觀塘鴻圖道 22/3/2026 18:00
今日經過觀塘搵食，食過呢間餐廳嘅午餐相當不錯，今日再來試晚餐。
燒大蝦三文魚籽龍蝦汁扁意粉 $158﹕賣相勁豪華，大大隻燒蝦上面舖滿三文魚籽，有驚喜。大蝦非常新鮮，肉質爽脆鮮甜，帶住陣陣惹味嘅炭烤香氣。最正係加埋面頭鋪滿嘅三文魚籽，一咬落去爆發出滿滿嘅海水咸鮮味。龍蝦汁極之濃郁，每一條扁意粉都掛滿晒鮮甜嘅味道，口感煙韌彈牙，整體黎講味道非常豐富。
卡邦尼溫泉蛋芝士長螺絲粉 $138﹕長螺絲粉嘅坑紋完美吸滿濃郁嘅芝士白汁，大啖食落去滿口都係奶香。將中間嗰隻溫泉蛋輕輕篤穿，等滑溜嘅流心蛋黃慢慢流出嚟，撈埋煙肉同芝士汁一齊食，口感變得更加幼滑細膩。煙肉粒脆脆地又夠鹹香。
燒烤醬雞肉薄餅 $178﹕薄餅底焗到極之金黃香脆，但中間依然保持到軟熟嘅麵粉香。上面塗滿極之惹味嘅特製燒烤醬，酸酸甜甜超級開胃。面頭鋪滿厚切嘅嫩滑雞肉粒同埋大量芝士，用料極之豐富。熱辣辣一塊拉起，芝士拉絲效果極佳，配料超惹味。
觀塘 7/2/2025 14:00
豐富午餐配一杯飲品，抵食。
香草蕃茄牛面肉焗芝士黃薑蕃茄飯$108: 每一啖都充滿芝士，仲有燉煮得極之入味嘅牛面肉，軟腍到不得了，膠質豐富，有大量香草同蕃茄，味道酸酸甜甜。黃薑嘅獨特香氣好突出，令到成個飯更加惹味。芝士、蕃茄、牛肉同香料，完美咁融合埋一齊。
香草蕃茄醬青口扁意粉 $118: 鮮紅色嘅蕃茄醬汁包裹住每一條扁意粉，醬汁上面舖滿一隻隻青口。醬汁味道非常濃郁，食得出係用新鮮蕃茄熬製而成，青口肉質飽滿肥美，食落鮮甜彈牙。扁意粉軟硬適中，充滿咬口。扁身嘅麵條可以掛汁。
意式辣肉腸薄餅 $128: 熱辣辣咁上枱，金黃色嘅餅底焗得好香脆，但中間依然保持到少少煙韌口感，充滿麵粉香，上面舖滿一片片圓形嘅意式辣肉腸，水牛芝士超拉絲，蕃茄醬嘅酸甜味好足。
觀塘 25/10/2025 14:00
無食一排原來轉左餐牌，多左唔同款式，而且價錢仲抵左，吸引。
菠蘿煙肉安格斯牛肉漢堡 $168: 食過幾次都不錯，今次encore。賣相靚仔，份量十足，麵包表面微微烤焦，夾著厚實多汁嘅安格斯牛肉餅，牛肉餅質感紮實，肉汁豐富，濃郁牛肉香氣，熟度岩岩好。一片烤得微焦嘅菠蘿片，自然甜味帶微酸同焦香，好清爽。煙肉煎到脆卜卜，仲有新鮮生菜、番茄，醬料酸酸甜甜，整體不錯。薯條一向都高水準，即炸又香脆，外脆內軟，咸味適中。
脆皮燒豬腩配蜜糖紅菜頭菠蘿沙律 $98: 擺盆賣相討好，豬腩整齊排好，仲有紅色嘅紅菜頭菠蘿沙律。燒豬腩外皮金黃酥脆，切面層次分明，脂肪分布均勻，入口時外皮酥脆，內裡鮮嫩多汁，脂肪部分經過烘烤後香而不膩，帶有濃郁燒烤香氣。菠蘿酸甜清新正好解油膩感，配搭不錯。
卡邦尼扁意粉 $88: 醬汁有濃郁奶香味，仲有好香芝士味，口感絲滑濃稠。加上超多咸香煙肉、洋蔥同蘑菇，味道超豐富。扁意粉煮得岩岩好，口感彈口，索晒濃稠嘅醬汁。整體而言，都係食過最好味嘅卡邦尼意粉。大愛!
觀塘 13/8/2025 14:00
觀塘工業大廈美食多，呢間餐廳環境不錯，舒適闊落，就同friend子來一個暑期最後一個Holiday Lunch。
午餐都幾抵食，有餐湯、主菜、飲品，仲可以追加小食同甜品。餐湯係洋蔥忌廉湯，口感順滑，有奶油濃稠感，粒粒洋蔥非常清甜，仲有類似蟹柳等材料、好味。
慢煮日本雞胸配自家製干邑燒烤醬 $138﹕三大件雞胸肉慢煮烹製，熟成度剛好，肉質非常柔軟，雞肉原汁原味。干邑燒烤醬味道微甜微酸，帶濃郁果香同酒香，為雞胸加上香氣。配上綿密嘅奶香薯蓉，好飽足。
煙三文魚闊條麵配波菜忌廉汁 $118﹕煙三文魚整成靚靚嘅玫瑰花，放上鮮綠嘅意粉上。煙燻三文魚片鹹香加上煙燻香。闊條麵完全吸附醬汁，醬汁係新鮮波菜加上濃郁嘅奶油混合成而成，啖啖芝味，超正！
焦糖瑪奇朵 $21﹕濃縮咖啡底層味道甘香，係個人鍾意嘅堅果味，加上全脂奶製成嘅奶泡，口感絲滑輕盈。用焦糖醬畫成線條，輕輕為咖啡加上甜度，甜苦味相當平衡，十分喜歡！
山政小山園槙之白宇治抹茶 $24﹕用上頂級宇治抹茶濃成，茶底濃郁甘香，帶甘味餘韻，上面加上鮮奶拉花令茶味柔和一點，高質！
棒棒鷄鎚配蜜糖芥末汁 $28﹕外皮炸得金黃酥脆，肉質仲柔嫩多汁，加上酸甜甜蜜糖芥末醬。
法式檸檬撻 $42﹕賣相小巧又精緻，檸檬餡清新檸檬香氣，酸味恰到好處，口感輕盈似奶油質地。撻皮脆卜卜，上面仲灑上少許開心果，有驚喜！
吉士焦糖梳乎厘 $78﹕視覺效果一流，兩大塊梳乎厘非常鬆軟，空氣感十足，蛋香味濃。淋上微甜吉士醬，頂層仲燒成焦糖脆皮，最鍾意烤得夠脆，仲帶一點甘苦味，伴碟嘅焦糖爆谷絕對加分。
常說甜品放第二個胃，今餐份量十足，主菜同甜品胃都滿滿，盡興而歸。
觀塘 10/5/2025 14:30
觀塘工廠大樓上面搵到一間勁多好評嘅Cafe，入座主場隔離間房，私隱度高，大大張梳化可以輕鬆chill吓，好似一個神秘嘅基地。
照燒鰻魚滑蛋漢堡 $118﹕賣相勁靚，勁澎湃，原條鰻魚做到漢堡有夠豪華。漢堡包脆卜卜，牛油味好香。全條鰻魚實淨有口感，照燒醬非常濃甜，有微微香烤嘅氣味，略嫌未夠嫩滑，同埋多左少少骨。至於滑蛋真係非常creamy，入口即溶，蛋汁豐富，吸收晒鰻魚汁嘅甜味，兩者實在太夾。配菜仲有新鮮脆卜卜嘅生菜同鮮甜嘅番茄，略加少少帶酸嘅沙律醬，正正為漢堡增添清爽感。整體味道不錯，啖啖滿足感。薯條新鮮即炸，口感綿密，絕對係食漢堡必備。
肉桂蘋果批配雪糕 $48﹕賣相非常吸引，一上枱已經聞到好香嘅肉桂味。外層嘅批皮比較濕潤，上面整體舖滿一片片蘋果，煮熟左嘅蘋果柔軟得黎仍保留輕微爽脆，每一啖都滲透住肉桂嘅濃香，味道微甜微酸。最後配上雲呢拿雪糕來一個冰火交融。雪糕滑溜香濃，奶香味突出，同蘋果批嘅味道完全夾。雪糕慢慢融化將兩者溝埋一齊食，幸福滿瀉！
雪糕窩夫 $42﹕啱啱出爐嗰種香味已經夠迷人，窩夫烤到外皮金黃脆卜卜，入口鬆化，內層柔軟，帶啖啖香濃牛油味，最鍾意佢甜度夠，非常不錯。加上雲呢拿雪糕加添一份奶香。淋上少少糖漿同朱古力醬又靚又好味。
亞芺佳朵 $29﹕半價可以加配飲品，廿幾蚊一杯又靚又勁高質嘅手工咖啡。大大杯雲尼拿雪糕伴意大利濃縮咖啡。將熱騰騰嘅咖啡淋入雪糕，雪糕慢慢融化，咖啡香味慢慢散到發出黎。本身咖啡濃郁香濃得黎帶點微苦，雲呢嗱雪糕嘅奶香平衡咗咖啡微微嘅苦澀味，咖啡慢慢變得柔和，最後就係鮮奶咖啡嘅口味，每啖都好滿足。
豐富嘅一餐，不過二百幾蚊，咸點甜點品質都相當高，又坐得舒服，超喜歡!
觀塘鴻圖道 23/3/2025 12:00
呢間餐廳坐得舒服，裝修用啲型格工業風。店員親切為小朋友送上畫紙同畫筆，大大加分。午餐餐牌款式多又好豐富，款款睇落都好吸引。
千島煙肉菠蘿和牛漢堡薯條 $168
賣相討好，見到材料一層一層疊起好吸引。麵包烤得脆脆，非常鬆軟。主角係和牛漢堡扒，外層微焦所以略帶一點苦味，嫩滑談不上，肉汁亦唔見得多，還好牛味算濃。反而香脆嘅煙肉帶煙燻香氣更為突出，加埋甜甜的烤菠蘿，帶微酸清爽，再淋上酸酸甜甜嘅千島醬，救番成件事。漢堡配上金黃香脆嘅薯條，外脆內軟，鹽分調味剛剛好，的確不錯。
卡邦尼扁意粉 $98
新鮮煮至剛剛好嘅扁意粉，質感煙韌彈牙，吸晒濃郁嘅卡邦尼醬汁。醬汁係滑順嘅忌廉，加上濃厚嘅芝士融合得剛好。材料有大量白蘑菇、煙肉等，非常豐富，最後再撒上帕瑪森芝士碎，芝士味更加濃郁。
意大利蘑菇煙肉薄餅 $118
一上枱就有啲失望，比上次黎食細左咁多。還好味道仲keep到。餅底厚薄得恰到好處，外層香脆微焦，咬落仲煙煙韌韌，而且舖滿芝士，脆卜卜又具香氣。餡料同醬料都俾得夠多，醬料番茄味濃，酸酸甜甜。上面鋪滿新鮮嘅蘑菇，菇味濃郁鮮甜，柔軟多汁。再配搭鹹香嘅煙肉，微微焦香咸香味濃，最緊要係一層厚厚嘅芝士，足夠拉絲。
