富苑金閣

by admin | 8 月 16, 2026 | Blog, 中菜, 小食, 港式, 甜品, 酒樓, 鑽石山, 點心

慈雲山 16/8/2026 11:00

今日午餐嚟到鑽石山富苑金閣飲茶，招牌點心水準不俗：鮮蝦餃賣相勁靚，晶凝通透，皮薄餡料足，蝦肉爽彈鮮甜，好食到要叫多一籠。蟹籽燒賣皇肉質扎實，材料豐富又多汁。醬汁蒸鳳爪炆得軟爛惹味；排骨啖啖肉，蒜香味道足；菜苗餃、潮州粉果，餡料豐富；春卷炸得金黃香脆；金錢肚爽口彈牙，微辣惹味。

每款點心定時出爐，熱辣辣上枱，用料實在且份量足，傳統老字號酒樓，點心師傅經驗十足，絕對係高性價比嘅飲茶之選。全單$500有找，飽到上天花板。

WM cafe

by admin | 7 月 30, 2026 | Blog, 甜品, 西餐, 鑽石山, 麵包

鑽石山 30/7/2026 14:00

澳洲烤羊架伴牛乾菌意大利飯 $168﹕羊架兩大件份量十足，羊架外層烤到微脆，熟成度剛剛好，肉質保持粉嫩多汁，羶香濃郁。牛乾菌意大利飯煮到軟硬適中，每一粒米都索晒牛乾菌獨特嘅菌香同濃郁嘅忌廉湯汁，菇香四溢，同羊架非常夾。

雙層美國安格斯牛肉漢堡 $138﹕絕對係肉食獸嘅邪惡之選！漢堡包烤到脆卜卜，夾住兩大塊厚身嘅美國安格斯牛肉漢堡扒。漢堡扒煎到外微脆，中間肉汁大爆發，濃郁嘅牛肉香氣滿瀉。中間夾左芝士同新鮮沙律菜、番茄等，岩岩好中和油膩感。薯條新鮮炸起，金黃香脆，中間軟熟，成個組合份量十足，食完超級滿足！

藍莓芝士蛋糕 $48﹕餅底用咗牛油曲奇碎壓成，香脆可口。蛋糕質感極之綿密幼滑，入口即溶，有濃郁嘅芝士香氣，奶香十足。面頭鋪滿咗酸甜開胃嘅藍莓醬，仲有粒粒飽滿嘅新鮮藍莓，加一點水果嘅天然酸味，整體甜度啱啱好。

全單$354，單價小貴，簡單試幾樣。

富苑金閣

by admin | 5 月 17, 2026 | Blog, 港式, 鑽石山, 點心

慈雲山 17/5/2026 11:00

鑽石山富苑金閣最吸引嘅地方，保留到傳統老牌酒樓裝修，仲係大排檔自取點心，非常有懷舊風味，仲有幾十年經驗嘅老師傅主理。

點心出品超新鮮，上枱時熱辣辣，賣相不錯。燒賣大大粒，入口彈牙，仲有大大隻鮮蝦。小朋友最鍾意鵪鶉蛋燒賣。蝦餃外皮透薄，蝦肉爽口鮮甜，啖啖蝦肉。菜苗餃，加上蔬菜，更加香甜。鮮竹卷腐皮吸滿醬汁，內餡豐富入味。

排骨肉質嫩滑，帶點蒜香同豆豉香，簡單但好食；鳳爪夠腍，醬香濃郁。仲有出邊少見嘅雞球大包，包皮鬆軟，餡料夠多。糯米雞糯米夠黏糯，入面餡料亦夠味。

叉燒酥外層酥皮鬆化，叉燒甜鹹平衡。雪山脆皮麻糬芝麻包算係新式包點，非常驚喜，外層脆脆，入面有麻糬煙韌，加上芝麻餡香濃流心，口感層次豐富。

點心選擇非常多，飽到上天花板。

WM Cafe & Bar

by admin | 8 月 5, 2025 | Blog, 小食, 西餐, 鑽石山

鑽石山 5/8/2025 14:00

黑雨之下賺一日休息，荷里活廣場搵食，木質裝修幾靚，中間仲有一棵大樹，幾舒服可以慢慢HEA。

柚子海鹽烤西班牙伊比利豬鞍 $208﹕賣相靚，西班牙伊比利豬鞍份量十足。豬鞍燒得外皮金黃，外層刷上一層薄薄嘅柚子蜂蜜，陣陣香甜。豬鞍外皮微微焦香酥脆，煮得剛好熟成，中間肉質肉色粉嫩均勻，啖啖肉汁。肥瘦適中，少量脂肪所以口感非常嫰滑。只係簡單用鹽調味，突顯豬肉本身嘅香甜，原汁原味。仲有大量薯蓉，綿密香滑，加幾粒甜甜嘅粟米，非常飽足。

意式海鮮薄餅 $138﹕賣相有驚喜，材料超豐富，每一片披薩鋪滿新鮮嘅海鮮料。餅皮烤得微焦，薄薄地口感酥脆，有啲係餅乾口感，夠晒香口。薄餅用料可謂誠意十足，有飽滿多汁嘅蝦仁、鮮甜蜆仔肉、Q彈嘅魷魚片，大量超甜粟米。薄餅基底搭配係番茄醬，酸中帶甜，而且芝士份量俾得足，足夠做到拉絲效果。薄餅烤至微焦，仲有煙燻嘅味道，相當不錯。

脆炸洋蔥圈 $58﹕簡單嘅小食但擺盆不失精緻，份量超多，足夠同朋友仔Happy Share。金黃色外皮超酥脆，中間係甜甜嘅洋蔥。洋蔥圈炸得火候恰到好處，洋蔥仲保留著清甜鮮嫩，仲有洋蔥原汁原味，又唔會太過油膩。最好就係沾上酸酸甜甜嘅番茄醬。