麥當勞KITKAT香芋味黑白芭菲
馬鞍山 9/4/2026 13:00
KITKAT香芋味黑白芭菲 $14
麥當勞新推，賣相幾靚。表面灑滿黑糖珍珠同白玉糯米糍，黑糖珍珠帶有淡淡焦香，白玉糯米糍軟糯有嚼勁，配上酥脆嘅威化餅乾，口感豐富。底層嘅香芋雪糕綿密細滑，甜度適中。
營豐海南雞專門店
馬鞍山 4/4/2026 18:00
招牌脫骨海南雞飯 $35﹕油亮嘅雞皮非常吸睛，雞肉完全起晒骨，食落極之方便，肉質超級嫩滑多汁，完全無嚡口嘅感覺。最出色嘅配搭嘅油飯，粒粒分明，吸滿咗雞油同香料嘅精華，香氣四溢。點埋佢哋秘製嘅薑蓉同甜豉油，非常惹味。
香茅煎豬扒飯 $28﹕豬扒大大塊，煎得金黃香脆，唔會覺得乾柴。香茅味道突出，醃得非常入味。
霸王麻香口水雞飯 $36﹕重口味挑戰霸王麻香口水雞飯，雞肉保持住極致嘅滑溜口感，上面層紅通通嘅秘製辣汁，充滿花椒同麻香，非常刺激。
椒鹽豬柳 $17﹕椒鹽豬柳炸得極之酥香，外層沾滿惹味嘅椒鹽，入面豬柳肉質鬆軟，鹹香十足。
泰式豬腳 $15﹕泰式豬腳炆得軟糯，充滿住濃郁嘅膠質同酸辣味，肉質都幾豐富，入味。
扣埋平台折扣，埋單$110，抵食！
KFC
馬鞍山 3/4/2026 08:00
KFC今期新出「肯！鬆甜包」雞肉蛋鬆甜包餐 $28，配薯餅、蜜糖綠茶。
鬆甜包類似Pancake質感，鬆軟綿密，本身有淡淡嘅蛋香蜜味，質地軟濕潤。餡料係一片雞肉漢堡扒，肉汁都幾豐富，口感鬆軟。夾埋一塊厚身嘅滑溜煎蛋，充滿濃郁蛋香。鬆甜包嘅微甜同雞肉嘅鹹香組合，味道都幾豐富。本身跟蜜糖綠茶夠清甜，加$6有埋薯餅或蜜糖鬆餅，一份早餐都好飽足。
西樹泡芺
馬鞍山 2/4/2026 17:00
每月二號買二送一，今期係「熱情果白桃」配「美祿忌廉」$64﹕泡芙金黃酥脆，仲保持到香脆口感。「熱情果白桃」入面爆滿嘅餡料湧晒出嚟。熱情果嘅微酸同白桃嘅清甜交融，忌廉打得綿滑細緻。有濃郁嘅天然果香，味道幾清爽。白桃大大件都幾清甜。「美祿忌廉」有滿滿嘅麥芽朱古力香氣，超級濃郁，甜度控制得啱啱好。
牛奶冰室
馬鞍山 22/2/2026 18:00
星州炒貴刁 $58﹕貴刁條條分明，面頭沾滿濃郁惹味嘅咖喱香氣，帶住少少微辛，超級開胃。配料方面極之足料，有鮮甜嘅蝦仁、香口嘅叉燒絲同埋爽脆嘅芽菜，口感層次極之豐富。
乾炒豬扒炒即食伊麵 $53: 公仔麵炒得啱啱好，保持到彈牙嘅口感，完全唔會糊口。豬扒外層煎到微脆，肉質依然軟腍多汁，醃得極之入味，鹹香惹味。
一口雞蔥油撈麵 $58: 雞扒煎到外皮金黃香脆，肉質嫩滑豐厚，大量蔥油醬，味道勁香，公仔麵完美吸滿晒蔥油精華。
搵食工房
馬鞍山 22/2/2026 12:00
搵食工房，馬鞍山小店，無論係份量定係味道都交足功課，超級滿足！
風沙蒙古炸牛肩扒薯菜 $62﹕賣相極之有霸氣，牛肩扒肉質保持得極之軟腍多汁，滿滿牛脂香氣，加上蒙古香料完美融，微辛嘅風沙調味，味道極之豐富。配埋焗薯，味道香甜，加上沙律醬超好味。
日式咖哩吉列豬扒溫泉蛋大碗飯 $56﹕吉列豬扒炸得極之金黃鬆脆，肉質厚實又juicy，咖哩汁香料味勁濃，辣度岩岩好，撈飯超正。撈埋溫泉蛋味道柔和又另一番風味。
焗周打蜆汁小元貝魚柳意粉 $60﹕舖滿芝士賣相吸引，醬汁係濃郁嘅周打蜆汁，完美掛滿每條意粉，面頭鋪滿彈牙嘅小元貝同煎到微脆嘅魚柳，熱辣辣，相當不錯。
