by admin | 9 月 12, 2026 | Blog, 上海菜, 小食, 甜品, 馬鞍山
馬鞍山 12/9/2026 13:00
今日收工去咗馬鞍山新港城中心大街嘅三叔廚房食晏。三叔肉絲雙麵黃，脆軟雙重口感好有層次，芡汁調配得好勻循，生煎包底脆皮軟，咬開肉汁鮮甜滿溢，水準好穩定。最後叫多一份豆沙鍋餅，香脆綿密，甜味唔太甜。價錢貼地，而且份量好足。
三叔肉絲雙麵黃 $88﹕份量勁大，兩個人分都絕對夠食，成碟麵堆到好似座金黃色嘅小山丘咁，炸麵條炸得好均勻。面頭淋滿晶瑩剔透嘅肉絲芡汁，肉絲、冬菇、芽菜等，都好足料。上面吸咗芡汁嘅麵條變得軟腍入味，底層依然保持酥脆，一啖咬落去有齊脆同軟兩種口感。
三叔生煎包 4隻 $40﹕四粒白雪雪嘅生煎包排得整整齊齊，頂頭撒咗滿滿嘅黑芝麻同翠綠蔥花點綴。翻開底部煎到底層呈現好均勻嘅焦金黃色，油光透亮好誘人。包皮頂部食落鬆軟棉密，底部就煎得好似餅乾咁香脆。一咬開肉汁即刻喺口入面爆發，豬肉濃郁鮮甜，油脂香氣同蔥香平衡，可惜唔算太熱，打了折扣。
豆沙鍋餅 $38﹕切好一件件嘅鍋餅整齊排好，餅皮煎到金黃微焦，表面鋪滿密密麻麻嘅白芝麻。中間夾住厚厚嘅紅豆沙餡，外層餅皮薄脆香酥，入面包住嘅豆沙餡就綿密幼滑，甜味自然，甜度控制岩岩好。
老闆娘送飲品，熱豆漿味道幾清甜，豆味香，不錯。
by admin | 8 月 30, 2026 | Blog, 港式, 甜品, 西餐, 馬鞍山
馬鞍山 30/8/2026 17:00
「阿月渾子」列日窩夫 $88﹕呢款開心果窩夫賣相極吸睛，窩夫即叫即烘，外層金黃酥脆，內裏綿密鬆軟且蛋香四溢。面頭淋上濃郁細滑嘅特調開心果醬，再灑上滿滿嘅香脆開心果碎粒，堅果風味醇厚得嚟唔會過於甜膩。配埋冰凍香滑嘅草莓雪糕一齊食，一冷一熱，奶油清爽空氣感十足，味道不錯。
玉桂蘋果金寶 $68﹕呢道經典嘅玉桂蘋果金寶充滿溫暖嘅烘焙香氣。蘋果粒切得大細適中，用玉桂粉同焦糖慢火煨煮至軟糯入味，散發出肉桂獨特嘅香氣。頂層鋪滿烤得金黃酥脆嘅金寶碎屑，咬落香脆有牛油香，甜酸平衡得剛剛好。上面仲有一球香滑嘅牛奶雪糕，賣相非常精緻，份量略嫌細小，唔夠喉。
黑糖金時。白玉 $68﹕賣相極具和風美感。底層係圓潤雪白嘅手作白玉小丸子，口感極之煙韌軟糯、嚼勁十足，熱辣辣，加上香甜甘醇嘅黑糖汁，同埋黃豆粉，味道不錯。紅豆大大粒，綿密起沙，顆粒分明，食得出係靚野。面頭灑上玉米片，加一點脆口，配合不錯。
薑湯紫薯。雙圓 $48﹕呢碗中式糖水暖胃又養生。薑湯底色澤清亮，辛辣感溫和順喉。入面加入咗軟糯香甜嘅紫薯塊同黃番薯，口感綿密；雙圓（芋圓與地瓜圓）煮得晶瑩剔透、彈牙煙韌。成碗糖水材料豐富、甜度適中，飲落成個人都暖笠笠。
食足四個甜品，全單$272。環境不錯，味道不錯，單價略貴，份量太精緻，難怪人流咁少。可惜。
by admin | 6 月 19, 2026 | 小食, 港式, 甜品, 茶餐廳, 馬鞍山
馬鞍山 19/6/2026 17:00
牛奶冰室下午茶真係抵到一個點。
豬扒炒公仔麵 $51﹕鑊氣十足，一上枱已經香氣撲鼻。公仔麵炒到條條分明兼夠乾身，索晒醬油同蔥香，口感煙韌彈牙。豬扒厚切大件，經過醃製後煎到外皮微脆，肉質依然保持嫩滑多汁。啖啖麵配埋啖啖肉，惹味又飽肚。
星州炒貴刁 $50﹕充滿南洋風味嘅炒貴刁鑊氣十足，非常香口惹味。河粉炒到邊位微微燶香，煙韌彈牙，調味香帶輕微咖哩辣度。配料豐富，火腿、鮮蝦、雞蛋、韭菜同芽菜等。
焗鮮茄豬扒飯 $43﹕份量一啲都唔輕量，熱辣辣，面頭厚厚嘅芝士焗到金黃微焦，拉絲效果理想。底層係酸甜開胃嘅新鮮番茄汁撈飯，配埋外脆內嫩嘅厚切焗豬扒。茄汁嘅天然果酸中和咗芝士同豬扒嘅膩感，開胃又滿足。
冰火菠蘿油 $12﹕外層嘅菠蘿包皮焗到金黃酥脆，面頭嘅格子香甜鬆化，加熱後暖笠笠。夾住一厚片冰凍牛油，利用包身餘溫慢慢融化喺熱辣辣嘅包心入面。一口咬落去，冰火交融嘅口感加上濃郁牛油香。
經典西多士 $20﹕厚切方包沾滿蛋漿後炸到外脆內軟，切開入面有香濃嘅花生醬夾心。面頭放上一大塊牛油，再淋上滿滿金黃糖漿，甜絲絲同鹹香完美結合。
by admin | 5 月 31, 2026 | Blog, 中菜, 酒店, 酒樓, 馬鞍山
馬鞍山 31/5/2026 18:00
今日試中菜，揀左幾款招牌菜。
晚市孖寶$338。金銀蒜粉絲蒸聖子皇﹕陣陣蒜香蒸，聖子皇飽滿，肉質鮮嫩彈牙，味道都幾鮮甜，粉絲索汁夠惹味。
岩石火焰黑豚燒皇﹕上枱有火焰效果，黑豚肉本身油脂分佈均勻，帶微微焦香，滿滿肉汁，肉質爽滑，醬汁鹹甜味不錯。
豉油皇龍鬚炒麵 $128﹕炒麵幼細，口感爽彈，炒得夠鑊氣。豉油皇醬香濃郁，仲有魷魚鬚、芽菜等唔少配料。
椒鹽包仔豆腐 $78﹕包仔豆腐炸得外酥內嫩嘅，外層金黃酥脆，中間都幾軟嫩，豆香香，加上椒鹽，帶微微香辣，幾惹味。
晚市送甜品，芝麻糊味道微甜，芝麻幾香。紫米椰汁糕，紫米幾軟糯，椰汁味幾香，配合得不錯。
味道雖不錯。晚市茶錢$20/位，仲有一碟花生$20，連加一都要$688，唔平。
by admin | 5 月 31, 2026 | 外賣, 小食, 港式, 甜品, 馬鞍山
馬鞍山 31/5/2026 16:00
Chill Sweet
麻糬芋圓桃膠椰汁西米露 $39﹕自選三款配料真係足料又豐富，麻糬煙韌軟糯，奶香味濃，芋圓Ｑ彈有嚼勁口感極佳，桃膠滋補養顏。底層係香滑濃郁，充滿椰香嘅椰汁西米露，冰涼清甜。
三寶皇
自家手工製魚肉燒賣 $19﹕經典魚肉燒賣大大粒有七粒，係恆安街市嘅名物，絕對係掃街必食！新鮮熱辣辣，燒賣口感彈牙扎實，充滿濃郁嘅魚肉鮮香，比一般足料，食落煙韌有咬口，點少少甜醬同辣油一齊食，惹味又充滿港式地道風味。
煎釀三寶 $26﹕任選六大件，香氣十足。茄子加魚肉夠香口。魚肉外皮金黃香口，口感厚實，魚味香濃。加上紅腸就更加惹味。淋上少少甜豉油已好好味。
魚肉碗仔翅 $28﹕呢碗傳統嘅魚肉碗仔翅真係暖好足料。茨汁濃度啱啱好，口感順滑濃稠。入面配料十足，有彈牙嘅魚肉、木耳絲同蛋花，啖啖都好豐富。落少少麻油、鎮江醋同白胡椒粉撈勻，酸香惹味，充滿懷舊嘅香港情懷！
by admin | 5 月 23, 2026 | 外賣, 港式, 茶餐廳, 馬鞍山
馬鞍山 23/5/2026 09:00
早餐$40﹕滑溜炒蛋份量十足，奶香濃郁且口感極之軟滑；配埋烘到金黃香脆嘅厚多士，外脆內軟。經典嘅沙嗲牛肉公仔麵惹味非常，濃郁嘅沙嗲醬掛滿每一條彈牙麵條，牛肉軟腍入味，味道算可以。最後再來一杯香濃順滑嘅熱好立克，暖笠笠又甜而不膩。
