by admin | 8 月 9, 2026 | 2026廣州生日之旅, 中菜, 外賣, 小食, 廣州, 甜品, 西北菜
秦哥哥長安風味
廣州東方寶泰 9/8/2026 19:30
因人廣州塔實在太多人，所以轉場番東方寶泰搵食。
招牌單人餐 36.8元﹕有齊肉夾饃、長安手工涼皮、西安冰峰，抵食。肉夾饃熱辣辣，外皮烘得金黃酥脆，極之鬆脆。入面塞滿咗吸飽滷汁嘅臘汁肉，肥瘦相間且炆得軟爛入味。肉汁滲透成個饃餅，鹹香四溢且油而不膩。手工涼皮質地晶瑩剔透，食落滑溜爽口又帶有彈性。面頭淋上濃稠醇香嘅麻醬，配埋爽脆嘅黃瓜絲同索汁嘅麵筋，拌勻之後每一啖都裹滿濃郁嘅芝麻香氣。西安經典嘅冰峰汽水係橙味汽水，氣泡感十足，入口清甜爽快，解油膩又解渴。
糖醋里脊 29.8元﹕糖醋里脊炸得金黃誘人，外層薄脆，入面嘅里脊肉質鮮嫩多汁。均勻包裹住酸甜濃郁嘅糖醋醬汁，酸中帶甜極之惹味，鑊氣十足，無論大人定細路都食唔停口。
黑松露雞樅菌拌麵 23.8元﹕呢碗拌麵香氣極度濃郁。將黑松露特有嘅幽香同鮮甜爽口嘅雞樅菌完美結合，麵條質地煙韌彈牙，撈勻之後每條麵都沾滿菌香醬汁，充滿野菌風味。
滷蛋滷得相當入味，蛋白表面呈現深褐色，口感彈牙扎實。入面嘅蛋黃綿密濕潤，滲透出陣陣醇厚嘅香料與醬油香氣。
打卡送厚奶手工酸奶或芒果布甸。厚奶手工酸奶質地濃稠，面層帶有一層香濃凝結嘅奶皮子。入口綿密幼滑，奶香濃郁純正，酸甜平衡得剛剛好，天然清爽。芒果布甸質地滑溜細膩，充滿濃郁嘅芒果果香同香甜奶香。
nini Sunday
東方寶泰 9/8/2026 20:30
可愛嘅鯛魚做飯後甜品，點評優惠24.4元代30元，買左兩款試下。
迷你鯛魚燒（朱古力、草莓、藍莓）﹕迷你鯛魚燒賣相精緻小巧，一客有齊三款人氣口味。魚形外皮烘得外脆內軟，充滿香濃嘅蛋奶香氣。朱古力味內餡濃郁幼滑，帶出甘甜滋味；草莓同藍莓味則果香四溢，酸甜果蓉中和咗餅皮嘅甜度，入口清爽不膩。一啖一粒，口感層次豐富。
紅豆麻糬鯛魚燒﹕經典紅豆麻糬鯛魚燒口感極具層次。熱辣辣嘅外皮金黃酥脆，咬落去即刻食到軟糯煙韌嘅麻糬，拉絲效果十足。入面包裹住厚實綿密嘅紅豆餡，紅豆粒煮得軟爛甘甜、甜度適中。外脆、內軟、軟糯三重口感，充滿飽足感。
打卡仲送可愛嘅扣針，超Cute。
深夜豆漿。薄皮蒸餃。小吃。腸粉。炒粉
美團外賣 9/8/2026 21:00
全家福薄皮蒸餃 19.6元﹕呢份全家福薄皮蒸餃有12隻，一次過試齊六個口味。蟹子蝦、芝士玉米、南瓜、紫菜馬蹄、香芋、冬菇，各有特色，味道突出。餃子皮擀得晶瑩剔透又薄滑，蒸出嚟隱約見到入面飽滿嘅餡料，入口軟糯帶點彈性。入面嘅肉餡鮮嫩多汁，沾少少香醋或辣椒醬食更加提味。
潮汕香蔥脆筍豬肉圓 11.2元﹕呢款炸潮汕香蔥脆筍豬肉圓炸到金黃香脆，外層帶有酥香感。咬落去豬肉餡扎實彈牙兼肉汁豐富，入面嘅脆筍粒增添咗清爽嘅咬口，配埋濃郁嘅蔥香，鹹香惹味且油香四溢，真係一款極具風味嘅地道潮汕小食。
潮汕炸墨魚丸 10元﹕呢份炸墨魚丸炸到金黃誘人，香氣撲鼻。咬落去口感極之爽口彈牙，食得出墨魚肉嘅鮮甜同扎實質感，完全冇粉感。外皮微脆香口，內裏鮮美多汁。
冰豆漿 5元﹕入口順滑細膩，香濃嘅大豆豆香，甜度調配得啱啱好。
埋單54元，超抵食。
by admin | 8 月 9, 2026 | 2026廣州生日之旅, 廣州, 港式, 甜品
9/8/2026 15:30
離開地鐵博物館，行步去搭廣州的最美七公里。由萬勝圍站去廣州塔站全程車費每位2元，車程20分鐘左右。列車細細架，座位唔多，人太多，所以體驗麻麻。沿途緊貼著珠江水岸與綠化帶，窗外嘅風景係OK既。
鎏耕糖
廣州塔廣場 9/8/2026 16:30
入到廣州塔廣場，人流非常多，幸好搵到間甜品店可以稍坐。點評買券63元兩個，價錢唔平。
抹茶芝士哈蜜瓜冰﹕碗底鋪滿清甜多汁嘅新鮮哈密瓜肉，果香四溢；上面覆蓋住濃郁幼滑嘅抹茶忌廉與鹹香醇厚嘅芝士奶蓋，抹茶嘅微苦回甘同芝士嘅濃郁奶香完美交融，完美中和咗甜度。冰底刨得極之細膩綿密，入口即化。
芝士巧克力牛奶冰﹕芝士巧克力牛奶冰絕對係朱古力控嘅極致享受。濃郁嘅朱古力醬緊緊包裹住如雪花般細緻嘅牛奶冰底，入口即溶且充滿香濃嘅可可苦甜。面頭淋上厚厚一層鹹香順滑嘅芝士奶蓋，微微嘅鹹味將朱古力嘅甜膩感徹底化解，令整體風味更加醇厚，係邪惡感與滿足感爆棚嘅消暑甜品。
廣州塔廣場門外有個打卡位，影出黎嘅畫面幾特別。
商場都幾大，周圍行下都行到七點。原來晚上有人流管制，封晒廣場周邊嘅地鐵出入口，跟住人流行到去戶外，再轉番入地鐵站，人頭湧湧。
by admin | 8 月 9, 2026 | 2026廣州生日之旅, 小食, 廣州, 甜品, 西餐
廣州琶洲保利廣場 9/8/2026 12:00
第一站去到萬盛廣場，發現個商場非常之老舊，而且冇乜餐廳選擇。於是決定落返地鐵站轉去另一個保利廣場，呢個商場大好多，仲有一間環境非常之靚嘅西餐廳。兩層樓環境悠閒舒適，周圍花草樹木好似身處森林之內。仲有生日擺設。
雙人餐 182元非常豐富。味道相當不錯。
炙烤大蝦沙律用料相當新鮮。大蝦經過炙烤後帶有淡淡焦香，蝦肉爽口彈牙，鮮味十足。配搭新鮮脆嫩嘅農場生菜同菌類，口感清新爽脆。
炭烤穀飼肉眼牛扒﹕火候掌握得極之出色。外層烤出漂亮嘅菱形焦痕同炭火香氣，切開肉質粉嫩多汁。穀飼牛眼嘅油花分佈均勻，入口牛味濃郁醇厚，肉質軟嫩中帶有豐富肉汁。沾少少海鹽或黑椒汁一齊食，更能突顯牛肉本身嘅天然鮮美，肉香四溢令人非常滿足。
農場迷你小漢堡﹕呢款迷你小漢堡造型精緻小巧，漢堡包外脆內軟，夾住香脆魚柳，肉質鮮嫩。配埋融化嘅芝士、爽脆生菜同酸甜醬汁，一啖咬落去肉汁與芝士香氣瞬間爆發。
農場肉食者披薩﹕餅底烘得外脆內韌、帶有麥香，面頭毫不手軟咁鋪滿煙肉、香腸同牛肉粒等多款肉類配料。厚厚嘅水牛芝士烤到金黃拉絲，配搭酸甜濃郁嘅番茄底醬，每一啖都食到滿滿嘅肉香與濃郁芝士，香濃惹味且飽足感十足。
跟餐仲有兩杯凍蜂蜜柚子茶，清涼透心，滿滿嘅柚子果肉同果皮碎，攪勻之後飲落酸甜適中，冰爽解渴。
菠蘿椰椰慕斯蛋糕﹕呢款甜品充滿濃郁嘅熱帶風情。慕斯質地細膩幼滑、入口即溶，散發住清幽香濃嘅椰奶香味。夾層融入咗酸甜多汁嘅菠蘿果肉與果醬，天然果酸完美平衡咗椰奶嘅甜度。整體食落清新冰涼、甜而不膩。兩個帳戶打卡送兩件，生日免費送多一件，開心。
脆煎嫰感海味 快閃搶1元﹕魚柳份量勁大，表面煎到金黃微脆，咬落去「咔嚓」一聲帶有薄脆口感，但內裏依然保持住極致嘅嫩滑多汁。肉質細膩彈牙，味道鮮甜，醬汁帶微辣好味。
茶月山
黑糖清心丸單叢奶茶16.8﹕茶底選用咗潮汕特色嘅鴨屎香單叢烏龍茶，入口茶香高揚清幽，帶有獨特嘅蘭花香氣與清冽茶韻；配搭濃醇鮮奶，奶香順滑而完全唔會掩蓋茶底嘅回甘。底層加入煮得晶瑩剔透嘅潮汕清心丸，口感軟糯彈牙、爽滑有嚼勁，配埋黑糖嘅焦香甘甜。
by admin | 8 月 9, 2026 | 2026廣州生日之旅, 外賣, 廣州, 甜品, 麵包
9/8/2026
09:00 到達羅湖，先去廣深城際列車電子售票機買電子票，最後成功買到C7026班次，09:35開。一等座只需90元，兒童仲半價45元，六歲以下免票，但係電子系統加唔到，惟有排番人工口查詢。應該係系統問題，連櫃台都加唔到，職員指示反正免票，直接帶小朋友入閘就可以。
買完票落樓下買個快早餐。安檢嚴格，但流程都好快，9:25已經入到閘內候車區。準點開車，由於呢班有中途站，所以人流名顯較多，霸唔到多一個位，如果有得揀，一小時直達快車更佳。
華北川
麻薯布丁 19.8元/2個，份量唔算大，麻薯濕潤煙韌，布甸奶香味勁濃，口感奶滑，入口即溶。
另一款提拉米蘇，係打卡寫評免費送，一件都二十幾蚊，真係非常抵寫。份量大，面層均勻撒滿微苦嘅可可粉，中和咗馬斯卡彭芝士嘅香濃奶香。蛋糕有咖啡味，朱古力味，餅底仲有朱古力脆脆，層次極之豐富。
11:00 未夠就順利到達廣州東，先去全季酒店放低行李，可以使用自助寄存行李櫃，非常方便。
第一站係萬勝圍，地鐵11號線到琶洲，轉8號線繼續。兩線車站隔得非常遠，出閘後要戶外行一段路再安檢入閘。車程大半個鐘，大約十二點到達萬勝圍。
by admin | 8 月 12, 2025 | 2025廣州生日之旅, 廣州, 自助餐放題, 酒店
12/8/2025
美團先訂一晚酒店，到場後職員再幫我哋查一查房價，都係美團平台較為優惠。商務雙床間每晚房價385元-458元。因為生日時間入住，職員幫我哋免費升等去家庭房，房間非常闊落，裝修有格調。兩張雙人床，旁邊仲有用餐區，有張四人枱可以舒適地食宵夜。小朋友入住都有兒童拖鞋及牙刷等。房間衛生情況相當不錯，提供嘅備品都好足夠。基本上支裝飲用水係無限任拎。宵夜由送餐機械人送上，相當方便。最大嘅賣點就係廣州東站火車站一條馬路之隔，頂級方便。
早餐
住客優惠價99元有四張早餐券。第一日落去嘅時候冇人收票，所以變相第二天食多餐。
餐廳自助形式，選擇唔算特別多，都係啲包點，少量熱盤，仲有粗糧，味道不過不失，不過飲品熱鮮奶同即磨咖啡就相當唔錯。
by admin | 8 月 12, 2025 | 2025廣州生日之旅, 外賣, 廣州, 甜品, 麵包
12/8/2025 16:30
離開正佳廣場去地鐵站中間就見到呢間甜甜圈好吸引，優惠是買三送一。每件甜甜圈打包都好精緻，獨立包裝，又靚又方便。甜甜圈本身都鬆軟有彈性，面層有唔同款式嘅配料同裝飾，賣相討好。
東京抹茶 16元﹕底層係香濃嘅脆皮朱古力，加上深綠色嘅抹茶粉，抹茶微苦同朱古力嘅濃郁好夾。
士多啤梨馬卡龍 16元﹕呢款甜甜圈賣相實在高級，粉粉嘅士多啤梨脆皮，上面點綴著一粒迷你馬卡龍，顏值爆表。士多啤梨味道酸甜，馬卡龍外殼酥脆，內餡濕潤，為整體增添了法式甜點嘅精緻感。
繽紛草莓 16元﹕士多啤梨脆皮之上再添上粒粒士多啤梨碎碎，滿滿果香氣息，味道更加立體。
Labubu 16元﹕係朱古力冬甩上面撒上七彩朱古力碎粒，再加上而家時興Labubu朱古力，深得小朋友歡心。
麥安妍麵包
就係一出地鐵閘口東方寶泰廣場，位置超級方便。試食後買兩款回港做手信。
黑金開心果馬里奧 32元﹕大大件，幾新鮮。合桃與開心果嘅組合，無論口感定味道都唔錯，麵包本身都幾鬆軟，外皮口感酥脆。中間有一層濃厚嘅開心果醬，堅果油脂香又有奶香，鹹甜交融。
紅豆鬆鬆吐司 32元﹕紅豆同肉鬆嘅組合相當特別，吐司質地非常鬆軟，帶微微奶香，烤得恰到好處，邊緣微脆，內部柔軟。切開中間係滿滿紅豆餡，吐司表面就超多肉鬆，甜度適中，鹹中帶甜，層次感十足。
17:00
買齊麵包甜品手信就返酒店拎行李，5:30pm到廣州東站入閘，準備搭6:00pm嘅一小時特快車返深圳。還好人唔多，而且夠手快，繼續釣到四人面對面嘅卡位，中間有張枱可以開餐食甜品。返到深圳，再經羅湖返屋企，結束三日兩夜之旅。
