12/8/2025
美團先訂一晚酒店，到場後職員再幫我哋查一查房價，都係美團平台較為優惠。商務雙床間每晚房價385元-458元。因為生日時間入住，職員幫我哋免費升等去家庭房，房間非常闊落，裝修有格調。兩張雙人床，旁邊仲有用餐區，有張四人枱可以舒適地食宵夜。小朋友入住都有兒童拖鞋及牙刷等。房間衛生情況相當不錯，提供嘅備品都好足夠。基本上支裝飲用水係無限任拎。宵夜由送餐機械人送上，相當方便。最大嘅賣點就係廣州東站火車站一條馬路之隔，頂級方便。
早餐
住客優惠價99元有四張早餐券。第一日落去嘅時候冇人收票，所以變相第二天食多餐。
餐廳自助形式，選擇唔算特別多，都係啲包點，少量熱盤，仲有粗糧，味道不過不失，不過飲品熱鮮奶同即磨咖啡就相當唔錯。
12/8/2025 16:30
離開正佳廣場去地鐵站中間就見到呢間甜甜圈好吸引，優惠是買三送一。每件甜甜圈打包都好精緻，獨立包裝，又靚又方便。甜甜圈本身都鬆軟有彈性，面層有唔同款式嘅配料同裝飾，賣相討好。
東京抹茶 16元﹕底層係香濃嘅脆皮朱古力，加上深綠色嘅抹茶粉，抹茶微苦同朱古力嘅濃郁好夾。
士多啤梨馬卡龍 16元﹕呢款甜甜圈賣相實在高級，粉粉嘅士多啤梨脆皮，上面點綴著一粒迷你馬卡龍，顏值爆表。士多啤梨味道酸甜，馬卡龍外殼酥脆，內餡濕潤，為整體增添了法式甜點嘅精緻感。
繽紛草莓 16元﹕士多啤梨脆皮之上再添上粒粒士多啤梨碎碎，滿滿果香氣息，味道更加立體。
Labubu 16元﹕係朱古力冬甩上面撒上七彩朱古力碎粒，再加上而家時興Labubu朱古力，深得小朋友歡心。
麥安妍麵包
就係一出地鐵閘口東方寶泰廣場，位置超級方便。試食後買兩款回港做手信。
黑金開心果馬里奧 32元﹕大大件，幾新鮮。合桃與開心果嘅組合，無論口感定味道都唔錯，麵包本身都幾鬆軟，外皮口感酥脆。中間有一層濃厚嘅開心果醬，堅果油脂香又有奶香，鹹甜交融。
紅豆鬆鬆吐司 32元﹕紅豆同肉鬆嘅組合相當特別，吐司質地非常鬆軟，帶微微奶香，烤得恰到好處，邊緣微脆，內部柔軟。切開中間係滿滿紅豆餡，吐司表面就超多肉鬆，甜度適中，鹹中帶甜，層次感十足。
17:00
買齊麵包甜品手信就返酒店拎行李，5:30pm到廣州東站入閘，準備搭6:00pm嘅一小時特快車返深圳。還好人唔多，而且夠手快，繼續釣到四人面對面嘅卡位，中間有張枱可以開餐食甜品。返到深圳，再經羅湖返屋企，結束三日兩夜之旅。
龔印記牛骨牛雜屋 12/8/2025 14:00
雙人餐 162 元
廣州必吃熱騰騰嘅牛腩牛雜煲，香氣撲鼻，湯底係老廣風味，煲內滿滿嘅牛腩、牛雜、牛筋、蘿蔔和湯底，色澤誘人，濃郁的牛骨香氣撲面而來。牛腩燉得非常軟嫩，入口即化。牛雜處理非常乾淨，無一絲腥味。牛肚爽脆、牛筋腍滑，吸滿了湯汁。仲有麵筋索晒湯汁超級正。到火鍋部份可以自行加入公仔麵及為蔬菜。
牛骨湯非常香濃牛味，口感順滑，而且冇味精。
啫牛舌雖然係薄切，但係非常惹味，香氣十足。
點評 9.9元 獲得一份招牌牛腩河粉，原來份量超級多，材料拍得住原裝牛腩煲咁多，超級抵食，勁飽肚。
打卡送大大杯檸檬可樂。
12/8/2025 11:00
「正佳極地海洋世界」係今行重點項目之一。知道正佳廣場有幾個大館，選擇呢個好評度最高嘅海洋世界，的確幾吸引。早一日係點評買到優惠票價，407元可以二大一小入場，由於細佬未夠100cm可以免票。買票後出示QR code就可以直接入場。就係呢個系統出現左小插曲，不知情之下，店家扣埋我地買來備用嘅小童票，還好之後係點評平台申訴情況，幾經轉折，最後無條件退錢，可算係點評一大消費保障。
一入門口嘅時空隧道已經非常震撼，每區劃分唔同主題，可以觀賞各種海洋生物。估唔到係水族箱都相當大，環境都好乾淨企理。
最特別就係幾場美人魚表演。因為太受歡迎，所以要一早來霸位。一入場直衝去最後嘅表演場區，表演水缸係幾大，表演都不錯，有驚喜，但係只席地而坐而且都幾迫，感受不太好。第一場係白蛇傳主題。完秀後再原路返回起點由頭睇過。
離開前再睇另一場係蛟人魅影美人魚主題，其實內容都大同小異，第二場舞蹈比較優美，元素較多。
即場打卡得到紀念品。11am入場，玩到2pm，性價比還好。
12/8/2025 10:00
今行最後一個大景點就係正佳廣州，係酒店只需要搭幾個地鐵就到，沿著地下街唔洗露天就到。呢個商場真係超誇張，國家4A級旅遊區，入面有埋海洋館、冰雪世界、熱帶雨林生態園等，真係幾玩日幾夜都玩唔晒。
特登趁早先去四樓嘅「非洲標本展」。呢個商場連非洲動物標本都有，真係超勁。幾十件栩栩如生嘅動物標本，從威風凜凜的獅子、體型龐大的大象、長頸鹿、斑馬等都有，以極其逼真嘅姿態呈現眼前，可見真實大小同樣貌，震撼!
11/8/2025 18:00
黎到體育中心站，行錯左去另一條地下街，經過HOTMAX補給一下。之後繼續下一站時尚時河商業廣場，原來係一個橫跨幾個地鐵站嘅地下街，其中一部份就係夜上街主題。佈置不錯，有五光十色嘅霓虹燈，中間仲有一架會行走嘅電車，超跨張。
拇指生煎包 18元﹕煎得香脆，外皮薄薄，肉餡豐富又有肉汁，十五粒，一啖一粒，相當不錯。
記錄余生車輪餅
一個餐有車輪餅及飲品，只需 19.9元。
黑糖波波奶﹕基底係醇厚而溫潤嘅鮮奶，奶味柔和順滑，加入大量飽滿圓潤嘅黑糖珍珠，帶一點焦香與甘甜味，口感Q彈有嚼勁。
奧巧爆漿麻薯﹕新鮮出爐，拎上手仲係溫熱，餅皮散發著淡淡嘅雞蛋香味。外皮微微焦，輕輕咬開，飽滿嘅內餡好似熔岩般爆漿流出，係熱奧利奧巧克力醬，其風味極濃郁，帶著可可味微苦，加上奧利奧的甜，甜度恰到好處。藏喺中間嘅麻糬有驚喜，潔白軟糯，口感極其煙韌，米香味甜，不錯。
抹茶QQ 11元﹕呢款係濃郁嘅抹茶卡士達醬，抹茶略帶甘苦，醇厚回甘，麻糬軟糯，帶米香，米香同抹茶配合得宜，中和左抹茶嘅微苦。
四時滿棠
紅豆芋圓牛奶綿綿冰 28元﹕雪白的冰底上有大量飽滿透亮嘅紅豆，圓潤可愛嘅三色芋圓。牛奶綿綿冰細膩綿密，入口即化，濃郁奶香味散開來，唔似傳統刨冰咁粗糙。紅豆經過細心熬煮，飽滿又軟糯香甜，仲有沙沙質感，甜味恰到好處，加上少許煉奶變得香甜。手工製作嘅芋圓有芋頭、地瓜、紫薯口味，口感煙韌彈牙，充滿嚼勁，整體配合得不錯。
打卡送兩份芝麻湯圓夠大方，外皮由糯米粉揉製而成，晶瑩剔透，散發著淡淡米香，光滑而略帶彈性，質地軟糯Q彈。內裡嘅芝麻餡爆開流出，芝麻味濃郁香醇，超正!
