思塔克漢堡 STACK UP
深圳水圍 1/7/2026 18:30
點評霸氣積分50元換一份漢堡餐，安格斯牛堡同凍檸樂。
新鮮即製，熱辣辣，賣相亦都靚到不得了，漢堡飽滿，麵包烤到表面金黃油亮脆卜卜，滿滿牛油香。安格斯牛肉餅厚切紮實，外層煎到微微焦香，內裏粉嫩多汁，嫩滑彈牙，肉味濃郁醇厚，再夾埋爽脆生菜、多汁蕃茄同融化芝士，仲有酸甜醬汁層層疊，惹味全部融為一體，相當高質。加杯檸檬可樂，清新果酸夠解渴。
香港嘉嫂麵包
深圳水圍 1/7/2026 18:00
點評霸氣積分50元換得一份五個包，份量十足。
港式酥皮蛋撻，撻皮烤到金黃油亮，一層層酥皮層次分明，鬆化香酥，蛋漿非常嫩滑，蛋香濃郁。
流心菠蘿包有驚喜，菠蘿脆皮焗到金黃裂紋，香酥誘人。中間係爆多奶油餡，超級流心，香滑得嚟又夠奶香，味道不錯。
吞拿魚包口感鬆軟，中間飽滿吞拿魚餡加沙律醬，鹹香惹味。
奶油包，非常傳統港式包點，個包烤到金黃鬆軟，表面撒滿一層香脆椰絲，中間係超多奶油，帶椰絲清甜同奶油香滑，正!
Cream Story
深圳萬象食家 21/6/2026 15:00
點評筆記禮盒搶到CREAM STORY意大利手工冰淇淋雙球。試左唔同味道，最後揀左兩款人氣Gelato，開心果味同榛子味。賣相亦唔錯，份量唔少。Gelato質感綿密細滑，入口即化，奶油份比較重，感覺厚重。開心果味濃醇厚，啖啖都食到開心果本身嘅油潤同香甜，仲有回甘，真材實料。榛子味果但香更加濃厚，微微焦香。
小楊生煎
外賣@南山嘉樂道 14/6/2026 18:00
小楊生煎包 23元﹕底部煎到金黃脆卜卜，油亮亮，脆口又鬆軟，一啖落去入面滾燙肉汁即刻瀉出嚟，鮮甜濃郁，豬肉餡紮實彈牙，鮮香多汁。
鍋貼 14元﹕外皮脆脆，皮較煙韌，內餡同生煎包差不多，但肉汁較少。
藤椒大蝦生煎包 23元﹕有彈牙大蝦，肉嘅醇厚同藤椒嘅麻香。
墨魚丸湯 6元﹕粒粒圓碌碌、白雪雪，墨魚丸本身鮮甜爽脆，Q彈無比，真材實料，啖啖都食到墨魚嗰種獨有嘅鮮味同嚼勁，彈牙得嚟又夠紮實，味道鮮甜。
樂品軒
深圳海岸城 14/6/2026 16:30
筆記禮盒換的茶餐廳單人餐共兩份
試左兩款經典港式美味，乾炒牛河鑊氣撲鼻，河粉炒到條條分明，油潤亮澤，河粉本身滑溜溜都夠彈牙，牛肉就嫩滑多汁，肉味濃郁，醃得入味。河粉夾埋炒到微微焦香嘅芽菜同蔥段，爽脆清香，味道不錯。
三絲炒米粉﹕米粉炒到乾爽分明，見配料都非常多。米粉煙韌彈牙又爽口，大量肉絲，醃得夠入味，幼細嫩滑﹔火腿絲帶點鹹鮮夠惹味﹔蛋絲香軟味濃，加上仲有唔少芬菜，夠鑊氣又唔覺油膩。
最後飲茶檸檬可樂，清新酸香，酸酸甜甜，透心涼。檸檬茶都非常夠檸檬味，茶香濃郁。
京炙坊北京烤鴨
深圳市民中心 14/6/2026 11:30
用霸氣積分500元美食券換，高級北京菜，味道、環境、服務都一流，絕對值得!
京炙酥不膩文房烤鴨﹕堂前料理，氣場十足，鴨皮片得薄薄一塊塊，烤到金黃油亮，皮脆酥而不膩，完全冇半點肥膩感，滿滿嘅鴨香，鬆脆入口即化；鴨肉部分就嫩滑多汁，肉味濃郁。鴨餅超薄，米香味濃，加上八寶蘸料非常特別，除左基本嘅青瓜、蔥白同甜鴨醬，仲有超甜哈蜜瓜配熱情果醬，果香味更香甜，創新又好味。擺盆靚，仲做到保溫，入口暖笠笠，可算係食過最好食嘅片皮鴨。
黑松露黃油吐司配魚子醬烤鴨﹕賣相豪華到不得了，吐司香脆，香濃黃油香，再撒上黑松露，中間夾左片皮鴨，鴨香十足，頂層舖上魚子醬，啖啖鹹鮮海洋風味，一啖入口整體配合得非常好，鹹鮮、酥脆、鴨香、黃油香全部融為一體，非常驚喜。
銅壺慢熬梨湯﹕小吊梨湯湯色清澈淡淡琥珀色，梨嘅天然清甜慢慢喺口腔散開，香甜清爽，膠質感重非常幼滑溫潤，養生又好味。
乾隆白菜﹕白菜本身爽脆爽多汁，最正係嗰個芝麻醬，香濃幼滑，勁惹味。
老北京爆肚﹕用水燙煮，牛肚爽脆，但較為煙韌，蘸上濃郁惹味嘅麻醬蘸料、麻油等，調味是不錯的。
老北京炙子烤肉﹕羊肉係燒得火紅嘅鐵板上面燒到滋滋響，肉片肥瘦相間，煎到邊位微微焦香，肥肉部分油脂慢慢逼出嚟，肉質都保持嫩滑多汁，香料調味重，好惹味。用芝麻包包住食，多一份芝麻香，夠飽肚!
一口炸醬麵﹕麵條係手工製，煙韌爽彈，滑溜順喉，炸醬濃稠，黃豆醬香濃醇厚，鹹中帶甜，小巧份量食得舒服。
獅舞龍騰手工冰激凌﹕龍頭玉璽加上故宮太和門前銅獅造型，仲有乾冰，威武又華麗，影相一流。芝麻味堅果焦香超濃，啖啖香口又回甘，入口冰感軟重，非常清涼。烏龍茶茶味香醇，更加清新，甜度剛好，非常解膩。
