30/6/2024 11:45
中午選擇嚟呢度食自助餐，點評優惠非常抵食，兩大一小只需要350元。餐廳係近飛船酒店，一入去已經見到落地大玻璃，有好多珊瑚同海洋生物。時間尚早，入座率唔高，可以坐喺一張六人大枱，對正大玻璃。
食物款式唔算多，最近嘅就有麵檔，點心部。全場最名貴嘅就係粉絲蒸扇貝。
場中間就係熟食區，比較特別嘅有潮式拼盤、燒味。味道到位。
日式區仲有炸物、幾款壽司、飯團。仲有一個區域係麵包、冷盤。旁邊仲有自助飲品區，各式汽水果汁咖啡茶都有。
最值得留意就係甜品區，款式都幾多。必試園區限定朱古力潛艇，朱古力味道濃，中間仲有流心果醬。奶凍非常幼滑。提拉米蘇素撻咖啡味朱古力味都夠濃。紅絨蛋糕細細件，奶油味幾香。小朋友就最鍾意棉花糖。
食物款式唔算多，冇太多名貴嘅菜式，刺身，雪糕都冇，只係簡簡單單各式各樣熱盤，感覺上一般餐廳貨色，甜品相當唔錯。以人均$100嘅價錢喺樂園食到無限任食已經非常抵，環境一流，餐廳提供BB椅，兒童餐具等，非常貼心，服務亦相當好。
30/6/2024 10:30
早點check-in會即刻送埋兩日樂園入場券。搭酒店穿梭巴士到達飛船酒店，大堂有好多打卡位。
酒店大堂落一層就有一個好細嘅入閘位，安檢排隊都排咗一段時間，再出到一個戶外嘅中庭，就係樂園嘅入口。
今日會食自助餐，趁而家仲有少少時間，先行下層嘅一部份。下層村冷氣相當舒服，空間感十足，裝置都非常新淨。
遇岩時間睇到珊瑚長老動雕秀，20分鐘，光影音效不錯，有互動有教育意義。
30/6/2024 10:00
10點未夠就到酒店check in，人都幾多。上次都係住呢間酒店，感覺平靚正。今次再黎大堂多左一個兒童遊樂場，簡單滑梯同波泳池，足夠俾小朋友等緊check-in嘅時候玩。大堂外露天地方仲多左幾隻動物。
今次係中旅社買套票，包一晚酒店，飛船樂園門票兩大兩小共$1095，呢個價錢實在抵到爛。
大約6點回程返酒店時攞房，原來派咗去歡樂區驚一樓，升降機都唔使搭，鑽入走廊第二間就係，方便到不得了。酒店房幾闊落，兩張單人床，拼埋一齊都足夠一家四口，基本送咗三枝蒸餾水，仲有兩大兩小嘅梳洗用品，洗頭水沐浴露等，算應有盡有。前台仲幫忙安排咗加床欄，小朋友更加安全。
酒店有穿梭巴士去園區各處，十分方便。
30/6/2024 06:45
去珠海今次唔搭直通巴，因為車費大小同價，小朋友細，感覺相當唔抵。由馬鞍山出發，樓下都有A41P機場巴士($29 / $14.5)，由上車坐到落車大約需要一個半鐘，8點多就到港珠澳大橋旅檢大樓。
今日係星期日，可能時間尚早，過關完全唔使等，非常順暢。
過關後買金巴車票($65 / $33)，電子購票好方便。金巴係一般雙層巴士，客滿即開，上車時有職員幫你收好行李，人人有位坐，相當舒適，全程40分鐘。
30/6/2024 09:15
9點多已踏足珠海，過關又係完全唔使排。拱北關口中大樓平台有好多餐廳，喺大樓地下停車場就可以等網約車。大約25分鐘就到長隆園區，車費大約50元。
28-29/11/2019
住：馬戲酒店
食：企鵝酒店自助餐
樂園好大，非常多機動遊戲，有部份都適合幼兒小孩。樂園實在太大，入住酒店可以玩足兩日一夜，總算搵得晒。仲有好多大大小小嘅水族館，小朋友最鍾意。不要錯過每日定時嘅劇場夜晚嘅煙花同埋燈飾最令人難忘。