by admin | 9 月 12, 2026 | Blog, 上海菜, 小食, 甜品, 馬鞍山
馬鞍山 12/9/2026 13:00
今日收工去咗馬鞍山新港城中心大街嘅三叔廚房食晏。三叔肉絲雙麵黃，脆軟雙重口感好有層次，芡汁調配得好勻循，生煎包底脆皮軟，咬開肉汁鮮甜滿溢，水準好穩定。最後叫多一份豆沙鍋餅，香脆綿密，甜味唔太甜。價錢貼地，而且份量好足。
三叔肉絲雙麵黃 $88﹕份量勁大，兩個人分都絕對夠食，成碟麵堆到好似座金黃色嘅小山丘咁，炸麵條炸得好均勻。面頭淋滿晶瑩剔透嘅肉絲芡汁，肉絲、冬菇、芽菜等，都好足料。上面吸咗芡汁嘅麵條變得軟腍入味，底層依然保持酥脆，一啖咬落去有齊脆同軟兩種口感。
三叔生煎包 4隻 $40﹕四粒白雪雪嘅生煎包排得整整齊齊，頂頭撒咗滿滿嘅黑芝麻同翠綠蔥花點綴。翻開底部煎到底層呈現好均勻嘅焦金黃色，油光透亮好誘人。包皮頂部食落鬆軟棉密，底部就煎得好似餅乾咁香脆。一咬開肉汁即刻喺口入面爆發，豬肉濃郁鮮甜，油脂香氣同蔥香平衡，可惜唔算太熱，打了折扣。
豆沙鍋餅 $38﹕切好一件件嘅鍋餅整齊排好，餅皮煎到金黃微焦，表面鋪滿密密麻麻嘅白芝麻。中間夾住厚厚嘅紅豆沙餡，外層餅皮薄脆香酥，入面包住嘅豆沙餡就綿密幼滑，甜味自然，甜度控制岩岩好。
老闆娘送飲品，熱豆漿味道幾清甜，豆味香，不錯。
by admin | 6 月 16, 2026 | Blog, 上海菜, 台式, 小食, 港式, 荃灣
荃灣 16/6/2026 13:30
劉興記二人份。
招牌生煎包 $35﹕生煎包煎到底部金黃香脆、油亮亮，脆卜卜夠晒香口，一咬爆汁，鮮甜惹味，肉味濃郁。
蟹粉生煎包 $80﹕同樣煎到底脆皮，蟹粉金黃油潤，都幾鮮香，濃郁鮮味之選。
麻醬青瓜雞絲粉皮 $45﹕份量唔少，雞絲幼細嫩滑、鮮甜入味﹔青瓜絲清脆爽口都幾新鮮，最正係嗰個麻醬夠晒香濃幼滑。
雞湯小雲吞加一隻生煎包配可樂 $66﹕陣陣濃郁雞湯香，湯色清澈金黃，幾鮮甜。小雲吞就皮薄餡靚，浮喺湯面晶瑩通透，一啖一隻，雲吞皮滑溜溜、薄到入口即化，入面肉餡鮮甜彈牙、肉汁飽滿。套餐有一隻生煎包，跟埋罐可樂就最正，非常豐富。
上海小籠包 $40﹕咬開小籠包，先飲一下鮮甜濃郁嘅湯汁，肉餡紮實彈牙、肉味濃郁，個人最鍾意沾啲陳醋，酸咪咪非常好食。
by admin | 5 月 1, 2026 | 上海菜, 中菜, 小食, 深圳, 甜品
中洲灣 1/5/2026 18:30
麵包誘惑 9.9元﹕原個厚方包烘到外層金黃酥脆，入面切好嘅麵包粒鬆軟又充滿牛油香。面頭加咗一大球雲呢拿雪糕，凍冰冰嘅雪糕慢慢溶化喺熱辣辣嘅麵包上。冰火交融，充滿濃濃嘅奶香同甜味。
龍井茶香酥骨肉 48元﹕骨肉外皮炸得卜卜脆，入面嘅肉質卻極之嫩滑，完全唔乾柴。龍井茶香滲入肉裡，解走油膩感之餘，仲帶出肉嘅鮮甜，陣陣清幽茶香。
粉絲裹蝦大蝦 39元﹕肉質非常爽脆鮮甜，最正一定係鋪喺底層嘅粉絲，完全吸收晒大蝦嘅鮮甜同蒜蓉醬汁嘅精華。每一啖粉絲都充滿濃郁嘅鹹香，惹味。
花田冰粉 22元﹕份量多，賣相精緻，晶瑩剔透，食落滑嘟嘟，帶有淡淡嘅花香同清甜嘅糖水味，仲有好多唔同配料。岩好清走晒前面食烤肉嘅油膩感，感覺非常清新解渴。
綠茶蔥香烤肉﹕點評LV8送，一上枱已經聞到極濃郁嘅蔥香同炭烤味。烤肉肥瘦適中，外層燒得微微帶焦，帶孜然微辣，鹹香惹味。
江南綠茶餅﹕點評送。呢款餅外皮沾滿白芝麻，煎到極之香脆。咬開入面軟糯煙韌，綠茶味清幽撲鼻。佢甜度控制得好，芝麻嘅微鹹同綠茶嘅清甜配合得完美無瑕，外脆內軟嘅口感層次極之豐富。
84元代100元代金券，全單夾埋103元。超抵!
by admin | 3 月 7, 2026 | Blog, 上海菜, 旺角, 麵食, 點心
旺角 7/3/2026 13:30
今次試咗「劉興記」嘅招牌生煎包，除咗必食嘅經典原味，仲試埋佢哋充滿特色嘅「沙嗲牛肉生煎包」，超驚喜。
生煎包 $35/4 煎到個底金黃香脆，賣相已經非常吸引，熱辣辣，爆晒汁，湯汁非常鮮甜，原味真係無可挑剔。
跟住試下充滿港式風味嘅「沙嗲牛肉生煎包」$15，一咬開，濃郁嘅沙嗲醬香味即刻湧出嚟，味道非常突出。入面嘅牛肉餡料同樣嫩滑，味道香濃惹味，帶少少花生香，甜中帶鹹。外皮同經典款一樣，底脆皮軟，驚喜！
上海小籠包 $40
香煎雞扒拌麵配一隻小籠包 $58 ：蔥油嘅香氣即刻撲鼻而來。麵條煮非常彈牙，蔥油均勻咁掛喺每一條麵上面，鹹香得嚟又帶點蔥嘅微甜，惹味到極。香煎雞扒煎到外皮金黃香脆，肉質保持得好嫩滑。
食完香口惹味嘅拌麵，即刻飲一啖凍豆漿，簡直係完美配合。呢杯凍豆漿味道清甜，完全唔會死甜，帶有濃郁嘅黃豆香氣。口感順滑細膩，口感粉粉地，感覺真材實料。冰涼消暑解渴。
by admin | 1 月 18, 2026 | 上海菜, 快餐, 深圳
崗廈北深圳之眼 18/1/2026 18:00
原味生煎包：灑滿咗黑芝麻同蔥花，香氣撲鼻，賣相極之吸引。包底金黃色，極之香脆。輕輕咬開一小口，鮮甜濃郁嘅豬肉湯汁即刻湧出嚟，入面個肉餡肥瘦適中，肉質鮮嫩彈牙。
升級版嘅蟹粉生煎包，將鮮香嘅蟹粉同豬肉融合。一咬開薄皮，金黃色嘅蟹油同清甜嘅湯汁即刻爆發出嚟，海鮮嘅甘香同豬肉嘅鮮味非常夾。蟹粉嘅份量畀得極之大方，食得出嗰陣醇厚嘅鮮味。
美團外賣 29/10/2025 19:00
外賣都保持質素， 十分不錯。
深圳in城市廣場 18/5/2025 17:30
小楊生煎 19.5元﹕小楊生煎嘅生煎包絕對係一大驚喜，令人回味無窮！每隻生煎包個底煎到金黃香脆，但頂部依然保持柔軟。包皮唔算太厚，口感彈牙。咬開一啖，最令人驚喜嘅係多到爆汁，肉汁仲熱辣辣，非常澎湃。肉餡扎實，充滿濃郁嘅肉香味，味道甜甜的，用料非常足。高質，性價比極高!
小楊鮮肉小籠 15元﹕小楊鮮肉小籠就係細膩版本。細細粒嘅小籠包白白靚靚，皮薄晶瑩，隱約可以看見內裡豐富嘅鮮肉餡料，賣相已經非常吸引。輕輕用筷子夾起，感受到包皮嘅堅韌同彈性。細細粒可以一啖一啖，又係一咬爆汁，湯汁濃郁而鮮甜唔會油膩。內餡充滿豬肉甜香，沾少少酸醋，味道更加清爽，完完全全停唔到口！
外賣都咁高汁，平靚正！
崗廈北深圳之眼 17/11/2024 17:30
蟹粉生煎雙人餐 31元
套餐包括一份蟹粉大蝦雙拼及魚丸湯。今期主題限定蟹粉生煎包，上枱新鮮熱辣，外皮金黃鬆脆，脆卜卜，中間有豐富嘅肉餡仲有蟹粉，味道不錯。另一款內餡有大大隻大蝦，好豪華。魚丸非常爽口彈牙，味道不錯。
小楊生煎四隻 12元
大眾點評優惠$12可以食到四隻小楊生煎包，好抵食。新鮮熱辣打開包皮，肉汁流晒出嚟，肉餡甜甜的，非常不錯。
深圳印力中心 14/1/2024 11:00
黎到印力中心食個簡簡單單brunch，想試呢間生煎包好耐，環境闊落，都坐得幾舒服。
意式牛肉套雙人C餐﹕三拼牛肉小楊生蝦、雞絲湯麵、魚丸湯、特色炸豬排 57.5元
意式牛肉套餐A﹕牛肉小楊雙拼、油豆腐百葉包粉絲湯 28元
生煎包新鮮熱辣，包厚皮，煎得香脆，中間爆多汁，肉餡都好豐富，味道唔錯。
魚丸爽口彈牙。炸豬扒略為乾身少少。粉絲湯份量多，粉絲吸收湯汁。
鮮雞湯鮮肉小餛飩 11元：份量唔少，一大碗，小雲吞皮薄材料多。
打卡送里脊肉 (原6元)：啖啖肉一串，調味不錯。
by admin | 1 月 11, 2026 | Blog, 上海菜, 佐敦, 港式, 麵食, 點心
佐敦 11/1/2026 13:30
上次食過旺角店，今日再來佐敦店encore。
先來一大支清甜豆漿，豆味夠香，又夠凍，仲有免費任添!
今次叫左幾款唔同口味嘅生煎包，招牌原味 ($35/4隻)外層脆卜卜，非常焦香，咬開中間係鮮甜肉餡，最緊要係爆多汁，雖然係煎炸嘢，但係食完又唔會覺得好油膩! 另外仲有瀨尿蝦 ($28/2隻) 同蟹粉 ($38/2隻)。
個人就幾鍾意呢度嘅小籠包 ($40)，新鮮熱辣，一啖一粒，皮薄薄，肉餡鮮甜多汁，加少少醋已經好好味。
香煎豬排拌麵 ($45) ，份量十足，一大塊切好嘅豬扒，金黃酥脆，煎得啱啱好，咬落去少少香脆，唔會乾爭爭，調味亦都好夠，鹹香適中。拌麵係蔥油醬底，每一條麵都光澤感十足，啲蔥炸到焦黃色，非常香口。麵條係爽滑彈牙，入口充滿濃郁嘅蔥香同醬油嘅鮮甜味，簡單得嚟又好惹味。
但呢間店更加細，地方淺窄，而且食物出品無論賣相、新鮮度同味道都好似比旺角略遜。
