深圳高新園 29/10/2025 18:00
青蒜回鍋肉﹕五花腩片肥瘦適中，炒到邊位有微微焦香同香脆感，肉質嫩滑。青蒜清香又解膩，配埋豆豉同醬料嘅咸香，非常惹味。成碟菜都充滿鍋氣，味道濃郁又唔會過咸，係一碟好下飯嘅家常美味。
擂椒皮蛋茄子﹕有驚喜嘅一味涼菜，茄子蓉軟糯，配埋煙韌嘅皮蛋粒，口感細緻又有層次。搗爛之後，辣椒既鮮辣同清香完全發揮出嚟，辣勁夠晒，各種食材味道完全融合，真係令人食指大動。
豬油渣炒菜心﹕翠綠嘅菜心新鮮爽口，本身清甜同有水份。豬油渣炸到金黃酥脆，帶嚟濃郁嘅油香，蒜蓉香，鑊氣十足，味道啱啱好，油而不膩。
招牌口水雞﹕雞肉滑嫩多汁，雞皮爽彈，質素一流，醬汁絕對係靈魂所在，麻、辣、鮮、香、甜、酸齊備，層次豐富又平衡得好好。紅油香氣撲鼻，花椒嘅麻味啱啱好。
呢度嘅菜式風味正宗，整體用餐體驗極佳，無論係菜品味道定係服務都好出色，味道地道。
深圳領展中心城 3/8/2025 18:00
河源蒸米粉 30元﹕米粉蒸到條條分明，上面鋪滿咗肉碎、冬菇絲同埋大量蔥花。口感非常煙韌彈牙，仲帶有淡淡米香。上面嘅配料亦好惹味，肉碎鹹香十足，冬菇絲爽口彈牙，鮮味突出。全部味道滲透入米粉入面，成碟米粉食落唔會好油膩，味道恰到好處。
酸菜鱸魚 58元﹕個湯底酸菜嘅酸爽同辣椒嘅香辣結合，酸得嚟唔會嗆喉，辣味適中，飲落去非常順口。主角鱸魚片份量好多，切得好薄，而且全部無骨，啖啖肉，口感嫩滑，完全吸收晒湯底嘅精華，鮮甜得嚟又帶點酸辣，非常惹味。除咗魚肉，入面嘅配料都好足，索晒湯汁嘅酸菜爽脆可口，另外仲有啲粉絲、芽菜喺底，味道不錯。
菠蘿咕嚕肉單人餐 35元﹕咕嚕肉炸到金黃香脆，均勻被一層橙紅色、亮澤嘅糖醋醬包住。配料除咗有新鮮菠蘿，仲有青、紅椒同洋蔥，顏色五彩繽紛。咕嚕肉外皮炸得非常香脆，豬肉依然保持到好嫩滑多汁。糖醋醬汁調校得啱啱好，酸酸甜甜。新鮮菠蘿嘅果香同酸甜味，正好中和咗炸肉嘅油膩感，非常醒胃。
深圳KKOne 25/7/2025 12:00
海底撈火鍋，真係火鍋界服務世一，更非常適合慶祝生日。
今日揀咗番茄湯底配菇菌湯（87元），湯底味道不錯，蕃茄湯更是一流。番茄新鮮香味香氣，飲一啖已經好暖胃，仲非常開胃。職員仲幫你加上牛肉粒同埋芫荽蔥，特製一碗蕃茄肉碎湯，真係超級好味。
牛肉丸（29元）彈牙多汁。鮮切吊龍牛肉（46元）肉質嫩滑，油花分佈均勻。蒙古羊肉片（72元）帶香濃羊膻味，肉質細嫩。撈麵係必點，睇住師傅現場拉麵，麵條彈牙又掛湯，吸晒番茄湯底嘅精華。
兒童餐（26元）小巧精緻，已經有多款火鍋料，午餐肉、鵪鶉蛋、魚柳、米線、蔬菜，份量細細，但非常抵食。
漢堡兒童餐 （39.9元）賣相不錯，有小漢堡、雞翼、蛋糕、飲品。
莓莓抹茶牛乳（18元）味道香濃，用料充足，都拍得住出邊嘅茶飲店質素。
喺度慶祝生日收穫滿滿，首先有一大碗長壽麵。場內佈置非常靚，店員仲會唱生日歌。間中仲有變臉表演，又不停有小禮物。店內仲有一個兒童遊樂場，有職員姐姐陪小朋友畫畫砌積木，真係非常歡樂。女士更可以做靚靚嘅美甲。
整體味道唔算十分突出，但係服務同埋周邊實在絕對贏晒。食足兩個幾鐘，埋單257元代300元，補埋尾數340元左右。
外賣@深業上城 15/6/2025 18:00
老壇酸菜魚 40.9﹕金黃色嘅湯底點綴著鮮紅嘅辣椒，老壇酸菜有一陣發酵嘅醇厚酸爽，與魚骨熬製嘅高湯融合，味道溫和，帶辣味。新鮮鱸魚切得厚薄適中，口感嫩滑，骨唔算多，吸收晒酸辣湯味道。仲有好多配料，爽脆嘅酸菜同豆芽吸滿湯汁，豆皮厚度適中，飽足感。
原味不辣酸菜魚 40.9﹕呢款唔辣味道，湯色呈奶白色，與老壇酸菜嘅天然酸結合，湯頭溫潤順喉，突顯魚湯嘅鮮甜。鱸魚嫩滑肉質細膩，魚片充分吸收了湯汁味道。
紅糖鴛鴦糍粑 16元﹕賣相吸引，雙色糯米糍粑，糍粑外皮輕微酥脆，中間超級軟糯，亦帶嚼勁口感，米香味濃。外面淋上濃稠嘅紅糖漿，散發著獨特糍粑焦糖香氣，甜而不膩，
漁奶奶芽菜肉末炒飯 28元﹕米飯被炒得粒粒分明，乾爽而不油膩，每一粒米都均勻地裹上醬油香氣。配料有唔少肉末香蔥、芽菜等，清甜爽脆嘅口感，亦帶肉味鹹香。
手作老成都紅糖冰粉 3元﹕冰粉凝固後呈現果凍般滑溜，口感Q彈，入口即化。糖水係紅糖水，色澤深邃，質地濃稠，散發着甘蔗甜味，冰粉冰涼爽滑，仲有好多配料，正好解左口中嘅油膩與辛辣。
外賣@深圳后海匯 21/7/2024 18:00
完全破記錄，竟然同一個品牌食三次。
今次加咗牛肉餅，外皮係酥皮，中間免治牛肉輕微辣味，不錯。感覺上呢間分店酸菜魚湯底輕手少少，冇咁辣。
外賣@深圳深業上城 26/5/2024 18:00
太好味，話咁快兩星期後又encore。
金蒜原味酸菜鱸魚 62元：蒜味十足依然好食。
藤椒金湯酸菜黑魚 48元：湯底酸辣，上面加咗好多花椒。感覺上比老壇酸菜魚冇咁辣，但係更加麻。
芽菜肉末炒飯 29元：炒飯非常香，坐得夠乾身，唔油膩，有啲菜同肉碎，上邊舖滿脆卜卜炸鬆，非常好食。
外賣@深圳卓悅中心 15/5/2024 17:30
晚餐選擇卓悅中心買酸菜魚，直接買漁語魚外賣自取，大約等左半個鐘。打包非常安心，保溫袋真係超保溫，返到屋企成兩個鐘仲係熱。每碗魚用厚錫紙碗包好，入口仲相當熱。
老壇酸菜黑魚單人套餐 46元
一打開碗就聞到酸辣味道，湯底用上好多酸菜、辣椒、花椒等。魚肉都相當多，吸收晒辣味，仲有好多豆芽、金菇。辣味麻味後勁十足，配飯都實在太刺激。
金蒜原味酸菜鱸魚單人套餐 62元
呢款係原味不辣版，但係湯底有好多好多蒜泥，香味十足，個人更加喜歡呢個味道。鱸魚明顯矜貴啲，味道鮮甜。
終於有機會試專門店嘅酸菜魚，個人黎講抵受不住太辣，反而更愛金蒜味。下次再試第二個品牌。
深圳壹方天地 2/3/2025 13:00
葷四素一小吃超值2-3人餐 108元
第一次試貴州紅酸湯，因為夠抵食。番茄鍋鮮剁牛肉沫餅已加鍋裏。紅酸湯底係正宗貴州風味，酸香味撲鼻，一入口就能感受到果酸，番茄味勁濃，仲有好多牛肉碎。貴州山胡椒薄荷牛肉算嫩滑，滲透住山胡椒嘅香麻味，加埋淡淡薄荷清香，幾特別。手切美式肥牛肥瘦適中。花溪手打薄荷貢菜丸子飽滿彈牙，貢菜味好濃。火鍋料可以加入、娃娃菜、金針菇等。貴州餌塊似係糯米製成嘅年糕咁，食落去口感煙韌又柔嫩，帶有淡淡嘅米香，幾特別。貴州撅粑都係類似嘅野，口感較滑。係貴州豬板筋勁韌，完全食唔到。米飯、醬料自助，可以無限續。
熱食有鍋巴土豆，炸到外皮金黃酥脆，內裏依然鬆軟香滑，但係調味勁辣。整體味道好重口味又刺激，試過就算。
佐敦逸東酒店 8/12/2024 17:30
估唔到逸東酒店而家開咗個美食廣場，選擇相當多。
沙茶鮮牛拌麵 $57
濃郁嘅沙茶湯底帶香辣味，滲有少少甜中帶鹹。牛肉片切得適中，口感嫩滑，吸曬湯汁嘅香氣，麵條煙煙韌韌，厚度十足，拌麵手仲有好多唔同嘅配料。
汁煮肥牛湯麵 $54
牛骨湯香味濃郁，滑潤口感，暖胃又滋補。肥牛片肉質嫩滑且帶有少許油脂香氣，麵條煮得彈牙，吸收晒湯底濃郁嘅精華。
粟米豬肉雲吞 $48
雲吞嘅餡料非常實在，再加上清甜嘅粟米，好juicy嘅感覺，薄薄嘅雲吞皮包住。配牛骨湯，味道相當不錯。
黃金炸雞球配蜜糖芥茉醬 $38
炸雞大大件，唔算油膩，蜜糖芥末醬甜甜酸酸味道不錯。
白桃冷泡茶 $12
加配飲品估唔到不錯，白桃味夠香，茶味平衡適中，味道不甜。
紅磡黃埔Aeon 1/9/2024 12:00
AEON美食廣場位置相當多，都幾多嘢食，今日揀呢間牛味非常香濃嘅店舖。
慢煮牛脷熱伴刀削麵 $57 好少地方有得食牛脷，呢度嘅牛脷份量相當多，口感不錯。刀削麵質地厚實，煙煙韌韌，揀咗招牌蔥油，醬汁甜甜，香蔥味濃郁，撈麵不錯。
沙茶鮮牛熱伴刀削麵 $57 鮮牛肉勁多，沙茶醬濃郁，少少辣啱啱好。呢款揀咗胡麻醬，撈埋青瓜同蘿蔔，非常之清爽。
粟米豚肉小雲吞 $48: 一大碗淨雲吞有20粒咁多，味道不錯，小朋友最啱。值得一提揀咗牛骨湯非常清爽，淡淡牛骨香味。
蒜泥白肉 $38 ：賣相不錯，白肉上面鋪咗厚厚一層蒜泥，加上醬汁同埋辣油，非常開胃。
埋單啱啱好$200 ，抵食又飽肚。
