by admin | 7 月 21, 2024 | 中菜, 四川菜, 外賣, 深圳
外賣@后海匯 21/7/2024 18:00
完全破記錄，竟然同一個品牌食三次。
今次加咗牛肉餅，外皮係酥皮，中間免治牛肉輕微辣味，不錯。感覺上呢間分店酸菜魚湯底輕手少少，冇咁辣。
外賣@深圳深業上城 26/5/2024 18:00
太好味，話咁快兩星期後又encore。
金蒜原味酸菜鱸魚 62元：蒜味十足依然好食。
藤椒金湯酸菜黑魚 48元：湯底酸辣，上面加咗好多花椒。感覺上比老壇酸菜魚冇咁辣，但係更加麻。
芽菜肉末炒飯 29元：炒飯非常香，坐得夠乾身，唔油膩，有啲菜同肉碎，上邊舖滿脆卜卜炸鬆，非常好食。
外賣@深圳卓悅中心 15/5/2024 17:30
晚餐選擇卓悅中心買酸菜魚，直接買漁語魚外賣自取，大約等左半個鐘。打包非常安心，保溫袋真係超保溫，返到屋企成兩個鐘仲係熱。每碗魚用厚錫紙碗包好，入口仲相當熱。
老壇酸菜黑魚單人套餐 46元
一打開碗就聞到酸辣味道，湯底用上好多酸菜、辣椒、花椒等。魚肉都相當多，吸收晒辣味，仲有好多豆芽、金菇。辣味麻味後勁十足，配飯都實在太刺激。
金蒜原味酸菜鱸魚單人套餐 62元
呢款係原味不辣版，但係湯底有好多好多蒜泥，香味十足，個人更加喜歡呢個味道。鱸魚明顯矜貴啲，味道鮮甜。
終於有機會試專門店嘅酸菜魚，個人黎講抵受不住太辣，反而更愛金蒜味。下次再試第二個品牌。
by admin | 6 月 23, 2024 | 四川菜, 外賣, 深圳
深圳筍崗寶能環球匯 23/6/2024 18:00
酸菜魚單人餐
賣相不錯，湯底酸辣味勁，個人覺得有啲太辣。魚片多，幾鮮甜，口感腍滑，配料都多。
味道不錯，但係個人抵受不住辣度。
by admin | 6 月 16, 2024 | 四川菜, 外賣, 深圳
外賣@西麗寶能環球匯 16/6/2024 20:00
另一個品牌酸菜魚。
酸菜魚 49.9元：酸菜湯底有酸辣、花椒味，但感覺比較薄弱淡口。魚肉都夠滑。
唔辣番茄魚62元：真係一個蕃茄湯加魚肉，甜甜酸酸，仲加左粉絲，非常適合小朋友。
紅糖糯糍粑18元：煙煙韌韌，中間包住紅糖味道不錯。
姚姚脆奶 18元：炸鮮奶係多士麵包包住奶餡，淡淡奶香，香脆可口。
感覺上配菜小食仲好食過主菜。
by admin | 5 月 26, 2024 | 四川菜, 小食, 深圳, 美食廣場
深圳深業上城大食代 26/5/2024 17:00
麻辣串串 5元@
by admin | 9 月 6, 2015 | 四川菜, 黃大仙
詠藜園四川菜館@黃大仙
6/9/2015 12:00
今日同老友睇進擊的巨人，順面喺附件食個午餐。選擇左詠藜園。十二點黎到人唔多，四人枱岩岩好。咁耐無黎，叫左幾樣招牌菜。
生煎包 ($34)
包底有唔少芝麻，包皮本身幾甜，肉餡都好飽滿多汁。
銀絲卷 ($16)
外皮幾脆，中間幾軟，甜甜地唔錯呀，沾埋煉奶更好食。配豆漿清甜解渴。
紅油抄手 ($30)
肥嘟嘟脹book book非常飽滿，菜肉餡的抄手皮薄餡多，充滿肉汁。加上甜甜辣辣嘅濃醬汁，仲有些少生蒜同麻醬，花生醬香味好夠。不錯。
鮮肉小籠包 ($52)
新鮮出爐熱辣辣。皮都算薄，肉餡豐富，肉汁都好多。略嫌水氣太重，皮有啲粉粉感覺，一般啦。
上海粗炒 ($55)
幾夠鑊氣，賣相唔錯。材料都好夠，有齊菜、肉絲、冬菇絲咁。
招牌擔擔麵 ($26)
手打幼白麵線煙韌柔滑，幼身略扁嘅麵線正好沾住麻醬湯汁。香蔥、花生碎、仲有芝麻醬同少許辣油，一啲麻一啲辣一啲花生嘅香濃湯汁。但明顯花生麻醬俾得唔夠，香味已經減退，但都算可以啦。
雲白肉 ($50)
肉片夠薄，加上大量蔥蒜、醬油同辣油，呢味真係好送麵。
太后豌豆黃 ($19)
完成正餐，叫左個網上人氣熱點太后豌豆黃 ($18) 做甜品。豌豆糕唔會太甜，食落幾清甜，又啖啖豆味，似綠豆蓉糕。
埋單三百零蚊，飽到上頸。一餐非常滿意嘅四川菜。
真係闊別多年啦，今日一食，重拾番當時好味嘅回憶。今次嘅總結都係兩個字﹕ 好味!
by admin | 6 月 20, 2011 | 四川菜, 麵食, 黃大仙
詠藜園四川菜館@黃大仙
19/6/2011 20:30
記得差不多成十年前，詠藜園進駐黃埔蔡瀾美食坊，開張無耐，為左唔洗等咁耐，特登趁晚市開門前排隊攞籌，等足一個鐘就係為左一家四口一人一碗擔擔麵、一碟雲白肉、一客紅油抄手，閒時會點一鍋雲吞雞、食下高力豆沙…細個乜都唔識，只知道好味!
佔據開飯網搜查引擎「中式全選」、「四川菜」、「黃大仙區」三個項目笑臉搜尋No.1。
黃大仙詠藜園
比食飯時間夜少少，八點幾先去到等位，大約二十分鐘。
舖仔細細，古舊風味，搭枱係指定動作。
擔擔麵 (小辣) ($18)
手打幼白麵線煙韌柔滑，幼身略扁嘅麵線正好沾住麻醬湯汁。
香蔥、花生碎、肉碎、仲有芝麻醬同少許辣油，一啲麻一啲辣一啲花生嘅香濃湯汁，惹味!
有試過其他地方嘅擔擔麵，花生味係濃，但越食越膩，變左花生醬麵，幾濃都係假。
詠藜園嘅湯，係恰到好處，濃而不膩。18蚊一碗，物超所值!
紅油抄手 ($26)
肥嘟嘟脹book book非常飽滿，菜肉餡的抄手皮薄餡多，充滿肉汁。
加上甜甜辣辣嘅濃醬汁，仲有些少生蒜同麻醬，更加香，更吸引食欲。
出面食過，有啲抄手營養不良細細粒，醬汁齋辣無香味，呢啲劣食絕對可以飛歐，就算以後食抄手只可以食詠藜園的話，我都願意。
雞絲粉皮 ($50)
粉皮滑溜溜，厚薄適中，雞絲份量充足，仲有幾多青瓜絲，配上香濃嘅麻醬。整體尚算不錯，但雞絲略嫌不夠嫰滑，不夠絲。粉皮都吸晒青瓜味，對於不好青瓜的小女子來說，有點不好受，但我理解，呢個菜青瓜係必須的。
神奇地，三種食物都用花生麻醬做醬汁，但竟然完全唔覺膩。係我地好野，定係詠藜園好野?
完成正餐，叫左個網上人氣熱點太后豌豆黃 ($18) 做甜品。
豌豆糕唔會太甜，食落幾清甜，又啖啖豆味，作結良品。
百零蚊一餐非常滿意嘅四川菜。
真係闊別多年啦，今日一食，重拾番當時好味嘅回憶。
今次嘅總結都係兩個字﹕ 好味!
地埋位置確實係吊腳兼隔踄，但仍有推動你專登一去嘅魔力。
