Flames

Flames

by | 8 月 14, 2022 | 兒童餐, 意大利菜, 紅磡, 西餐, 麵包

Flames＠黃埔

14/8/2022 12:00

10/7/2022 12:00

今日想去黃埔玩，經Openrice搵到呢間餐廳勁多好評，訂位仲有七五折優惠。點知黎到仲有一個更優惠嘅優惠，原來假日叫一份Holiday Brunch就送一份兒童餐。最後買二送二勁抵。

黑松露卡邦尼扁意粉 ＄108
可以話係食過最好食嘅Carbonara，無懸念。意粉硬度剛好，忌廉味勁重，好香黑松露味，煙肉、雜菌、洋蔥嘅配搭，整體真係好好味。

葡式燒雞扒漢堡配薯條 ＄128

非常澎湃嘅一份漢堡，雞扒大到突番出黎，好吸引。漢堡仲有番茄、生菜等配料。將佢解體，雞扒有辣味，有肉汁，可惜麵包略為乾身。薯條都係非常多，新鮮炸起，脆到不得了。

迷你炸魚薯條配他他醬

迷你？真係迷你？一大碟你話係正常Size我都信。兩大件魚柳炸得香脆，粉漿唔厚，配上偏酸嘅他他醬，好味。

番茄肉醬扁意粉

呢份就合理Size嘅迷你意粉，但味道相當不錯。番茄味濃，肉醬亦相當多。

兒童餐一份原價＄68，一個迷你主菜加一個雪糕。細細碗兩個小雲呢拿雪糕球，口感較為黏身，唔似一般平價雪糕，有驚喜。

食物賣相，味道都係非常好，單叫一份Brunch一百零蚊，跟飲品已算非常合理。而家仲送多兩份兒童餐，就真係抵到離晒譜。一定會Encore！

Beans

Beans

by | 12 月 19, 2019 | 意大利菜, 甜品, 西餐, 馬鞍山

Beans＠馬鞍山

19/12/2019 12:00
黃金蟹肉意大利粉
賣相吸引，成個蟹蓋，蟹肉份量都好多，忌廉味重帶點咸鮮。
    
Say Cheese 檸檬芝士慕絲
卷。山政小山園 抹茶蛋卷
24/9/2018 12:30
 
中午愉閒食好野。Beans假期超多人排隊，見到人龍都唔想等。趁平日唔多人，一於整個午餐。
忌廉番茄汁手切牛柳絲意大利粉 $58
醬汁非常之濃味，酸甜適中，仲加上唔少車厘茄，非常適合茄汁怪如我。牛柳都算幾腍，配上意粉總有點中西合壁的感覺。

千島醬蟹捧蟹子帆立貝薄餅 $68
Pizza大約六吋左右，原身餅底，面層舖滿海鮮料，賣相非常吸引。熱辣辣，芝士半融，帆立貝都幾新鮮，仲有蟹子、蟹柳等，味道不錯。

車打芝士薯條 $25
加配嘅小食，份量少少，芝士醬就多，味道不錯。

 

平日有午餐價錢都唔貴，包飲品。可惜份量略少，非常精緻，味道總算不錯，惟有叫多幾款，或者再飯後甜品啦。

粟米班腩飯以外嘅選擇，殺你呀

by | 3 月 28, 2016 | 意大利菜, 紅磡, 荃灣, 西餐

Saizeriya Italian Restaurant
28/3/2016 13:30
26/12/2013 14:00
31/7/2011 13:00

28/3/2016 13:30 @紅磡

白汁野菌雞肉雲吞 $29
雲吞不錯，熟成度剛好，白汁加左洋蔥、芝士粉等，幾忌廉咪，野菌落得夠多。

野菌忌廉意粉 $27
醬汁同前者一樣，正常

水牛芝士比薩 $29

茄醬唔算多，比較淡口，但芝士就落得好重手。

肉醬多利亞 $27
肉醬好味，撈飯一流。

26/12/2013 14:00 @荃灣

31/7/2011 13:00 @荃灣
一個唔知點讀嘅名，係荃灣區出名平靚正嘅意大利餐廳。
星期日中午，一行五人，等位係指定動作，唔超過三十分鐘已經唔錯。

地中海海鮮比薩 ($32)
九吋比薩口感同味道有別於平時食嘅港式薄餅。比薩唔算厚底，但亦唔薄皮，稍為少少脆但較為煙韌，切起黎有點吃力。一般嘅比薩就好似扁左麵包咁鬆泡泡，蛋味較濃。意式比薩小麥味道好香，亦感覺到發酵過嘅風味。比薩面層舖滿煙三文魚、蝦、魷魚，仲有豐富嘅芝士。材料夠新鮮，芝士味濃郁，但稍為結實，做唔到拉絲效果。如果溫度更高，芝士融化得更徹底，相信會食得更開心。

吞拿魚比薩 ($28)
材料充足，每一啖都食到吞拿魚，配上蕃茄醬，酸酸甜甜好開胃。呢款芝士比較重手，味道濃郁，好滿足。

地中海海鮮焗飯 ($28)
出奇地以鐵板上菜，飯面舖滿青口、蜆仔、蝦同魷魚圈等，$28有如此新鮮、豐富嘅材料，真係超驚喜。用鐡板焗令飯有些少焦硬，要撈埋蕃茄汁一同進食。蕃茄汁正有開胃嘅酸味，食欲大增。

香辣雞翼 ($30)
雞翼係餐前小食最佳選擇，雞翼烤焗到金黃色，有刺激惹味嘅辣道，肉質嫰滑，肉汁豐富，小食黎講已經好唔錯。

卡邦拿意大利粉 ($24)
卡邦拿最必要嘅蛋味好充足，味道亦夾雜左雞湯同酒嘅香味。意粉韌度適中，煙肉略嫌煎得未夠香口。芝士味同忌廉口感應該要加倍，惟有自行加芝士粉，撈一撈，搞一搞，豐富一下。

餐廳大，職員不多，客人請自動波。自助型式，冇人幫你斟茶遞水，所以無須加一服務費。
每樣料理，包括九大吋比薩都係大約三十蚊。廿幾三十蚊一款，請唔好要求大大碟上菜。雖然味道講唔上極之好味，但至少合格有餘，性價比係超高。

澄清一點，今次冇用團購。冇任何優惠之下，人均消費只$29。勿論今餐係唔係正宗意菜，但只用一個粟米班腩飯嘅價錢，食到質素OK嘅料理，我都冇說話好講。

一個唔知點讀嘅名，因為試過味道，食過滿意，抵到爛，所以之後請記得佢，佢叫「薩莉亞」。

大角咀暗黑船長

by | 7 月 25, 2012 | 大角咀, 意大利菜, 西餐

金船長餐廳@大角咀
25/7/2012 14:30

星期三放大假又去睇個早場，蝙蝠俠早場都要六十大蚊，真係幾貴。睇完戲都夠鐘食下午茶，最後冒住貓狗大雨行去大角咀慢慢嘆。N年前曾經去過呢間金船長試過唔錯，下午茶款式選擇都幾多，一於再試。

香草忌廉汁雜菌天使麵 ($29)
首先，陣忌廉香味已經好誘人，賣相亦相當吸引。雜菌非常多，有冬菇、蘑菇同其他唔知乜菇，材料好充足。忌廉汁味道好濃郁，奶香味濃帶淡淡香草味，雜菌嘅味道亦溶化喺醬汁之中。質地亦超級忌廉咪，好幼滑，黏稠得黎相當掛麵，每條天使麵都被忌廉汁包裹住。可惜就係，天使麵都係一般嘅偏腍口感，好彩味道搭夠，都值得一試。

德國肉腸炒飯 ($29)
鮮橙色嘅炒飯加左唔少蕃茄醬，感覺同西炒飯差唔多，不過材料用上德國肉腸粒、青紅椒等，更加矜貴。不過飯炒得唔及中式炒飯咁乾身，質地略濕，近似意大利飯。

6吋金船長至尊比薩 ($30)
招牌比薩都係此店人氣之選，下午茶三十蚊就有交易，真係抵。比薩新鮮即焗，香到不得了。批底好似餅乾般鬆脆，中間相當鬆化。批面材料十足，蕃茄醬、芝士落得超級重手。有齊辣肉腸、火腿、菠蘿、青紅椒、洋蔥、蘑菇等嘅大雜錦，值得一試。

呢間大角咀人氣名店嘅下午茶相當抵食，仲免收加一服務費。每個套餐跟埋冷熱飲品，兩個人叫左三個套餐，做午餐都夠食。食品味道都相當好，唔怪得晚市可以咁墟陷，唔少人仲會黎呢度過節、慶祝紀念日，因為貪佢燈光柔和，夠幽暗，氣氛唔錯。

車軚迫比薩

by | 5 月 27, 2012 | 小食, 尖沙咀, 快餐, 意大利菜

Big Pizza@尖沙咀
28/5/2012 13:00
尖東有一間小店嘅門面經常都攝住我嘅目光。喺極度細少嘅玻璃櫃中，放住八個異常巨大嘅Pizza，成個構圖相當得意。呢個車軚咁大嘅Pizza做團購，正係試味嘅好機會。谷旁$25可以買到12吋特大薄餅一件同飲品一杯。
夏威夷薄餅 ($35，團購價$25)、燒雞肉薄餅 ($35，團購價$25)
比薩實在太大件，無能力影到四正嘅相，惟有借Po谷旁張宣傳相。完整一個比薩有貨櫃車車軚咁大，直徑足足有24吋長。團購餐$25包一件裝薄餅，份量都唔小野，係一個大紙碟都裝唔晒嘅12吋長三角形。柯打後，店員將Pizza放入焗爐翻熱，再將Pizza放喺大紙碟上，再要對摺先可以放入紙袋。拎上手非常有重量，真係份量十足。
薄餅底唔算厚，但質地尚算鬆軟，部份位置比較香脆。不過最吸引人嘅，係表層嘅材料。內餡份量十足，鋪滿半溶化嘅芝士，散發住誘人嘅香氣。蕃茄醬酸酸甜甜，加上濃郁嘅水牛芝士，味道已經好正。夏威夷薄餅仲有有火腿、甜蜜蜜嘅菠蘿，非常清甜開胃。而燒雞肉薄餅有大大件燒雞、洋蔥、蕃茄粒、青椒粒等，材料非常豐富，啖啖肉。
兩款特大巨型比薩兼覓十足，而且味道都唔錯，材料豐富，醬汁又夠多。食一件已經夠做午餐，非常飽肚，$25抵食。得閒行過都可以買件當做lunch呀。不過最衰就係，只得外賣，買完之後，要搵個商場冷氣位先得有開餐。