荔枝角 20/7/2026 16:30
近排幾鍾意呢間外賣丼飯店，性價比高，整體份量十足，外賣之選。
咖喱吉列豬扒飯 $52﹕豬扒金黃脆卜卜，咖喱汁係日式風味，味道濃郁，充滿蔬果香甜，質地濃稠，微微辣度岩岩好，撈飯就最岩。
滑蛋照燒雞扒牛肉丼 $60﹕雙拼飯雙重享受！面頭嘅滑蛋半熟狀態，入口即化，仲有淡淡嘅日式甜醬油香。雞肉外皮微脆，肉質鮮嫩多汁。牛肉肥瘦適中，口感奶滑，灑左少少七味粉，更加惹味。
胡麻手撕雞蕎麥麵 $54﹕清新嘅一味，手撕雞肉質嫩滑，充滿雞油香，撈埋濃郁醇厚嘅胡麻醬，真係好開胃。蕎麥麵口感爽滑有彈性，吸晒胡麻醬汁之餘，仲帶有淡淡嘅蕎麥清香。再加上青瓜絲，整體配搭非常清爽，唔會覺得好膩，夏天食就最岩。
日式炸餃子 $29﹕五大隻，外皮炸到金黃酥脆夠香口。入面嘅豬肉同菜餡保持到豐富肉汁，沾埋微酸嘅日式餃子醋，惹味又開胃。
旺角 11/7/2026 13:30
鴛鴦鰻魚丼飯 $98﹕賣相靚到不得了，天婦羅新鮮即炸，非常香脆，唔算油膩。有一大片蒲燒鰻魚，仲有鰻魚天羅婦，一次過滿足晒兩個願望。蒲燒鰻魚沾滿醬汁，非常油亮，魚肉厚實質感嫩滑，醬汁甜中帶甜，仲有少少炭香味。鰻魚天婦羅係另一重驚喜，鰻魚外皮金黃酥脆，內裏鰻魚肉依然嫩滑多汁，香濃惹味。仲有整到花形嘅炸金菇，菇味鮮甜，味道非常不錯。白飯吸滿晒鰻魚醬汁，越食越停唔到口。
自選天婦羅定食配鰹魚湯蕎麥麵 $153﹕自選天婦羅揀左幾款海鮮料，有夠豪華。帶子天婦羅飽滿圓潤，滑嫰鮮甜。珍寶蟹柳天婦羅非常粗壯一大條，炸漿薄薄，蟹柳非常鮮甜多汁。松葉蟹鉗鮮嫩幼滑，蟹肉鮮味爆發。黑虎蝦爽口彈牙，食得出非常新鮮。每款海鮮料都鮮甜十足。鰹魚湯蕎麥麵湯色清澈金黃，陣陣鰹魚嘅鮮香同昆布嘅香氣，味道鮮甜清潤。蕎麥麵爽滑彈牙，麥香十足，清爽解膩，絕對係天婦羅嘅最佳配搭。
炸菠蘿海鹽雪糕 $28﹕菠蘿炸到金黃香脆，仲暖笠笠，超級鮮甜多汁，上面放左一球凍冰冰嘅海鹽雪糕，奶味香濃，食得出海鹽咸咸地，一熱一凍，冰火交融，超正!
九龍灣 13/6/2026 16:00
日式咖哩吉列豬扒蛋蓋飯 $62: 咖哩汁濃稠香醇，甜中帶少少辛香，吉列豬扒炸到脆卜卜，外皮夠晒香口，加上滑蛋滑流，蛋黃勁夠滑順，蛋香完美包裹住吉列豬扒同白飯，再溝埋濃郁咖哩汁，撈飯超正。
照燒雞扒配胡麻醬烏冬 $57: 雞扒煎到外皮金黃油亮，照燒醬甜甜地中帶鹹，雞肉腍滑多汁，啖啖惹味。烏冬本身煙韌爽滑，最正係嗰個胡麻醬，香濃幼滑，啖啖都食到芝麻嘅醇厚。
滑蛋照燒雞扒牛肉雙拼丼 $60: 一碗食到雞同牛兩款肉，抵食又滿足；雞肉腍滑多汁，牛肉肥瘦相間，咬落彈牙又juicy，最正係嗰滑溜溜嘅滑蛋，蛋液半凝固，蛋香完美包裹住雞扒、牛肉同白飯。
日式炸餃子 $29: 底部煎到金黃帶脆，入面肉餡鮮甜爆汁，蘸少少醋同醬油更加開胃。
大埔 7/6/2026 17:00
點齊幾款人氣日式丼飯加小食。
壽喜燒牛肉飯 $57: 牛肉片燜到完全入味，壽喜燒醬汁甜鹹平衡，醬油同糖嘅比例剛剛好，牛肉腍滑多汁，肥瘦相間，再加埋焾身洋蔥嘅天然清甜，白飯吸滿晒精華。
滑蛋鰻魚丼 $66: 份量十足，滑蛋上面有大半條鰻魚。鰻魚肥美油潤，肉質軟綿，蒲燒汁味道香甜。半凝固嘅滑蛋入口幼滑，蛋味香濃，加上鰻魚汁送飯非常正。
滑蛋雙拼雞扒牛肉丼 $60:一碗食到雞同牛兩款肉，雞扒煎到外皮微微帶焦香，咬落嫩滑唔柴，牛肉就鮮嫩多汁，兩款肉鋪上嫩滑滑蛋，鹹香惹味。
日式炸餃子 $29: 炸到金黃帶脆，餃皮薄脆，入面肉餡鮮甜爆汁，肉香夠晒足，蘸少少醋同醬油更加開胃。
旺角 6/6/2026 13:30
蒲燒鰻魚飯定食$88﹕賣相靚，鰻魚舖滿整碗飯面，蒲燒醬汁油亮，鰻魚肉質肥美厚實，入面非常嫩滑，完全無腥味，鰻魚有豐腴嘅油脂香。蒲燒醬汁甜中帶鹹，最正係醬汁滲入埋底層嘅白飯，粒粒飯都吸滿晒鰻魚同醬汁嘅精華。
今次試咗自選天婦羅豚骨湯蕎麥麵$30，最正係可以自己揀料，今次就一次過豪晒，揀齊黑毛和牛 $52、穴子$24、珍寶蟹柳$20、鮮帶子$20、鰻魚$20、帆立貝$14同杏鮑菇$8，陣容真係非常華麗。豚骨湯底鮮甜，蕎麥麵本身就煙韌爽彈，淡淡嘅蕎麥香。每件天婦羅都炸到外層金黃酥脆，個漿炸得薄而脆，黑毛和牛一咬落去油脂即刻散開，嫩滑又香口；穴子炸完依然保持鬆軟嫩滑鮮甜；珍寶蟹柳爽口彈牙；鮮帶子同帆立貝鮮甜，外脆內裡仍然飽滿多汁；鰻魚有驚喜，肥美油潤，本身已有蒲燒汁，炸左更好味﹔杏鮑菇都炸得外脆內嫩，啖啖菇香爆汁。加多兩支日本汽水，午市無加一，超滿足!
深圳華強 24/5/2026 11:00
點評換領60元代金券兩張，可以叫三碗麵，埋單補5元。
叉燒味噌拌麵 36元﹕簡簡單單，味噌醬好惹味，醬汁緊緊包住麵條，入口幾順滑，味道濃郁得嚟又唔會太鹹。味噌本身有種深沉嘅鹹鮮味，叉燒質帶少少油香，幾嫰滑，麵條本身保持到彈口，都非常掛汁，不錯。
紅油肉沫擔擔拌麵 32元﹕紅油一拌開，香辣味即刻出晒嚟，再滲出少少麻辣味。肉沫細碎入味，調味鹹香，拌埋麵一齊食可以增加口感，麵條掛汁能力幾好，紅油同醬香沾滿麵條，不錯。
墨王叉燒拉麵 49元 + 蛋8元，第一感覺係賣相幾吸引。湯底色澤深濃，配上大片叉燒、拉麵同溏心蛋。味道明顯偏濃郁，入口有豐厚嘅鹹香，同時帶住油脂香氣，口感幼滑。叉燒亦係成碗麵嘅重點。肉片份量夠有誠意，肥瘦分布如果處理得好，入口會同時食到肉香同油潤感。拉麵硬度適中，口感都幾彈牙，掛湯不錯，每啖麵都沾滿濃湯。溏心蛋味道入味，軟滑濃郁，相當不錯。
