馬鞍山 24/3/2026 12:00
炙燒慢煮厚牛舌丼 $53﹕第一堂食堂食，賣相極討好! 厚切牛舌四大片，肉質變得軟嫩，爽爽地，仲有肉汁。牛味滿滿，仲非常入味。配上大量超超洋蔥同紫菜，超級好送飯嘅。日本珍珠米煮得粒粒分明，口感煙韌彈牙。熱辣辣嘅飯粒完美吸收晒牛舌嘅脂香同埋惹味嘅特製燒汁，鹹甜比例控制得啱啱好。跟餐仲有味噌湯同沙律，超級抵食!
馬鞍山 25/2/2026 12:00
牛胸腹定食 $98﹕肉片色澤鮮明，肥瘦比例極之平均，雪花紋理相當靚。將牛胸腹放上高溫嘅烤爐，即刻發出誘人嘅「滋滋」聲，陣陣牛脂香氣撲鼻而來。燒到表面微焦就可以夾起，大啖咬落去，肉質極之軟腍多汁。豐盈嘅油脂喺口腔入面瞬間溶化，牛味濃郁得嚟完全唔會覺得嚡口，口感極之細膩。將燒到熱辣辣、微焦惹味嘅牛胸腹沾滿餐廳特製嘅燒肉醬汁，然後直接鋪喺白飯上面一齊食。醬汁嘅微甜同牛肉嘅甘香完美結合，油香滲透落每粒米飯入面，非常惹味。定食仲有麵豉湯、沙律，豐富。
太子 21/3/2026 13:30
濃蝦湯拉麵 $110﹕一上枱已經聞到極之香濃嘅烤蝦味，鮮橙湯底非常濃郁，入口啖啖都係蝦嘅鮮甜精華，鮮味十足。麵條掛湯能力極高，咬落去煙韌彈牙。最正係加埋佢哋嘅「溏心蛋」，蛋白滷得極之入味，一切開入面個蛋黃呈完美嘅半流心狀態，軟滑無比。不得不提入面嘅叉燒肉，叉燒大大片，肉味香濃，適量油花入口軟腍，吸盡蝦湯精華，鮮味更突出。
雞白湯拉麵 $110同樣令人充滿驚喜。奶白色嘅湯底質地好似忌廉咁幼滑，飲落去充滿醇厚嘅雞肉鮮香，濃郁得嚟又完全唔會覺得漏。大廚將火候控制得好好，配埋極之嫩滑嘅肉片，肉質軟腍多汁。熱辣辣咁連湯帶麵大啖食落去，個胃即刻覺得好舒服，有一種被療癒嘅溫暖感。
炸雞 $28﹕炸雞大大件，炸到金黃酥脆，入面嘅雞肉依然保持嫩滑多汁。
冷萃八女煎茶 ($45)呢款冷萃茶帶有極之清新嘅綠茶回甘，茶湯清澈透亮，完全無半點苦澀味。冰涼透心嘅茶香瞬間沖走晒炸物嘅油膩感。另一杯凍茉莉拿鐵 ($40)，茉莉花嘅清香同香滑嘅牛奶完美融合，口感極之幼滑，淡淡嘅花香喺口腔入面慢慢散發出嚟。
估唔到拉麵店做甜品都相當出色，經典嘅焦糖布甸 ($40) 質地極之滑溜，入口即化，滿滿雲尼拿籽食得出真材實料，最出色係面頭嗰層特製焦糖醬，甜中帶住微微嘅焦苦味，完美中和咗蛋香布甸嘅甜膩。開心果巴斯克 $60 質地綿密軟滑，濃郁嘅忌廉芝士同醇厚嘅開心果堅果香氣非常夾，開心果嘅味道極之突出而且用料十足。
總括嚟講，呢度拉麵都算唔錯，甜品更加充滿驚喜又夠高質。
旺角 28/2/2026 14:00
鰻魚拼牛肉飯 $62
飯面鋪滿油潤亮澤嘅蒲燒鰻魚，陣陣醬油香氣，魚油甘香，甜鹹適中嘅蒲燒醬汁，撈飯超正。牛肉片切得夠薄，口感軟腍入味，而且肉汁豐富，充滿牛脂香氣。滿滿日式醬油同洋蔥香甜，超滿足。
肥牛豚骨鍋 $60
呢度嘅湯底夠晒濃郁，味道香甜。主角牛肉份量唔少，牛肉切得薄薄哋，肥瘦分佈平均。將牛肉放落滾湯度輕輕拖兩下，肉質食落非常軟腍嫩滑。火鍋嘅配料都好豐富，有大大件蟹柳、金針菇、鮮甜嘅蔬菜、嫩滑豆腐。蔬菜索滿晒湯底嘅精華，惹味到極，最鍾意超甜粟米，爆多汁，淨係食配料都已經好滿足。
絕對係性價比極高嘅之選，價格極之親民。
旺角 21/2/2026 13:30
自選天婦羅定食 $116﹕自選彈性高，鍾意食乜就叫乜。一上枱見到一大碟天婦羅，賣相已經好吸引。天婦羅穴子真係成餐飯嘅亮點，條穴子長到隻碟都裝唔晒！炸漿薄脆，穴子肉質細嫩綿密，魚油香氣豐富。珍寶蟹柳份量十足，一咬開係絲絲分明嘅蟹肉質感，鮮甜多汁，炸過之後更加香口。天婦羅帶子係半生熟狀態，外層酥脆，入面依然保持刺身級嘅軟嫩鮮甜，火候控制得啱啱好。至於黑虎蝦，肉質爽口彈牙，蝦味濃郁。選擇配上冷酢橘烏冬，湯底清澈，入口帶有淡淡嘅鰹魚鮮味，最正係酢橘嘅酸香非常突出，清新醒神，烏冬口感極之煙韌彈牙，掛湯力強，雪得夠凍，夠晒清爽，正好中和天婦羅嘅油膩感，完美。
蒲燒鰻魚丼 $88﹕絕對係經典中嘅經典，一大塊厚肉嘅鰻魚鋪滿喺飯面，表面燒到焦糖化，油潤亮澤，賣相非常吸引。用筷子輕輕一夾，鰻魚肉質極之鬆軟肥美，入口即化。蒲燒醬汁調得恰到好處，甜鹹適中，撈飯一流。再飲啖麵豉湯，味道濃郁，充滿豆香，就係一餐簡單而又充滿幸福感嘅享受。
雞皮餃子 $48﹕將傳統餃子皮換成雞皮，將免治雞肉餡包住再拎去炸，超驚喜。外皮金黃香脆，非常誘人，滿口都係雞油嘅甘香，內裡嘅雞肉餡料鮮嫩多汁，沾少少醋非常好食，比起普通餃子惹味得多。
紫薯紅豆豆腐雪糕 $38﹕豆腐雪糕嘅口感綿密，豆味非常突出，甜度適中，感覺好清新。紫薯天婦羅，香甜軟糯，而紅豆蓉就煮得粒綿密。將三樣嘢一齊食，唔會太甜膩，充滿日式風情，為整餐飯畫上一個清新又滿足嘅句號。
最後叫多一支提子汽水 $10，完美。
價錢唔貴，食物高質，值得再來。
福田口岸 1/2/2026 19:00
開心果芝士蛋糕 49元﹕蛋糕嘅質地極之輕盈軟綿，切開嗰陣可以清晰感覺到充滿空氣感。今次呢款係開心果口味，本身蛋糕已有淡淡嘅開心果味，中間仲有一層開心果醬，堅果嘅醇厚香氣同忌廉芝士嘅微酸完美融合，味道極之平衡，味道唔太甜。面頭仲開心果杜拜朱古力碎，令到整體口感層次更加豐富。
九龍灣 25/1/2026 18:00
紅酒燴厚切牛舌蛋包飯 $86﹕牛舌份量多，牛舌切得極之厚身，有驚喜。牛舌炆到極之軟腍入味，輕輕一咬就喺口腔入面化開，完全無半點韌度。配埋下面嗰層滑溜嘅半熟蛋，紅酒醬汁嘅微酸同濃郁蛋香完美融合，口感層次極之豐富，非常下飯。
黑椒牛柳配野菜丼 $88﹕牛柳用鐵板送上，熱辣辣，煎得極之香口，肉質鮮嫩多汁，牛味濃郁。黑椒醬汁調配得惹味，微微嘅辛辣感，絕對係送飯一流嘅配搭。最抵讚係加咗唔少新鮮野菜，翠綠清甜又爽脆，完美中和咗黑椒牛柳嘅厚重肉感。
唐揚炸雞豚骨湯拉麵 $68﹕豚骨湯底濃郁呈奶白色，入口鮮甜醇厚。拉麵麵條煙韌彈牙，掛湯能力高。即炸嘅唐揚炸雞，外皮炸到金黃酥脆，咬落去肉汁四溢，雞肉嫩滑無比，外脆內軟。
每個主食跟埋飲品，美味不錯，抵食!
