旺角 30/5/2026 13:30
經過旺角試吓「PHO HOME」，呢度主打越南風味嘅餐廳。二人餐$208。
香茅豬扒湯檬﹕個湯底好清澈鮮甜，檬粉幾幼滑。豬扒醃得非常入味，烤到表面微微焦香，肉質唔乾，香茅香氣。
生熟牛肉湯河﹕骨湯底香濃，鮮味好突出。熟牛肉片腍滑入味，而生牛肉片就放入滾燙湯底度輕輕燙一燙，肉質極之嫩滑，帶點粉嫩，牛味新鮮又清甜。湯河本身爽滑有彈性。
香茅雞翼﹕有驚喜，雞翼大大隻，醃得夠入味，外皮金黃酥脆，入面嘅雞肉就保持住嫩滑多汁，滿滿香茅同香草嘅香氣。
飲品揀左椰汁三色冰﹕椰汁奶香濃郁滑溜，底層嘅三色配料各有口感，軟糯嘅啫喱條條、綿密嘅紅豆，冰涼透心，甜度啱啱好，清甜唔漏。
餐廳細細，座位有啲迫。
沙田 17/5/2026 18:00
石窩蛋白黃咖喱豬頸肉配黃薑飯 $116: 一上枱已經有陣陣香料味同咖喱香撲出嚟。黃咖喱味道比一般重辣型咖喱柔和，入口先感受到椰香同香料香氣，加入蛋白，辣味更溫和。豬頸肉煎得香，加上綿綿嘅薯仔，同咖喱汁拌埋一齊食特別夾，黃薑飯本身味道好香，送飯一流。
海南雞脾椰汁酸湯檬粉 $108: 湯底有椰汁順滑，滲出酸香，味道清爽。檬粉幼滑順口，索晒湯汁。雞脾肉份量勁足，肉質嫩滑。
小食拼盤 $149: 一次過食到幾款小食，蒸粉包外皮帶少少黏糯感，肉碎內餡豐富。手撕雞紙卷就勝在外層夠薄，配料包得結實，咬落去層次分明，手撕雞調味幾香。豬頸肉燒到微微焦香，食落香口但唔會太膩。越式春卷外皮炸得香脆，內餡勁足料。
椰子沙冰 $43: 入口冰凍綿滑，椰香自然，甜度唔算高，非常清涼。
龍眼梳打 $36: 龍眼甜味自然，帶少少果香，配上梳打嘅氣泡感，整體感覺清爽。
粉嶺中心 3/4/2026 14:00
椰香咖哩牛腩煲 $70﹕熱辣辣上枱，陣陣香濃嘅咖哩香氣同椰奶香氣。咖哩汁有香滑嘅椰汁，完美中和咗咖哩本身嘅辛辣感，令到個汁變得極之綿滑濃郁。牛腩炆得極之軟腍入味，牛筋膠質豐盈又軟滑。將滿滿嘅咖哩汁淋上熱辣辣嘅白飯度，超好送飯。
燒豬頸肉越式撈檬 $49﹕豬頸肉厚切燒到外層金黃微焦，鎖住晒入面豐富嘅肉汁，肉質爽口彈牙，有滿滿炭燒香氣。配埋底層清涼爽滑嘅檬粉、新鮮翠綠嘅生菜同青瓜絲，口感層次極之豐富。最重要係淋上酸酸甜甜嘅特製魚露，酸酸甜甜帶微辣，中和咗豬頸肉嘅油膩感。一凍一熱、一爽一軟嘅配搭極之開胃。
斑斕咖央多士 $31﹕多士烘得極之金黃香脆，咬落去發出清脆嘅索索聲。入面搽滿極度濃厚嘅斑斕咖央醬，夾埋一塊厚身嘅冰凍牛油。斑斕嘅香味同椰奶嘅微甜，加上半溶牛油香，冰火交融嘅口感強烈。
越式炸春卷 $26﹕炸春卷絕對係必點嘅經典小食，春卷炸得極之金黃酥脆，唔會覺得過分油膩。入面嘅餡料非常足料，滿滿嘅豬肉碎、木耳絲同粉絲，用新鮮爽脆嘅生菜包住件熱辣辣嘅春卷，再點埋酸酸甜甜嘅特製魚露一齊食。
越式扎肉蒸粉包 $26﹕粉包外皮晶瑩剔透，食落極之滑溜軟糯，充滿住淡淡嘅天然米香。入面包住炒得極之惹味嘅肉碎同沙葛，面頭灑滿炸得金黃香脆嘅乾蔥碎。上面有片厚切越式扎肉，肉質爽口彈牙，帶黑胡椒香氣。淋上少少魚露提鮮，味道清爽。
炭燒牛肉串 $26﹕牛肉串燒到外層微微焦香，鎖住入面豐富嘅肉汁，牛肉極之軟嫩多汁，香茅同蒜香非常入味，沾上微辣沙嗲汁，好惹味。
椰汁冰 $12﹕椰子香氣濃郁醇厚，質感順滑，最重要係夠晒冰凍，消暑解膩。
沙田 14/12/2025 18:00
鐵板法式牛粒配白飯 $113﹕成個鐵板盛上，滋滋作響，夠晒熱辣辣。牛粒份量好足，每一粒都煎到表面帶少少焦香，內裡依然保持住粉嫩狀態，肉汁豐富，口感嫩滑又有嚼勁，唔會太韌。個醬汁調得啱啱好，夠香濃甜香，帶微辣，配上洋蔥同青椒等，索晒啲汁，撈埋白飯一齊食超正。
火車頭粉絲煲 $156﹕今次揀左雞湯底，配料超級豐富，包括牛丸、生牛肉、牛筋同烤牛肉。成個煲一上枱熱辣辣，生牛肉切得夠薄，放入熱湯輕輕灼一灼，入口極之嫩滑，牛味好濃。烤牛肉帶有微微嘅焦香，肉質比起生牛肉有嚼勁少少，食落去好惹味。牛丸爽口彈牙，一咬爆汁出。牛筋炆得非常軟腍入味，充滿膠質。
海南雞配黃薑飯 $79﹕賣相吸引，雞肉切得好靚，有光澤。雞皮爽口彈牙，唔肥膩，雞肉嫩滑到不得了。呢度嘅油飯粒粒分明，充滿雞油香、香茅味同椰香，但食落去又唔會覺得好油，加上辣椒醬酸辣開胃，正!
椰汁拉茶紅豆冰﹕底層係滿滿嘅紅豆，中間係椰汁味奶茶，茶香之餘，仲有好濃郁嘅椰香，茶底夠厚，無俾椰汁蓋過。紅豆煮得好腍身，起晒沙，每一啖都充滿豆香，甜度啱啱好。
旺角 12/7/2025 13:30
今日來旺角午餐，見到越男仔。之前喺沙田食過實在太鍾意佢個蕃茄湯。今次就叫一份蕃茄湯檬！
牛豬番茄湯檬粉 $93: 呢個番茄湯實在太好味，酸甜濃厚嘅番茄湯底，非常新鮮，仲有啖啖蕃茄肉。檬粉米香味濃，吸收晒蕃茄湯嘅味道，好味！材料勁豐富，熟牛、烤牛肉、豬頸肉同豬扒四款。薄切牛肉片吸收晒番茄香味，烤牛調味濃郁，鹹香味，豬頸肉爽口，豬扒夠鬆軟。份量十足，超級飽。
黑糖無骨鳳爪沙律﹕呢款鳳爪比平時食嘅越式鳳爪多咗一份香甜，相信就係黑糖嘅味道，味道更為濃郁，仍然有平時食開嘅酸酸甜甜，再加丁點微辣，非常開胃。沙律有好多新鮮蔬菜，加咗調味，酸甜清爽。
椒鹽脆蛋魚柳：魚柳炸得金黃酥脆，魚肉鮮嫩柔軟，加上香濃嘅椒鹽調味，炸蒜末同辣椒碎調味適中，鹹香與微辣，非常吸引，香味十足。還好魚柳唔算油膩，非常不錯。
雙蝦拼滑雞配椰汁酸湯檬粉 $138 ：呢個湯底非常特別，本身湯底有雞湯嘅香甜，而且椰香味濃郁，仲帶一點酸醋，非常開胃清爽，又夠特別。搭配兩隻大蝦，烤得微焦，蝦肉新鮮彈牙，食得出鮮蝦嘅香甜。仲有唔少件滑雞，吸收晒椰香味湯底，非常有東南亞特色。
鮮水果茶 跟餐$23: 清涼嘅果茶，加咗大量新鮮菠蘿，茶香配上菠蘿嘅酸甜清香，超級解渴，陣陣冰爽。
越男仔@沙田 6/4/2025 18:30
順化蕃茄紅酒豬扒 $128 配大脆包 $38
番茄豬扒一個鑊仔送上，搭配住金黃酥脆嘅大脆包，賣相吸引。豬扒煎至焦香但仍然保持住肉汁，口感嫩滑。加入滿滿蕃茄，帶點酸甜同微微酒香，呢個醬汁絕對值得大讚！食的出新鮮蕃茄嘅酸甜味，非常濃郁。而大脆包外皮烤得金黃，輕輕一切就脆裂，外皮脆口但內裡非常鬆軟有彈性。撕下一塊用嚟沾蕃茄醬，醬汁滲入麵包裡，非常好味。
金菠蘿蕃茄海鮮焗黃薑飯 $123
以半個新鮮菠蘿盛裝而焗飯，菠蘿焗得有些微焦，上枱已聞到陣陣菠蘿香氣。飯面係大大隻新鮮大蝦，肉質鮮甜爽口。但除此之外，就係一兩件魷魚圈，無乜其他海鮮料。加上蕃茄醬汁多一份酸甜。一匙舀起新鮮熱辣嘅黃薑飯，米粒粒粒分明，色澤金黃帶光澤，散發住濃郁香料味同椰香味，味道濃郁。菠蘿汁嘅清新果香滲透飯中，非常開胃。
三色雞翼拼盤 $108
賣相靚，三款雞翼都大大隻，炸到金黃酥脆，裏面雞肉仍然多汁嫩滑。三種特色雞翼各有千秋。蒜香牛油雞翼表層油亮，牛油嘅香氣滲入肉裏，鹽香味同蒜香味平衡。金蒜雞翼好似除左金蒜仲加左咸蛋黃，味道咸香濃郁，每啖都有沙沙嘅感覺。越式蒜椒雞翼鮮橙紅色，濃厚嘅蒜香混合辣椒，帶出濃烈嘅辛香。
龍眼梳打冰 $35
今次似呢款龍眼蜜加上梳打水。龍眼蜜自然甜香，蜂蜜嘅金黃色，粒粒龍眼肉甜甜蜜蜜，加入梳打水，冒出嘅小氣泡，冰涼透心，非常清爽。
龍眼花蜜茶 $32
埋單$510，感覺質素不及上次。
越男仔@沙田 12/1/2025 18:30
沙田圍呢度其實都好多餐廳，今日食呢間越南仔，餐廳裝修充滿着好多玩味嘅佈置。
紅蕃茄火車頭煲 $155
天氣凍叫咗個火車頭煲，一上枱已經非常豪華。濃郁嘅蕃茄湯基底，酸酸甜甜，用料十足，食得出好多新鮮蕃茄肉，豆角，洋蔥等。火鍋材料非常豐富，包括牛肉片、牛筋、牛丸等。牛肉片嫩滑多汁，牛筋膠質滿滿，牛丸非常彈牙又爆汁。加$8加配黃薑飯絕對值得。黃薑味香濃，仲食得出好香嘅香茅同埋椰奶味。淋上濃郁嘅番茄湯汁，小朋友都胃口大開。天氣涼涼哋，食呢個熱辣辣嘅湯鍋實在非常正斗。
蒜蓉牛油海南雞脾撈金邊粉 $98
主角海南雞脾非常嫩滑，皮肉均稱，上面淋上蒜蓉牛油汁，濃郁而不過膩。金邊粉非常爽口彈牙，米味香濃，仲加咗好多新鮮蔬菜，好清爽。撈金邊粉嘅靈魂醬汁魚露，酸酸甜甜帶微辣，咸香味濃，清爽解膩，可算係食過最高質嘅撈金邊粉。
三色檬紙卷拼盤 $138
賣相一流，色彩繽紛。拼盤有三款特色檬紙卷，每款嘅基本元素係檬紙加滿滿嘅蔬菜同檬粉，蔬菜的確好新鮮。牛炸醬帶著燒烤香氣，牛肉軟嫩帶微辣。煙三文魚咸鮮味十足。手撕雞一絲絲肉質細嫩多汁，感覺健康又清爽。整道菜色彩鮮豔，好睇又好食。
椰汁拉茶紅豆冰 $36
以香濃嘅椰汁為基底，口感濃郁順滑，加上濃郁嘅拉茶。底下嘅紅豆煮至軟糯，帶天然香甜味道。飲品層感豐富，好飽足。
鮮菠蘿梳打冰 $35
另一款清新怡人嘅特飲，新鮮菠蘿酸甜適中。最驚喜就係原玻璃樽梳打，慢慢倒入菠蘿冰裏，菠蘿嘅自然酸甜味同梳打水非常夾，氣泡又夠晒多，非常清新，非常解渴。
餐點單價其實唔算平，全單$517，但係菜式份量同質素對得住價錢。無論係賣相，食物嘅味道，都食得出非常正宗講究。感覺上小店係自家經營，老闆及店員都非常之親切有禮，亦都好體貼小朋友嘅需要。好難得今時今日仲有咁嘅服務態度，全餐飯都係非常之滿足。
