馬鞍山親子餐廳

馬鞍山親子餐廳

疫情期間太少出街玩。今日趁小公主生日,去親子餐廳盡興一下。
預約左11:00 - 13:45呢場,只設最低餐飲消費。成人最低消費$180,3歲或以上$80,3歲以下免費。即係我地有$440 budget。

今日有套餐,$138包主菜及餐湯。揀左小食拼盆。 
有黑松露薯條、炸花枝丸、津蔥圈。份量都唔少,味道正正常常啦。

兒童套餐 $128,可以揀一款特式便當,揀左炸雞。賣相幾得意,深得小朋友歡心。

菠蘿香腸星星薄餅 $98,造星相當吸引,配料都豐富。

焗葡國雞飯 $108

味道正常,就唔好期望太多。玩至上,食都係其次,食得飽,ok既。

餐廳唔算大,就非常BB Friendly,內設洗手、廁所,BB椅。玩樂區有波波池、滑梯、繩網、模式超市廚房等。。。就小朋友黎講已夠好玩。

炑八韓烤親子餐廳

炑八韓烤親子餐廳@觀塘
5/5/2019 13:00

新開親子餐廳賣廣告賣得咁行,搞到我都心思思趁下墟。
餐廳位於觀塘,地點實在太唔就腳,出左地鐵站仲要行近十五分鐘,唔係有什麼特別係絕對唔會行過黎。約左5月5日一點場,提早少少到已見一家大細排隊等入場。

一入場就見到兒童遊樂區,靚係的確幾靚,但地方唔算大,波波池、廚房玩具等,總算應有盡有。入場第一件事就係幫小朋友租韓服,兩歲碼嘅碼岩岩好。韓服仍好新淨,影相幾靚。

睇睇餐牌,之前廣告所賣嘅套餐已經瘋狂加價,睇落唔太抵食,最後決定散叫幾種過下口癮。另外,隨餐奉送前菜尤其泡菜係不錯的。

甕配韓牛五花肉 $168
只係叫左一款燒烤食品,兩大條五花肉,調味不錯的。燒烤來講,反而最突出係爐邊泡菜蛋同芝士粟米,無限任添,而且味道非常好味,絕對係MVP之選。

蜂蜜牛油炸雞半隻 $88
炸得幾香口,仍有肉汁,味道還好,薯條都非常新鮮熱辣。

韓式炒粉絲 $78
配料夠多,味道不鑊,幾有鑊氣,又夠大碟,抵食。


朱古力蛋糕冰沫 $68
賣相討好,非常澎湃,材料都好多。牛奶味冰沬好幼細,加朱古力配搭一流。再加埋極邪惡嘅朱古力醬。

荔枝梳打 $36
味道是不錯的,也夠大杯。

星期日玩2.5小時,兒童入場費多謝$130,包一份所謂的兒童小食係幾塊餅乾仔。加埋自己落單嘅野食,埋單$630,一家三口連玩連食係可以接受嘅。野食係正確質素,但礙於位置實在太唔方便,而且遊樂區唔算十分大,真係玩一次就夠。

Cafe Moa Moa by Panash

Cafe Moa Moa by Panash@荃灣
30/4/2017 12:00

同BB游完水,就去荃灣廣場搵食。而家帶住BB一定以環境闊落舒適為首要選擇,最後揀左呢間。可能適逢五一假期,12點黎到仲大把位,可以揀張四人圓枱,仲有位放BB車。
睇過餐單後,柯打左一份二人套餐,$238再加一,包括自助麵包、餐湯、餐飲、小食拼盤、意粉、薄餅。

自助麵包放題係呢間餐廳嘅特色。出面有約十款麵包任揀。雖然係普通無餡包,但質素的確不錯。

牛角包必食,好香牛油味,所以非常搶手。北海道牛奶麵包清甜,連BB都好鍾意食。仲有提子包、芝麻包、合桃包、法包、麵包條、牛油小蛋糕等,樣樣味道都唔錯。

小食拼盤有雞翼洋蔥圈薯條,新鮮即炸,份量正常,味道唔錯。

香煎帶子忌廉意大利粉

份量略為少,味道正常。

煙三文魚薄餅

材料幾豐富,味道不錯。
總體黎講,主菜係普通正常,份量偏少正好留多啲空間食麵包,麵包的確唔錯。
環境舒適開揚,非常Baby Friendly,餐廳仲提供三款BB椅任揀。五歲以下小朋友不需附加費,都可以任食麵包。同時段所見,大部份係家庭帶小朋友黎食,小朋友自助出去拎麵包,仲食得好開心。最緊要係無限時任坐,我地可以他他條條坐足兩個鐘。