by admin | 6 月 11, 2026 | Blog, 中菜, 四川菜, 小食, 沙田, 燒烤, 西北菜
沙田 11/6/2026 12:30
今次去咗「小野人串燒」食午餐，滿滿炭烤香味，有驚喜。午餐選擇多，仲可以優惠價追加小食。
大漠燒羊肉串飯 $89﹕配宮廷小茄子，五大串羊肉串份量十足。羊肉串得肥瘦相間，炭烤到外層微微焦香，撒上孜然同辣椒粉，肉質都幾滑，帶點羶味，非常正。加配小野人菠蘿沙冰($16) 夠解膩，沙冰幼滑綿密，酸酸甜甜，超暢快。
台南肉飯 $48﹕賣相不錯，滷肉飯肥瘦相間，滷到入晒味，肥肉部分腍滑得入口即溶，油脂香又唔覺膩，瘦肉入味，最正係滷汁濃稠香醇，鹹中帶甜，撈飯一流。
小野人燒牛肉串 $28﹕肉質細緻鮮嫩，牛味勁香。
台灣香腸 $36﹕香腸大大條，腸衣微焦脆卜卜，中間肉滿滿豬肉餡，肉汁豐富鮮味。
北海道蒜蓉粉絲大扇貝 $57.8﹕新鮮扇貝配上大量香蒜粒烤熟，仲有勁索汁嘅粉絲，超惹味。
烤香滷肥腸 $51.2﹕聞到陣陣炭火香，同埋肥腸膻味，入口滑，脂肪濃厚，油香味十足。
燒嫰雞肉串 $23﹕雞肉烤到外層微微焦香，鎖住滿滿肉汁，仲有青蔥更香。
燒魷魚鬚 $26﹕烤到邊位微微捲起帶少少焦邊，咬落爽脆彈牙，越嚼越有味，調味微甜，不錯。
燒雞脆骨 $23﹕烤到金黃焦香，脆卜卜嘅口感，鹹香調味。
牛舌芯 $23﹕牛舌芯部位本身肉質嫩滑，烤到微脆，入面就嫩滑多汁，肉味濃郁帶油香。
by admin | 6 月 6, 2026 | Blog, 拉麵, 日式料理, 旺角
旺角 6/6/2026 13:30
蒲燒鰻魚飯定食$88﹕賣相靚，鰻魚舖滿整碗飯面，蒲燒醬汁油亮，鰻魚肉質肥美厚實，入面非常嫩滑，完全無腥味，鰻魚有豐腴嘅油脂香。蒲燒醬汁甜中帶鹹，最正係醬汁滲入埋底層嘅白飯，粒粒飯都吸滿晒鰻魚同醬汁嘅精華。
今次試咗自選天婦羅豚骨湯蕎麥麵$30，最正係可以自己揀料，今次就一次過豪晒，揀齊黑毛和牛 $52、穴子$24、珍寶蟹柳$20、鮮帶子$20、鰻魚$20、帆立貝$14同杏鮑菇$8，陣容真係非常華麗。豚骨湯底鮮甜，蕎麥麵本身就煙韌爽彈，淡淡嘅蕎麥香。每件天婦羅都炸到外層金黃酥脆，個漿炸得薄而脆，黑毛和牛一咬落去油脂即刻散開，嫩滑又香口；穴子炸完依然保持鬆軟嫩滑鮮甜；珍寶蟹柳爽口彈牙；鮮帶子同帆立貝鮮甜，外脆內裡仍然飽滿多汁；鰻魚有驚喜，肥美油潤，本身已有蒲燒汁，炸左更好味﹔杏鮑菇都炸得外脆內嫩，啖啖菇香爆汁。加多兩支日本汽水，午市無加一，超滿足!
by admin | 6 月 6, 2026 | Blog, 外賣, 旺角, 港式, 甜品, 麵包
何文田 6/6/2026 12:30
最鍾意呢啲新鮮出爐麵包小店。今次試咗四款甜品，每一款都有驚喜！
花生糯米糍 $6﹕大大粒好吸引，外皮煙韌軟糯，咬落去口感彈滑，入面包住勁澎湃嘅花生碎，甜味適中。
古早味芝士蛋糕 $18﹕質感輕盈細膩，口感綿密如雲，芝士味都幾香濃，食落好順喉。
古早味肉鬆蛋糕 $20﹕鹹甜派甜品嘅代表，蛋糕鬆軟濕潤，配上表面鋪滿嘅香酥肉鬆，鹹香同甜香互相配合，估唔到咁好食。
朱古力心太軟 $12﹕外層蛋糕烤得剛好，輕微脆脆，切開即刻流出濃郁滑潤嘅朱古力漿，非常香甜，勁驚喜。
by admin | 5 月 30, 2026 | Blog, 小食, 越菜, 麵食
旺角 30/5/2026 13:30
經過旺角試吓「PHO HOME」，呢度主打越南風味嘅餐廳。二人餐$208。
香茅豬扒湯檬﹕個湯底好清澈鮮甜，檬粉幾幼滑。豬扒醃得非常入味，烤到表面微微焦香，肉質唔乾，香茅香氣。
生熟牛肉湯河﹕骨湯底香濃，鮮味好突出。熟牛肉片腍滑入味，而生牛肉片就放入滾燙湯底度輕輕燙一燙，肉質極之嫩滑，帶點粉嫩，牛味新鮮又清甜。湯河本身爽滑有彈性。
香茅雞翼﹕有驚喜，雞翼大大隻，醃得夠入味，外皮金黃酥脆，入面嘅雞肉就保持住嫩滑多汁，滿滿香茅同香草嘅香氣。
飲品揀左椰汁三色冰﹕椰汁奶香濃郁滑溜，底層嘅三色配料各有口感，軟糯嘅啫喱條條、綿密嘅紅豆，冰涼透心，甜度啱啱好，清甜唔漏。
餐廳細細，座位有啲迫。
by admin | 5 月 24, 2026 | Blog, 小食, 泰國菜, 深圳
深圳卓悅中心 24/5/2026 16:30
點評積分換單人餐，有飯有飲夠晒下午茶，仲幾好食。
雞肉熟蛋泰國豬油渣打拋飯、泰紅春奶茶﹕雞肉炒得非常入味，帶有濃郁嘅香草氣息，微微辣度恰到好處。配上全熟嘅煎蛋，加左蛋香味，撈飯一流。最大嘅亮點在於加入左泰國豬油渣，金黃酥脆嘅豬油渣增添油脂香氣同脆爽感。配上一標泰式奶茶，濃厚茶香，甜度控制得宜，順滑而不膩，中和打拋雞肉嘅辛辣感。
豬肉流心蛋泰國豬油渣打拋飯、芒果春檸茶﹕賣相勁靚，好有泰式風情。豬肉碎吸滿了鹹香微辣嘅醬汁，肉質軟嫩多汁。最正嘅地方係完美嘅流心蛋，輕輕劃破後，金黃色嘅蛋液緩緩流出包裹住米飯同豬肉，讓整體嘅口感變得滑潤濃郁。酥脆嘅豬油渣提香，非常過癮。飲品最吸引人嘅地方係芒果同檸檬平衡，新鮮芒果濃郁熱帶果香，檸檬微酸，春茶清新香氣。
芒果糯米飯 18元﹕新鮮芒果切得厚實，味道香甜，入口即化，柔嫩多汁，紫糯米微微嚼勁，入味軟腍。加入濃郁嘅椰奶後，滑順嘅油脂感同淡淡嘅鹹香，中和左芒果嘅甜膩，配合得非常好。
打卡送蝦片，香脆，食得出蝦味，微微辣，好香口惹味，仲可以續加。
by admin | 5 月 24, 2026 | Blog, 拉麵, 日式料理, 深圳
深圳華強 24/5/2026 11:00
點評換領60元代金券兩張，可以叫三碗麵，埋單補5元。
叉燒味噌拌麵 36元﹕簡簡單單，味噌醬好惹味，醬汁緊緊包住麵條，入口幾順滑，味道濃郁得嚟又唔會太鹹。味噌本身有種深沉嘅鹹鮮味，叉燒質帶少少油香，幾嫰滑，麵條本身保持到彈口，都非常掛汁，不錯。
紅油肉沫擔擔拌麵 32元﹕紅油一拌開，香辣味即刻出晒嚟，再滲出少少麻辣味。肉沫細碎入味，調味鹹香，拌埋麵一齊食可以增加口感，麵條掛汁能力幾好，紅油同醬香沾滿麵條，不錯。
墨王叉燒拉麵 49元 + 蛋8元，第一感覺係賣相幾吸引。湯底色澤深濃，配上大片叉燒、拉麵同溏心蛋。味道明顯偏濃郁，入口有豐厚嘅鹹香，同時帶住油脂香氣，口感幼滑。叉燒亦係成碗麵嘅重點。肉片份量夠有誠意，肥瘦分布如果處理得好，入口會同時食到肉香同油潤感。拉麵硬度適中，口感都幾彈牙，掛湯不錯，每啖麵都沾滿濃湯。溏心蛋味道入味，軟滑濃郁，相當不錯。
