by admin | 4 月 6, 2026 | 兒童餐, 小食, 深圳, 燒烤, 西北菜, 親子餐廳, 麵包, 麵食
深圳翠竹 6/4/2026 12:00
吃光光牛肉燜飯﹕牛肉炆得軟腍入味，飯粒吸滿晒濃郁嘅肉汁同醬香，軟糯得嚟又唔會太爛，真係超級惹味。
甜蜜蜜香烤雞翅兒童餐配番茄酸湯有機掛麵﹕專為小朋友而設嘅兒童餐非常有心機！擺盤賣相靚。香烤雞翅外皮微脆，肉質嫩滑多汁，味道甜蜜蜜好開胃。配埋番茄酸湯有機掛麵，湯底酸甜濃郁，掛麵煙韌順滑，健康得嚟又好味，小朋友食得超級開心。
羊肉串配烤餅﹕羊肉串燒得香氣四溢，肥瘦均勻，羶味濃郁，孜然香料味極之突出。烤餅熱辣辣、外脆內軟嘅，可以索晒肉汁。
新疆沙灣大盤雞﹕份量十足，雞肉件件厚肉嫩滑，薯仔炆到極之入味。微辣嘅醬汁香濃惹味，配埋煙韌嘅寬麵條掛滿湯汁一齊食，層次豐富。
西貝面筋﹕面筋Q彈有咬口，配埋酸酸辣辣嘅秘製涼拌汁，超級醒胃。裏面仲有爽脆嘅青瓜絲，做前菜一流，食完胃口大開。
鐵板包菜炒粉絲﹕包菜炒得極之爽脆鮮甜，粉絲吸滿晒醬油同蔬菜嘅精華，乾身又惹味，鑊氣十足。
蒙古奶酪餅﹕熱辣辣嘅蒙古奶酪餅，外皮烤得金黃酥脆。一咬開，入面極度澎湃嘅奶酪餡即刻流出嚟，多到可以拉絲，奶香超級濃郁，甜度適中唔會膩。
胡麻油沙蔥炒雞蛋﹕胡麻油嘅獨特香氣非常突出，沙蔥帶有一陣淡淡嘅清香。雞蛋炒得極之滑溜，充滿蛋香。
點評套餐再外加小菜，全單約為500元。
by admin | 3 月 1, 2026 | 中菜, 兒童餐, 深圳, 火鍋, 親子餐廳
深圳卓悅匯 1/3/2026 11:00
又來海底撈慶祝生日。
揀咗番茄湯與三鮮火鍋湯底 ($87)，番茄湯極之濃郁，酸酸甜甜，加埋肉碎真係超級開胃。
揀左幾款肉，「撈派肥牛」肥瘦均勻，放入滾湯淥十幾秒就食得，肉質軟腍多汁。「雪花豬肉片」紋理極之靚，淥熟之後口感爽彈。仲有令人極之驚喜嘅「內蒙草原羔羊肉」，羊肉味甘香濃郁。「暴打魚皮蝦卷」真係極之有驚喜，外層魚皮淥熟之後依然保持微脆煙韌，入面嘅蝦滑鮮甜彈牙，口感層次極之豐富。另一款「勁道牛肉丸」打得超級爽脆彈牙，滿滿肉汁，牛味極之香濃。
「黃金蜂窩炸蛋」超巨型，炸得金黃酥脆，表面佈滿好似蜂窩咁嘅細孔。將佢放落滾燙嘅湯底度淥短短幾秒，吸滿晒濃郁嘅湯汁。「脆貢菜丸子」超級爽脆彈牙，肉汁豐盈，加左貢菜爽脆感。「撈派撈麵」即場表演拉麵。「兒童餐」造型極之可愛，色彩繽紛，食材配搭講究營養均衡，份量啱啱好，仲有禮物。
為壽星準備嘅「生日肥牛蛋糕」。肥牛雪花紋理極之靚，層層疊疊咁砌成一個立體蛋糕嘅形狀，打卡一流！另外仲有一袋生日禮物，店員一齊唱生日歌，非常開心。
呢間店有細細兒童遊樂場，仲可以做兒童美甲，小朋友超開心。
全單300元，情緒價值高。
by admin | 2 月 8, 2026 | 中菜, 兒童餐, 深圳, 火鍋
深圳坂田萬科 8/2/2026 12:00
今次我哋去咗人氣極高嘅「野妹經典火鍋」，最過癮嘅地方，就係「超市自選」嘅點餐模式。行勻成個食材區，睇中邊碟新鮮配料就自己攞，極之有尋寶嘅樂趣。
先叫一個鮮切牛肉二人餐 168元，叫咗「番茄及菇菌雙拌鍋」，番茄湯底熬得極之濃郁，酸酸甜甜超級開胃；而菇菌湯就清甜滋潤，啖啖鮮菇香氣。套餐包括吊龍、匙柄、梅花肉同埋肥牛。吊龍切得厚薄適中，放落滾湯稍微淥幾秒就食得，肉質極之嫩滑多汁。匙柄中間帶條肉筋，咬落去有種獨特嘅微脆口感，肉質緊實。肥牛雪花紋理分佈得均勻，入口腍滑。梅花肉肥瘦適中。
墨魚腸極之爽口彈牙，帶住濃濃嘅墨魚鮮味。鮮蝦滑真材實料，鮮甜爽脆，食得出粒粒鮮甜蝦肉。魚豆腐索晒菇菌湯嘅清甜。四川苕皮質地煙韌軟糯，放落濃郁嘅湯底入面慢慢煮，完美吸收晒湯汁嘅所有精華。滑溜得嚟又帶住極佳嘅嚼勁，絕對係成餐火鍋嘅完美收尾。仲有蔬菜同飲品，非常滿足。
送兩份兒童餐，除左主菜，仲有公仔造型麵包同水果。意式番茄鮮牛肉意麵酸酸甜甜嘅番茄醬汁超級開胃，鮮牛肉切得細細粒，肉質腍滑。另一款蔬菜雞蛋餅材料豐富，融入充滿蛋香嘅煎餅入面。
呢間分店自助枱更豐富，除左有前菜小食，仲有迷你蛋糕、雪耳糖水、冰粉自助，打卡送雪糕球，性價比極高!
by admin | 12 月 21, 2025 | 中菜, 兒童餐, 深圳, 火鍋
深圳中洲灣 21/12/2025 12:00
慫火鍋慶祝生日。湯底揀咗「果蔬清湯」同「濃濃番茄」雙拼湯底。果蔬清湯飲落清甜滋潤，濃濃番茄湯底酸酸甜甜，番茄味超級濃郁厚實。
「原切雪花肥牛」油脂分佈平均，涮幾秒就食得，入口嫩滑，牛脂香即刻爆發喺口腔。「呼倫貝爾草地羔羊卷」羶味濃，質感細膩柔滑、入口即化。加埋大大塊「雞腿肉」，腍滑多汁。「怂廠萌娃套餐」賣相夠晒可愛，食物配搭又營養。
各式小料選擇超多，任你自由調配自己最啱口味。最驚喜係嗰鍋熱辣辣招牌燜飯，米粒索晒湯汁嘅鮮甜精華，煙韌之餘又夠香，每一啖都咁滋味，配埋自家調醬，食到停唔到口。
飲品揀左「廣西茉莉•輕奶綠」茶香淡雅，奶味柔滑又唔膩，啱啱好中和晒火鍋嘅濃味，飲落去清爽又解膩。
最後，「一塊慶祝蛋糕」，芝士順滑唔會太甜太膩，仲有廠工唱跳一齊廢祝生日，完美為成餐飯畫上一個甜蜜句號。
埋單230元左右，價錢唔算貴，值得！
by admin | 12 月 7, 2025 | 兒童餐, 深圳, 韓國菜
深圳KKOne 7/12/2025 17:00
芝士辣牛肉湯飯 34元﹕紅噹噹嘅辣湯面頭鋪滿半融化嘅芝士，賣相極之邪惡。牛肉炆得極之軟腍入味，配埋微辣濃郁嘅湯底，超級惹味。最驚喜嘅係，芝士嘅奶香完美中和咗湯底嘅辣度，令到口感變得更加順滑豐厚。將成碗白飯倒落去拌勻，每一啖飯都掛滿濃郁嘅芝士同辣湯，食落真係暖胃又滿足。
歡喜兒童餐 35元﹕呢份餐配搭得非常有心思，營養均衡之餘，賣相仲極之精緻，即刻吸引住小朋友嘅眼球。食物口味清淡得嚟又唔會覺得寡，份量唔少。肉醬飯惹味香濃，加上紫菜，味道一流。仲有炸魚手指、雞翼、薯仔、蔬菜，仲有玩具。
厚蛋玉子燒 6.9元﹕呢個玉子燒煎得極之厚身，咬落去口感蓬鬆柔軟，層次分明。滿滿嘅蛋香之中帶住微微嘅甜味，內裡仲保持住濕潤多汁，仲有酸酸甜甜千島醬，勁好味。
by admin | 8 月 28, 2025 | 兒童餐, 小食, 沙田, 泰國菜, 甜品, 西餐
沙田 24/8/2025 12:00
泰式忌廉青口配薯條$59﹕熱辣辣嘅青口浸喺淡黃色嘅泰或忌廉醬汁之中。食得出忌廉嘅濃郁奶香，仲有好多香茅、青檸葉、淡淡嘅椰香，帶輕微辣度。醬汁質地順滑，西蘭心紅蘿蔔等煮到腍晒，吸晒湯汁，不錯。主角青口肉質唔算肥美，但都算幾鮮甜，無腥味。搭配著一大份金黃香脆嘅薯條，都算飽足。
燒帶子配意粉及海膽忌廉汁$56﹕海膽忌廉汁有濃郁奶香，食得出少少海膽甘甜味，有咸香海味，醬汁的質地順滑濃稠包著意粉。麵條軟硬度掌握得恰到好處。有幾顆都算大粒嘅帶子，表面煎至金黃微焦，味道幾鮮甜，肉質彈牙。最後仲有菇類做配料。
脆魚手指2件伴粟米、 薯蓉及北歐果味飲品 (免費添飲) $23﹕兒童餐有兩條金黃酥脆嘅魚手指，外脆內軟，無乜腥味。旁邊是一小份色澤鮮黃嘅甜粟米粒，飽滿多汁，最後一球綿密嘅薯蓉。最緊要係搭配北歐果味飲品免費添飲!
鯊魚造型脆皮薄荷黑朱古力新地$16﹕顏值與美味集於一身，雪糕上面仲插著一塊鯊魚尾巴造型黑嘅薄脆，非常值得打卡嘅創意甜品。雪糕底質地極為順滑細膩，入口即化，朱古力味濃郁，食得出甘苦味，亦帶清涼嘅薄荷味，甜度適中。加上朱古力醬冷卻成脆皮，勁正!
