太子 9/5/2026 13:30
「肉香之追求」和牛封門柳壽喜燒 $288、黑安格斯小排 $150
今次去太子試咗八不壽喜燒，整體感覺相當滿足，無論食材質素、配搭，定係用餐氣氛都好正宗。壽喜燒鍋底甜鹹平衡得好，醬油香同淡淡甘甜，愈煮愈入味，每款食材都吸滿精華。
和牛封門柳配黑安格斯小排賣相靚，油花非常均勻。放入壽喜燒湯底輕輕一灼，牛味即刻更突出，和牛封門柳油香濃郁，油脂分布平均，入口柔嫩。黑安格斯牛小排肉質相對結實少少，依然保持嫩滑，牛香濃厚。配料方面，稻庭烏冬 $22 絕對值得一讚。麵條幼滑彈牙，掛汁能力高，吸收咗壽喜燒湯底之後特別惹味，每一啖都帶住甜甜鹹鹹嘅香氣。日本葛絲 $28 口感爽滑，晶瑩剔透，入口順滑。日本蛋 $10 更加係靈魂所在，蛋汁色澤金黃，質感濃稠，用嚟蘸住牛肉食，牛肉變得更滑，亦中和咗壽喜燒嘅濃味，令整體更圓潤。
馬鞍山 20/4/2026 12:00
星期一定食「燒肉拼盤定食」只需要$79，唔洗加一。一碟有齊牛胸腹、豚腩肉同雞腿肉。一擺啲肉落烤爐，一陣陣油脂燒烤嘅焦香，牛胸腹油脂分佈好靚，放落爐輕輕燒一陣已經熟。牛脂甘香，肉質非常腍滑，牛味好濃。豚腩肉最正就係要將表面燒到微微帶焦，逼出多餘嘅油分。咬落去外層微脆，肉質爽彈有咬口。雞腿肉燒到金黃酥脆，鎖住晒入面嘅肉汁，肉質幾嫩滑。各款肉類沾上甜甜嘅燒烤汁就最好味，或者加少少海鹽都唔錯。成個定食除咗有燒肉，仲配埋白飯、湯、沙律，滿足。
馬鞍山 24/3/2026 12:00
炙燒慢煮厚牛舌丼 $53﹕第一堂食堂食，賣相極討好! 厚切牛舌四大片，肉質變得軟嫩，爽爽地，仲有肉汁。牛味滿滿，仲非常入味。配上大量超超洋蔥同紫菜，超級好送飯嘅。日本珍珠米煮得粒粒分明，口感煙韌彈牙。熱辣辣嘅飯粒完美吸收晒牛舌嘅脂香同埋惹味嘅特製燒汁，鹹甜比例控制得啱啱好。跟餐仲有味噌湯同沙律，超級抵食!
馬鞍山 25/2/2026 12:00
牛胸腹定食 $98﹕肉片色澤鮮明，肥瘦比例極之平均，雪花紋理相當靚。將牛胸腹放上高溫嘅烤爐，即刻發出誘人嘅「滋滋」聲，陣陣牛脂香氣撲鼻而來。燒到表面微焦就可以夾起，大啖咬落去，肉質極之軟腍多汁。豐盈嘅油脂喺口腔入面瞬間溶化，牛味濃郁得嚟完全唔會覺得嚡口，口感極之細膩。將燒到熱辣辣、微焦惹味嘅牛胸腹沾滿餐廳特製嘅燒肉醬汁，然後直接鋪喺白飯上面一齊食。醬汁嘅微甜同牛肉嘅甘香完美結合，油香滲透落每粒米飯入面，非常惹味。定食仲有麵豉湯、沙律，豐富。
外賣@福田 1/2/2026 18:00
老太太肥牛拌飯 40元﹕肥牛肉質軟腍幼嫩，醬汁甜甜地非常入味，仲有超多勁甜洋蔥，味道清甜，勁好送飯。
老太太石鍋拌飯 34元﹕飯面舖滿色彩鮮豔嘅爽脆野菜、鮮嫩肉碎同一隻煎得極靚嘅太陽蛋，趁熱將秘製韓式辣醬加落去瘋狂攪拌，辣醬微甜帶辛，極之開胃。肉片相當腍滑，非常入味。將蛋黃拌勻，辣味更加柔和，不錯。
送例湯，仲有韓式前菜，味道不錯，值得再來。
深圳華強北 18/1/2026 12:00
香烤肥鰻雙人餐 158元
燒鰻魚認真驚艷! 鰻魚肉質極之肥美厚身，細火慢烤之下，魚皮變得香脆可口，入面嘅魚肉就保持鮮嫩多汁。搽埋微甜嘅特製醬汁，豐富嘅魚脂香氣加上甜甜嘅醬汁，口感層次極之細膩，真係食過返尋味，可算食過最好食嘅鰻魚。
豬五花燒到外層金黃焦脆，逼出多餘油脂，咬落去爽脆彈牙，油香四溢。肥牛就極之軟腍入味，肉汁豐富。最正嘅食法當然係將熱辣辣嘅烤肉蘸滿秘製韓式醬汁，加埋微酸嘅泡菜同生蒜，用翠綠嘅生菜包住一啖咬落去。蔬菜嘅清甜完美中和咗肉脂嘅厚重感，惹味得令人完全停唔到口。
打卡送香脆秀真菇，兩個帳戶送足兩大碟，炸皮脆脆，中間菇肉腍滑多汁，微微調味已超級好食! 最後仲送兩隻掛飾俾小朋友。
馬鞍山 23/12/2025 18:30
今日叫 RUD 燒肉丼外賣。一份丼飯加埋椰菜同麵豉湯，抵食。
炙燒慢煮厚牛舌丼 $53﹕有驚喜！一打開外賣盒，四大片厚切牛舌份量十足，肉質極之軟腍多汁，表面帶有微微焦香，配埋秘製嘅惹味燒肉汁。珍珠米吸滿晒肉汁精華，加埋爽脆蔥花，非常不錯。
雞肉親子丼 $48﹕雞肉大大件，肉質極之鮮嫩多汁，最精華嘅靈魂絕對係面頭嗰層半熟滑蛋，金黃色嘅蛋液完美包裹住每一件雞肉同埋底層圓潤嘅珍珠米。日式醬汁微甜，帶洋蔥鮮甜，好味。
日式柚子辛辣雞丼 $48﹕雞肉肉質鮮嫩多汁，特製嘅柚子辛辣醬，酸甜清香嘅柚子味完美中和咗微辣嘅刺激感，惹味得嚟完全唔會覺得溜。
沙田新城市廣場 4/8/2025 13:30
踏入八月份生日月，連續幾日約朋友慶祝，第一站係食日本燒肉! 生日食豪啲! 中午黎食有唔同燒肉定食，其實都好抵食。每份定食包括沙津、味噌湯、小食、飲品同甜品。$20 升級白桃乳酸梳打。小食係微辣嘅牛舌粒，口感煙韌實在，微辣夠開胃。
黑毛和牛大判燒盛合 $368﹕非常豪華，高品質嘅一款盛合，可以一次過試到三款唔同部位。。大判燒係大塊切片嘅薄牛肉，鹿兒島A4和牛西冷有好靚油花，脂肪分布均勻，大理石紋理超靚。一向都鍾意A4油脂分布均勻，又唔會過於油膩。薄燒快熟牛肉口感更幼滑，亦能鎖住肉汁，真係入口即溶，充滿濃郁嘅牛肉香氣同油香。唔洗多加醬汁，伴入溫泉蛋味道更柔和，一片已經可以送一碗飯。另外兩款係牛裡腹小排同牛背末脊肉，中文真係唔識啦。食得出一款油脂豐富，口感腍滑應該就係牛五花カルビ。另一款肉質實在，口感較有嚼勁，應該就係里肌肉ロース。
特上牛胸腹肉 $198﹕日文ハラミ即係橫隔膜，纖維豐富，略帶點油花，所以肉質都係咁軟腍，肉味濃郁，帶點油脂的甘香。厚燒可以燒到外面微焦，肉質仍然柔軟，肉汁豐富，牛嘅甜香味更加突出。加左甜甜嘅燒烤醬，好下飯。
餐廳提供三款配醬，一款特調燒肉專用醬，味道香甜﹔一款加入辛香味嘅醬料，味道微辣﹔仲有一款檸檬汁，正好一解牛油嘅油膩感。其實牛肉品質相當好，本身嘅簡單調味已經好足夠，原汁原味。
最後一份豐富甜品，有雲尼拿雪糕糯米糍﹔仲有滑到不得了，又濃味嘅杏仁豆腐，完美!
