深圳中航城 26/4/2026 12:00
今日特登試超人氣嘅「一緒壽喜燒」自助餐。最基本四款肉任食，加上自助火鍋吧任食，點評券成人都係104元，即場買兒童券55元。
壽喜燒湯底夠晒濃郁，醬油嘅鹹香同鮮甜味調得啱啱好，湯底越煮越惹味。重點緊係無限追加嘅高質牛肉，啲牛肩肉同和牛片質素好有驚喜，油花分佈得好靚。自助區都好有誠意，有齊各款新鮮蔬菜、菇類同豆製品，丸類款式都超級多，賣相都唔錯。自助區仲有各式各樣嘅飲品、雪糕同甜品任揀。最開心係自製珍珠奶茶非常好飲，雪糕甜品都不錯。
整體嚟講，性價比極高，係時間1.5小時輕微太趕。
打卡送小禮品。
深圳皇廷廣場 29/3/2026 11:00
食一餐午餐嘅價錢可以無限自助的確爽快。自助餐最緊要係選擇夠多，呢度嘅肉類區、海鮮款都多，可惜肉款多數原味，醃肉味道亦唔算濃，口感一般。扇貝同青口算最好食，起碼鮮甜，蒜蓉辣油落得夠多，味道不錯。
除咗自己動手燒肉，熟食區款式仲多。各式炸物新鮮熱辣，炸鮮奶最好食，薯條夠脆。蛋撻香脆鬆化，蛋味香濃，好過香港好多餅店。熱盆仲有熱腸、菠蘿炒飯算非常不錯。各款甜品有自助冰粉、小蛋糕、布甸等。無限任飲嘅特飲最驚喜係有伯牙絕弦，冰涼透心，奶味香濃，或者不同款枝裝飲品。最後伊利雪糕無限添，味道還好。呢間店明顯燒烤料一般，熱盆更出色。點評做優惠，成人只需要69.9元，兒童39.9元，性價OK。暗地裡無限時食足兩個鐘呢個係幾開心。
深圳中航城 4/1/2026 12:00
呢度主打韓式烤肉放題，食材選擇極之豐富，好滿足。肉類選擇多，五花肉、秘製肥牛、厚切五花肉放上高溫烤盤，發出誘人嘅滋滋聲響。燒到外層金黃焦脆，逼出多餘油脂，咬落去油香四溢，口感爽脆彈牙。肉類都醃得極入味，韓式微甜醬香，肉質軟腍多汁﹔仲有幾款海鮮類。
除咗高質烤肉，自助吧仲有好多款熟食、涼拌菜、壽司賣相都唔錯。最緊要係甜品、雪糕、飲品都係任食。
食物選擇多，都算幾新鮮，味道還好。以成人99元一位當食餐午餐係非常滿足。
30/12/2025 14:30
商場內就有呢間人氣台灣小火鍋。剛好黎到係下午茶時段，幾款餐都有特價，超抵食! 每位自選自選火鍋湯底，跟配一款肉類主食。兒童，只需要單點就可以共鍋，一齊享用出面嘅自助食品、飲品、甜品。
試咗大骨鍋、石頭鍋 (NT$10)、濃奶起司鍋 (NT$60) 同頤心菌菇鍋 (NT$60)，四款都各有特色。大骨鍋湯頭幾濃郁，呈現奶白色，飲落有陣肉骨香，口感順滑又暖胃。石頭鍋就好有傳統風味，洋蔥同麻油爆香之後香氣即刻出晒嚟。濃奶起司鍋奶香好突出，起司融入湯底之後變得更加滑，拎嚟煮肉同配料都好掛汁。頤心菌菇鍋就比較清爽，菇香自然，湯頭鮮甜。
肉類揀左上選梅花豬肉 (NT$238) 肥瘦比例啱啱好，食落嫩滑又有豬肉本身嘅鮮甜。培根豬肉 (NT$238) 油脂比較豐富，油香就慢慢滲出嚟，食落入口即化，脂香好吸引。雞腿肉 (NT$268) 好彈牙，肉質夠多汁，吸收咗湯底味道之後更加好食，咬落好有滿足感。特選培根牛肉 (NT$268) 嘅油花好靚，放入滾湯度輕輕淥幾秒，肉片變色就可以食，牛味濃郁，口感又滑。望落去塊肉色澤好靚，油花分佈得好均勻。
加配板腱牛 (NT$108) 最大嘅特色，就係中間有一條幼幼地嘅透明嫩筋。將塊牛肉夾落滾湯度淥幾秒，見到肉片轉做微粉紅色就可以夾起。牛味超級濃郁，肉質好腍滑，加埋中間嗰條嫩筋遇熱之後變得好爽彈。
今餐其中一個重頭戲，就一定係澎派海鮮九拼 (NT$288) 成個拼盤一上枱已經好吸睛，入面有九款唔同海鮮，蝦夠鮮甜，魚片厚身，蛤蜊又飽滿，帶子都幾新鮮，仲有好多唔同魚類。海鮮煮完之後，保留到本身嘅鮮味，肉質又細緻又彈牙，仲會令湯底多咗一份海鮮鮮甜味。
值得一讚出面個自助吧真係超豐富，丸類多到不得了，多款蔬菜、麵食。最正係冷熱飲品任選，今行試過馬玉山嘅紅豆牛奶超濃郁，飲上癮。最後仲有雪糕做甜品，超滿足。四大二小食得飽晒，埋單共NT$1,733，抵!
28/12/2025 09:00
第二晚今次入住「墾丁河堤度假酒店」，房價包埋自助早餐，極之有驚喜。餐廳環境開揚舒適，食物款式選擇都OK多，中想食得清淡啲，可以揀熱辣辣嘅白粥，配埋肉鬆、肉燥都非常好味。烘得餐包加果醬，穀物片，簡簡單單。飲品有香濃咖啡，奶茶，醒神一流，仲有果汁氣泡水，都算應有盡有。
呢間酒店應該係舊店重裝，酒店入面都裝修得幾靚。今次揀左三人房，房間唔大，廁所較窄，商務佈置其實唔太適合小朋友。一張大床一張單人床都夠訓。房間備品齊全，基本有咖啡茶包、支裝水，刷牙等個人用品可以係大堂自取。
大堂空間佈置幾靚。二樓有個公共空間，有個迷你兒童玩樂區，旁邊有梳化自助飲品，等車休息一陣就最岩。Agoda 每晚房價$700，算不過不失。揀選呢間酒店主要因為距離「鹿境」只需步行3分鐘，第三日上午可以自己玩多半日先走。
屯門Hotel Cozi Resort 17/8/2025 12:00
特登嚟屯門食自助餐，因為環境實在太吸引，到處都係火車主題，連座位都係火車車卡包廂，小朋友一入場已經勁興奮。餐廳外有一個觀景平台Cozi Starry，環境光猛都幾舒服。
餐廳唔算大，但係應有盡有，麵包前菜、沙律、凍海鮮、刺身、熱盆、甜品、飲品都齊全。主打海鮮主題選擇都幾多，蒜蓉粉絲蒸扇貝限量，粉絲索晒蒜蓉汁。即煮嘅海膽汁鮑魚蝦仁意粉，新鮮熱辣，味道不錯。最愛嘅甜品首選自製脆皮窩夫，牛油味夠香，新鮮熱辣，外脆內軟。自行配上雪糕同埋朱古力醬，拍得住出邊嘅甜品舖。最後仲有多款雪糕選擇，貴價嘅Movenpick、Häagen-Dazs口味都幾多。首次是香港品牌Co Co Berry有好多香港特色嘅口味，豆腐味清甜豆味香，超推介。香港奶茶非常濃郁，都不錯。
食飽飽上五樓兒童遊樂場玩，場地唔算大，但玩樂設施應有盡有，連電動車都有得玩，真係超開心。
