by admin | 5 月 18, 2025 | Blog, 小食, 深圳, 港式, 茶餐廳, 飲品
深圳黃貝嶺 18/5/2025 11:00
點評零元探店來到黃貝嶺，就喺地鐵站內地下街小店，類似美食廣場。環境就一般，但出品算唔錯，而且份量十足。
黯然銷魂飯﹕《食神》嘅黯然銷魂飯即係「叉燒煎蛋飯」，叉燒飯加上荷包蛋。呢度嘅黯然銷魂飯份量多，賣相討好，叉燒整整齊齊舖喺飯面。叉燒係經典蜜汁味道，脂肪比例較高，瘦肉較少。外層帶微微焦香，非常油亮，肉質咬落去爽口有嚼勁。蜜汁係鹹甜口味，非常入味。兩隻煎蛋非常靚，邊位微微金黃焦脆，蛋黃仍保持半熟狀態。白飯大大碗，本身係甜口醬油，撈飯已不錯。將蛋黃打爛，流心蛋液拌勻白飯，增加咗更濃郁柔滑嘅口感。
招牌銷魂叉燒滑蛋飯﹕呢款係叉燒配滑蛋，炒蛋非常嫩滑有蛋汁，蛋香濃郁均，上面舖滿蜜味叉燒。呢款叉燒肥瘦比例適中，表面有閃亮嘅蜜糖醬汁增添焦香味，每塊都切得啱啱好嘅大小，肉嫩有彈性，醬油鹹甜味均衡，叉燒汁同滑蛋融合，非常香濃。
熊仔凍奶茶﹕視覺效果令人無法抗拒，超級大隻熊仔坐喺杯上，細緻到連毛茸茸感覺都做到。至於奶茶本身，傳統方法沖製嘅港式奶茶，濃茶底混合住香甜但唔會過膩嘅淡奶，茶香同奶香比例恰到好處，香濃唔會太澀，口感圓潤順滑，味道不錯，又好睇又好飲。
熊仔凍檸茶﹕估唔到檸茶係咁大杯，熊仔仲咁大隻。茶底本身幾香，味道微甜，檸檬都幾新鮮，酸度適中。
雞翼拼薯條﹕雞翼外層炸得金黃酥脆，陣陣香氣，雞皮脆而不硬，而內裏嘅雞肉仍然細嫩多汁，原汁原味嘅咸香，非常好味。薯條就保持香脆，內裡仍然柔軟鬆化。
by admin | 4 月 27, 2025 | Blog, 新蒲崗, 日式料理, 樓上cafe, 甜品, 西餐, 飲品, 麵包
新蒲崗 27/4/2025 18:00
慢煮手撕豬腩窩夫三文治 $116
新蒲崗人氣餐廳「窩子」嘅特色菜之一，單係睇賣相已經夠吸睛，實在太澎湃，材料勁豐富。金黃酥脆嘅窩夫係底部主角，邊緣輕微帶焦，散發牛油同蛋香，上面放上新鮮生菜同番茄外，再鋪滿手撕豬腩肉，加上一片烤得微焦嘅芝士，份量十足! 豬腩肉絲香嫩，煮得夠晒入味，味道酸酸甜甜，非常開胃。配搭嘅窩夫焗至金黃，中間非常鬆軟帶韌性，可惜蛋味略為不足。但確實有驚喜。
日式海鮮大阪燒酥皮薄餅 $188
賣相實在吸引，材料多到滿瀉。以日式大阪燒加上酥皮做成薄餅，的確有創意。直徑足足8寸酥皮，底層嘅酥皮薄餅脆到不得了，入口時酥香滿溢。薄餅材料呈現大阪燒嘅元素，滿滿嘅海鮮如魷魚仔、帶子粒同蜆肉，相當足料，一絲絲嘅紅生薑係日和風味來源。加上濃郁香甜嘅大阪燒醬同蛋黃醬，仲有會舞動嘅柴魚片，脆口紫菜碎，確確實實嘅大阪燒! 可惜酥皮同海鮮有啲分離散碎，食起來比較狼狽。
三重朱古力麻糬窩夫配朱古力雪糕 $84
呢款甜品絕對能得到朱古力魔歡心。窩夫外層烤得輕脆焦香，但中間原來隱藏住勁煙韌嘅麻糬，唔單止勁有韌度，仲有濃郁嘅朱古力香。窩夫上灑滿Oreo碎同大量朱古力醬，仲有大大個朱古力雪糕。雪糕除左朱古力仲食到棉花糖同果仁，應該係類似石板街嘅口味。用朱古力脆卷沾雪糕黎食，充滿童年回憶。
抹茶士多啤梨法式千層酥配士多啤梨雪糕 $82
千層酥上唧滿奶油，仲有大大粒士多啤梨點綴，糖霜灑喺酥皮上，高貴又精緻。輕輕切開酥皮，原來內藏抹茶醬。酥皮輕盈鬆化，牛油味香，酥而不膩。抹茶質感絲滑，帶著一絲甘苦，士多啤梨又新鮮又夠甜，多一份清爽。配搭嘅士多啤梨雪糕味道香濃，有天然嘅果香，不錯。
朱古力鮮奶咖啡 $44
有靚靚嘅拉花，表面可以見到輕柔嘅泡沫。咖啡嘅香氣散發出來，味道香純，加入牛奶令整體口感更加順滑，奶香味過後就飲得出微甜嘅朱古力味，平衡咖啡嘅苦味，品質相當高。
係舊區難得一見可以歇腳放鬆嘅小店，餐廳內放滿玩具、舊物，連枱椅都係舊時學校嘅產品，玩味十足。一班年青店員親切有禮，手法專業。食物有創意，賣相精緻吸睛，味道仲相當不錯。不錯的窩。
by admin | 4 月 13, 2025 | Blog, 外賣, 深圳, 甜品, 飲品
深圳領展中心城 13/4/2025 17:00
點評探店得兩杯飲品加一件蛋糕。
抹茶草莓鮮奶
透明杯裝住清晰分層嘅飲料，底層係鮮紅嘅草莓果醬，中層係雪白香滑嘅鮮奶，而頂層就係翠綠濃郁嘅抹茶。抹茶有醇厚香氣，散發住天然茶香，微微帶點甘苦，香濃嘅鮮奶加一點柔和，入口本身細緻順滑。草莓醬清甜微酸，搖勻各層材料，味道相當平衡，可惜冰略多，整體感覺略淡。
抹茶奶酪醬莓莓
透明杯中展現住迷人嘅層次，底層係紅色莓果沙冰，冰感略重，大啖淡嘅酸甜草莓香。上邊鋪咗薄薄一層抹茶奶酪，淡淡嘅奶香為沙冰增添一層柔和，輕微嘅鹹鮮味。頂層係極具質感嘅抹茶醬，散發住清新淡雅嘅茶香，質感濃稠，微苦。感覺抹茶是不錯的。
黑金抹茶卷
外觀不錯，深黑蛋糕卷體包住鮮明翠綠嘅抹茶餡料，層次分明。黑色嘅外皮柔軟而富有韌性，帶有淡淡嘅蛋香氣，咬起來有適當嘅濕潤感。內層嘅抹茶餡料茶香濃郁，帶微微苦甘味道，味道微甜，整體配合得不錯，感覺上甜品好過飲品。
by admin | 4 月 13, 2025 | 台式, 深圳, 甜品, 飲品
深圳水圍 13/4/2025 15:30
點評下午茶探店
鮮榨椰皇冰芋圓燒：靚靚嘅賣相比一早俾人留下深刻印象，碗內堆滿咗雪白濃郁嘅椰奶冰沙。椰奶冰沙用椰皇製作，保留咗天然嘅清甜同濃郁香氣，冰涼順滑嘅口感，入口即溶。中間係超厚綿密嘅芋泥，味道香濃。頂層鋪滿色彩豐富嘅芒果同西瓜，水果新鮮爽甜，加上脆卜卜嘅椰片。三色小芋圓分開另上，芋圓彈牙，咬落煙韌有嚼勁，味道香甜而不膩，配埋椰奶冰沙真係完美嘅搭配。
超厚老椰芋泥
芋泥口感濃郁順滑，入口即化，細細感受一下仲可以嚐到芋頭特有嘅天然香甜。一啖啖嘅芋泥夾雜住少許芋頭顆粒，椰奶味道香濃，再加上西米等，略帶嚼勁，味道清新而純正，非常飽足。
深圳水圍 16/2/2025 16:30
抹茶牛乳草莓大福：光睇外表就讓人忍唔住瘋狂打卡影相！紅白綠相間，實在太靚。底層係鮮紅色嘅士多啤梨醬打底，仲有淡淡果。中間係牛奶雪白滑嫩嘅麻糬大福，非常之黏糯，口感滑順，米香味濃。頂層係香濃嘅抹茶綠。抹茶帶一點點微苦，然後草莓果肉又帶一點酸酸甜甜的感覺，再加上奶香，整體估唔到咁夾，更有層次感！
草莓金芒芋圓燒：賣相實在太吸引，鮮艷嘅紅色橙色非常繽紛。金黃色芒果冰沙上邊鋪滿超多士多啤梨同芒果肉。沙冰滿滿芒果香味，入口即溶，非常清爽。水果帶一點酸味，但係味道相當香濃，酸甜味特別清新。芒果果肉很軟，飽滿多汁，濃濃嘅熱帶水果香氣。分開另上仲有一碗芋圓，有大有小，色彩繽紛，非常可愛。每粒芋圓都非常香甜，口感煙靭，正正中和左水果嘅酸酸甜甜。
深圳筍崗寶能環球會匯 23/6/2024 16:00
麻糬芋圓燒 21元
抹茶麻糬鮮奶 19元：新產品，大大杯都只係$19。抹茶麻糬味道好濃，口感煙韌黏口，份量都非常多，相當有驚喜。加上鮮奶非常香濃，仲有粒粒煙煙韌韌小芋圓，口感非常豐富， 十分飽足。
深圳筍崗寶能環球會匯 21/1/2024 16:00
想食呢間芋圓主題甜品好耐，今日就叫咗三款唔同口味食個下午茶。擺盆賣相非常靚，每一碗芋圓都好豐富。每款配搭都差唔多，基本有好多芋圓、仙草、小丸子芒果、西瓜等等。芋圓口感煙韌，味道香濃，的確幾好食。各款水果都相當新鮮鮮甜。
鮮榨椰奶芋圓燒 23元：呢款加上一杯椰奶，椰香味重。
草莓金芒芋圓燒 26元：呢款就加料草莓同埋芒果。
麻糬芋圓燒 21元：呢款加咗米香味濃，非常黏口嘅米麻糬。
by admin | 4 月 6, 2025 | Blog, 外賣, 小食, 旺角, 港式, 甜品, 西餐, 飲品, 麵包
旺角 6/4/2025 15:00
行過豉油街就聞到好香嘅蛋香味，決定試呢間專賣奶昔同窩夫嘅人氣小店。落單後新鮮即製，要稍等一陣。
意大利開心果醬奶昔加開心果碎 $70
奶昔面層灑滿開心果碎，非常真材實料。一啖入口已經充滿濃郁嘅開心果味道，本身奶昔奶香味極濃，口感滑溜，入口即化，中間仲有脆卜卜開心果碎，甜中帶少少咸香。義大利開心果醬果真與別不同，飲得出的真材實料，開心果味好！實！在！
日本抹茶奶昔加珍珠 $55
抹茶奶昔上呢隻極可愛嘅熊貓棉花糖實在太吸睛! 抹茶奶昔味道香濃，抹茶嘅甘香同微苦，同奶香非常平衡，的確有日本抹茶嘅感覺。黑糖珍珠煙韌有嚼勁，仲有一條KitKat朱古力棒，為抹茶帶來一點甜，實在太豐富。
士多啤梨窩夫三文治 $35
每件窩夫都係即叫即製，一路睇住店員姐姐細心製作，蛋香味一路散發出黎。窩夫賣相十分得，非常精緻。拎上手仲暖笠笠，窩夫外層酥脆，中間柔軟，蛋香味極濃。吉士醬細膩香滑，甜度適中，仲有超新鮮勁鮮甜嘅士多啤梨粒，整體配合得非常好。
爆谷鹽焦糖窩夫三文治 $35
窩夫三文治加爆谷，非常有創意。鬆軟窩夫加上脆卜卜嘅爆谷，口感幾特別。每粒爆谷都爆得好均勻，焦糖味香濃，窩夫之上再淋上香甜嘅焦糖漿，味道更加濃郁，鹹甜拿捏恰到好處。
整體嚟講，奶昔同窩夫用料及製作都極具誠意，不得不讚每一杯奶昔都用料十足，睇住店員姐姐直接唧出雪糕加入材料細心製作，水果又新鮮，窩夫又係真係真材實料，每款賣相都好精緻，估唔到旺角嘅街頭小食已經進化到呢個地步。
by admin | 3 月 16, 2025 | 外賣, 深圳, 甜品, 飲品
深圳中航城 16/3/2025 18:30
厚抹茶鮮牛乳 19元
又一個新茶飲品牌，椿風手作厚抹茶鮮牛乳，賣相不錯，濃郁抹茶綠配純白厚乳。抹茶咪道香濃，散發出天然茶香。一啖入口，奶香濃郁嘅鮮牛乳同抹茶完美融合，豐盈而細膩，抹茶苦甜味好平衡。
打卡送米你脆脆小米布丁迷你甜筒，米味道勁香，口感綿密，呢個真有驚喜。
