太子 15/8/2026 14:00
慢煮鹽燒鹿兒島牛舌漢堡 $118: 賣相澎湃，第一次見原條牛舌造成漢堡。牛舌又厚又長，以鹽燒鎖住肉汁，肉質軟嫩中帶有爽彈嚼勁，油脂香氣濃郁。漢堡包烘得外脆內軟，夾埋新鮮生菜同特調醬汁一齊食，仲有新鮮即炒外脆內軟嘅薯條，非常好味。
香蕉朱古力牛角窩夫配雪糕 $65: 賣相勁靚，牛角窩夫金黃香脆，內裏鬆軟。淋上濃郁嘅朱古力醬，再配上一球冰凍香滑嘅雪糕。一冷一熱、一脆一軟，仲有新鮮香甜香蕉切片，好睇又好食。
抹茶鮮奶 $24: 抹茶粉茶香醇厚，帶有淡淡嘅甘苦回甘，與蒸打得綿密幼滑嘅熱鮮奶完美融合。入口順滑，奶香與茶香平衡得剛剛好，暖胃又解膩。
蜂蜜柚子茶 $16: 酸甜適中，溫潤清爽。
星期六日冇套餐，只得散叫，單價唔平，只能夠小試幾樣，不過味道相當不錯。
何文田 15/8/2026 12:30
合桃酥 $7.5: 合桃酥外形金黃飽滿，表面帶有香脆嘅合桃碎，濃郁嘅牛油同堅果香氣。口感極之鬆化酥脆，甜度亦控制得啱啱好。
豆沙酥 $7.5: 經典唐餅，外皮焗到層次分明、酥香鬆化。入面包裹住厚實細滑嘅紅豆豆沙餡，口感綿密且甜而不膩。
朱古力蛋糕 $24: 蛋糕質地濃郁扎實，蛋糕體濕潤綿密，每一啖都食到濃郁嘅朱古力甜香，仲有勁多朱古力粒粒，朱古力控大愛。
紅豆糯米糍 $6: 糯米糍外層沾滿咗雪白嘅香甜椰絲，增添咗獨特嘅熱帶風情。煙韌軟糯嘅糯米皮包裹住香滑嘅紅豆餡，清甜綿密。
花生糯米糍 $6: 花生糯米糍外皮煙韌彈牙，口感軟糯適中。入面填滿咗香氣四溢嘅碎花生同糖粉混合餡料，多到爆餡，滋味無窮。
剛好全單$100，抵食。
9/8/2026
09:00 到達羅湖，先去廣深城際列車電子售票機買電子票，最後成功買到C7026班次，09:35開。一等座只需90元，兒童仲半價45元，六歲以下免票，但係電子系統加唔到，惟有排番人工口查詢。應該係系統問題，連櫃台都加唔到，職員指示反正免票，直接帶小朋友入閘就可以。
買完票落樓下買個快早餐。安檢嚴格，但流程都好快，9:25已經入到閘內候車區。準點開車，由於呢班有中途站，所以人流名顯較多，霸唔到多一個位，如果有得揀，一小時直達快車更佳。
華北川
麻薯布丁 19.8元/2個，份量唔算大，麻薯濕潤煙韌，布甸奶香味勁濃，口感奶滑，入口即溶。
另一款提拉米蘇，係打卡寫評免費送，一件都二十幾蚊，真係非常抵寫。份量大，面層均勻撒滿微苦嘅可可粉，中和咗馬斯卡彭芝士嘅香濃奶香。蛋糕有咖啡味，朱古力味，餅底仲有朱古力脆脆，層次極之豐富。
11:00 未夠就順利到達廣州東，先去全季酒店放低行李，可以使用自助寄存行李櫃，非常方便。
第一站係萬勝圍，地鐵11號線到琶洲，轉8號線繼續。兩線車站隔得非常遠，出閘後要戶外行一段路再安檢入閘。車程大半個鐘，大約十二點到達萬勝圍。
深圳大劇院站 2/8/2026 14:30
抽中點評探店，拎四個包，打卡再送一個酥皮蛋撻，抵! 店面裝潢走優雅嘅法式風情路線，一行近已經聞到陣陣撲鼻嘅牛油香氣。
田園彩椒法棍 18.8元﹕法棍外皮烤到金黃香脆，充滿嚼勁，入面鋪滿咗紅、黃、綠三色新鮮彩椒，有天然清甜味，仲有香濃嘅半溶芝士，芝士味香濃，面舖芝士碎加另一個清爽口感，健康又惹味！
意式肉醬香腸料理包 21.8元﹕濃郁嘅意式番茄肉醬酸甜開胃，入面有滿滿嘅免治豬肉同香草碎，真材實料。主角香腸肉質紮實彈牙，腸衣脆一咬爆汁，濃厚嘅地道意式風味，極具飽足感！
丹麥熱狗酥卷 12.8元﹕外層係層層疊疊，焗到金黃酥脆嘅丹麥酥皮，咬落去牛油香氣四溢、極度鬆化。包裹住入面一條肉汁豐富、Q彈惹味嘅熱狗腸。酥脆嘅口感同鹹香嘅熱狗完美結合，層次分明。
灸烤無糖芝士 32元﹕芝士表面仲有一層微脆嘅金黃色澤，入口係極度濃郁醇厚嘅芝士奶香，口感綿密幼滑。餅底香味濃，入口脆卜卜。呢件芝士蛋糕絕對高質。
鑽石山 30/7/2026 14:00
澳洲烤羊架伴牛乾菌意大利飯 $168﹕羊架兩大件份量十足，羊架外層烤到微脆，熟成度剛剛好，肉質保持粉嫩多汁，羶香濃郁。牛乾菌意大利飯煮到軟硬適中，每一粒米都索晒牛乾菌獨特嘅菌香同濃郁嘅忌廉湯汁，菇香四溢，同羊架非常夾。
雙層美國安格斯牛肉漢堡 $138﹕絕對係肉食獸嘅邪惡之選！漢堡包烤到脆卜卜，夾住兩大塊厚身嘅美國安格斯牛肉漢堡扒。漢堡扒煎到外微脆，中間肉汁大爆發，濃郁嘅牛肉香氣滿瀉。中間夾左芝士同新鮮沙律菜、番茄等，岩岩好中和油膩感。薯條新鮮炸起，金黃香脆，中間軟熟，成個組合份量十足，食完超級滿足！
藍莓芝士蛋糕 $48﹕餅底用咗牛油曲奇碎壓成，香脆可口。蛋糕質感極之綿密幼滑，入口即溶，有濃郁嘅芝士香氣，奶香十足。面頭鋪滿咗酸甜開胃嘅藍莓醬，仲有粒粒飽滿嘅新鮮藍莓，加一點水果嘅天然酸味，整體甜度啱啱好。
全單$354，單價小貴，簡單試幾樣。
旺角 3/7/2026 14:00
醇滑芝士撻 $24﹕撻片烤到表面金黃微焦，油亮亮咁，撻皮鬆化香酥脆卜卜。芝士餡滑溜溜，陣陣芝士嘅濃郁奶香。
士多啤梨牛油扁包 $26﹕新出品! 麵包鬆軟，充滿麥香，士多啤梨酸酸甜甜嘅，甜得嚟又夠清新開胃，仲有粒粒開心果仁碎，超正!
朱古力酥 $25﹕一層層酥皮焗到金黃鬆化，入面有粒粒朱古力香濃醇厚，味道勁香濃。
開心果迷你丹麥磚 $30﹕今期新出品，細細正方形嘅丹麥酥皮外層超脆又鬆化，入面嘅開心果餡多到爆，開心果味香濃，堅果油香味道突出，不錯!
