長沙灣 11/4/2026 14:00
鹵水乳鴿 $48﹕乳鴿油亮，鴿肉啖啖肉，肉質都幾滑溜，肉汁豐富。鹵水鹹香鮮甜，夠晒入味。
沙拉骨 $88﹕份量多，大大件豬扒掛滿濃郁嘅沙拉醬。豬扒微微酥脆，軟腍多汁。沙拉醬酸酸甜甜，大人細路都鍾意。
白鱔煲仔飯 $88﹕原煲即煮熱辣辣上枱嘅，一打開個砂鍋蓋，滿滿飯香同豉汁白鱔香氣。厚切白鱔鋪滿飯面，淋上甜豉油，賣相極吸引。魚肉厚身爽口彈牙，魚油豐富。最精彩嘅部分當然係底層極度香脆嘅金黃飯焦，咬落去索索聲，充滿濃烈嘅焦香，豉油撈飯，超正!
送贈是日靚湯，菜乾豬骨湯夠晒足料! 大牌檔風味。長沙灣市政街市樓上，舊街市無冷氣，天熱都有啲辛苦，衛生情況還好。
馬鞍山 22/2/2026 18:00
星州炒貴刁 $58﹕貴刁條條分明，面頭沾滿濃郁惹味嘅咖喱香氣，帶住少少微辛，超級開胃。配料方面極之足料，有鮮甜嘅蝦仁、香口嘅叉燒絲同埋爽脆嘅芽菜，口感層次極之豐富。
乾炒豬扒炒即食伊麵 $53: 公仔麵炒得啱啱好，保持到彈牙嘅口感，完全唔會糊口。豬扒外層煎到微脆，肉質依然軟腍多汁，醃得極之入味，鹹香惹味。
一口雞蔥油撈麵 $58: 雞扒煎到外皮金黃香脆，肉質嫩滑豐厚，大量蔥油醬，味道勁香，公仔麵完美吸滿晒蔥油精華。
深圳寶安大仟里 19/2/2026 16:00
泥石流爆奶華﹕極具視覺震撼，一切開表面厚厚嘅可可粉同烘到金黃香脆嘅多士，入面嘅特製奶醬就好似泥石流咁洶湧流出嚟，賣相極之邪惡！多士外脆內軟，吸滿晒濃郁嘅鮮奶同朱古力香。
黯然銷魂叉燒飯﹕叉燒燒得靚，半肥瘦嘅肉質極之軟腍，表面帶有陣陣誘人嘅微焦香氣同蜜汁嘅香甜。最靈魂嘅係面頭嗰隻燶邊太陽蛋，輕輕篤穿個太陽蛋黃，等啲滑溜蛋汁流落熱辣辣嘅白飯度，再撈埋秘製甜豉油一齊大啖大啖咁食，正。
雞蛋仔﹕熱辣辣新鮮出爐嘅雞蛋仔賣相可愛，口感軟綿綿，中間仲有奶黃醬，甜度適中。
炸雞翼薯條﹕雞翼外皮炸得極之酥脆，咬開仲有豐富嘅肉汁流出嚟，肉質保持得極之嫩滑。薯條炸到金黃色、外脆內軟。
香港小吃拼盆﹕一次過試勻多款口味，首先係滑溜無比嘅混醬腸粉，腸粉完美掛滿香濃嘅花生醬、甜醬同麻醬。仲有極之彈牙爽口嘅咖哩魚蛋，微辛嘅咖哩汁香濃惹味，極度開胃。滷水雞翼夠入味，醬汁醇厚甘香。炸蝦卷鮮甜嘅蝦肉配上酥脆外皮，口感極佳。
尖沙咀 10/1/2026 13:30
近排發現重慶大樓旁邊多左一個慶芳商場地下美食街，真係搵食新去處! 食街中間就見到一架車仔麵檔，原來係一間非常港式地道嘅車仔麵店，吸引!
大大碗車仔麵份量十足，一次過滿足幾個邪惡願望。豬大腸厚度十足，滷得好入味，外皮爽脆，中間充滿油脂香，真係邪惡又好食。牛腩係半肥瘦嗰種，炆到好腍身，肉味濃郁。豬手皮爽肉滑，充滿豐富嘅骨膠原，牛筋丸都係彈牙到不得了。淮山麵煙韌幼滑，吸湯力強，每一啖麵都掛滿咗濃郁香甜嘅腩汁，超好食。
另一碗試埋雞中翼都好有驚喜，肉質嫩滑，瑞士汁甜度啱啱好﹔仲有超彈牙嘅墨魚丸、菜肉餃皮薄餡靚，鮮味十足。另碗上嘅魚皮餃，魚皮更加爽滑彈牙，魚香味十足。
招牌必食厚叉燒真係份量十足，外層燒到焦糖色，油光亮麗，仲有少少焦邊，外層嘅焦邊帶點微脆，蜜汁味香甜濃郁，內裡嘅肉質非常鬆軟，半肥瘦每一啖都充滿肉香同油香，正!
冠軍奶茶港式風味，茶底夠香，味道少甜，讚!
沙田 22/11/2025 09:00
沙嗲牛肉公仔麵早餐與炒蛋腸仔早餐$39﹕濃郁嘅沙嗲香氣已經撲鼻而來，沙嗲醬極之惹味，帶有濃厚嘅花生甘香同微辣尾韻，湯底濃稠度啱啱好。牛肉處理得非常軟腍入味，完全吸晒沙嗲精華。公仔麵煮得極之彈牙，每一條麵都掛滿濃郁嘅湯汁。炒蛋入口極之滑溜，充滿濃郁嘅蛋香同淡淡嘅牛油味，質地保持濕潤綿滑。配埋煎得香脆帶微焦嘅腸仔，不錯。
番茄火腿奄列 $33﹕金黃色嘅奄列賣相已經相當吸睛，輕輕用刀切開，半熟嘅蛋液緩緩流出，可見火候控制得啱啱好。蛋皮外層煎得微香，內裡極之滑溜，充滿濃郁嘅蛋香同淡淡嘅牛油味。裡面包住滿滿嘅火腿絲同新鮮番茄肉，鹹香惹味，鮮甜微酸嘅番茄汁完美中和咗火腿同牛油嘅油膩感。
深圳新洲 12/10/2025 18:30
點評探店
封神豬扒飯﹕即係番茄焗豬扒飯，面層芝士烤得微微焦香，散發出濃郁嘅奶香味，芝士下可見鮮紅嘅番茄醬汁，仲有大大年吉列豬扒，大量雞蛋炒飯非常香口，濃郁卻不膩口，蕃茄醬汁味道恰到好處，酸酸甜甜。
豉油雞飯加荷包蛋﹕豉油雞飯經典選擇，加上一隻煎得剛剛好嘅荷包蛋，沒有太花哨嘅擺盤，豉油雞雞皮亮皮，味道唔太咸，雞肉比較實淨，還好有些雞味。要加上薑蓉就可以送飯。
腩汁生菜﹕菜都幾新鮮，腩汁味道幾香，可以送飯。
熊仔奶茶﹕可愛嘅熊仔造成奶茶，奶茶茶味濃郁，帶微微嘅苦澀，奶味平衡，甜度適中，不會過於膩口，又夠晒凍，正斗。
鮮奶紅豆冰﹕鮮奶紅豆冰賣相吸引，紅豆層層堆疊，鮮奶倒入後有漸層效果，頂部鋪滿碎冰，清涼感十足。紅豆的甜度自然，煮得軟糯卻不爛，奶味甜度適中，味道不錯。
正宗香港茶餐廳，完全係香港風味，味道真係一般般。
