馬鞍山 19/6/2026 17:00
牛奶冰室下午茶真係抵到一個點。
豬扒炒公仔麵 $51﹕鑊氣十足，一上枱已經香氣撲鼻。公仔麵炒到條條分明兼夠乾身，索晒醬油同蔥香，口感煙韌彈牙。豬扒厚切大件，經過醃製後煎到外皮微脆，肉質依然保持嫩滑多汁。啖啖麵配埋啖啖肉，惹味又飽肚。
星州炒貴刁 $50﹕充滿南洋風味嘅炒貴刁鑊氣十足，非常香口惹味。河粉炒到邊位微微燶香，煙韌彈牙，調味香帶輕微咖哩辣度。配料豐富，火腿、鮮蝦、雞蛋、韭菜同芽菜等。
焗鮮茄豬扒飯 $43﹕份量一啲都唔輕量，熱辣辣，面頭厚厚嘅芝士焗到金黃微焦，拉絲效果理想。底層係酸甜開胃嘅新鮮番茄汁撈飯，配埋外脆內嫩嘅厚切焗豬扒。茄汁嘅天然果酸中和咗芝士同豬扒嘅膩感，開胃又滿足。
冰火菠蘿油 $12﹕外層嘅菠蘿包皮焗到金黃酥脆，面頭嘅格子香甜鬆化，加熱後暖笠笠。夾住一厚片冰凍牛油，利用包身餘溫慢慢融化喺熱辣辣嘅包心入面。一口咬落去，冰火交融嘅口感加上濃郁牛油香。
經典西多士 $20﹕厚切方包沾滿蛋漿後炸到外脆內軟，切開入面有香濃嘅花生醬夾心。面頭放上一大塊牛油，再淋上滿滿金黃糖漿，甜絲絲同鹹香完美結合。
深圳海岸城 14/6/2026 16:30
筆記禮盒換的茶餐廳單人餐共兩份
試左兩款經典港式美味，乾炒牛河鑊氣撲鼻，河粉炒到條條分明，油潤亮澤，河粉本身滑溜溜都夠彈牙，牛肉就嫩滑多汁，肉味濃郁，醃得入味。河粉夾埋炒到微微焦香嘅芽菜同蔥段，爽脆清香，味道不錯。
三絲炒米粉﹕米粉炒到乾爽分明，見配料都非常多。米粉煙韌彈牙又爽口，大量肉絲，醃得夠入味，幼細嫩滑﹔火腿絲帶點鹹鮮夠惹味﹔蛋絲香軟味濃，加上仲有唔少芬菜，夠鑊氣又唔覺油膩。
最後飲茶檸檬可樂，清新酸香，酸酸甜甜，透心涼。檸檬茶都非常夠檸檬味，茶香濃郁。
馬鞍山 23/5/2026 09:00
早餐$40﹕滑溜炒蛋份量十足，奶香濃郁且口感極之軟滑；配埋烘到金黃香脆嘅厚多士，外脆內軟。經典嘅沙嗲牛肉公仔麵惹味非常，濃郁嘅沙嗲醬掛滿每一條彈牙麵條，牛肉軟腍入味，味道算可以。最後再來一杯香濃順滑嘅熱好立克，暖笠笠又甜而不膩。
馬鞍山 8/5/2026 12:00
蒜香蕃茄汁一口炸雞滑蛋蓋飯 $76﹕份量唔少，一口炸雞金黃酥脆，啖啖肉，雞肉嫩滑多汁、肉味十足。淋上香濃蕃茄汁，蒜香濃郁惹味同蕃茄汁嘅酸甜味，再蓋住滑溜溜嘅嫩蛋，非常好味。
白咖喱湯香茅豬扒低卡高纖蒟蒻麵 $72﹕白咖喱湯底奶白香濃、椰香撲鼻，香茅嗰陣清新香氣同咖喱嘅微辣交織得啱啱好。豬扒煎到外層微微焦香，內裏嫩滑多汁，咬落彈牙入味，肉香十足。蒟蒻麵就爽滑彈牙，晶瑩通透，吸滿晒白咖喱湯精華。
酥皮濃蝦湯 $18﹕酥皮鬆化香酥，蝦湯湯色誘人，香濃醇厚，熬到蝦味十足，鮮甜得嚟又夠濃郁，啖啖都食到蝦嘅鮮香同膠質。
馬鞍山 7/5/2026 12:00
蒲燒鰻魚滑蛋包飯 $75﹕賣相靚，鰻魚超大件，勁吸引。鰻魚口感鬆較，咬落軟腍入味，又夠油香，蒲燒醬嘅甜甜地非常香。滑蛋漿香滑得嚟又夠嫩，蛋香濃郁又夠滑，上面鏗魚乾加點鮮香氣，撈飯勁正!
鐵板黑椒鴛鴦扒配白飯 $62﹕鐵板上枱香氣四溢，熱氣騰騰，兩件鴛鴦扒勁澎湃。雞扒外層燒到香脆焦香，內裏粉嫩多汁。牛扒大大塊，咬落嫩滑彈牙，肉汁滿瀉，肉味濃郁醇厚。最正係黑椒醬，香濃惹味，辛香夠勁。超抵食!
長沙灣 11/4/2026 14:00
鹵水乳鴿 $48﹕乳鴿油亮，鴿肉啖啖肉，肉質都幾滑溜，肉汁豐富。鹵水鹹香鮮甜，夠晒入味。
沙拉骨 $88﹕份量多，大大件豬扒掛滿濃郁嘅沙拉醬。豬扒微微酥脆，軟腍多汁。沙拉醬酸酸甜甜，大人細路都鍾意。
白鱔煲仔飯 $88﹕原煲即煮熱辣辣上枱嘅，一打開個砂鍋蓋，滿滿飯香同豉汁白鱔香氣。厚切白鱔鋪滿飯面，淋上甜豉油，賣相極吸引。魚肉厚身爽口彈牙，魚油豐富。最精彩嘅部分當然係底層極度香脆嘅金黃飯焦，咬落去索索聲，充滿濃烈嘅焦香，豉油撈飯，超正!
送贈是日靚湯，菜乾豬骨湯夠晒足料! 大牌檔風味。長沙灣市政街市樓上，舊街市無冷氣，天熱都有啲辛苦，衛生情況還好。
