by admin 4 月 6, 2026 | 兒童餐 , 小食 , 深圳 , 燒烤 , 西北菜 , 親子餐廳 , 麵包 , 麵食
深圳翠竹 6/4/2026 12:00
吃光光牛肉燜飯﹕牛肉炆得軟腍入味，飯粒吸滿晒濃郁嘅肉汁同醬香，軟糯得嚟又唔會太爛，真係超級惹味。
甜蜜蜜香烤雞翅兒童餐配番茄酸湯有機掛麵﹕專為小朋友而設嘅兒童餐非常有心機！擺盤賣相靚。香烤雞翅外皮微脆，肉質嫩滑多汁，味道甜蜜蜜好開胃。配埋番茄酸湯有機掛麵，湯底酸甜濃郁，掛麵煙韌順滑，健康得嚟又好味，小朋友食得超級開心。
羊肉串配烤餅﹕羊肉串燒得香氣四溢，肥瘦均勻，羶味濃郁，孜然香料味極之突出。烤餅熱辣辣、外脆內軟嘅，可以索晒肉汁。
新疆沙灣大盤雞﹕份量十足，雞肉件件厚肉嫩滑，薯仔炆到極之入味。微辣嘅醬汁香濃惹味，配埋煙韌嘅寬麵條掛滿湯汁一齊食，層次豐富。
西貝面筋﹕面筋Q彈有咬口，配埋酸酸辣辣嘅秘製涼拌汁，超級醒胃。裏面仲有爽脆嘅青瓜絲，做前菜一流，食完胃口大開。
鐵板包菜炒粉絲﹕包菜炒得極之爽脆鮮甜，粉絲吸滿晒醬油同蔬菜嘅精華，乾身又惹味，鑊氣十足。
蒙古奶酪餅﹕熱辣辣嘅蒙古奶酪餅，外皮烤得金黃酥脆。一咬開，入面極度澎湃嘅奶酪餡即刻流出嚟，多到可以拉絲，奶香超級濃郁，甜度適中唔會膩。
胡麻油沙蔥炒雞蛋﹕胡麻油嘅獨特香氣非常突出，沙蔥帶有一陣淡淡嘅清香。雞蛋炒得極之滑溜，充滿蛋香。
點評套餐再外加小菜，全單約為500元。
by admin 3 月 1, 2026 | 中菜 , 兒童餐 , 深圳 , 火鍋 , 親子餐廳
深圳卓悅匯 1/3/2026 11:00
又來海底撈慶祝生日。
揀左幾款肉，「撈派肥牛」肥瘦均勻，放入滾湯淥十幾秒就食得，肉質軟腍多汁。「雪花豬肉片」紋理極之靚，淥熟之後口感爽彈。仲有令人極之驚喜嘅「內蒙草原羔羊肉」，羊肉味甘香濃郁。「暴打魚皮蝦卷」真係極之有驚喜，外層魚皮淥熟之後依然保持微脆煙韌，入面嘅蝦滑鮮甜彈牙，口感層次極之豐富。另一款「勁道牛肉丸」打得超級爽脆彈牙，滿滿肉汁，牛味極之香濃。
「黃金蜂窩炸蛋」超巨型，炸得金黃酥脆，表面佈滿好似蜂窩咁嘅細孔。將佢放落滾燙嘅湯底度淥短短幾秒，吸滿晒濃郁嘅湯汁。「脆貢菜丸子」超級爽脆彈牙，肉汁豐盈，加左貢菜爽脆感。「撈派撈麵」即場表演拉麵。「兒童餐」造型極之可愛，色彩繽紛，食材配搭講究營養均衡，份量啱啱好，仲有禮物。
為壽星準備嘅「生日肥牛蛋糕」。肥牛雪花紋理極之靚，層層疊疊咁砌成一個立體蛋糕嘅形狀，打卡一流！另外仲有一袋生日禮物，店員一齊唱生日歌，非常開心。
呢間店有細細兒童遊樂場，仲可以做兒童美甲，小朋友超開心。
by admin 9 月 7, 2025 | Blog , 甜品 , 西貢 , 西餐 , 親子餐廳 , 麵食
西貢 7/9/2025 12:00
Chicken Mexicana Burger $148﹕賣相靚仔材料夠晒豐富飽滿，超厚身嘅雞扒煎得微焦，中間仲保持鮮嫩多汁，一片融化嘅芝士增加咸香味。但係呢款漢堡算係非常清新，有新鮮嘅生菜同番茄片，醬汁係牛油果醬，濕潤順滑口感，淡淡甜酸。
Pancetta Carbonara $159﹕一睇就知非常忌廉咪，奶油香味勁濃，仲有好香芝士味，口感絲滑又夠濃稠。意粉本身韌度適中，每條粉都被白汁包裹，超滋味。配料係最基本嘅煙肉、白蘑菇，簡簡單單就係最好味。呢個意粉算係一個非常成功嘅演繹，可算係食過最高質嘅Carbonara之一。
Honeycomb Pancake $130﹕兩大片圓潤厚實嘅鬆餅，表面金黃，口感超級鬆軟，中間濕潤。蛋香、奶香、牛油濃郁，本身已經好好味，再淋上甜甜嘅蜂蜜糖漿，加一點清甜花香，更甜蜜。配襯嘅鮮忌廉同水果，酸酸甜甜，顏色又靚。
Cast Iron French Toast $128﹕用熱熱嘅鐵板送上，熱辣辣，多士煎到完美嘅金黃色。兩大件多士外層微脆，中間係浸滿蛋漿，濕潤柔軟，而且勁香牛油味同蛋味。拖肥醬光亮濃稠，再撒上肉桂粉，味道非常平衡，香氣滿滿。最後雲尼拿雪糕來一個冰火，暖暖嘅多士加上凍冰冰嘅雪糕，勁滿足。
連加一$600幾蚊，味道不錯，但總覺比上次少左一點驚喜。
by admin 8 月 17, 2025 | Blog , 屯門 , 甜品 , 自助餐放題 , 親子餐廳 , 酒店
屯門Hotel Cozi Resort 17/8/2025 12:00
特登嚟屯門食自助餐，因為環境實在太吸引，到處都係火車主題，連座位都係火車車卡包廂，小朋友一入場已經勁興奮。餐廳外有一個觀景平台Cozi Starry，環境光猛都幾舒服。
餐廳唔算大，但係應有盡有，麵包前菜、沙律、凍海鮮、刺身、熱盆、甜品、飲品都齊全。主打海鮮主題選擇都幾多，蒜蓉粉絲蒸扇貝限量，粉絲索晒蒜蓉汁。即煮嘅海膽汁鮑魚蝦仁意粉，新鮮熱辣，味道不錯。最愛嘅甜品首選自製脆皮窩夫，牛油味夠香，新鮮熱辣，外脆內軟。自行配上雪糕同埋朱古力醬，拍得住出邊嘅甜品舖。最後仲有多款雪糕選擇，貴價嘅Movenpick、Häagen-Dazs口味都幾多。首次是香港品牌Co Co Berry有好多香港特色嘅口味，豆腐味清甜豆味香，超推介。香港奶茶非常濃郁，都不錯。
食飽飽上五樓兒童遊樂場玩，場地唔算大，但玩樂設施應有盡有，連電動車都有得玩，真係超開心。
by admin 7 月 27, 2025 | 中菜 , 兒童餐 , 小食 , 深圳 , 親子餐廳 , 點心
深圳歡樂海岸 27/7/2025 17:00
公主生日去西貝慶祝。
親子套餐 124元
兒童餐份量對於小朋友嚟講啱啱好。蘑菇湯莜面魚魚蘑菇湯粉，小朋友鍾意食嘅粉仔。仲有一份細細個嘅雜糧漢堡，麵包軟熟，入面塊漢堡扒雖然細，但肉味都幾足，加埋番茄醬，酸酸甜甜好開胃。仲有水果，甜品，酸奶等。
土豆胡蘿蔔小鍋牛腩﹕騰騰小鍋上枱，入面嘅材料好豐富，大大嚿嘅牛腩、土豆同胡蘿蔔。牛腩炆得好腍，用筷子輕輕一夾就分得開，肉質軟嫩得嚟又帶少少筋，好有口感。土豆同胡蘿蔔都吸收晒啲肉汁精華，煮到又腍又入味，用嚟撈飯簡直係一流。
羊肉小餃 45元﹕水餃隻隻都好飽滿，皮好煙韌，唔會太厚或者太腍，羊肉味好濃郁，肉汁豐富，真材實料，味道濃郁但又恰到好處。
生日麵一碗蕃茄湯底闊條麵，有蛋有菜賣相幾靚。最驚喜嘅係生日環節。啲店員會圍埋一齊唱生日歌，氣氛超級高漲，仲有魔術表演，又有禮物，小朋友超級開心。
by admin 7 月 25, 2025 | 中菜 , 兒童餐 , 四川菜 , 深圳 , 火鍋 , 親子餐廳
深圳KKOne 25/7/2025 12:00
海底撈火鍋，真係火鍋界服務世一，更非常適合慶祝生日。
今日揀咗番茄湯底配菇菌湯（87元），湯底味道不錯，蕃茄湯更是一流。番茄新鮮香味香氣，飲一啖已經好暖胃，仲非常開胃。職員仲幫你加上牛肉粒同埋芫荽蔥，特製一碗蕃茄肉碎湯，真係超級好味。
牛肉丸（29元）彈牙多汁。鮮切吊龍牛肉（46元）肉質嫩滑，油花分佈均勻。蒙古羊肉片（72元）帶香濃羊膻味，肉質細嫩。撈麵係必點，睇住師傅現場拉麵，麵條彈牙又掛湯，吸晒番茄湯底嘅精華。
兒童餐（26元）小巧精緻，已經有多款火鍋料，午餐肉、鵪鶉蛋、魚柳、米線、蔬菜，份量細細，但非常抵食。
漢堡兒童餐 （39.9元）賣相不錯，有小漢堡、雞翼、蛋糕、飲品。
莓莓抹茶牛乳（18元）味道香濃，用料充足，都拍得住出邊嘅茶飲店質素。
喺度慶祝生日收穫滿滿，首先有一大碗長壽麵。場內佈置非常靚，店員仲會唱生日歌。間中仲有變臉表演，又不停有小禮物。店內仲有一個兒童遊樂場，有職員姐姐陪小朋友畫畫砌積木，真係非常歡樂。女士更可以做靚靚嘅美甲。
整體味道唔算十分突出，但係服務同埋周邊實在絕對贏晒。食足兩個幾鐘，埋單257元代300元，補埋尾數340元左右。
