馬鞍山 31/5/2026 18:00
今日試中菜，揀左幾款招牌菜。
晚市孖寶$338。金銀蒜粉絲蒸聖子皇﹕陣陣蒜香蒸，聖子皇飽滿，肉質鮮嫩彈牙，味道都幾鮮甜，粉絲索汁夠惹味。
岩石火焰黑豚燒皇﹕上枱有火焰效果，黑豚肉本身油脂分佈均勻，帶微微焦香，滿滿肉汁，肉質爽滑，醬汁鹹甜味不錯。
豉油皇龍鬚炒麵 $128﹕炒麵幼細，口感爽彈，炒得夠鑊氣。豉油皇醬香濃郁，仲有魷魚鬚、芽菜等唔少配料。
椒鹽包仔豆腐 $78﹕包仔豆腐炸得外酥內嫩嘅，外層金黃酥脆，中間都幾軟嫩，豆香香，加上椒鹽，帶微微香辣，幾惹味。
晚市送甜品，芝麻糊味道微甜，芝麻幾香。紫米椰汁糕，紫米幾軟糯，椰汁味幾香，配合得不錯。
味道雖不錯。晚市茶錢$20/位，仲有一碟花生$20，連加一都要$688，唔平。
31/12/2025 16:00
是次高雄入住福容倈旅，絕對五星好評。
三晚入住閱旅二中床房，每晚房價約$800。另加兒童同床附加費每晚NT$550，幼兒同床免費。
福容大品牌，倈旅年輕線，酒店非常新淨。酒店大堂細細，裝修時尚，整體簡潔又企理。一入到房直頭嘩一聲。一個大玄關，旁邊仲有茶水位置，大大個鋅盤枱面。進入卧室範圍更不得了。兩張二人床，除左書枱閱讀區，仲有一張大梳化加小餐枱，空間感十足。房內叉電位都非常充足，WIFI不錯，仲可以睇NETFLIX。廁所空間大，設備新，個人用品齊全。入房。
酒店每天仲送贈汽水、咖啡、茶包、零食、綠豆酥。幼兒入住可要求加裝床欄，讚!
下午至晚上時段，住客仲可以免費到餐廳享用零食、果汁、咖啡等。我地最鍾意買外賣上黎食，坐得舒適，又可以飲下野。
位置就係前金捷運站一分鐘腳程，方便到不得了。
是次入住是非常讚，性價比高，值得再試下呢個品牌其他酒店!
28/12/2025 09:00
第二晚今次入住「墾丁河堤度假酒店」，房價包埋自助早餐，極之有驚喜。餐廳環境開揚舒適，食物款式選擇都OK多，中想食得清淡啲，可以揀熱辣辣嘅白粥，配埋肉鬆、肉燥都非常好味。烘得餐包加果醬，穀物片，簡簡單單。飲品有香濃咖啡，奶茶，醒神一流，仲有果汁氣泡水，都算應有盡有。
呢間酒店應該係舊店重裝，酒店入面都裝修得幾靚。今次揀左三人房，房間唔大，廁所較窄，商務佈置其實唔太適合小朋友。一張大床一張單人床都夠訓。房間備品齊全，基本有咖啡茶包、支裝水，刷牙等個人用品可以係大堂自取。
大堂空間佈置幾靚。二樓有個公共空間，有個迷你兒童玩樂區，旁邊有梳化自助飲品，等車休息一陣就最岩。Agoda 每晚房價$700，算不過不失。揀選呢間酒店主要因為距離「鹿境」只需步行3分鐘，第三日上午可以自己玩多半日先走。
![2025 高雄墾丁之旅 [2.1 墾丁宅屋海景民宿]](https://www.letseatoutdiary.com/wp-content/uploads/2026/01/img_3314-1080x675.jpg)
27/12/2025 08:00
昨晚Check In時天已黑，窗外只見一片漆黑乜都睇唔到。今早一起身就見到海景，係真真正正180度無死角海景，真係非常值得。
一生人點都要去一次墾丁，享受陽光與海灘。自問唔係玩水之人，望下海放下風都係嘗心樂事。所以黎墾丁必需揀一間可以享受全海景嘅民宿。睇過唔同民宿，最後睇中呢間都算新開無耐，而且有全海景露台嘅四人房。房間都算幾大，四人房係兩張大床，仲有一個全海露台，用Google一睇座向，真係擁抱全海。房間Netflex，wifi齊備。出入用房卡，而且提供所有備品，刷洗用品、茶包、汽水、支裝水等，拍得住酒店級安排。衛生情況良好，只係需要行樓梯。
知道墾丁難自己搵食，呢間民宿另一樣好嘅地方係包埋早餐。第二朝九點準時拎到早餐，新鮮即製，份量都幾多。
炸豬扒雞蛋火腿三文治、雞扒雞蛋火腿三文治﹕賣相超吸引，極之有霸氣。麵包烘得微微帶脆，仲有好香牛油味。豬扒炸得金黃酥脆，肉質依然保持軟嫩多汁。夾埋煎得極之香嘅火腿同軟滑煎蛋，口感層次極之豐富，仲有生菜同沙律醬，惹味到令人完全停唔到口。另一款雞扒煎得香口，肉質超級嫩滑又鮮甜配搭，加上微鹹嘅火腿同充滿蛋香嘅煎蛋，味道極之夾。
四色吐司﹕色彩繽紛，視覺效果極之吸睛，有朱古力、士多啤梨、藍莓、奶黃醬，樣樣都幾好味。最後，仲有鮮橙同清甜冬瓜茶，真係非常滿足。
房東非常友善客氣，仲介紹墾丁景點俾我地。總體黎講，$1,000/晚都好值得。
民宿對面就係船帆石，馬路旁就有個觀海平台，臨走時出去打卡影相，吹下海風，非常爽快。食飽飽，準時10點上車開始墾丁一日遊。
屯門Hotel Cozi Resort 17/8/2025 12:00
特登嚟屯門食自助餐，因為環境實在太吸引，到處都係火車主題，連座位都係火車車卡包廂，小朋友一入場已經勁興奮。餐廳外有一個觀景平台Cozi Starry，環境光猛都幾舒服。
餐廳唔算大，但係應有盡有，麵包前菜、沙律、凍海鮮、刺身、熱盆、甜品、飲品都齊全。主打海鮮主題選擇都幾多，蒜蓉粉絲蒸扇貝限量，粉絲索晒蒜蓉汁。即煮嘅海膽汁鮑魚蝦仁意粉，新鮮熱辣，味道不錯。最愛嘅甜品首選自製脆皮窩夫，牛油味夠香，新鮮熱辣，外脆內軟。自行配上雪糕同埋朱古力醬，拍得住出邊嘅甜品舖。最後仲有多款雪糕選擇，貴價嘅Movenpick、Häagen-Dazs口味都幾多。首次是香港品牌Co Co Berry有好多香港特色嘅口味，豆腐味清甜豆味香，超推介。香港奶茶非常濃郁，都不錯。
食飽飽上五樓兒童遊樂場玩，場地唔算大，但玩樂設施應有盡有，連電動車都有得玩，真係超開心。
12/8/2025
美團先訂一晚酒店，到場後職員再幫我哋查一查房價，都係美團平台較為優惠。商務雙床間每晚房價385元-458元。因為生日時間入住，職員幫我哋免費升等去家庭房，房間非常闊落，裝修有格調。兩張雙人床，旁邊仲有用餐區，有張四人枱可以舒適地食宵夜。小朋友入住都有兒童拖鞋及牙刷等。房間衛生情況相當不錯，提供嘅備品都好足夠。基本上支裝飲用水係無限任拎。宵夜由送餐機械人送上，相當方便。最大嘅賣點就係廣州東站火車站一條馬路之隔，頂級方便。
早餐
住客優惠價99元有四張早餐券。第一日落去嘅時候冇人收票，所以變相第二天食多餐。
餐廳自助形式，選擇唔算特別多，都係啲包點，少量熱盤，仲有粗糧，味道不過不失，不過飲品熱鮮奶同即磨咖啡就相當唔錯。
