大家食@油麻地
2/12/2011 13:00
午餐只食個第一腸， 當然唔夠飽。記得早前貪平買左兩張大家食團購券，立即去食埋，填飽個肚先算。平，的確係平，只需$14，就有一客招牌炸醬撈麵，再加埋一杯冷熱飲品。
$14一客，份量唔少，一大碟撈麵，一大堆花生，超多條青瓜，炸醬豬肉碎呢埋喺麵同麵之間。一向勁憎青瓜嘅本人，聞到青瓜味真係頂唔順。而每條青瓜粗度十足，份量超多，可能比M記中裝薯條更多。好衰唔衰仲要撈埋落個麵度，要一條一條夾走都幾花時間。
除去青瓜呢個敵人後，出現番一碟我接受得到嘅炸醬麵。麵係煙韌嘅，亦唔會過腍。肉醬係好味嘅，粒粒豬肉碎調味適中，亦夠惹味，濕潤度剛好，唔覺得太油膩。再加埋香脆花生，其實係一個唔錯嘅配搭。
但…點解? 點解青瓜嘅味道仍然陰魂不散…一陣陣嘅草青腥臭味…噢! 撈!
就係呢幾十條青瓜，破壞晒成碟撈麵，所以我俾劣評。編按﹕我係有偏見!
如果你愛青瓜，相信你會愛死呢碟撈麵。講完。
0 Comments