大阪王將@馬鞍山
1/11/2015 20:30
話說馬鞍山呢個美食沙漠，近排開番幾間食得下嘅餐廳。今次就黎試下大阪王將。八點落到黎都要排隊，大約等左半個鐘。
呢間大阪王將除左餃子出面，仲有天津飯。基本$45起，任選選類、蛋、汁，另外再加錢跟配料。
五味海苔飯+元祖天津蛋+王將咖哩汁+自家製漢堡扒 ($63)
記憶中同早期食過嘅天津飯好唔同，之前食過醬汁係類似中式芡，呢個似奄列蛋飯多啲，仲可以自選醬汁。鐵板上，厚厚嘅天津蛋包飯飯，上面加左塊漢堡扒，汁係另上。
本來睇落乾乾地，將淋上去，賣相即時變得吸引。漢堡扒幾鬆軟，入面幾Juicy，肉味都幾濃，唔錯。天津蛋係好厚嘅滑蛋，幾驚喜係雖然外皮全熟，但切開裡面仲幾濕潤，夠幼滑，蛋味正常。所謂嘅五味海苔飯係珍珠飯面加左少去海苔碎。而咖哩汁係傳統日式咖哩，夠香，辣度低，整體黎講算唔錯。
套餐跟餃子 ($18)
餃子似乎係即叫即煎，夠新鮮熱辣。餃子皮薄微脆，內裡肉餡多汁，都OK。
滑蛋豬扒鍋 ($62)
以火鍋上，能夠保持溫度，可惜出品麻麻。豬扒炸粉漿太多，豬扒太薄，仲甩皮，普通貨式。而醬汁偏咸，香味不足。
0 Comments