行完哥拉巴園落山路途會經過一條小街，除左有幾間長崎蛋糕名店外，仲可以試下長崎名物「角煮饅頭」。岩崎本舖得到長崎特產最優秀獎，長崎市內總有一間喺左近。行過隨便試食，一人一舊，試食嘅份量都幾乎有四份一個包。咁試完好食又唔怕再消費，買一個角煮饅頭 (¥400) 當下午茶。新鮮熱辣到燙手絕對無得頂，包係好似饅頭咁，再軟身濕潤一啲。中間夾住一塊厚切豚角，幾乎比包皮還大。三層豬腩層次分明，滷到入晒味，甜甜嘅醬油充滿住成塊豚肉，肉質鬆軟到入口即溶，又唔會過份油膩，食完一件更加開胃。