2014大阪京都七天遊之第一日 [1.2 暴走天神橋筋與梅田]

by admin | 4 月 8, 2014 | 2014大阪京都七天遊, 旅遊, 日本, 關西 | 0 comments

17:15 落機到達大阪都已經下午，第一日行程選擇喺梅田地區遊走。先去附近嘅新梅田食道街醫肚。Google Map顯示腳程要三分鐘，但其實一出酒店轉個彎就係，真係勁近。大阪第一餐試試地道嘅大阪燒同炒麵，揀左一間參加過電視冠軍王嘅人氣名店きじ。

1969年創店嘅きじ可算係老字號。一般遊客因為旅遊書介紹，多數會去藍天大廈滝見小路店，但梅田食道街店更有老大阪風味。小店細細，木製裝潢配上淡淡暗暗嘅燈光，將焦點全部放係大廚嘅鐵板上。我地坐喺鐵板枱前，睇住鐵板上嘅美食真係食欲大增，全部新鮮即製呀。

食客多數係落班嘅西裝友，正真體驗到大阪人五點半嘅生活。店員知道我地係遊客，提供左中文菜單，仲安排左識國語嘅職員幫我地落單。點左一份炒麵，加一份大阪燒豚玉。先送上炒麵，好香口，有鑊氣，麵條夠煙韌，材料有椰菜豬肉等，味道較為清爽，如果醬油可以再多啲應該會更好食! 另一味大阪燒整得好靚，表面塗滿醬汁，仲有蛋黃醬同海苔。用迷你小鏟切開，外皮係脆脆的，中間嘅餡多到不得了，粉漿軟腍，加上又甜又爽脆嘅椰菜，仲有肉碎，配合得好好。不愧為大阪燒人氣名店! 埋單總數大約¥1370，物有所值。

18:15 食完下午茶就繼續下一站天神橋筋商店街。為左要完成滿步狀，決定由天七向天一方向行。天七起站係雜貨店西台，同老闆婆婆溝通過後，佢擔心我地去到天一終點間舖頭已經關門，所以決定照俾滿步狀我地，以免失望而回。婆婆實在太好人啦，我地一定會好好完成整段路程!

天神橋筋商店街係日本最長嘅商店街，成條街橫跨三個地鐵站距離，全程有2.6公里，由七丁目行到一丁目差不多要用上一個鐘時間。商店街有成八百間店舖，好多都係舊式家居小店，體驗到傳統大阪街坊生活。雖然六點幾有好多小店已經關門，但食肆仍然人氣鼎盛，特別係壽司舖，因為呢度係有名嘅壽司激戰區。

沿商店街行試左兩樣日本傳統小食，丹波屋嘅醬酒味糯米小丸子 (¥70)，煙煙韌韌嘅糯米丸加上醬油，少少咸少少甜，味道好搞笑。

鳴門鯛燒本舖嘅鯛魚燒 (¥150)外脆內軟，香甜好味嘅紅豆多到滿瀉。

邊睇邊行，大約行左一個鐘，終於到達一丁目終點! 將滿步狀頒俾自己先!

20:00 又到晚飯時間，今晚選擇食鰻魚飯。名代宇奈とと出名平靚正，最平嘅鰻魚飯只需要¥500，¥500有得食鰻魚飯的確吸引。柯打左一客¥500鰻魚飯，另一客加左蔥同溫泉蛋嘅鰻魚飯 (¥800)。雖然價錢平，但鰻魚俾足一大塊，而且鰻魚仲係肥厚有肉地。日本嘅鰻魚真正係炭火燒烤，所以炭香味十足，鰻魚本身一啲都唔腥，醬汁好濃郁，細蔥香味極濃而且好甜好脆，送飯一流。值得一提，日本嘅飯除左比較煙韌外，飯粒本身已經好夠甜味。飲埋杯清涼麥茶，非常完美嘅晚餐！