2015九州蜜月追櫻之旅第二日 [2.1 長崎鐵道上的朝食]

by admin | 3 月 30, 2015 | 2015九州蜜月追櫻之旅, 九州, 旅遊, 日本 | 0 comments

安排左今日係長崎一日之旅，八點未夠就起身，第一件事係去博多駅買早餐。博多駅有好多間便當專門店，便當實在太色彩繽紛，花多眼亂都唔知揀邊款好，係度都消耗左好多時間。咁岩係AMU EST嘅萬坊JR博多シティ店見到便當人氣嘅三味便當，就決定買一個。另外再買左個明太子飯團加餸。

今日第一日使用JR Pass，只需喺人工改扎口出示Pass，就可以自由進出。喺指示版前搵正確嘅月台就搭電梯上。進入JR月台，影車頭係指定動作。搭上08:56嘅JRかもめ，展開日本鐵路之旅。由於JR Pass已包指定席，當然要劃位坐得舒服啲啦! 的確，車箱非常闊落，好舒適。由博多去長崎車程約兩小時，風景就無乜啦，都係樹同屋。咁就慢慢嘆個靚早餐啦。

先講下個飯團，係博多明太子胚芽米(¥230)，紫菜包飯入面加左明太子，明太子係鱈魚子，好有海鮮味，腥味唔算重，加少少辣，食落都幾開胃。

¥1200 三味便當係一款九宮格便當，賣相的確好靚好吸引，而味道相當唔錯。係火車上食凍凍嘅便當，實在有番風味，估唔到咁驚喜，真正好味。呢個便當係以魷魚做主材料，總共有十七款小食，裡面有十四款都用上魷魚作材料。佢個名叫「上等いか三昧辨當」，但食得出有唔止三種煮法。魚豆腐二色田樂係好甜嘅魚蛋。醬油菇漬物非常入味、魷魚甘辛煮即係魯汁魷魚，非常入味。魷魚筒包飯，飯煙煙韌韌不錯吃。好夠味嘅綠海草，加左蛋黃醬魷魚絲。有馬煮配醬菜有味飯。魷魚絲包住肉嘅燒賣、玉子燒都加左魷魚，非常香甜。魷魚炊御飯。白煮魷魚配檸檬汁。炸流心芝士魷魚波，魚味極濃，配芝士非常襯。