離開哥拉巴園，繼續散策之旅。下一個目標係長崎新地中華街，由哥拉巴園經荷蘭大道就可以行去中華街，腳程大約十多分鐘。
日本有三大中華街，有横浜中華街、神戶南京町同長崎新地中華街。早前已經唔覺意去過神戶南京町，今次黎到長崎儲第二張閃卡。長崎新地中華街特別之處，係街道呈十字型，東南西北四方入口都有紅色牌樓，原來係代表「東青龍」、「西白虎」、「南朱雀」、「北玄武」。
中華街內有幾十家中式國菜館，有經營長崎特產雜燴麵、碗麵等，名店有如「江山樓」，係馳名中外推介店。亦有售賣中國雜貨商品。可能係時間問題，街道上無乜人，而且食店好似正落場，談不上熱鬧。
提早五點食晚飯，由中華街行去思案橋都係幾分鐘，黎到呢間創業於1925年、九州最古老嘅喫茶店ツル茶ん食元祖土耳其飯。呢度好耐之前係報社，創辦人同國父有淵源，所以門口亦寫住「孫文先生故緣之地」。店裡面貼左好多坂本龍馬跟同中山先生嘅資料，亦有好多明人到訪嘅留影同簽名。店內有復古裝修，亦保留好多舊有擺設，另有一番風味。
昔なつかしトルコライス ¥1080
土耳其飯的確係Fusion菜，飯、意粉、沙律放喺同一碟。呢款招牌菜係咖哩吉列豬扒配番茄拿破崙意粉。勝在顏色鮮艷，賣相吸引，而且美味都唔錯。咖哩汁香得黎帶甜，豬扒炸得香脆，肉質不錯，唔鞋仲有肉汁。意粉汁番茄味勁濃，酸甜醒胃。而飯並唔係普通白飯，而係拌入牛油、洋蔥同粟米嘅有味飯，淡得黎有味，正好緩和口味。
フリカンデルトルコ ¥1080
另一味選擇左漢堡配黑椒意粉。牛肉漢堡非常唔錯，切開漢堡仲見到肉汁，而且肉質鬆軟有肉味，配上微酸嘅ドミグラスソース牛扒醬，不錯吃。而意粉就簡單用黑椒調味，不過不失。
埋單港幣$140有找，味道未算驚為天人，但勝在配搭有趣。看似九唔搭八，但正好感受長崎和洋融合嘅感覺。
食飽呢個早晚餐，開始向稻佐山進發。途中黎到呢間長崎蛋糕名店「福砂屋」嘅總本店，心想買幾條長崎蛋糕做手信，但得知食用期限得一星期，惟有稍後再掃貨。
0 Comments