第一站目的地係嵐山，由梅田出發，最方便又最抵嘅交通方法就係阪急電車。再利用阪急二日券乘車大放題，抵上加抵。搭上08:00通勤特急到桂，再轉普通車去嵐山，全程需時五十五分鐘。話明係通勤特急，當然見到有唔少通勤嘅黑衣人。呢個時間係日本人上班嘅高峰期，喺鐵路站見到人潮全部都係著晒深色西裝嘅上班族，場面真係好壯觀，Matrix感十足。
 

落車後由向トロッコ嵯峨野駅進發，途經中之島公園、渡月橋，已經見到好多櫻花。適逢旅遊嘅呢幾日，係京阪櫻花滿開至吹雪嘅高峰期，的確，我地遇上好多靚靚嘅櫻花。
 

再見到Arinco，係Tabelog 3.53甜品名店。買左一個宇治綠茶味Arinco Sand (¥308)，微甜嘅清雪芳蛋糕加上抹茶雪糕，做早餐都唔錯。
 
 

09:45到達天龍寺。天龍寺係世界文化遺產，係「京都五大禪寺」之首，可算係嵐山必遊景點，入場費¥500，一遊無妨。行左大約半個鐘時間，有山有水有花有竹林，大自然環境影相一流。
   

離開庭園後，再俾多¥100入寺內庭參觀大方丈、書院、多宝殿，要除鞋先可以行入去。踩上木板好軟好舒服，行入內庭更有風味。