旺角 7/3/2026 13:30
今次試咗「劉興記」嘅招牌生煎包，除咗必食嘅經典原味，仲試埋佢哋充滿特色嘅「沙嗲牛肉生煎包」，超驚喜。
生煎包 $35/4 煎到個底金黃香脆，賣相已經非常吸引，熱辣辣，爆晒汁，湯汁非常鮮甜，原味真係無可挑剔。
跟住試下充滿港式風味嘅「沙嗲牛肉生煎包」$15，一咬開，濃郁嘅沙嗲醬香味即刻湧出嚟，味道非常突出。入面嘅牛肉餡料同樣嫩滑，味道香濃惹味，帶少少花生香，甜中帶鹹。外皮同經典款一樣，底脆皮軟，驚喜！
上海小籠包 $40
香煎雞扒拌麵配一隻小籠包 $58 ：蔥油嘅香氣即刻撲鼻而來。麵條煮非常彈牙，蔥油均勻咁掛喺每一條麵上面，鹹香得嚟又帶點蔥嘅微甜，惹味到極。香煎雞扒煎到外皮金黃香脆，肉質保持得好嫩滑。
食完香口惹味嘅拌麵，即刻飲一啖凍豆漿，簡直係完美配合。呢杯凍豆漿味道清甜，完全唔會死甜，帶有濃郁嘅黃豆香氣。口感順滑細膩，口感粉粉地，感覺真材實料。冰涼消暑解渴。
旺角 28/2/2026 14:00
鰻魚拼牛肉飯 $62
飯面鋪滿油潤亮澤嘅蒲燒鰻魚，陣陣醬油香氣，魚油甘香，甜鹹適中嘅蒲燒醬汁，撈飯超正。牛肉片切得夠薄，口感軟腍入味，而且肉汁豐富，充滿牛脂香氣。滿滿日式醬油同洋蔥香甜，超滿足。
肥牛豚骨鍋 $60
呢度嘅湯底夠晒濃郁，味道香甜。主角牛肉份量唔少，牛肉切得薄薄哋，肥瘦分佈平均。將牛肉放落滾湯度輕輕拖兩下，肉質食落非常軟腍嫩滑。火鍋嘅配料都好豐富，有大大件蟹柳、金針菇、鮮甜嘅蔬菜、嫩滑豆腐。蔬菜索滿晒湯底嘅精華，惹味到極，最鍾意超甜粟米，爆多汁，淨係食配料都已經好滿足。
絕對係性價比極高嘅之選，價格極之親民。
旺角 21/2/2026 13:30
自選天婦羅定食 $116﹕自選彈性高，鍾意食乜就叫乜。一上枱見到一大碟天婦羅，賣相已經好吸引。天婦羅穴子真係成餐飯嘅亮點，條穴子長到隻碟都裝唔晒！炸漿薄脆，穴子肉質細嫩綿密，魚油香氣豐富。珍寶蟹柳份量十足，一咬開係絲絲分明嘅蟹肉質感，鮮甜多汁，炸過之後更加香口。天婦羅帶子係半生熟狀態，外層酥脆，入面依然保持刺身級嘅軟嫩鮮甜，火候控制得啱啱好。至於黑虎蝦，肉質爽口彈牙，蝦味濃郁。選擇配上冷酢橘烏冬，湯底清澈，入口帶有淡淡嘅鰹魚鮮味，最正係酢橘嘅酸香非常突出，清新醒神，烏冬口感極之煙韌彈牙，掛湯力強，雪得夠凍，夠晒清爽，正好中和天婦羅嘅油膩感，完美。
蒲燒鰻魚丼 $88﹕絕對係經典中嘅經典，一大塊厚肉嘅鰻魚鋪滿喺飯面，表面燒到焦糖化，油潤亮澤，賣相非常吸引。用筷子輕輕一夾，鰻魚肉質極之鬆軟肥美，入口即化。蒲燒醬汁調得恰到好處，甜鹹適中，撈飯一流。再飲啖麵豉湯，味道濃郁，充滿豆香，就係一餐簡單而又充滿幸福感嘅享受。
雞皮餃子 $48﹕將傳統餃子皮換成雞皮，將免治雞肉餡包住再拎去炸，超驚喜。外皮金黃香脆，非常誘人，滿口都係雞油嘅甘香，內裡嘅雞肉餡料鮮嫩多汁，沾少少醋非常好食，比起普通餃子惹味得多。
紫薯紅豆豆腐雪糕 $38﹕豆腐雪糕嘅口感綿密，豆味非常突出，甜度適中，感覺好清新。紫薯天婦羅，香甜軟糯，而紅豆蓉就煮得粒綿密。將三樣嘢一齊食，唔會太甜膩，充滿日式風情，為整餐飯畫上一個清新又滿足嘅句號。
最後叫多一支提子汽水 $10，完美。
價錢唔貴，食物高質，值得再來。
旺角 15/2/2025 15:30
喺旺角行到攰，想搵飲杯嘢食件餅。首先講下杯茶走，呢度嘅茶底夠濃厚，茶香突出而唔會有澀味。甜度拿捏得幾好，順滑得嚟又唔會太甜，奶香同茶香平衡得啱啱好，每一啖都係經典嘅港式風味。朋友揀左白桃烏龍茶，味道清新，入口首先係烏龍茶嘅甘醇，之後白桃嘅果香慢慢滲出嚟，唔好自然嘅清香。飲完之後非常消暑。抹茶芝士巴斯克蛋糕抹茶味極之濃郁，抹茶回甘，食落去帶少少微苦，剛好中和咗芝士嘅膩感。蛋糕質感好軟滑，入口即溶。
旺角 15/2/2026 12:30
幾鍾意呢間泰屋，因為午餐真係平靚正!
先飲返啖冬蔭公湯，未飲已經聞到濃烈嘅香茅同南薑味。一入口，酸辣味即刻湧上嚟，刺激得嚟又非常開胃。湯底夠濃厚，唔係只有辣味，而係充滿咗蝦頭嘅鮮甜同椰奶嘅香滑。草菇爽口多汁，索滿咗酸辣湯，好開胃。
海南雞飯 $70﹕相當正宗，賣相靚，雞皮油亮望落已經非常吸引。雞件份量十足，全部都係去骨雞髀肉，啖啖肉。雞皮爽滑彈牙，皮下脂肪唔多，但雞油香氣十足。雞肉極之嫩滑，完全唔會覺得嚡口，而且煮得啱啱好，仲保留到豐富嘅肉汁。即使係雞胸嘅部分，都一樣咁嫩滑。個飯底先係重點，用雞油同香料煮過嘅油飯，粒粒分明，索滿晒雞油同香茅嘅香味，就算唔配雞肉齋食都已經好好味。飯嘅軟硬度適中，油香十足但又唔會覺得油膩。當然唔少得靈魂醬汁，薑蓉同泰式辣醬，加少少酸辣超級好味。
泰式肥牛炒河 $60﹕一上枱就聞到好強勁嘅鑊氣，河粉炒得均勻，色澤油潤亮澤，每一條都沾滿咗甜醬油嘅焦香味，河粉入口煙韌彈牙，保持到乾身爽口。肥牛肉片份量超多，醃得入味，食落軟腍唔韌，仲有各色青菜，爽脆嘅口感中和咗河粉嘅油膩感。調味適中，咸咸甜甜相當不錯。
青咖哩越式豬扒飯 $58﹕香茅豬扒大大件，煎得出色。豬扒預先用香茅、魚露等香料醃過，非常入味。上枱時熱辣辣，外層煎到有少少焦香，但切開入面依然肉汁豐富，肉質鬆軟唔會乾柴。每一啖都食到香茅獨有嘅清新香氣，非常開胃。青咖哩醬汁較為稀身，但味道不減，咖哩味香濃，香料、椰奶味十足，順滑得嚟又唔會太甜，辣度溫和，撈飯超正。
加配幾款小食都好抵食，先講串燒雞 $25，一上枱已經聞到好香嘅燒烤味，雞肉燒得啱啱好，表面帶點金黃微焦，賣相好吸引。咬落去肉質依然保持嫩滑，完全唔會乾柴，保留咗豐富嘅肉汁。醃料嘅味道滲透入每一絲雞肉入面，帶有淡淡嘅黃薑同香茅味。呢度嘅沙嗲醬做得好出色，花生味極之濃郁，質感粗粒得嚟又順滑，帶有微甜同微辣，非常惹味。
另一款必試嘅係炸蝦餅拼春卷 $20。大大塊圓碌碌嘅蝦餅炸到金黃酥脆，入面係實實在在嘅蝦肉膠，咬落去非常彈牙，每一啖都食到鮮甜嘅蝦味。蝦餅炸得好透，唔會油淋淋，配埋專用嘅泰式酸梅醬，酸酸甜甜非常開胃，酸甜味更加提昇咗蝦肉嘅鮮甜。春卷外皮極之酥脆，鬆化到跌晒碎，內餡豐富，係大量粉絲同雜菜，仲有木耳絲、紅蘿蔔絲等配料，增加咗爽脆嘅口感層次，味道一點都唔寡，反而有一種清新嘅蔬菜甜香。
椰汁冰﹕呢度嘅椰汁甜度調校得啱啱好，唔會過份甜膩，而係突顯咗椰子本身嘅天然清香同奶滑感，郁順滑嘅椰奶香味即刻充滿成個口腔。口感非常幼滑，最重要就係解辣。當你食完一啖咖哩，即刻飲一啖冰凍嘅椰汁冰，舒緩辣味帶嚟嘅刺激感，超涼快。
觀塘 7/2/2025 14:00
豐富午餐配一杯飲品，抵食。
香草蕃茄牛面肉焗芝士黃薑蕃茄飯$108: 每一啖都充滿芝士，仲有燉煮得極之入味嘅牛面肉，軟腍到不得了，膠質豐富，有大量香草同蕃茄，味道酸酸甜甜。黃薑嘅獨特香氣好突出，令到成個飯更加惹味。芝士、蕃茄、牛肉同香料，完美咁融合埋一齊。
香草蕃茄醬青口扁意粉 $118: 鮮紅色嘅蕃茄醬汁包裹住每一條扁意粉，醬汁上面舖滿一隻隻青口。醬汁味道非常濃郁，食得出係用新鮮蕃茄熬製而成，青口肉質飽滿肥美，食落鮮甜彈牙。扁意粉軟硬適中，充滿咬口。扁身嘅麵條可以掛汁。
意式辣肉腸薄餅 $128: 熱辣辣咁上枱，金黃色嘅餅底焗得好香脆，但中間依然保持到少少煙韌口感，充滿麵粉香，上面舖滿一片片圓形嘅意式辣肉腸，水牛芝士超拉絲，蕃茄醬嘅酸甜味好足。
