雲南桂林過橋米線
尖沙咀 19/9/2026
今個周末去開尖沙咀老字號雲南桂林過橋米線食個晏。
肥牛番茄烏冬嘅湯底真材實料，番茄鮮甜味突出。肥牛嫩滑得嚟索曬酸甜湯汁，配埋煙韌烏冬食真係好夾。
小鍋米線配料好大份，仲可以自選湯底，揀個清湯，湯底清甜。豬軟骨炆到充滿膠質，大腸煙韌香濃。魚腐吸滿清湯，米線口感爽滑。仲有大量芽菜、配料，夠晒惹味。
份量好足夠，性價比高。
餸多多
大圍 16/7/2026 18:00
經過大圍就買份「餸多多」嘅淨餸，排骨裹滿蜜汁，味道不錯，但骨比較多。蒜蓉魷魚爽彈，粉絲索曬濃郁蒜香，部份粉絲唔夠腍。蔥油雞肉質嫩滑，西蘭花大蝦用料十足，份量足，性價比高。加多個例湯清補涼，非常足料，鮮甜冇味精，非常正，啱晒家常便飯。
七甜三秋
深圳新洲 13/9/2026 14:00
點評中獎總共四份蛋糕下午茶。小店位置偏遠，距離地鐵站有一段路程。裝修不錯，幾有風味，有少量枱可以堂食。蛋糕款式多，每份已經係外帶包裝，乾淨企理。每份一件蛋糕，一件冰淇淋泡芙。
迪拜巧克力奶油蛋糕﹕成個蛋糕面頭鋪滿開心果脆絲，見到中間係朱古力蛋糕底層層夾住翠綠色嘅開心果奶油，深啡同鮮綠撞埋一齊非常搶眼。開心果脆絲好似威化咁爽脆，仲有一層可可簿脆，可可嘅微苦同開心果嘅堅果香氣喺口入面爆發，甜度岩岩好，食完一件都完全唔覺得膩。
小山園抹茶蛋糕﹕蛋糕抹面呈現好純粹嘅草綠色，質地平滑細緻，層次分明嘅朱古力蛋糕抹茶鮮奶油層層相間，蛋糕食落鬆軟綿密，抹茶鮮奶油入口即化，抹茶甘醇微苦，味道厚濃，中間仲有一層栗子泥，味道微甜，為蛋糕帶一點甜，味道不錯。
馬斯卡彭提拉米素千層蛋糕﹕一層可可鮮奶油一層餅皮整齊疊咗幾十層，面頭厚厚鋪滿一層深色法芙娜可可粉。薄皮帶點煙韌，夾層嘅意大利軟芝士忌廉幼滑順喉，一軟一韌配搭得好好。中間仲加左沾滿咖啡嘅手指餅，芝士味濃郁得嚟好輕盈，苦甜平衡，層次感豐富。
焦糖秋栗蛋糕﹕頂層淺啡色栗子泥，最上面放咗成粒油亮金黃嘅糖漬栗子，暖色調賣相好有秋日氣息。栗子蓉口感粉糯綿密，味道濃郁但唔會太甜，海綿蛋糕鬆軟濕潤，一啖食到兩種唔同嘅軟熟質感。焦糖嘅微焦微苦咁啱中和咗栗子嘅厚實甜香，堅果香氣好濃，甜而不澀。超級好食。
冰淇淋泡芙一啖咬落忌廉爆漿，勁!
三叔廚房
馬鞍山 12/9/2026 13:00
今日收工去咗馬鞍山新港城中心大街嘅三叔廚房食晏。三叔肉絲雙麵黃，脆軟雙重口感好有層次，芡汁調配得好勻循，生煎包底脆皮軟，咬開肉汁鮮甜滿溢，水準好穩定。最後叫多一份豆沙鍋餅，香脆綿密，甜味唔太甜。價錢貼地，而且份量好足。
三叔肉絲雙麵黃 $88﹕份量勁大，兩個人分都絕對夠食，成碟麵堆到好似座金黃色嘅小山丘咁，炸麵條炸得好均勻。面頭淋滿晶瑩剔透嘅肉絲芡汁，肉絲、冬菇、芽菜等，都好足料。上面吸咗芡汁嘅麵條變得軟腍入味，底層依然保持酥脆，一啖咬落去有齊脆同軟兩種口感。
三叔生煎包 4隻 $40﹕四粒白雪雪嘅生煎包排得整整齊齊，頂頭撒咗滿滿嘅黑芝麻同翠綠蔥花點綴。翻開底部煎到底層呈現好均勻嘅焦金黃色，油光透亮好誘人。包皮頂部食落鬆軟棉密，底部就煎得好似餅乾咁香脆。一咬開肉汁即刻喺口入面爆發，豬肉濃郁鮮甜，油脂香氣同蔥香平衡，可惜唔算太熱，打了折扣。
豆沙鍋餅 $38﹕切好一件件嘅鍋餅整齊排好，餅皮煎到金黃微焦，表面鋪滿密密麻麻嘅白芝麻。中間夾住厚厚嘅紅豆沙餡，外層餅皮薄脆香酥，入面包住嘅豆沙餡就綿密幼滑，甜味自然，甜度控制岩岩好。
老闆娘送飲品，熱豆漿味道幾清甜，豆味香，不錯。
酸奶罐罐
深圳in城市 6/9/2026 13:30
霸氣積分換購。蜜李桃桃酸奶昔簡直是消暑神器！份量超足，粉嫩賣相就讓人食慾大開。吸管一插到底大吸一口，濃稠冰涼的酸奶順滑入喉，酸甜比例拿捏得恰到好處。酸奶的天然微酸完美中和了桃肉的甜，既解膩又富飽腹感，絕對是果茶控和乳品愛好者必衝的夏日天花板！
麵霸頂軍
深圳燕南 6/9/2026 12:00
點評零元探店兩份，有拌麵配餃子，非常豐富。
招牌戰鬥拌麵：面頭鋪滿燒雞肉同紫菜，啲醬汁顏色深邃油潤，均勻咁掛滿每一條麵條，醬汁濃郁得嚟唔會膩，鹹鮮之中帶有微甜。麵條咬落去煙韌彈牙。仲有好多蔬菜、子薑、蘿蔔等，加入生雞蛋和豉油，非常惹味。
雞軟骨餃子：餃子煎到金黃色，每隻都包得飽滿挺身，排列得好整齊。餃子皮外脆內軟，咬落去裡面嘅雞軟骨提供咗豐富嘅彈韌嚼勁，層次感十足。雞肉餡料鮮甜多汁，即叫即整熱辣辣。
低溫慢煮豬肩肉拉麵配日式餃子及中華沙律 30元：額外加購橙V優惠套餐，真係勁超抵。鰹魚湯底鹹香味濃。兩大塊粉嫩嘅低溫慢煮豬肩肉，半熟嘅溏心蛋同紫菜，賣相極之誘人。豬肩肉質地軟嫩到入口即化，拉麵細身，順滑掛湯。日式餃子非常飽滿，皮薄加上菜肉餡，非常好食。仲有中華沙律。
