茶木＠馬鞍山

20/2/2022 19:00

茶木堂食就食得多，今日見好似要等位等好耐，索性轉行買外賣返屋企慢慢嘆。外賣優惠＄140可以揀兩份主菜連飲品。兩份仲送一客小食。

第一選擇係黑醋味醂豬軟骨配白飯

豬軟骨炆得好腍，有部份軟骨仲可以食埋，味道酸咪咪，幾開胃。

另一客係紅燒牛頰肉麵

外賣份量都俾得足，牛肉大大舊，入晒味。湯同麵分開，值得一讚。

飲品唔洗加錢已經有黑糖珍珠奶茶。仲送一份鹽酥雞。小食雖然份量少少地，但係炸粉唔太厚，都食到啖啖雞肉。

＄140加幾蚊外賣費，兩份豐富台式食品，都覺得幾抵食。