泰式清湯底豬頸肉河粉份量相當多，豬頸肉有整整八大片，外皮似乎燒過，輕微焦香，肉質算爽口，但有點硬實。河粉非常得意，係一大片、超闊嘅河粉片，質感好滑溜，感覺有啲似未捲嘅豬腸粉。泰式清湯加左唔少冬菜同青蔥，幾夠香。

另一款粉叫左椰汁雞湯底，椰汁味好香，雖然雞味唔重，但口感非常幼滑，相信加左唔少椰奶，而且除左椰香味，亦酸中帶微辣，又唔油膩，個人幾喜歡。加配幼身粉絲，吸晒啲湯汁，實在好正。豬扒反而輪為配角，但肉質好腍，好鬆化，帶好香醬油味，仲有些少啡黃色類似咖哩嘅香料調味。湯中仲浮遊左幾舊白蘿蔔，超清甜，完全無渣，配湯又係一流。

叫自己做茶餐廳，但其實格局比茶記更乾淨舒適。上至佈置、下至餐具水杯，都好有泰式風情。雖然無試過佢嘅得獎菜式，但無攞獎嘅食品質素都算滿意，團購餐$33實在抵食。睇番餐牌，正價都係正路價錢，大約五十蚊有一個海南雞飯餐，聽講質素都OK，行開果頭可以一試。