鞍山沙漠中的綠洲﹕芝士薄餅

by | 10 月 16, 2011 | 快餐, 西餐, 馬鞍山 | 0 comments

Cheese Pizza@馬鞍山
16/10/2011 20:00

馬鞍山真係無乜野好食,商場俾大型連鎖餐廳佔領晒。點都要搵食的話,都仲有少量質素算可以嘅選擇。$88一個二人套餐,可以食到Pizza,價錢係一大吸引。

套餐包括一個自選六吋迷你批,飯、意粉或小食任選兩款,仲有湯或餐飲,兩個人係絕對夠食。

櫻之花薄餅﹕ 材料有千島汁、煙三文魚、洋蔥、粟米、獅子狗魚蛋、蟹柳、紫菜、芝麻等。
厚批餅皮夠鬆軟,有好香牛油味,口感有啲似麵包,韌韌地,但批面芝士略嫌唔夠多。日本風味嘅薄餅通常都係配千島醬,三文魚唔多覺佢嘅存在,洋蔥、粟米、獅子狗比較突出,味道偏甜。平平地廿幾三十蚊一個,算係交足功課。
炸雞﹕ 超大隻炸雞嘅外皮比平時食到嘅深色,炸皮比較厚身、硬身,似係基因雞巴辣香雞嘅炸皮,勝左炸得乾身,唔算油膩。脆皮底下係厚實一大件嘅雞肉。雞肉厚身得黎仍夠軟嫰,每咬一啖都充滿肉汁。但雞肉始終無乜味道,惹味度不足,最後淪為茄汁魔虐待嘅對象。
百里香燒豬排骨﹕ 非常、十分、極之驚喜嘅一味。排骨足足有十條骨,鍾意食呢味嘅人,一定最愛佢骨肉相連嘅精髓,半肥瘦嘅肉,仲有骨邊絲絲細筋。排骨烤得好,切開肉仍見到迷人嘅粉紅色。熟成度剛好,肉質唔韌,亦有肉汁。用香濃嘅香草、黑胡椒調味,盡顯鮮味,亦夾雜左豬嘅羶味。配上酸甜嘅燒汁係另一種更滋味嘅食法。
更喜出望外嘅係,跟排骨並唔係求其幾條放到腍晒嘅薯條,而係炸魷魚圈。薄薄嘅炸粉下,係新鮮魷魚,非常煙韌,極之足料,唔會粉多過餸,而且味道唔錯。
今時今日,$88食得飽兩個人,已經無怨言,仲要係食Pizza,食豬仔骨,更加係無投訴。總覺得Cheese Pizza係打正旗號要做低基因雞同比殺黑,但以平價快餐形式經營,係有佢嘅優勢。總好過花四十幾蚊,去基因雞買個一人餐,兩隻基因雞仲要縮水縮左足足一半。平時兩個人想食Pizza的話,無番兩舊水都唔洗旨意落到樓,而家只需近乎三份一價錢,已經食到正常水準,邊度搵呀? 
眼見Cheese Pizza越做越大,分店越開越多,慢慢都變左做連鎖式餐廳,只好求神拜佛佢質素唔好下滑太多。阿彌陀佛。

Archive

0 Comments

Submit a Comment

發佈留言必須填寫的電子郵件地址不會公開。

壽司郎

馬鞍山 1/9/2023 11:00 調景嶺 30/4/2023 11:00

尊寶比薩

深圳彩田萬佳店 20/8/2023 12:30...

廿一堂

樂富 30/7/2023 12:00

米菲厨房Miffy Kitchen

深圳歡樂海岸 24/7/2023 18:00 店仔細細,Miffy公仔裝潢都算多,而且大大隻,小朋友最開心。還好人唔多,可以選擇最佳位置。 雙人牛排套餐 Y188...

克茗冰室

深圳寶安大仟里 1/4/2023 15:00...