坑口 30/4/2023 11:00

壽司郎黎到香港已經開咗好耐，咁耐都未試過，今日嚟到坑口發現仲可以網上預約。憑網上預約到店，等一等就可以入座，減省好多排隊時間。

用平板電腦落單，睇圖片揀嘢食，送餐直接送到座位，出菜速度非常之快。

叫咗幾款魚生類別，三文魚幾先甜，吞拿魚腩非常之肥美，啖啖油香。最鍾意火炙系列，暖暖地加上沙律醬幾好味。帶子都好鮮甜。碎吞拿魚軍艦只需要$12 ，非常抵食。總括嚟講魚生都好新鮮。醋飯大少少甜醋味，輕微黏口，幾鍾意呢種壽司飯底。

叫咗一碗豚骨叉燒拉麵，估唔到湯底幾濃郁，質素不錯，拍得住一般拉麵店。天婦羅炸物都新鮮即炸，熱辣辣$19一碗茶碗蒸，滑到不得了，入口即溶，湯底香甜。

最後係甜品環節，估唔到甜品都咁多選擇，朱古力香莓雪糕巴菲特大杯，牛奶味雪糕奶味濃郁香甜，淋上朱古力醬同埋各款雜莓，酸酸甜甜。抹茶口味加上抹茶蕨餅，口感煙韌綠茶味濃。日式布甸蛋味十足。卡達拉娜係芝士味極濃郁嘅蛋糕，凍冰冰。蜜瓜容器裝住酸酸甜甜嘅雪芭。