成熟含蓄的賣非佛

by | 8 月 19, 2012 | 大角咀, 甜品 | 0 comments

貴族甜品@大角咀
19/8/2012 18:00
今日需要甜份。
去大角咀用埋啲團購券,一睇就知呢間貴族甜品同九龍城果間皇室有九成相似。今次完全唔考慮想定唔定,只係隨意選擇左兩款人氣甜品,來一個破天荒,呢個新嘗試就換來一個新的賣非佛。
龍珠二世 ($30,團購價$15)
爽脆水晶珠、煙韌黑珍珠,加芒果沙冰做基底。上面加上又酸又甜嘅芒果、朱古力味雪糕同龍眼肉。淺嘗兩啖覺得還可以。
宇治金時 ($30,團購價$15)
估唔到朱古力魔今日嘅重點會落喺宇治金時上。三十蚊一份,未計團購折扣一半,會唔會大碗得太慷慨? 真心欣賞小店做團購唔偷工減料。
抹茶刨冰做基底,加上一大堆蜜紅豆、白玉同一個綠茶雪糕,係宇治金時嘅基本配搭。綠色嘅茶配上一紅一白,好日本。小店話冰底係用來自日本嘅特級宇治綠茶製作,冰底有微甘嘅綠茶香。唔知係唔係小店特製,定係自然形成,最底層嘅冰綠茶味更濃郁。蜜紅豆的確又大粒又蜜,煮得夠腍。白玉係糯米丸子,煙煙韌韌,可惜無黎味道。不過只要每一啖都夾埋綠茶冰、紅豆同白玉,就會發覺佢地能夠起互補作用,味道既甜亦帶微甘,入口即溶又帶煙韌。最後一個奶味極重嘅綠茶雪糕更係亮點,可以舒緩甘苦味,讓你感受綠茶的香甜。
突然覺得甜品舖嘅朱古力甜品好細路,因為好多用朱古力做主調嘅甜品,都會改埋一啲極具童話氣氛嘅名稱,咩魔鬼森林、黑王子定朱古力天地咁。感覺上好合襯,但不失一點低能。惟獨宇治金時,一味唔常見,但見親都唔會改名嘅甜品。從名稱、賣相、配色、味道都極成熟嘅樣子。
從來,青綠色都係佔據小妹最討厭顏色排行榜第一位。宇治金時,一個日本極度出名嘅冰品,咁耐以黎都係睇到當睇唔到嘅選擇。但有時食得多甜到漏嘅朱古力,成熟地、含蓄地甜嘅綠茶甜品,可能係另一種選擇。可能從今以後,或會成為小妹一個新賣非佛。

Archive

0 Comments

Submit a Comment

發佈留言必須填寫的電子郵件地址不會公開。 必填欄位標示為 *

抹趣

深圳領展中心城 13/4/2025 17:00 點評探店得兩杯飲品加一件蛋糕。 抹茶草莓鮮奶...

千芋本舖

深圳水圍 13/4/2025 15:30 點評下午茶探店...

Shake!T

旺角 6/4/2025 15:00 行過豉油街就聞到好香嘅蛋香味,決定試呢間專賣奶昔同窩夫嘅人氣小店。落單後新鮮即製,要稍等一陣。 意大利開心果醬奶昔加開心果碎...

酥小貢

深圳黃田 4/4/2025 15:00...

Odelice!

沙田新城市廣場 22/3/2025 14:00 星期六獎勵自己,同閨蜜過嚟沙田呢間時尚法國菜餐廳食早午餐套餐。有齊頭盤、主菜、飲品,仲可以追加甜品,實在太豐富。...