添好運點心專門店@深水埗
25/12/2010 19:30

添好運呢個名唔記得幾時開始突然冒起，幾乎等於一盎兩件嘅代名詞。
實在未能的起心肝去正店排四個鐘，今次去住深水埗新店止住痕。

 好彩要朝拜呢間一粒星新店只需45分鐘耐性。餐紙選擇不算特別多，都係一般正路都有嘅點心。

 
臘腸滑雞飯 ($17)、免治牛肉腸 ($15)、排骨 ($12)、燒賣 ($19)、牛肉 ($12)、粉果 ($10)。講真一般質素，雖然無特別驚喜，但肯定真材實料，新鮮熱辣。

值得一提佢嘅蝦餃 ($19)，真正表現到咩叫晶瑩剔透、皮薄餡靚。一級棒!

酥皮焗叉燒包 ($14) 係此店必點名物。一上枱已經聞到陣陣牛油香味，保證新鮮出爐，熱辣辣。外層墨西哥皮酥酥脆脆，內餡嘅叉燒醬內真係有叉燒粒，同酥皮襯到絕。普通一個叉燒包，加左墨西哥皮，竟然會結合出如此驚喜嘅效果。就好似食完味吉陽一既料理，會忍唔住大叫「好~美~味~呀~~」咁。難怪在座每枱都最少叫番一兩碟打底，真係食兩個都唔夠。

老老實實，點心又唔係十分、非常、特別、極之咁好味。但一個驚喜度爆登，令人眼bling bling嘅酥皮焗叉燒包，已經能夠塞住你把口，足以補償番你浪費左45分鐘喺佢門口齋等冇得食嘅弱小心靈。

最後心甘情願拎張紅衫魚(二人同行價)找數。好滿足嘅聖誕夜。
網上有唔少人話深水埗始終都只係拷貝，點都唔夠旺角正店好。
嗯~睇黎點都要搵日花幾個鐘去旺角店一轉啦~