荔枝角 20/7/2026 16:30
近排幾鍾意呢間外賣丼飯店，性價比高，整體份量十足，外賣之選。
咖喱吉列豬扒飯 $52﹕豬扒金黃脆卜卜，咖喱汁係日式風味，味道濃郁，充滿蔬果香甜，質地濃稠，微微辣度岩岩好，撈飯就最岩。
滑蛋照燒雞扒牛肉丼 $60﹕雙拼飯雙重享受！面頭嘅滑蛋半熟狀態，入口即化，仲有淡淡嘅日式甜醬油香。雞肉外皮微脆，肉質鮮嫩多汁。牛肉肥瘦適中，口感奶滑，灑左少少七味粉，更加惹味。
胡麻手撕雞蕎麥麵 $54﹕清新嘅一味，手撕雞肉質嫩滑，充滿雞油香，撈埋濃郁醇厚嘅胡麻醬，真係好開胃。蕎麥麵口感爽滑有彈性，吸晒胡麻醬汁之餘，仲帶有淡淡嘅蕎麥清香。再加上青瓜絲，整體配搭非常清爽，唔會覺得好膩，夏天食就最岩。
日式炸餃子 $29﹕五大隻，外皮炸到金黃酥脆夠香口。入面嘅豬肉同菜餡保持到豐富肉汁，沾埋微酸嘅日式餃子醋，惹味又開胃。
荔枝角 20/7/2026 15:30
發現荔枝角茶飲，選擇非常多，三十零蚊大大杯好抵飲。
抹茶紅豆拿鐵 $32: 抹茶味道濃郁，微微回甘，奶味平衡，香滑順喉，仲有粒粒紅豆綿軟香甜，同抹茶苦甘完美夾埋，甜而不膩，非常解渴。
布丁粉粿奶茶$32: 奶香濃滑，茶味配鮮奶味道幾平衡，五分甜啱啱好。雞蛋布丁滑溜溜，仲帶淡淡蛋香，口感超綿密。台式仙草粉粿QQ彈牙，煙韌得嚟又順滑。
荃灣 20/7/2026 12:00
開始暑假狂食之旅，第一站荃灣。鍾意呢間Cafe環境闊落，非常舒服，可以慢嘆一個中午。
日本芥辣蛋沙律配薯片及西班牙辣肉腸 $98﹕蛋沙律綿滑細膩，入口即化，沙律醬加左芥辣，一陣微微嗆勁，辛香惹味好特別，加上薯條脆卜卜，辣肉腸咸香微辣，呢個前菜好開胃。
扒日本豚肉 $178﹕日本豚肉表面金黃微焦，切開豚肉中間嫩滑多汁，肉質厚實彈牙，沾少少燒汁已經好好食。配菜仲有粒粒焦糖蘋果，酸甜果香同豚肉好夾，南瓜綿密清甜，滿足。
黑松露野菌菠菜意粉$128﹕陣陣黑松露、香蒜嘅味道，意粉彈牙有嚼勁，條條掛滿香濃醬汁。野菌爽滑多汁，菠菜清新解膩，整體適味鹹香濃郁，越食越惹味。
Garden Party Croffle $108﹕牛角包窩夫脆卜卜，層層鬆化，陣陣牛油香。忌廉清爽微甜，食得出水蜜桃烏龍茶香，甜而不膩，加上士多啤梨清甜多汁，賣相靚又好味。
Latte $48﹕拉花細緻，一黎到已聞到陣陣咖啡嘅醇厚香氣。今日係Fruity咖啡豆，咖啡入口醇厚，苦中回甘，微微果香酸甜感，奶泡幼滑順喉，甜而不膩。
主菜不錯，仲有靚甜品同靚咖啡完美收尾。
尖沙咀 18/7/2026 14:00
今次嚟到尖沙咀家家戶戶試地道韓國菜，叫左兩個套餐，配菜有齊泡菜海帶湯等，非常豐富，賣相都好靚。泡菜酸辣爽脆、鹹鮮惹味，酸中帶少少甘甜、辣度岩岩好。海帶湯底鮮甜清潤，少少胡椒微辣夠開胃。
韓式牛肉炒粉絲 $98，炒粉絲配料都幾多，韓式粉絲晶瑩通透，爽口彈牙，陣陣麻油香味。牛肉嫩滑多汁，調味適中，再加上大量爽脆嘅雜菜，健康之選。
牛肉韓式什錦飯 $102﹕一大碗什錦飯鋪滿鋪滿嫩滑牛肉、大量菠菜、翠玉瓜、蘿蔔絲同一隻金黃流心蛋，再擺一舀鮮紅辣醬。將所有材料拌勻，鹹甜帶微辣，越撈越入味，層次豐富。
大圍 16/7/2026 14:00
暑假開始約朋友出黎飯聚，最鍾意呢間綠茶餐廳環境舒服，可以慢慢嘆。來試限定新菜式。
醬滷牛腩配荷葉餅 $168﹕賣相亦都靚到不得了，份量超多。一件件牛腩滷到色澤深沉油亮，陣陣醬滷嘅濃郁香氣，牛腩軟腍入味、筋膜爽口。荷葉餅薄韌柔軟，夾埋牛腩一齊食，索晒醬汁。
薄皮鮮肉小籠包 $38﹕細細粒一啖一粒，皮薄多汁，肉汁鮮甜濃郁，沾少少醋提香。
福祿滿園點心小拼 $38: 一籠四件，色彩繽紛，造型已經贏晒。綠色係綠茶龍井米糕，清雅茶香、米香加上紅豆，甜味恰到好處。蘋果造型包包口感鬆軟。紅棗包內餡係非常香甜嘅紅棗蓉最後細細粒紅色喜字米膏，味道微甜，軟糯彈牙。
懷舊米漿 $18﹕米漿質感幼滑綿密，食得出陣陣香濃米香，香濃醇厚，味道微甜，唔會膩。
蕭山蘿蔔幹炒飯 $58﹕炒飯粒粒粒分明，鑊氣十足，蘿蔔幹碎鹹香惹味。
旺角 11/7/2026 13:30
鴛鴦鰻魚丼飯 $98﹕賣相靚到不得了，天婦羅新鮮即炸，非常香脆，唔算油膩。有一大片蒲燒鰻魚，仲有鰻魚天羅婦，一次過滿足晒兩個願望。蒲燒鰻魚沾滿醬汁，非常油亮，魚肉厚實質感嫩滑，醬汁甜中帶甜，仲有少少炭香味。鰻魚天婦羅係另一重驚喜，鰻魚外皮金黃酥脆，內裏鰻魚肉依然嫩滑多汁，香濃惹味。仲有整到花形嘅炸金菇，菇味鮮甜，味道非常不錯。白飯吸滿晒鰻魚醬汁，越食越停唔到口。
自選天婦羅定食配鰹魚湯蕎麥麵 $153﹕自選天婦羅揀左幾款海鮮料，有夠豪華。帶子天婦羅飽滿圓潤，滑嫰鮮甜。珍寶蟹柳天婦羅非常粗壯一大條，炸漿薄薄，蟹柳非常鮮甜多汁。松葉蟹鉗鮮嫩幼滑，蟹肉鮮味爆發。黑虎蝦爽口彈牙，食得出非常新鮮。每款海鮮料都鮮甜十足。鰹魚湯蕎麥麵湯色清澈金黃，陣陣鰹魚嘅鮮香同昆布嘅香氣，味道鮮甜清潤。蕎麥麵爽滑彈牙，麥香十足，清爽解膩，絕對係天婦羅嘅最佳配搭。
炸菠蘿海鹽雪糕 $28﹕菠蘿炸到金黃香脆，仲暖笠笠，超級鮮甜多汁，上面放左一球凍冰冰嘅海鹽雪糕，奶味香濃，食得出海鹽咸咸地，一熱一凍，冰火交融，超正!
