大圍外賣 6/8/2026 17:00
Keeta 落單超抵食四人餐 $394
奶油蒜香韓式炸雞：外皮炸到金黃酥脆，肉質保持鮮嫩多汁。外層均勻包裹住濃郁嘅奶油蒜香，奶香同蒜香完美結合，甜中帶鹹嘅風味令人食唔停口。
黃金海岸薄餅：餅底焗到外脆內軟，餅底煙韌口感，面頭鋪滿濃郁嘅半溶芝士，大量吞拿魚、菠蘿、粟米，每一啖都食到惹味香甜。
拿破崙茄汁豬柳焗飯：面頭嘅芝士焗到金黃微焦，底層係酸甜開胃嘅茄汁撈飯，配埋外脆內嫩嘅厚切豬柳，勁飽足。
炸魚手指：外層炸到金黃香脆，魚肉質地軟滑鮮甜，沾上少少沙律醬食，口感外脆內軟。
總結嚟講，無論係香脆惹味嘅炸雞同薄餅，定係酸甜開胃嘅焗飯同香口小食，每款都充滿誠意。整體份量足料，抵食！
大圍 16/7/2026 14:00
暑假開始約朋友出黎飯聚，最鍾意呢間綠茶餐廳環境舒服，可以慢慢嘆。來試限定新菜式。
醬滷牛腩配荷葉餅 $168﹕賣相亦都靚到不得了，份量超多。一件件牛腩滷到色澤深沉油亮，陣陣醬滷嘅濃郁香氣，牛腩軟腍入味、筋膜爽口。荷葉餅薄韌柔軟，夾埋牛腩一齊食，索晒醬汁。
薄皮鮮肉小籠包 $38﹕細細粒一啖一粒，皮薄多汁，肉汁鮮甜濃郁，沾少少醋提香。
福祿滿園點心小拼 $38: 一籠四件，色彩繽紛，造型已經贏晒。綠色係綠茶龍井米糕，清雅茶香、米香加上紅豆，甜味恰到好處。蘋果造型包包口感鬆軟。紅棗包內餡係非常香甜嘅紅棗蓉最後細細粒紅色喜字米膏，味道微甜，軟糯彈牙。
懷舊米漿 $18﹕米漿質感幼滑綿密，食得出陣陣香濃米香，香濃醇厚，味道微甜，唔會膩。
蕭山蘿蔔幹炒飯 $58﹕炒飯粒粒粒分明，鑊氣十足，蘿蔔幹碎鹹香惹味。
大圍 6/6/2026 15:30
家常兩餸，今次叫咗兩淨餸，揀咗咖哩薯仔雞翼同豉椒排骨，另外仲有豆腐班腩同番茄炒蛋可以選擇。淨兩餸$40一盒真係非常抵食。
咖哩薯仔雞翼咖哩汁熬得濃稠馥郁，薯仔煮到腍，完全吸晒咖哩嘅香氣，雞翼有四大隻，燜得入味，肉質幾滑。豉椒排骨係醃得好入味，豉汁鹹香濃郁，肉質軟嫩，有骨有肉。豆腐班腩嘅班腩肉厚，豆腐就完全吸晒醬汁嘅精華，食落滑嘟嘟又惹味。番茄炒蛋酸甜濃郁，蛋炒得嫩滑鬆軟，送飯一流。
大圍 13/3/2026 17:30
淨兩餸 $40
今日經過大圍田心，發現新開兩餸飯專門店，買左幾款家常小菜，相當抵食! 價錢平，份量多，味道相當唔錯。招牌「生炒排骨」金黃酥脆，外層嘅脆漿好薄，啖啖肉。最正係個酸甜汁，味道調校得岩岩好，酸香開胃。「蜜汁欖角骨」排骨表面有微微嘅焦糖，味道甜甜，惹味到極。另外「西蘭花苗炒大蝦」西蘭花苗比起普通西蘭花更加幼嫩清甜，大蝦夠彈牙爽口，唔覺得太油膩。「咸酸菜豬肚」豬肚口感一流，咸酸菜惹味開胃。
大圍田心村 26/4/2025 14:00
蔥油炭燒豬扒飯 $110
相信係小店嘅招牌菜之一：巨人蔥油炭燒豬扒飯。一上枱已經聞到陣陣嘅香茅香氣，豬扒簡直係巨量，兩大塊巨型嘅炭燒豬扒擺放喺雪白嘅香軟白飯上。炭火燒烤，表面烤得金黃微焦，油脂豐富。外層仍然保留香脆口感，豬扒中間嫩滑多汁，非常好味。再加上蔥油，加一份咸香味，送飯一流。
泰式雞絲濕炒河 $95
河粉上鋪滿雞絲，份量多到不得了。雞絲都幾嫩滑，啖啖肉，感覺好爽。河粉非常幼滑，煮到啱啱好。幾喜歡濕炒嘅做法帶多點醬汁，河粉吸收晒個醬汁。仲加上大量蔬菜，非常健康。
泰式拼盤 $128
將多款經典泰式小吃集於一碟，材料豐富，賣相非常吸引。香葉包雞雞肉嫩滑，滲出淡淡香葉香氣。蝦餅外層香脆，內裡蝦肉餡爽口彈牙，食得出的新鮮。魚餅有豐富魚肉鮮味，加上香茅同咖喱等香料作點綴，微辣度非常好味。雞翼煎得金黃微焦，調味鹹。素菜春卷香脆可口，餡料豐富。咁多款香口小食，一定要加一點酸辣醬，酸酸甜甜，非常好味。
餐廳雖然規模唔算大，裝潢簡約清新，充滿着泰式情懷。非常鍾意呢種家庭式嘅小店，氣氛輕鬆自在，份量十足，價錢又親民。
大圍 20/4/2025 08:00
今日全家總動員出發去珠海，喺大圍集合。時間尚早，上中港車之前食個豐富早餐，估唔到圍方都有平早餐食。
樂麥蘆卡蜜糖雞扒、香腸拼炒麵﹕麥蘆卡蜜糖雞扒早餐嘅賣相吸引，雞扒金黃油亮，表面均勻覆蓋住蜜糖醬。雞扒外皮煎得微脆，帶有香氣，肉質軟嫩多汁，蜜糖同雞扒嘅微焦香味融合，味道甜甜的。炒麵炒得乾身、香氣十足，有加到芽菜。
燕麥奶滑蛋雞扒漢堡﹕漢堡由金黃飽滿嘅麵包包裹住滑蛋，加上色澤金黃嘅煎雞扒。漢堡包非常鬆軟，有好香麥味。燕麥奶滑蛋柔嫩順滑，蛋味香濃。雞扒煎得外脆內嫩，仲保留住肉汁，鹹香濃郁，食落完全唔會覺得乾。醬汁帶微酸沙津醬，仲有芝士咸香味。
