尖沙咀 16/5/2026 14:00
炒豬肉石鍋芝士拌飯，一上枱已經聽到石鍋滋滋聲，熱力十足，賣相亦特別吸引。石鍋令飯底慢慢形成微脆飯焦，炒豬肉調味惹味，最加分嘅當然係芝士，拌勻之後令整體口感更加濃厚順滑，更有奶香味，最後加入韓式醬料加點甜辣，非常惹味。
醬炒牛肉拌飯牛肉炒得入味，帶有醬香同淡淡甜味，牛味本身亦幾突出，肉質嫩滑。拌飯仲加有好多唔同配菜，好似芽菜、菠菜、蛋絲等，令整體口感更加豐富，麻油紫菜脆卜卜，絕對加分，韓式家常風味。
煎醬牛小排餃子餃子底部煎到金黃微脆，賣相好吸引。咬開之後，外皮帶少少煙韌，底部就有香脆口感，入面嘅牛小排餡明顯比一般餃子更有肉香，油脂感較豐富，加上醬汁調味後，鹹香之中帶點甜味，更加開胃。
蒸餃子王一籠一粒，大大隻，餃子皮柔軟滑身，入口唔會太厚，內餡飽滿多汁勁足料，每一啖都食到肉汁慢慢滲出，口感特別鮮嫩清爽。
尖沙咀 25/4/2026 14:00
嚟到尖沙咀旺角街食地道韓國菜。
海鮮流心小丸子 $238: 製作過程趣味十足，DIY，將芝士倒入炒飯中攪拌均勻，放入小丸子機，再加入牛奶蛋漿煎熟。每粒小丸子都圓轆轆，非常成功!估唔到份量咁多，整左三大底，飽晒! 小丸子外層金黃微脆，內裡係滿滿嘅芝士同海鮮炒飯，炒飯咸香微辣，加上濃郁嘅芝士同紫菜，味道非常夾。好玩又好食!
炸雞柳配沙律 $160: 份量超大，炸雞外皮炸到金黃酥脆，入面嘅雞肉仲鮮嫩多汁，而且啖啖肉，簡單加上酸甜蛋黃醬，已經非常惹味。食完邪惡嘅炸雞再食埋清新解膩嘅沙律，沙律菜超級新鮮爽脆，配搭埋微酸嘅柚子沙律汁，仲有酸甜爽脆嘅蘿蔔，入口極之清新。
尖沙咀 10/1/2026 13:30
近排發現重慶大樓旁邊多左一個慶芳商場地下美食街，真係搵食新去處! 食街中間就見到一架車仔麵檔，原來係一間非常港式地道嘅車仔麵店，吸引!
大大碗車仔麵份量十足，一次過滿足幾個邪惡願望。豬大腸厚度十足，滷得好入味，外皮爽脆，中間充滿油脂香，真係邪惡又好食。牛腩係半肥瘦嗰種，炆到好腍身，肉味濃郁。豬手皮爽肉滑，充滿豐富嘅骨膠原，牛筋丸都係彈牙到不得了。淮山麵煙韌幼滑，吸湯力強，每一啖麵都掛滿咗濃郁香甜嘅腩汁，超好食。
另一碗試埋雞中翼都好有驚喜，肉質嫩滑，瑞士汁甜度啱啱好﹔仲有超彈牙嘅墨魚丸、菜肉餃皮薄餡靚，鮮味十足。另碗上嘅魚皮餃，魚皮更加爽滑彈牙，魚香味十足。
招牌必食厚叉燒真係份量十足，外層燒到焦糖色，油光亮麗，仲有少少焦邊，外層嘅焦邊帶點微脆，蜜汁味香甜濃郁，內裡嘅肉質非常鬆軟，半肥瘦每一啖都充滿肉香同油香，正!
冠軍奶茶港式風味，茶底夠香，味道少甜，讚!
尖沙咀東 18/10/2025 14:00
上次試過呢間鹽味清湯底非常唔錯，再來encore。
北海道豚足濃清湯拉麵 $108﹕呢款就係鹽味清湯底，清澈而鮮甜，鹽味清湯底以鹽味清雞湯為基調，清爽濃郁唔油膩，而且湯底鹹度適中，可以大啖湯。麵條口感彈牙，煮得剛剛好，粗細適中，可以吸收湯底精華。豬手大大件，經過長時間燉煮，肉質超級軟嫩，膠質豐富，入口即化。大大片叉燒都係亮點之一，肉質鮮嫩，脂肪分佈均勻，入口即化。兩條炸牛蒡香酥可口，咸香味十足。，溏心蛋溏心度剛好，又腍又滑。
白松露慢煮叉燒濃清湯拉麵 $108﹕呢款拉麵加左白松露，白松露撈勻係湯底，香氣超香，回味無窮，完全係另一種風味。
午餐加$38可以加配小食同飲品，今次揀左名古屋雞翼，味道咸香，仲有好香芝麻味，外皮酥脆，中間多汁，不錯。而炸洋蔥圈真係超酥脆，外皮脆脆，中間和洋蔥夠晒甜。加上沙律醬酸酸甜甜。
店員講每日只賣100碗，賣哂就收鋪，真係受歡迎。
尖沙咀 4/10/2025 14:00
今日同姐妹來個中式午餐，呢間粵菜點心喺Element場內黎講唔算太貴，環境舒服，二人坐四人卡坐超舒適，服務仲好好。
羊肚菌杞子滑雞蒸飯$98: 一盅熱氣騰騰嘅蒸飯端上，散發菇菌香同雞肉香味。賣相吸引，大大件雞件舖滿飯面，仲有幾隻貴價羊肚菌，用料足料。雞件嫩滑多汁，羊肚菌爽滑，加少許甜醬油拌勻，米飯沾滿雞汁同菌香，醬油甜甜的，非常好味。加上幾粒杞子甜甜地，好似提子乾嘅口感，更加好味。
花膠撈麵 $158﹕女士最愛花膠超大片，晶瑩剔透，而且相當飽滿厚身，入口富有彈性，膠質豐富，吸收晒蠔汁味道，海味十足。大大隻花菇爽滑得黎，香味十足，麵條掛滿濃郁嘅醬汁，金黃油亮，質地爽滑彈牙，充滿韌勁。真係一個非常滋補養生嘅麵食。
鮮竹卷$52﹕炸腐皮吸滿高湯，本身已非常清甜。內餡有豐富嘅豬肉、蝦仁等，紮實，鮮味十足。
懷舊千層糕 $46﹕少見傳統甜蒸點，賣相討好，白黃一層層相間堆疊而成，層次分明。本身非常柔軟輕盈，白色米香味濃，黃色奶黃加上咸蛋黃非常惹味，仲食得出鹹蛋黃碎沙沙嘅口感，甜度適中，不錯。
冬瓜蜜味道清甜，瓜果清香味，清潤香甜。
整體出品相當高質。
尖沙咀 4/10/2025 11:00
來試尖沙咀多期要排長龍的超人氣酥皮撻！
今期新出品愛爾蘭咖啡蛋撻 $26 有驚喜！酥皮撻殼金黃酥脆，滿滿牛油香氣，蛋漿香滑，加上濃郁焦糖咖啡香氣，微微甘苦味，勁正！
白粟米酥 $30: 法式酥皮加上一整排粟米夠特別，酥皮層層疊疊非常鬆脆。白粟米粒粒粒飽滿，粟米本身香甜又清脆卜卜，吉士醬甜甜，不錯！
藍莓忌廉芝士貝果 $24: 最鍾意貝果夠札實煙韌，內餡豐富，忌廉芝士濃郁，藍莓酸甜，酸度甜度恰到好處。
明太子熱狗 $29: 香腸煎得焦香、肉汁飽滿，蓋上明太子醬，微微辣度，勁惹味。
