沙田石門 6/8/2026 14:00
煮干醬油豚骨博多拉麵豬軟骨 $68: 湯底濃郁，豚骨香同乾魚仔嘅鮮甜，醬油味香濃醇厚。博多拉麵條掛汁力十足，口感煙韌彈牙。主角豬軟骨炆到極之軟淋，軟骨部分一咬即化，吸滿晒濃郁嘅湯汁，食落非常滿足。
魚介豚骨醬油叉燒拉麵 $58: 魚介嘅鮮香同豚骨嘅濃厚平衡，叉燒厚切帶淡淡嘅焦香，肉質軟嫩入味，啖啖都係濃郁嘅肉香。
溏心蛋 $6:絕對係拉麵嘅完美配角，蛋白口感滑溜入面嘅蛋黃呈半熟流心狀，質地綿密香濃。浸透咗淡淡嘅醬油香氣。
雞軟骨餃 $10: 外皮煎到金黃酥脆。餃子入面嘅肉餡飽滿，特別加入咗爽脆嘅雞軟骨，咬落爽口。
燒汁雞皮餃子 $20: 邪惡感十足，外層用咗香脆嘅雞皮代替傳統餃子皮，包住惹味嘅肉餡，經過燒烤後充滿油脂香。面頭淋上惹味嘅燒汁，外脆內嫩，口感非常獨特。
黑豆漿$9
無加一，全單$195，抵食。
沙田石門 19/6/2026 12:00
牛盛丼 $95﹕一上枱已經見到碗面鋪滿咗層次豐富嘅牛肉，視覺效果震撼。牛五花油脂分明，燒到香氣四溢，入口肉汁四溢，軟嫩入味，完全唔會韌。配埋面頭嘅洋蔥、炸蒜，非常香甜惹味。份量十足又極具滿足感，肉食獸真係必試！
雞扒胡麻沙律汁冷稻庭烏冬 $75﹕夏日消暑嘅一流之選！主角雞扒煎到外皮金黃香脆，肉質依然保持鮮嫩多汁。稻庭烏冬條條掛汁，口感煙韌彈牙，冰涼爽口。淋上咗香濃幼滑嘅自家製胡麻沙律汁，芝麻香氣撲鼻，酸甜適中，撈埋清新嘅沙律菜一齊食，開胃又惹味非常清新。
豚軟骨咖喱飯 $75﹕豚軟骨炆到極之軟淋入味，肉質酥軟，軟骨部分更係一咬即化、滿滿骨膠原。日式咖喱汁質地濃稠，香甜微辣，層次豐富，同熱飯完美結合，每一啖都吸滿咗濃郁嘅咖喱香氣。
跟餐送飲品「蜂蜜檸檬」清新酸甜，鮮榨檸檬嘅清香中和咗蜂蜜嘅甜膩，冰涼透心涼，食完濃味嘅料理飲一杯即刻解膩。而暖笠笠嘅「熱雪梨蜜」就充滿天然嘅梨香同溫潤嘅蜜糖甜味，入口順滑滋潤，熱辣辣飲落去非常舒緩喉嚨。
沙田 11/6/2026 12:30
今次去咗「小野人串燒」食午餐，滿滿炭烤香味，有驚喜。午餐選擇多，仲可以優惠價追加小食。
大漠燒羊肉串飯 $89﹕配宮廷小茄子，五大串羊肉串份量十足。羊肉串得肥瘦相間，炭烤到外層微微焦香，撒上孜然同辣椒粉，肉質都幾滑，帶點羶味，非常正。加配小野人菠蘿沙冰($16) 夠解膩，沙冰幼滑綿密，酸酸甜甜，超暢快。
台南肉飯 $48﹕賣相不錯，滷肉飯肥瘦相間，滷到入晒味，肥肉部分腍滑得入口即溶，油脂香又唔覺膩，瘦肉入味，最正係滷汁濃稠香醇，鹹中帶甜，撈飯一流。
小野人燒牛肉串 $28﹕肉質細緻鮮嫩，牛味勁香。
台灣香腸 $36﹕香腸大大條，腸衣微焦脆卜卜，中間肉滿滿豬肉餡，肉汁豐富鮮味。
北海道蒜蓉粉絲大扇貝 $57.8﹕新鮮扇貝配上大量香蒜粒烤熟，仲有勁索汁嘅粉絲，超惹味。
烤香滷肥腸 $51.2﹕聞到陣陣炭火香，同埋肥腸膻味，入口滑，脂肪濃厚，油香味十足。
燒嫰雞肉串 $23﹕雞肉烤到外層微微焦香，鎖住滿滿肉汁，仲有青蔥更香。
燒魷魚鬚 $26﹕烤到邊位微微捲起帶少少焦邊，咬落爽脆彈牙，越嚼越有味，調味微甜，不錯。
燒雞脆骨 $23﹕烤到金黃焦香，脆卜卜嘅口感，鹹香調味。
牛舌芯 $23﹕牛舌芯部位本身肉質嫩滑，烤到微脆，入面就嫩滑多汁，肉味濃郁帶油香。
沙田 17/5/2026 18:00
石窩蛋白黃咖喱豬頸肉配黃薑飯 $116: 一上枱已經有陣陣香料味同咖喱香撲出嚟。黃咖喱味道比一般重辣型咖喱柔和，入口先感受到椰香同香料香氣，加入蛋白，辣味更溫和。豬頸肉煎得香，加上綿綿嘅薯仔，同咖喱汁拌埋一齊食特別夾，黃薑飯本身味道好香，送飯一流。
海南雞脾椰汁酸湯檬粉 $108: 湯底有椰汁順滑，滲出酸香，味道清爽。檬粉幼滑順口，索晒湯汁。雞脾肉份量勁足，肉質嫩滑。
小食拼盤 $149: 一次過食到幾款小食，蒸粉包外皮帶少少黏糯感，肉碎內餡豐富。手撕雞紙卷就勝在外層夠薄，配料包得結實，咬落去層次分明，手撕雞調味幾香。豬頸肉燒到微微焦香，食落香口但唔會太膩。越式春卷外皮炸得香脆，內餡勁足料。
椰子沙冰 $43: 入口冰凍綿滑，椰香自然，甜度唔算高，非常清涼。
龍眼梳打 $36: 龍眼甜味自然，帶少少果香，配上梳打嘅氣泡感，整體感覺清爽。
沙田 4/4/2026 17:00
香蕉朱古力雞蛋仔 $36
媽咪雞蛋仔聯乘周生生「YuYu魚仔造型雞蛋仔」，即叫即整新鮮熱辣，魚仔造型粒粒飽滿圓潤，賣相不錯。基本都係外脆內軟嘅質地，但加入左香蕉，整體變得綿密軟熟。粉漿係濃郁蛋味，加上大量朱古力粒，變成半溶狀態，朱古力都係爆晒漿。香蕉都落得幾重手，所以每一啖都食得出香蕉嘅天然清甜，非常足料。
沙田 4/4/2026 11:00
士林鹽酥雞滷肉飯 $75﹕材料都幾豐富，賣相不錯。鹽酥雞炸到金黃酥脆但唔油膩，炸粉薄薄地，入面嘅雞肉依然保持極度軟嫩多汁，充滿濃郁嘅胡椒香氣。旁邊嘅滷肉肥瘦適中，滷汁味道濃郁，肉碎吸收晒特製醬油嘅鹹香，將濃郁嘅滷汁同滷肉撈埋熱辣辣嘅白飯一齊大啖食，飽足。蛋餃蛋皮煎得薄薄，包住內餡，幾特別。
起司粟米蛋餅 $42﹕蛋餅皮煎得微焦香脆，口感極之煙韌軟糯。大啖咬開，入面半溶嘅起司拉晒絲，芝士味非常濃郁，夾埋粒粒清甜爽脆嘅鮮粟米，一鹹一甜嘅配搭極之夾。
黑糖珍珠奶茶 $12﹕黑糖嘅掛杯紋理超級靚，天然嘅黑糖焦香同滑溜嘅奶茶融合，茶底唔算太濃，底層嘅珍珠煙韌彈牙，充滿黑糖嘅甜蜜滋味，消暑解渴。
