沙田石門 20/12/2025 13:30
石門商場發現呢間非常抵食嘅小店，拉麵都相當唔錯。一個餐$58，拉麵加飲品，加$10仲有小食，超抵!
魚介豚骨醬油豬軟骨拉麵 $58﹕湯底有濃厚嘅豚骨味，充滿膠質，非常順滑，仲有魚介鮮甜味，唔會太油膩，微微醬油鹹香，不錯。拉麵都幾煙韌彈牙。大大件豬軟骨有驚喜，炆到超級軟腍，用筷子輕輕一夾就分開，連埋啲軟骨位都變成啫喱狀，入口即化，充滿骨膠原嘅感覺，調味適中又夠入味。
另一款係叉燒拉麵，碗上面鋪滿咗成三大塊圓碌碌嘅日式叉燒，肥瘦相間，邊位帶有微微嘅焦香，入口軟嫩，軟腍入味。
雞軟骨餃子煎到個底金黃香脆，薄薄嘅餃子皮包住豐富餡料，除咗有鮮甜嘅雞肉之外，仲加入咗切碎咗嘅雞軟骨。每一啖都食到雞肉嘅嫩滑多汁，同時又有雞軟骨脆脆嘅口感，好味。
沙田 14/12/2025 18:00
鐵板法式牛粒配白飯 $113﹕成個鐵板盛上，滋滋作響，夠晒熱辣辣。牛粒份量好足，每一粒都煎到表面帶少少焦香，內裡依然保持住粉嫩狀態，肉汁豐富，口感嫩滑又有嚼勁，唔會太韌。個醬汁調得啱啱好，夠香濃甜香，帶微辣，配上洋蔥同青椒等，索晒啲汁，撈埋白飯一齊食超正。
火車頭粉絲煲 $156﹕今次揀左雞湯底，配料超級豐富，包括牛丸、生牛肉、牛筋同烤牛肉。成個煲一上枱熱辣辣，生牛肉切得夠薄，放入熱湯輕輕灼一灼，入口極之嫩滑，牛味好濃。烤牛肉帶有微微嘅焦香，肉質比起生牛肉有嚼勁少少，食落去好惹味。牛丸爽口彈牙，一咬爆汁出。牛筋炆得非常軟腍入味，充滿膠質。
海南雞配黃薑飯 $79﹕賣相吸引，雞肉切得好靚，有光澤。雞皮爽口彈牙，唔肥膩，雞肉嫩滑到不得了。呢度嘅油飯粒粒分明，充滿雞油香、香茅味同椰香，但食落去又唔會覺得好油，加上辣椒醬酸辣開胃，正!
椰汁拉茶紅豆冰﹕底層係滿滿嘅紅豆，中間係椰汁味奶茶，茶香之餘，仲有好濃郁嘅椰香，茶底夠厚，無俾椰汁蓋過。紅豆煮得好腍身，起晒沙，每一啖都充滿豆香，甜度啱啱好。
沙田 24/8/2025 12:00
泰式忌廉青口配薯條$59﹕熱辣辣嘅青口浸喺淡黃色嘅泰或忌廉醬汁之中。食得出忌廉嘅濃郁奶香，仲有好多香茅、青檸葉、淡淡嘅椰香，帶輕微辣度。醬汁質地順滑，西蘭心紅蘿蔔等煮到腍晒，吸晒湯汁，不錯。主角青口肉質唔算肥美，但都算幾鮮甜，無腥味。搭配著一大份金黃香脆嘅薯條，都算飽足。
燒帶子配意粉及海膽忌廉汁$56﹕海膽忌廉汁有濃郁奶香，食得出少少海膽甘甜味，有咸香海味，醬汁的質地順滑濃稠包著意粉。麵條軟硬度掌握得恰到好處。有幾顆都算大粒嘅帶子，表面煎至金黃微焦，味道幾鮮甜，肉質彈牙。最後仲有菇類做配料。
脆魚手指2件伴粟米、 薯蓉及北歐果味飲品 (免費添飲) $23﹕兒童餐有兩條金黃酥脆嘅魚手指，外脆內軟，無乜腥味。旁邊是一小份色澤鮮黃嘅甜粟米粒，飽滿多汁，最後一球綿密嘅薯蓉。最緊要係搭配北歐果味飲品免費添飲!
鯊魚造型脆皮薄荷黑朱古力新地$16﹕顏值與美味集於一身，雪糕上面仲插著一塊鯊魚尾巴造型黑嘅薄脆，非常值得打卡嘅創意甜品。雪糕底質地極為順滑細膩，入口即化，朱古力味濃郁，食得出甘苦味，亦帶清涼嘅薄荷味，甜度適中。加上朱古力醬冷卻成脆皮，勁正!
沙田好運中心 24/8/2025 15:00
芒果沙冰椰青凍 $35﹕呢款甜品賣相非常吸引，金黃色嘅芒果沙冰配埋晶瑩剔透嘅椰青凍。芒果沙冰用新鮮芒果製成，果香濃郁，入口即化，帶有自然嘅甜味同微微嘅酸，口感超冰涼。而椰青凍非常特別，椰香濃郁清爽，質地滑溜又帶少少Q彈，入口即感受到椰青嘅清甜。芒果沙冰同椰青凍平衡，層次感十足。清新又解暑！
雪糕芒果紫米小丸子 $40﹕椰子雪糕冰涼滑溜，椰香味濃郁，味道清甜。芒果粒鮮嫩多汁，酸甜適中，紫米煮得夠腍，煙韌黏糯。小丸子Q彈有嚼勁，全部混合係芒果汁當中，不錯。
沙田石門 6/8/2025 14:00
滋補螺片花膠雞煲 半隻 $218: 湯底選擇幾多，揀咗呢款滋補花膠雞煲，湯底呈乳白色，本身味道幾香甜。半隻雞份量都非常充足，仲有大大塊嘅螺片同花膠。將材料放入湯中煮熟，慢慢釋放出更多甜味同膠原蛋白，真係非常之滋潤。螺片同花膠都煮得腍滑。半隻雞肥瘦適中，經過慢煮後充分吸收左湯底嘅鮮味，肉質非常嫩滑爽口，雞皮亦帶油香，可惜雞味比較薄弱。
極品本地手切牛頸脊 $238: 呢款牛肉脂肪分布均勻，大理石紋理非常靚，睇得見的高品質。輕輕煮十秒八秒，肉質呈現淡淡嘅粉紅色已經可以享用。牛肉仍保持鮮嫩多汁，淡淡嘅牛肉自然香甜味。加上沙茶醬甜豉油就最岩！
十優狀丸 $108﹕賣靚靚，一次過試齊五款口味。每款都好新鮮，口感彈牙。墨魚魚丸本身海味香濃，食得出粒粒墨魚肉，更加爽口Q彈。仲有一款黑墨丸，應該加左墨魚汁，味道更咸香。升級版加入加入黑松露，菇菌味香非常夾！蝦丸真材實料，蝦肉勁鮮甜，勁彈牙。鯪魚丸食得出新鮮，魚香濃郁，口感紮實。
雜菜籃 $70: 幾款蔬菜都非常新鮮，吸收晒湯底香甜，清爽！
全單要近$700，性價比一般。
沙田新城市廣場 4/8/2025 13:30
踏入八月份生日月，連續幾日約朋友慶祝，第一站係食日本燒肉! 生日食豪啲! 中午黎食有唔同燒肉定食，其實都好抵食。每份定食包括沙津、味噌湯、小食、飲品同甜品。$20 升級白桃乳酸梳打。小食係微辣嘅牛舌粒，口感煙韌實在，微辣夠開胃。
黑毛和牛大判燒盛合 $368﹕非常豪華，高品質嘅一款盛合，可以一次過試到三款唔同部位。。大判燒係大塊切片嘅薄牛肉，鹿兒島A4和牛西冷有好靚油花，脂肪分布均勻，大理石紋理超靚。一向都鍾意A4油脂分布均勻，又唔會過於油膩。薄燒快熟牛肉口感更幼滑，亦能鎖住肉汁，真係入口即溶，充滿濃郁嘅牛肉香氣同油香。唔洗多加醬汁，伴入溫泉蛋味道更柔和，一片已經可以送一碗飯。另外兩款係牛裡腹小排同牛背末脊肉，中文真係唔識啦。食得出一款油脂豐富，口感腍滑應該就係牛五花カルビ。另一款肉質實在，口感較有嚼勁，應該就係里肌肉ロース。
特上牛胸腹肉 $198﹕日文ハラミ即係橫隔膜，纖維豐富，略帶點油花，所以肉質都係咁軟腍，肉味濃郁，帶點油脂的甘香。厚燒可以燒到外面微焦，肉質仍然柔軟，肉汁豐富，牛嘅甜香味更加突出。加左甜甜嘅燒烤醬，好下飯。
餐廳提供三款配醬，一款特調燒肉專用醬，味道香甜﹔一款加入辛香味嘅醬料，味道微辣﹔仲有一款檸檬汁，正好一解牛油嘅油膩感。其實牛肉品質相當好，本身嘅簡單調味已經好足夠，原汁原味。
最後一份豐富甜品，有雲尼拿雪糕糯米糍﹔仲有滑到不得了，又濃味嘅杏仁豆腐，完美!
