櫻花雪糕

櫻花雪糕

Sweets House Cha Cha @尖沙咀

10/4/2022 12:30

今日嚟到尖沙咀喺美食廣場食完個午餐之後,就喺出邊買雪糕做甜品。見到今日有期間限定雪糕,實在太靚啦,係我哋最掛住嘅日本櫻花。

櫻花盛放 $52

揀左綠茶牛奶兩溝雪糕底,上面加左士多啤梨、花沾餅、類似果蓉忌廉,仲淋上士多啤梨汁。實物同相片100% match!!

雪糕幼滑,配上士多啤梨酸酸甜甜,仲食到有櫻花香味,呢個配搭好好味。不過,如果揀原味牛奶的話,相信士多啤梨同埋花香味會更加突出。可惜期間限定,可能下次唔見了。

小黑糖

小黑糖

小黑糖@尖沙咀
15/12/2019 14:00

食完韓式料理,就行去隔離不遠嘅厚福街搵野飲。
一條街仔幾間茶飲店,最後揀左呢間似乎都幾受歡迎嘅小店。

近來幾鍾意飲黑糖珍珠,正好呢間小店主打小黑營系列,選擇非常多,即刻選擇困難症。
最後揀左小黑糖珍珠厚鮮奶同埋宇治抺茶歐蕾珍珠,似乎都係招牌之作。

小黑糖珍珠厚鮮奶 $32
肥杯仔份量剛夠,賣相好吸引喎。
厚鮮奶奶味好香,非常幼滑。黑糖珍惜煙煙韌韌,甜味適中,不錯。叫左七成甜度,個人認為甜度剛好。

宇治抺茶歐蕾珍珠 $32
漸層色賣相好靚,黑糖珍珠都係一樣的,奶味好足,再加一點宇治抺茶味,配合得幾好。

兩杯味道都不錯,價錢唔貴,下次想再試下紫色果杯。

OPPA Coffee Bar Restaurant

OPPA Coffee Bar Restaurant

OPPA Coffee Bar Restaurant@尖沙咀
15/12/2019 12:30

一段時間無出街食飯,今日約朋友黎開尖沙咀,特登搵韓國餐食。

好友介紹話呢間小店好正宗韓味,由佢拍板叫左幾樣野食。
紫菜包飯 $92
賣相好靚,件件都好工整,中間仲有好多餡料,飯又夠軟熟,傳統又飽肚的美食。
雞肉蛋漿熔岩炒飯 $168
韓國哥哥送上鐵板飯,喺客人面前加入蛋漿、芝士等,再用火槍即時加熱,好睇又好食,大推。本身飯裡仲有唔少雞肉,味道不錯,再加埋極大量芝士,拉絲度十足,撈勻後啖啖飯都有濃郁芝士味。非常邪惡,但忍唔住一啖接一啖。 
蜜糖牛油無骨炸雞 半份$198
份量都唔少,雞炸得金黃,外皮非常鬆脆,肉質好嫰又多汁,加少少錢叫無骨係正確的,啖啖肉,非常滿足。蜜糖甜甜的,帶少許柚子,非常不錯。喺炸雞下面仲有啲薯條,吸晒蜜糖汁非常好味。
兩口子實在非常飽足,價錢略貴但係勝在正宗韓味。不錯。
拉麵Jo

拉麵Jo

拉麵Jo@銅鑼灣

14/10/2019 13:00

今日黎到銅鑼灣做野,做完野經過拉麵Jo,可能係時間較晏,唔洗排隊,就決定食個Late Lunch。

揀左特製沾麵

賣相吸引,份量都算好多。一碗熱熱嘅沾湯,豚骨湯好濃郁,帶魚介香味,湯較為杰身黏口,係我喜愛嘅味道同口感。揀左要冷麵,麵底口感好煙韌,個人偏愛硬麵正好合適,麵條亦相當掛湯,整體配合得不曾。大大塊五花肉,肥瘦分別,入口都算相當腍,浸一浸湯會更加好。另外配上一隻半熟溏心蛋,蛋白有少少裂左,外型有扣分,但入口好嫩滑,亦充滿住醬油味。最後將紫菜浸落湯,包住拉麵一食齊。最後再加湯飲晒成碗湯,非常飽足。

拉麵Jo@尖沙咀

9/7/2017 12:00

特製沾麵 $104
湯夠熱,魚介豬骨湯味濃
麵正常煙韌、稍冷
叉燒係正花腩脂肪入口即溶
整體唔錯
Dazzling Cafe

Dazzling Cafe

Dazzling Cafe @尖沙咀
29/9/2019 14:30

今日去完海港城買玩具,係時候食個下午茶。黎到The One幾多餐廳選擇,經過三樓呢間餐廳實在太靚,就決定來一個Fancy Tea。台灣少女系咖啡茶室,裝修同Menu都裡裡外外都係粉紅色的。

冰草莓拿咖咖啡 $48
靚靚粉紅色咖啡,味道不錯,帶少少士多啤梨味酸一酸,夠特別。
覆盆子蘋果茶 $45
酸酸甜甜好清爽嘅果汁飲品。

草莓繽紛冰淇淋鬆餅 $95
賣相超級吸引,色彩繽紛,熱辣辣鬆餅配雪糕,美味。

太妃糖香蕉布里歐 $118

非常澎湃,香蕉多到滿,類似多士的東西好鬆軟香甜。

假日來一個又靚又好味嘅下午茶,開心晒。

正宗韓燒

正宗韓燒

韓珍@尖沙咀
15/9/2019 18:30


太耐無食韓燒,老友建議呢間尖沙咀人氣非常高企嘅韓燒。
餐廳幾大,見到唔少店員都係韓國人,好正宗!
落單後先送上一大堆前菜,個人幾鍾意呢度嘅泡菜同洋蔥。

原來仲有一客焗蛋,脹卜卜幾得意。蛋裡面有多樣材料。

主菜黎啦,叫左一個招牌菜「八色珍味拼盤」$538,分別用上八種調味:人蔘、黑椒、日式燒汁、大醬、辣椒醬、香草、咖哩和蒜蓉,醃製出八款不同顏色烤肉。賣相真係好吸引,急不及待立即燒啦。先由最淺色,相信味道較清淡的燒起。

每件肉都好大件,燒好一邊之後反面,再剪成小塊慢慢燒。肉質相當不錯,非常入味,仲好Juicy。個人最鍾意大醬味,非常韓式,加配生菜包起來食,正好解膩。

另外,叫左一份醬油雞肉 $110,非常入味,又好嫰滑。

另外,仲叫左一份水冷麵 $68,食完熱辣辣嘅燒肉,再食一啖冷麵真係正斗。

好滿足的一餐,店員又會樂意幫你燒埋一份,感受非常正宗的美味韓燒。