九龍城 11/1/2026 18:00
天寒地凍來火鍋，有得食有得玩，帶小朋友就最岩。今次揀左「番茄薯仔鮮牛鍋」，大大件番茄、薯仔，仲有粒粒鮮牛肉，味道香濃，酸酸甜甜，夠晒開胃。
冰震鮑魚都係冰爽彈牙好鮮甜，今次嘅池魚刺身非常新鮮，味道甜甜，魚油味香。霜鮮肥牛油花非常靚，輕輕煮十秒，入口嫰滑到不得了。
火鍋料有招牌水餃皇，超飽滿勁大隻，皮薄餡靚，入面係原隻大蝦，非常爽口彈牙，仲有配料，充滿鮮味。手打鮮肥牛丸更加係必食推介，非常彈牙多汁，牛味極濃，而家肉汁豐富。雲吞併韭菜餃就岩晒小朋友，細細粒但餡料豐富，幾香甜。蝦滑併墨魚滑非常新鮮，煮熟左係非常爽口彈牙。
最後要讚下個紫菜響鈴，平時食響鈴多數係齋腐皮，呢度加埋紫菜，淥三秒即食，外層吸滿番茄牛湯嘅精華，內層紫菜帶嚟淡淡嘅海洋鮮味，酥脆得嚟又有層次，真係邪惡又好食！
佐敦 11/1/2026 13:30
上次食過旺角店，今日再來佐敦店encore。
先來一大支清甜豆漿，豆味夠香，又夠凍，仲有免費任添!
今次叫左幾款唔同口味嘅生煎包，招牌原味 ($35/4隻)外層脆卜卜，非常焦香，咬開中間係鮮甜肉餡，最緊要係爆多汁，雖然係煎炸嘢，但係食完又唔會覺得好油膩! 另外仲有瀨尿蝦 ($28/2隻) 同蟹粉 ($38/2隻)。
個人就幾鍾意呢度嘅小籠包 ($40)，新鮮熱辣，一啖一粒，皮薄薄，肉餡鮮甜多汁，加少少醋已經好好味。
香煎豬排拌麵 ($45) ，份量十足，一大塊切好嘅豬扒，金黃酥脆，煎得啱啱好，咬落去少少香脆，唔會乾爭爭，調味亦都好夠，鹹香適中。拌麵係蔥油醬底，每一條麵都光澤感十足，啲蔥炸到焦黃色，非常香口。麵條係爽滑彈牙，入口充滿濃郁嘅蔥香同醬油嘅鮮甜味，簡單得嚟又好惹味。
但呢間店更加細，地方淺窄，而且食物出品無論賣相、新鮮度同味道都好似比旺角略遜。
尖沙咀 10/1/2026 13:30
近排發現重慶大樓旁邊多左一個慶芳商場地下美食街，真係搵食新去處! 食街中間就見到一架車仔麵檔，原來係一間非常港式地道嘅車仔麵店，吸引!
大大碗車仔麵份量十足，一次過滿足幾個邪惡願望。豬大腸厚度十足，滷得好入味，外皮爽脆，中間充滿油脂香，真係邪惡又好食。牛腩係半肥瘦嗰種，炆到好腍身，肉味濃郁。豬手皮爽肉滑，充滿豐富嘅骨膠原，牛筋丸都係彈牙到不得了。淮山麵煙韌幼滑，吸湯力強，每一啖麵都掛滿咗濃郁香甜嘅腩汁，超好食。
另一碗試埋雞中翼都好有驚喜，肉質嫩滑，瑞士汁甜度啱啱好﹔仲有超彈牙嘅墨魚丸、菜肉餃皮薄餡靚，鮮味十足。另碗上嘅魚皮餃，魚皮更加爽滑彈牙，魚香味十足。
招牌必食厚叉燒真係份量十足，外層燒到焦糖色，油光亮麗，仲有少少焦邊，外層嘅焦邊帶點微脆，蜜汁味香甜濃郁，內裡嘅肉質非常鬆軟，半肥瘦每一啖都充滿肉香同油香，正!
冠軍奶茶港式風味，茶底夠香，味道少甜，讚!
沙田石門 20/12/2025 13:30
石門商場發現呢間非常抵食嘅小店，拉麵都相當唔錯。一個餐$58，拉麵加飲品，加$10仲有小食，超抵!
魚介豚骨醬油豬軟骨拉麵 $58﹕湯底有濃厚嘅豚骨味，充滿膠質，非常順滑，仲有魚介鮮甜味，唔會太油膩，微微醬油鹹香，不錯。拉麵都幾煙韌彈牙。大大件豬軟骨有驚喜，炆到超級軟腍，用筷子輕輕一夾就分開，連埋啲軟骨位都變成啫喱狀，入口即化，充滿骨膠原嘅感覺，調味適中又夠入味。
另一款係叉燒拉麵，碗上面鋪滿咗成三大塊圓碌碌嘅日式叉燒，肥瘦相間，邊位帶有微微嘅焦香，入口軟嫩，軟腍入味。
雞軟骨餃子煎到個底金黃香脆，薄薄嘅餃子皮包住豐富餡料，除咗有鮮甜嘅雞肉之外，仲加入咗切碎咗嘅雞軟骨。每一啖都食到雞肉嘅嫩滑多汁，同時又有雞軟骨脆脆嘅口感，好味。
沙田 14/12/2025 18:00
鐵板法式牛粒配白飯 $113﹕成個鐵板盛上，滋滋作響，夠晒熱辣辣。牛粒份量好足，每一粒都煎到表面帶少少焦香，內裡依然保持住粉嫩狀態，肉汁豐富，口感嫩滑又有嚼勁，唔會太韌。個醬汁調得啱啱好，夠香濃甜香，帶微辣，配上洋蔥同青椒等，索晒啲汁，撈埋白飯一齊食超正。
火車頭粉絲煲 $156﹕今次揀左雞湯底，配料超級豐富，包括牛丸、生牛肉、牛筋同烤牛肉。成個煲一上枱熱辣辣，生牛肉切得夠薄，放入熱湯輕輕灼一灼，入口極之嫩滑，牛味好濃。烤牛肉帶有微微嘅焦香，肉質比起生牛肉有嚼勁少少，食落去好惹味。牛丸爽口彈牙，一咬爆汁出。牛筋炆得非常軟腍入味，充滿膠質。
海南雞配黃薑飯 $79﹕賣相吸引，雞肉切得好靚，有光澤。雞皮爽口彈牙，唔肥膩，雞肉嫩滑到不得了。呢度嘅油飯粒粒分明，充滿雞油香、香茅味同椰香，但食落去又唔會覺得好油，加上辣椒醬酸辣開胃，正!
椰汁拉茶紅豆冰﹕底層係滿滿嘅紅豆，中間係椰汁味奶茶，茶香之餘，仲有好濃郁嘅椰香，茶底夠厚，無俾椰汁蓋過。紅豆煮得好腍身，起晒沙，每一啖都充滿豆香，甜度啱啱好。
土瓜灣 13/12/2025 14:00
今日去黎土瓜灣發現呢間幾有特色嘅餐廳，環境闊落，坐得非常舒服，點咗幾樣主菜，樣樣都有驚喜。
紅酒慢煮羊膝 $188﹕賣相勁吸引，一上枱已經聞到好香嘅紅酒味，羊膝炆得非常軟腍，用叉輕輕一篤就做到骨肉分離，完全唔韌，羊味好香。醬汁濃郁，有紅酒嘅果香同番茄香，微微酸甜好開胃，味道同羊肉嘅鮮味好夾。配上意大利飯，索晒啲汁，真係好滿足。
自家青醬天貝意大利飯 $88﹕第一次試天貝，非常特別，原來係來自印尼嘅發酵大豆餅，主要由黃豆製成，富含豐富植物性蛋白質嘅健康食品，豆味非常香濃。青醬味道好清新，羅勒味好出，意大利飯煮到啱啱好，口感外軟內韌，估唔到素食都可以咁好味。
法式海龍皇香煎龍躉柳 $228：龍躉柳煎得外皮金黃香脆，魚肉雪白嫩滑，魚油香氣十足，最好味係法式海龍皇湯底，濃稠度剛剛好，海鮮味非常突出，加上仲有大大隻八爪魚、帶子同蜆，非常豐富。
法式慢烤蘋果 $58﹕吃完主菜，當然要試試甜品。這款甜品賣相非常精緻，蘋果經過慢烤之後，口感變得軟糯綿密，果汁豐富，蘋果嘅天然酸甜味同玉桂香氣完美融合，再仲脆卜卜嘅果仁，味道非常有層次，將蘋果昇華到呢個層次，認真高級。
花果香草茶 $88﹕茶具非常靚，味道又好飲，酸酸甜甜嘅熱情果味好突出，除咗果味，仲有一陣淡淡嘅花香，優雅清新。食完啲重口味嘅主菜之後飲呢杯，真係即刻解渴又開胃，感覺好舒服。
燕麥鮮奶咖啡 $42﹕用咗燕麥鮮奶嚟沖，奶泡打得好綿密，入口好滑順。咖啡豆嘅味道幾香濃，有少少果仁味，同燕麥奶嗰種獨特嘅麥香味好夾，飲完個口仲會留有少少甘香，非常不錯。
總的來說，幾道菜式都做得好有心思，一個好適合悠閒周六嘅好去處。
