深圳水圍 15/3/2026 17:00
潮汕大目牛雙人餐 137元，入會即時優惠價19.9元加多一碟牛肉。
呢度最出名係濃郁惹味嘅「沙爹鴛鴦鍋」，一邊係沙爹香氣撲鼻，帶住微辣同花生香，味道的確超香濃；另一邊牛骨湯清甜鮮香，雙重享受配搭得極之完美。「嫩牛肉」極之滑溜鮮甜，放落滾湯淥短短幾秒就食得；「肥胓肉」油脂分佈極之靚﹔仲有肉味濃郁嘅「牛匙肉」，肉質鮮嫩無比。「熟牛腩」炆得極之軟腍入味，牛筋部位入口即化。而「手錘熟牛肉丸」更加係驚喜之作，手打得極之起膠，咬落去超級爽脆彈牙，肉汁滿瀉。「水果玉米拼貝貝南瓜」絕對係清甜之選，粟米超爽甜，南瓜就腍又香。最後，加一個「出前一丁公仔麵」放入濃郁嘅沙爹湯底度煮，麵條完美索晒湯底精華，每一啖都惹味到令人停唔到口。
深圳皇廷廣場 1/3/2026 18:00
北方雜醬拌麵 29.5元﹕手工麵條煙韌彈牙，掛滿濃郁惹味嘅特製雜醬，充滿豆醬香同肉碎。
豆角五花肉燜麵29.5元﹕類似炒麵，有五花肉碎同爽脆豆角，調味不錯。
鮮滷醬大骨套餐 25.5元﹕巨型大骨滷得極之入味，肉質軟腍，醬汁香濃。套餐跟一份白菜豬肉手工餃﹕純手工包製嘅餃皮薄得嚟充滿咬口，滿滿鮮甜肉汁。
韭菜盒子 13.5元﹕煎到外皮金黃香脆，入面塞滿新鮮韭菜、雞蛋同粉絲。
豆沙餅 9.9元﹕餅皮層層分明，微脆酥香，裏面嘅紅豆沙餡綿密細緻，清甜而不膩。
熊貓湯圓 6.8元﹕賣相極之吸睛，超可愛。輕輕咬開煙韌柔軟嘅糯米皮，裏面係濃郁嘅黑芝麻餡，甜度控制得啱啱好。
打卡送薑餅人造型冷泡茶。
深圳卓悅匯 1/3/2026 11:00
又來海底撈慶祝生日。
揀咗番茄湯與三鮮火鍋湯底 ($87)，番茄湯極之濃郁，酸酸甜甜，加埋肉碎真係超級開胃。
揀左幾款肉，「撈派肥牛」肥瘦均勻，放入滾湯淥十幾秒就食得，肉質軟腍多汁。「雪花豬肉片」紋理極之靚，淥熟之後口感爽彈。仲有令人極之驚喜嘅「內蒙草原羔羊肉」，羊肉味甘香濃郁。「暴打魚皮蝦卷」真係極之有驚喜，外層魚皮淥熟之後依然保持微脆煙韌，入面嘅蝦滑鮮甜彈牙，口感層次極之豐富。另一款「勁道牛肉丸」打得超級爽脆彈牙，滿滿肉汁，牛味極之香濃。
「黃金蜂窩炸蛋」超巨型，炸得金黃酥脆，表面佈滿好似蜂窩咁嘅細孔。將佢放落滾燙嘅湯底度淥短短幾秒，吸滿晒濃郁嘅湯汁。「脆貢菜丸子」超級爽脆彈牙，肉汁豐盈，加左貢菜爽脆感。「撈派撈麵」即場表演拉麵。「兒童餐」造型極之可愛，色彩繽紛，食材配搭講究營養均衡，份量啱啱好，仲有禮物。
為壽星準備嘅「生日肥牛蛋糕」。肥牛雪花紋理極之靚，層層疊疊咁砌成一個立體蛋糕嘅形狀，打卡一流！另外仲有一袋生日禮物，店員一齊唱生日歌，非常開心。
呢間店有細細兒童遊樂場，仲可以做兒童美甲，小朋友超開心。
全單300元，情緒價值高。
深圳壹方城 19/2/2026 12:00
今次嗌咗佢哋超抵食嘅火鍋二人餐173元，份量十足之餘食材仲極之新鮮。
個餐最核心嘅當然係個牛骨清湯底。湯頭清甜甘香，完全帶出牛肉本身嘅純粹鮮味。二人餐包咗幾款唔同部位嘅鮮切牛肉，每片牛肉都切得厚薄適中，放落滾湯度輕輕淥十幾秒，肉質即刻變得粉嫩誘人。咬落去超級軟腍多汁，豐盈嘅牛脂香氣喺味蕾爆發，配埋特製嘅沙茶醬一齊食，惹味到令人一啖接一啖咁食。
招牌手工河粉晶瑩剔透，吸收晒牛肉湯底嘅精華，口感極之滑溜煙韌，帶淡淡嘅米香，仲可以無限任食。二人餐仲配埋極之新鮮嘅蔬菜拼盤同手打牛丸。牛丸極之爽脆彈牙，有滿滿嘅肉汁。
潮汕炸豬肉卷炸到超級酥脆，入面嘅豬肉餡極之足料，肥瘦比例啱啱好，仲加入咗爽脆嘅馬蹄粒，五香粉味道幾香。
潮汕粿肉炸得外皮微焦香脆，口感扎實得嚟又帶點煙韌，點埋酸辣汁，酸酸甜甜和咗炸物嘅油膩感。
深圳坂田萬科 8/2/2026 12:00
今次我哋去咗人氣極高嘅「野妹經典火鍋」，最過癮嘅地方，就係「超市自選」嘅點餐模式。行勻成個食材區，睇中邊碟新鮮配料就自己攞，極之有尋寶嘅樂趣。
先叫一個鮮切牛肉二人餐 168元，叫咗「番茄及菇菌雙拌鍋」，番茄湯底熬得極之濃郁，酸酸甜甜超級開胃；而菇菌湯就清甜滋潤，啖啖鮮菇香氣。套餐包括吊龍、匙柄、梅花肉同埋肥牛。吊龍切得厚薄適中，放落滾湯稍微淥幾秒就食得，肉質極之嫩滑多汁。匙柄中間帶條肉筋，咬落去有種獨特嘅微脆口感，肉質緊實。肥牛雪花紋理分佈得均勻，入口腍滑。梅花肉肥瘦適中。
墨魚腸極之爽口彈牙，帶住濃濃嘅墨魚鮮味。鮮蝦滑真材實料，鮮甜爽脆，食得出粒粒鮮甜蝦肉。魚豆腐索晒菇菌湯嘅清甜。四川苕皮質地煙韌軟糯，放落濃郁嘅湯底入面慢慢煮，完美吸收晒湯汁嘅所有精華。滑溜得嚟又帶住極佳嘅嚼勁，絕對係成餐火鍋嘅完美收尾。仲有蔬菜同飲品，非常滿足。
送兩份兒童餐，除左主菜，仲有公仔造型麵包同水果。意式番茄鮮牛肉意麵酸酸甜甜嘅番茄醬汁超級開胃，鮮牛肉切得細細粒，肉質腍滑。另一款蔬菜雞蛋餅材料豐富，融入充滿蛋香嘅煎餅入面。
呢間分店自助枱更豐富，除左有前菜小食，仲有迷你蛋糕、雪耳糖水、冰粉自助，打卡送雪糕球，性價比極高!
深圳海岸城 1/2/2026 12:00
雙人餐 165元
一開爐滾起個湯底，清甜嘅新鮮椰青香氣即刻撲鼻而來。椰子水清甜味美，加埋文昌雞，大火煮幾分鐘就食得，雞肉極之嫩滑彈牙。連埋吸滿椰汁精華嘅雞皮一齊咬落去，口感爽脆得嚟又帶住清幽嘅椰香，完全唔會覺得肥膩。食椰子雞配埋沙薑、沙糖桔同辣椒特調嘅豉油蘸料，更加好味。最後飲返兩碗清潤無比嘅鮮甜原汁雞湯，正!
配菜仲有肥牛片，無乜血色唔太新鮮。肥牛吸滿晒湯汁嘅精華，肉質軟腍幼嫩。手打牛丸口極度爽口彈牙，一咬落去肉汁四溢，滿滿牛肉鮮甜味。鮮蝦滑就真材實料，鮮甜爽脆。最後加入蔬菜索晒肉脂同湯底嘅鮮味，清甜解膩。
雞肉煲仔飯有濃郁嘅飯香，雞肉醃得入味，將微甜嘅特製煲仔飯豉油淋上面，趁熱將雞肉同飯粒撈勻，每一啖飯都充滿住油香同肉汁。最精彩嘅部分一定係煲底嗰層金黃色嘅飯焦，焦香四溢。
最後，點評打送椰子奶凍，奶凍賣相白雪雪，質地極之細膩滑溜。椰奶香氣濃郁，冰涼透心，甜度控制得啱啱好，完全唔會覺得溜。
美味不過不失，餐廳裝修就勁靚，好多花、高級西式佈置，環境取勝。
