雲南桂林過橋米線
尖沙咀 19/9/2026
今個周末去開尖沙咀老字號雲南桂林過橋米線食個晏。
肥牛番茄烏冬嘅湯底真材實料，番茄鮮甜味突出。肥牛嫩滑得嚟索曬酸甜湯汁，配埋煙韌烏冬食真係好夾。
小鍋米線配料好大份，仲可以自選湯底，揀個清湯，湯底清甜。豬軟骨炆到充滿膠質，大腸煙韌香濃。魚腐吸滿清湯，米線口感爽滑。仲有大量芽菜、配料，夠晒惹味。
份量好足夠，性價比高。
柒粉田拌粉王
旺角 5/9/2026 14:00
招牌雙拼脆皮撈粉 $52: 好足料，脆皮燒肉外皮燒得香脆，肉質肥瘦適中；醬牛肉炆得好腍滑，醬汁非常入味。撈粉嘅質地煙韌彈牙，秘製醬汁撈勻之後依然鹹香惹味。
牛肉炒米粉 $63: 呢碟炒米粉真係好夠鑊氣！米粉炒得乾身分明，牛肉份量俾得幾足，肉質嫩滑唔嚡口。同樣係嗌咗走辣，反而更加食得出豉油嘅香氣同牛肉嘅鮮甜，火候控制得好出色。
現炸小酥肉 $20: 上枱嗰陣仲係熱辣辣，外層炸到金黃酥脆，粉漿夠薄。咬落去肉汁鎖得住，肉質軟嫩，調味啱啱好，食落口非常惹味，做香口小食一流。
爆漿紅糖糍粑 $22: 外皮炸得微脆，入面保持住煙煙韌韌嘅口感，趁熱咬開真係有紅糖爆漿嘅效果！紅糖糖漿香甜濃郁。
金記小食
太子 30/8/2026 14:30
酸辣粉﹕紅油湯底色澤紅亮，酸味醇厚，麻辣辛香直衝味蕾，非常刺激。紅薯粉煮得晶瑩剔透、軟硬適中，咬落滑溜爽口又極具彈性，完美吸飽酸辣精華，味道偏辣。肉碎俾得多，味道不錯，配埋爽口榨菜碎同香蔥一齊食，口感豐富多層次，都幾原味還原。
碗仔翅﹕呢碗經典港式碗仔翅稠度拿捏得剛剛好，勾芡順滑唔會結塊。湯底以濃郁嘅香菇肉絲熬製，色澤深邃油亮。入面配料相當充足，有齊爽脆嘅木耳絲、軟嫩嘅冬菇絲同幼滑嘅粉絲。落少少麻油同紅醋提鮮，醋香更能突顯出湯底嘅鮮甜鹹香，熱辣辣落肚非常暖胃又滿足。
大腸豬紅﹕豬大腸洗得非常乾淨，完全無異味，雪白油亮、爽彈嚼勁。
湯菜肉水餃﹕呢碗湯菜肉水餃賣相樸實但充滿家常滋味。水餃皮偏厚，包得圓潤飽滿，咬開入面包滿新鮮豬肉同爽脆蔬菜，菜肉比例勻稱，肉汁鮮甜多汁；配搭清甜溫潤嘅高湯一齊食，鮮味十足且毫不油膩，係飽足感滿滿嘅暖心之選。難得唔辣之選。
泡椒鳳爪﹕鳳爪皮爽肉脆、筋道彈牙。經過特製泡椒水長時間醃製，酸風味完全滲透入骨髓，酸爽開胃之中帶有後勁十足嘅泡椒辛辣感。冰涼爽口且膠原蛋白滿滿，越嚼越香，令人食到停唔到口。呢味唔算太辣，反而有驚喜。
價格親民且選擇豐富，唔怪得人流都幾旺，不過辣味為主，未必人人岩合味。
不二江湖菜
尖沙咀 28/8/2026 20:00
今日放學，喺尖沙咀搵食，呢間有晚餐都非常抵食。店內好多小熊貓裝飾，非常可愛。
酸菜魚飯 $86﹕呢份酸菜魚飯份量十足，一上枱就聞到酸菜香氣。魚片份量勁多，大大片，肉質滑嫩無骨，吸收晒金黃酸爽嘅酸菜湯汁。湯底揀左唔辣，酸麻味道足，已經非常好食。酸菜爽脆多汁，仲有茶樹菇香氣十足。
農家小炒牛肉飯 $76﹕呢道農家小炒牛肉勁夠鑊氣。牛肉切得大片厚薄均勻，大火快炒下保持軟嫩多汁且唔會過老。加入大量新鮮洋蔥香蒜，辛香四溢，鹹香味濃郁，撈埋勁香甜嘅洋蔥一齊食，勁好送飯。
芒芒梳打 & 凍柚子茶﹕兩款凍飲絕對係最佳拍檔。芒芒梳打充滿濃郁嘅芒果甜香，氣泡感十足，入口冰涼清爽、果香撲鼻；凍柚子茶柑橘果香，底層帶有絲絲柚子果肉，微酸微甜，非常解膩，透心涼。
富苑金閣
慈雲山 16/8/2026 11:00
今日午餐嚟到鑽石山富苑金閣飲茶，招牌點心水準不俗：鮮蝦餃賣相勁靚，晶凝通透，皮薄餡料足，蝦肉爽彈鮮甜，好食到要叫多一籠。蟹籽燒賣皇肉質扎實，材料豐富又多汁。醬汁蒸鳳爪炆得軟爛惹味；排骨啖啖肉，蒜香味道足；菜苗餃、潮州粉果，餡料豐富；春卷炸得金黃香脆；金錢肚爽口彈牙，微辣惹味。
每款點心定時出爐，熱辣辣上枱，用料實在且份量足，傳統老字號酒樓，點心師傅經驗十足，絕對係高性價比嘅飲茶之選。全單$500有找，飽到上天花板。
2026廣州生日之旅 ［1.5 秦哥哥長安風味、mini Sunday、深夜蒸餃］
秦哥哥長安風味
廣州東方寶泰 9/8/2026 19:30
因人廣州塔實在太多人，所以轉場番東方寶泰搵食。
招牌單人餐 36.8元﹕有齊肉夾饃、長安手工涼皮、西安冰峰，抵食。肉夾饃熱辣辣，外皮烘得金黃酥脆，極之鬆脆。入面塞滿咗吸飽滷汁嘅臘汁肉，肥瘦相間且炆得軟爛入味。肉汁滲透成個饃餅，鹹香四溢且油而不膩。手工涼皮質地晶瑩剔透，食落滑溜爽口又帶有彈性。面頭淋上濃稠醇香嘅麻醬，配埋爽脆嘅黃瓜絲同索汁嘅麵筋，拌勻之後每一啖都裹滿濃郁嘅芝麻香氣。西安經典嘅冰峰汽水係橙味汽水，氣泡感十足，入口清甜爽快，解油膩又解渴。
糖醋里脊 29.8元﹕糖醋里脊炸得金黃誘人，外層薄脆，入面嘅里脊肉質鮮嫩多汁。均勻包裹住酸甜濃郁嘅糖醋醬汁，酸中帶甜極之惹味，鑊氣十足，無論大人定細路都食唔停口。
黑松露雞樅菌拌麵 23.8元﹕呢碗拌麵香氣極度濃郁。將黑松露特有嘅幽香同鮮甜爽口嘅雞樅菌完美結合，麵條質地煙韌彈牙，撈勻之後每條麵都沾滿菌香醬汁，充滿野菌風味。
滷蛋滷得相當入味，蛋白表面呈現深褐色，口感彈牙扎實。入面嘅蛋黃綿密濕潤，滲透出陣陣醇厚嘅香料與醬油香氣。
打卡送厚奶手工酸奶或芒果布甸。厚奶手工酸奶質地濃稠，面層帶有一層香濃凝結嘅奶皮子。入口綿密幼滑，奶香濃郁純正，酸甜平衡得剛剛好，天然清爽。芒果布甸質地滑溜細膩，充滿濃郁嘅芒果果香同香甜奶香。
nini Sunday
東方寶泰 9/8/2026 20:30
可愛嘅鯛魚做飯後甜品，點評優惠24.4元代30元，買左兩款試下。
迷你鯛魚燒（朱古力、草莓、藍莓）﹕迷你鯛魚燒賣相精緻小巧，一客有齊三款人氣口味。魚形外皮烘得外脆內軟，充滿香濃嘅蛋奶香氣。朱古力味內餡濃郁幼滑，帶出甘甜滋味；草莓同藍莓味則果香四溢，酸甜果蓉中和咗餅皮嘅甜度，入口清爽不膩。一啖一粒，口感層次豐富。
紅豆麻糬鯛魚燒﹕經典紅豆麻糬鯛魚燒口感極具層次。熱辣辣嘅外皮金黃酥脆，咬落去即刻食到軟糯煙韌嘅麻糬，拉絲效果十足。入面包裹住厚實綿密嘅紅豆餡，紅豆粒煮得軟爛甘甜、甜度適中。外脆、內軟、軟糯三重口感，充滿飽足感。
打卡仲送可愛嘅扣針，超Cute。
深夜豆漿。薄皮蒸餃。小吃。腸粉。炒粉
美團外賣 9/8/2026 21:00
全家福薄皮蒸餃 19.6元﹕呢份全家福薄皮蒸餃有12隻，一次過試齊六個口味。蟹子蝦、芝士玉米、南瓜、紫菜馬蹄、香芋、冬菇，各有特色，味道突出。餃子皮擀得晶瑩剔透又薄滑，蒸出嚟隱約見到入面飽滿嘅餡料，入口軟糯帶點彈性。入面嘅肉餡鮮嫩多汁，沾少少香醋或辣椒醬食更加提味。
潮汕香蔥脆筍豬肉圓 11.2元﹕呢款炸潮汕香蔥脆筍豬肉圓炸到金黃香脆，外層帶有酥香感。咬落去豬肉餡扎實彈牙兼肉汁豐富，入面嘅脆筍粒增添咗清爽嘅咬口，配埋濃郁嘅蔥香，鹹香惹味且油香四溢，真係一款極具風味嘅地道潮汕小食。
潮汕炸墨魚丸 10元﹕呢份炸墨魚丸炸到金黃誘人，香氣撲鼻。咬落去口感極之爽口彈牙，食得出墨魚肉嘅鮮甜同扎實質感，完全冇粉感。外皮微脆香口，內裏鮮美多汁。
冰豆漿 5元﹕入口順滑細膩，香濃嘅大豆豆香，甜度調配得啱啱好。
埋單54元，超抵食。
