馬鞍山 25/12/2025 12:00
白咖喱香茅豬扒飯 $68﹕香茅同椰香超香，白咖喱汁微辣帶甜、充滿奶香，質地濃郁醇厚，撈飯超正。香茅豬扒炸得外脆內軟，肉質腍滑無比，切開仲保留到豐富肉汁，香茅味濃郁。加埋惹味嘅白咖喱一齊食，超好味。
鐵板自家製漢堡扒煎荷包蛋配薯條及酥皮濃蝦湯 $78﹕鐵板上枱嗰陣滋滋作響，自家製漢堡扒極之厚身，咬落去肉汁極多，牛味極濃。淋上醇厚嘅法式牛扒汁，味道香濃。最驚喜嘅係跟餐配埋酥皮濃蝦湯，頂層酥皮焗到金黃鬆脆，入面係極之香濃順滑嘅蝦湯，每一啖都充滿海鮮嘅鮮甜。
芝士蒜香蕃茄湯暖笠笠巨髀窩配日本讚歧烏冬 $89﹕蕃茄湯底極之濃郁醇厚，酸甜開胃，最邪惡嘅係面頭加咗香濃嘅半溶芝士同埋惹味嘅蒜蓉，三者喺高溫下完美融合。飲一啖湯，芝士嘅奶香、蒜香嘅微辛同蕃茄嘅鮮甜好夾。講到明係「巨髀窩」，入面隻雞髀真係份量十足。雞肉燉得極之軟腍入味，用筷子輕輕一撥已經骨肉分離。肉質鮮嫩多汁。配埋日本讚歧烏冬煙韌彈牙，掛湯能力滿分。每一條烏冬都均勻咁沾滿濃厚嘅芝士蕃茄湯，飽足感爆燈。
馬鞍山 21/11/2025 12:00
白咖哩燒雞扒一口炸雞飯 $70﹕超鍾意呢度嘅白咖哩，聞落去有一陣椰奶香，同埋淡淡嘅香茅味，質地好creamy，味道香甜同濃郁嘅奶香，入口好滑順，帶有少少辛辣做點綴，反而好開胃，撈飯食真係一流，每一粒飯都裹滿咗香濃嘅白咖哩汁，食落去好滿足，完全唔覺膩。雞扒外皮煎得非常鬆脆，雞肉依然保持嫩滑多汁。另外仲有幾粒一口炸雞，外皮脆脆，炸粉唔太厚，中間仲有啖啖雞肉。成個飯嘅份量都好足，雞扒大大塊，白咖哩汁又畀得夠多，好正嘅午餐。
馬鞍山 19/10/2025 19:00
白咖哩香茅豬扒飯 $68
個白咖哩汁同上次食嘅一樣，充滿濃郁嘅椰奶香，質地順滑，帶有輕微嘅辣意，非常開胃。主角香茅豬扒煎得外層有少少焦香，但入面嘅肉質依然保持到鬆軟，一啲都唔韌。豬扒本身用香茅醃過，有種好獨特嘅清新香味，正好平衡咗白咖哩嘅濃郁感。豬扒索滿晒個汁，配埋軟熟嘅白飯一齊食，真係啖啖都係享受，好惹味。
白咖哩慢煮牛肉日本職人幼麵 $55
現同一個白咖哩湯底，用嚟做麵食嘅湯底會稍微調得稀身啲，但椰香味依然突出。麵條係用類似拉麵嘅麵質，掛湯能力好好，食落夠彈牙。最值得讚嘅係啲慢煮牛肉，炆得非常軟腍入味，幾乎入口即化，牛味香濃。牛肉嘅肉汁同白咖哩湯底融合埋一齊，令到個湯頭更加豐富有層次。白咖哩湯底色澤奶白，聞落去有一股好溫柔嘅椰奶香同香茅味，唔似平時嗰啲咖哩咁霸道刺鼻。試咗一啖湯，質感非常creamy，入口順滑，帶有微微嘅辛辣感，但更多嘅係椰香嘅甜味，層次好豐富，飲落去好暖胃舒服。主角慢煮牛肉絕對係驚喜。因為係慢煮，牛肉嘅肉質保持得非常軟嫩，幾乎係入口即溶，而且牛味好濃郁。牛肉本身吸滿晒白咖哩嘅精華，每一啖都充滿肉汁同咖哩香，完全唔會有渣或者太韌嘅情況，真係做得好出色。麵條幼細得嚟好有彈性，掛湯能力一流。每一條麵都掛滿咗濃郁嘅白咖哩汁，嗦一聲吸入口，爽滑彈牙，麵香同湯底完美融合。幼麵嘅質感唔會太淋，咬落去有種煙韌嘅口感，配埋軟腍嘅牛肉一齊食，真係一種享受。
自家製漢堡扒滑蛋蓋飯 $80
一大塊厚身嘅漢堡扒鋪喺飯面，上面仲蓋住一層半熟嘅滑蛋，蛋汁隨隨流落嚟，睇見都覺得治癒。首先切開個漢堡扒，肉汁即刻湧出嚟。一食落去，口感非常鬆軟，完全唔會有死實實嘅感覺。因為係自家製，食得出有用洋蔥碎混入去打，帶有洋蔥嘅甜味同焦香，肉味亦都好濃郁，每一啖都充滿住誠意。至於個滑蛋，火候控制得啱啱好。蛋身嫩滑，依然保持住微微流心嘅狀態，充滿蛋香。滑蛋同濃味嘅漢堡扒簡直係絕配，蛋液包住啲肉，令到口感更加順滑。蓋飯嘅醬汁都係亮點之一，鹹甜適中嘅日式燒汁淋喺飯面，滲透到每一粒米飯入面。當你一啖有齊漢堡扒、滑蛋同沾滿醬汁嘅白飯，嗰種滿足感真係難以形容。
馬鞍山 9/11/2025 17:30
趕得切食下午茶餐。
印度皇室咖哩香煎雞扒飯 $48﹕聞落去非常濃厚，豐富嘅香料味，非常誘人。雞扒大大塊，煎得個皮金黃酥脆，帶有微微嘅焦香，肉質保持嫩滑多汁。咖哩汁入口順滑，初頭係淡淡嘅椰奶香，隨之而來係香料嘅辛辣，慢慢喺喉嚨散發出嚟嘅溫熱感，非常惹味醒胃。咖哩汁俾得足，撈飯一流。
和風芥末豬扒包配薯條 $45﹕個包一上枱已經好吸睛，漢堡烘得外脆內軟，豬扒煎得酥脆，鎖住肉汁，咬落去啖啖肉，肉質鬆化。和風芥末醬帶有蛋黃醬嘅香滑同微微嘅酸甜，再滲出淡淡嘅芥末辛香，清新刺激，再夾埋爽脆嘅生菜絲，中和咗炸豬扒嘅熱氣同油分。粗切薯條炸得熱辣辣，外層香脆，薯蓉夠綿密。
西西里意或焗腸仔肉醬意粉 $43﹕表面焗到金黃焦香，芝士融化拉絲效果超級誇張！茄醬味道非常濃郁，酸甜開胃，而且食得出混入咗茄膏去煮，令醬汁更稠更掛麵。醬汁入面除咗腸仔，仲有免治豬肉，洋蔥、甘筍等，意粉煮得彈牙有嚼勁，撈汁一流。
屯門 17/8/2025 17:30
趕得切食下午茶。
亞參去骨海南雞飯 $48﹕份量迷你但賣相對版，雞肉滑嫩多汁，有雞肉味，雞皮帶有少少膠質，入口即化，配埋特製嘅醬汁，鹹中帶甜，仲有少少酸辣味，好開胃。油飯用雞湯煮成，粒粒分明又香濃，仲有陣陣雞油香。三色醬都齊全，辣椒醬，辣度適中，帶有蒜香同酸味，點飯或者雞都不錯。輕盈版份量真係好輕盈。
檳城紅茄參巴醬鴨腿滲滲 $48﹕大大隻鴨腿煮得入味，皮脆肉嫩，帶有濃郁嘅紅茄參巴醬香氣，微辣中帶甜，好惹味。滲滲係蛋麵同米粉，麵同米粉嘅比例啱啱好，麵條彈牙，米粉滑溜，吸晒紅茄參巴醬嘅精華，每一啖都充滿層次感。湯底酸甜開胃，帶有少少辣勁。
深業上城 2/3/2025 18:00
菠蘿蝦仁炒飯 33元﹕賣相對板，炒飯之上加左腰果仁。炒飯粒粒分明，有菠蘿嘅天然清新果香，食得出粒粒新鮮菠蘿，果汁勁多，蝦仁都幾爽口彈牙，再加埋雞蛋嘅滑嫩同少量青豆、紅蘿蔔嗰種清甜，口感豐富。
娘惹沙爺雞肉串 39元﹕未食已經嗅到嗰陣濃郁嘅娘惹風味，雞肉串燒到外層微微焦香，內裡卻嫩滑多汁，娘惹沙爺醬味道濃郁，花生芝麻味勁香，微微辣度啱啱好，非常惹味。
獅城炒貴刁 49元﹕河粉濕潤又帶點嚼勁，吸收左濃郁嘅醬料，配料有嫩滑嘅雞蛋、爽口嘅鮮魷魚，仲加左類似臘腸多一份香甜，配上翠綠嘅蔬菜豆芽加一份清新脆爽。調味咸鮮不辣，鑊氣十足。
咖椰焗烤麵包 20元﹕麵包焗得金黃酥脆內軟，中間係鮮綠咖椰醬，咖椰醬輕輕滲入麵包裡，充滿椰香同雞蛋嘅天然甜味。
送嘅蝦片都相當好味，炸得黃金香脆，充滿濃濃海鮮味。
星怡會嘅菜單選擇多元化，百幾蚊一餐外賣，出品不錯。
沙田好運中心 8/12/2024 11:00
娘惹茶燻鴨喇沙摻摻 $68
賣相吸引，估唔到鴨胸肉咁大件，外皮輕切一格格，煎得香脆金黃，肉質依然軟嫩多汁，且帶著鴨肉特有的香氣。喇沙湯底濃郁，椰奶順滑濃郁，再加入辛香料完美融合，帶輕微辣意。米線充分吸收濃湯精華，非常不錯。
海南雞飯拼喇沙 $96
海南雞份量都唔少，每件都皮薄肉嫩，帶著雞油香氣，口感嫩滑。按個人喜好沾上三款經典的醬料香濃微辣嘅辣椒醬，薑蓉醬，以及濃郁黑色甜醬油。不得不提香氣四溢嘅雞油飯。米粒晶瑩剔透，粒粒分明，每口都帶著濃郁的雞油香和蔥薑的微香。
海鹽雪糕椰汁珍多冰 $12
這款飲品顏值出眾，椰汁冰上放著一大球海鹽雪糕，仲有青綠色嘅椰漿粉條珍多。椰汁香醇濃郁柔滑質感。海鹽雪糕的鹹甜既解渴又滿足，冰涼透心。珍多QQ滑滑，層次感非常豐富。
