Ruên Thai & Vietnamese

by admin | 8 月 14, 2026 | Blog, 小食, 尖沙咀, 星馬菜, 泰國菜, 燒烤, 甜品

尖沙咀 14/8/2026 12:00

今日午餐嚟到 Ruên 泰越餐廳享用豐盛嘅異國料理。餐廳環境裝修雅致，充滿濃厚嘅東南亞風情，座位寬敞舒適。午餐選擇多，仲可以加配小食、甜品，非常豐富。

紅咖喱配香米飯牛肉 $146﹕烤牛肉鮮嫰粉紅色，賣相唔錯，牛味幾香。紅咖喱汁質地香濃幼滑，椰奶香氣突出，微辣非常惹味，撈飯一流，食唔停口。

泰式濕炒河粉海鮮 $136﹕濕炒河粉海鮮鑊氣十足，河粉質地煙韌滑溜，索晒鮮甜嘅茨汁。配料有新鮮海鮮，包括爽口大蝦、魷魚同青口等，肉質幾甜。茨汁濃稠適中，口感濕潤滑順。

越式炸春卷 $22﹕春卷外皮炸到金黃酥脆，口感極度鬆化。入面包裹住豐富嘅爽脆蔬菜絲，保留咗蔬菜嘅清甜同水份。沾上酸甜開胃嘅甜辣醬，香口惹味。

蟹肉豬肉燒賣 $26﹕燒賣外皮軟滑，肉餡扎實，有豬肉同蟹肉，味道鮮甜。

雞肉串燒 $38﹕串燒燒到外皮微焦，雞肉醃得好入味，肉質鮮嫩多汁，沾上惹味嘅自家製沙爹醬，花生同香料嘅香氣濃郁，甜中帶微辣，惹味程度十足。

班蘭煎餅配椰子雪糕 $38﹕班蘭煎餅味道清香，配搭一球香滑冰凍嘅椰子雪糕，冰感十足，椰味十足。冰火交融，甜而不膩。

芒果糯米飯 $58﹕呢碟經典芒果糯米飯賣相吸引。糯米飯煙韌軟糯，三層係白、藍、紫。淋上香濃嘅椰漿，鹹甜交織嘅風味極佳。配搭新鮮切片嘅芒果，肉質鮮甜多汁、果香四溢，兩者結合出極致嘅熱帶風情滋味。

泡沫咖啡 $28、鮮奶咖啡$28﹕咖啡入口香濃醇厚，口感滑順，奶香為主，咖啡味道唔太濃。

炭燒豬頸肉 $108﹕豬頸肉經過炭火燒烤後，外皮帶有微脆嘅焦香，肉質爽口彈牙且油脂分明。切開見到肉汁豐富，沾少少酸辣嘅泰式醬汁，更能突顯肉質嘅鮮甜。勁正!

全單 $691，高檔午餐，味道不錯。

泰芮珠 泰國打拋飯專門店

by admin | 5 月 24, 2026 | Blog, 小食, 泰國菜, 深圳

深圳卓悅中心 24/5/2026 16:30

點評積分換單人餐，有飯有飲夠晒下午茶，仲幾好食。

雞肉熟蛋泰國豬油渣打拋飯、泰紅春奶茶﹕雞肉炒得非常入味，帶有濃郁嘅香草氣息，微微辣度恰到好處。配上全熟嘅煎蛋，加左蛋香味，撈飯一流。最大嘅亮點在於加入左泰國豬油渣，金黃酥脆嘅豬油渣增添油脂香氣同脆爽感。配上一標泰式奶茶，濃厚茶香，甜度控制得宜，順滑而不膩，中和打拋雞肉嘅辛辣感。

豬肉流心蛋泰國豬油渣打拋飯、芒果春檸茶﹕賣相勁靚，好有泰式風情。豬肉碎吸滿了鹹香微辣嘅醬汁，肉質軟嫩多汁。最正嘅地方係完美嘅流心蛋，輕輕劃破後，金黃色嘅蛋液緩緩流出包裹住米飯同豬肉，讓整體嘅口感變得滑潤濃郁。酥脆嘅豬油渣提香，非常過癮。飲品最吸引人嘅地方係芒果同檸檬平衡，新鮮芒果濃郁熱帶果香，檸檬微酸，春茶清新香氣。

芒果糯米飯 18元﹕新鮮芒果切得厚實，味道香甜，入口即化，柔嫩多汁，紫糯米微微嚼勁，入味軟腍。加入濃郁嘅椰奶後，滑順嘅油脂感同淡淡嘅鹹香，中和左芒果嘅甜膩，配合得非常好。

打卡送蝦片，香脆，食得出蝦味，微微辣，好香口惹味，仲可以續加。

Thai Shack

by admin | 5 月 9, 2026 | Blog, 外賣, 小食, 旺角, 泰國菜, 燒烤

旺角 9/5/2026 15:30

今次試咗 THAI SHACK 幾款經典泰式小食同主食，正宗泰式街頭風味。

泰式金邊粉 $79，賣相相當吸引，炒得乾爽而唔油膩。米粉煙韌，醬汁酸酸甜甜，味道平衡得唔錯，配豐富，有爽口大蝦、豆乾、芽菜、蛋等，同米粉拌得幾均勻。花生碎加咗少少脆口感，好惹味。

加配泰式春卷， 經典小食，外皮炸得金黃香脆，內餡食到蔬菜同餡料本身嘅香味。配埋醬汁食，甜酸味更加突出，令春卷食落更醒胃。

肉碎生菜包 $48﹕非常清爽同惹味，肉碎炒得香口，調味帶有淡淡魚露香，味道濃郁，微微酸好開胃。生菜又夠新鮮爽脆。生菜包住肉碎一齊入口，口作為前菜特別討好。

泰式地道燒紅雞串 $28﹕味道超香氣，雞肉串燒得帶少少焦香，肉質保持嫩滑，非常JUICY。紅咖哩醬香濃惹味，味道甜甜地，三大串，啖啖肉，超抵食!

泰屋

by admin | 2 月 15, 2026 | Blog, 小食, 旺角, 泰國菜, 燒烤

旺角 15/2/2026 12:30

幾鍾意呢間泰屋，因為午餐真係平靚正!

先飲返啖冬蔭公湯，未飲已經聞到濃烈嘅香茅同南薑味。一入口，酸辣味即刻湧上嚟，刺激得嚟又非常開胃。湯底夠濃厚，唔係只有辣味，而係充滿咗蝦頭嘅鮮甜同椰奶嘅香滑。草菇爽口多汁，索滿咗酸辣湯，好開胃。

海南雞飯 $70﹕相當正宗，賣相靚，雞皮油亮望落已經非常吸引。雞件份量十足，全部都係去骨雞髀肉，啖啖肉。雞皮爽滑彈牙，皮下脂肪唔多，但雞油香氣十足。雞肉極之嫩滑，完全唔會覺得嚡口，而且煮得啱啱好，仲保留到豐富嘅肉汁。即使係雞胸嘅部分，都一樣咁嫩滑。個飯底先係重點，用雞油同香料煮過嘅油飯，粒粒分明，索滿晒雞油同香茅嘅香味，就算唔配雞肉齋食都已經好好味。飯嘅軟硬度適中，油香十足但又唔會覺得油膩。當然唔少得靈魂醬汁，薑蓉同泰式辣醬，加少少酸辣超級好味。

泰式肥牛炒河 $60﹕一上枱就聞到好強勁嘅鑊氣，河粉炒得均勻，色澤油潤亮澤，每一條都沾滿咗甜醬油嘅焦香味，河粉入口煙韌彈牙，保持到乾身爽口。肥牛肉片份量超多，醃得入味，食落軟腍唔韌，仲有各色青菜，爽脆嘅口感中和咗河粉嘅油膩感。調味適中，咸咸甜甜相當不錯。

青咖哩越式豬扒飯 $58﹕香茅豬扒大大件，煎得出色。豬扒預先用香茅、魚露等香料醃過，非常入味。上枱時熱辣辣，外層煎到有少少焦香，但切開入面依然肉汁豐富，肉質鬆軟唔會乾柴。每一啖都食到香茅獨有嘅清新香氣，非常開胃。青咖哩醬汁較為稀身，但味道不減，咖哩味香濃，香料、椰奶味十足，順滑得嚟又唔會太甜，辣度溫和，撈飯超正。

加配幾款小食都好抵食，先講串燒雞 $25，一上枱已經聞到好香嘅燒烤味，雞肉燒得啱啱好，表面帶點金黃微焦，賣相好吸引。咬落去肉質依然保持嫩滑，完全唔會乾柴，保留咗豐富嘅肉汁。醃料嘅味道滲透入每一絲雞肉入面，帶有淡淡嘅黃薑同香茅味。呢度嘅沙嗲醬做得好出色，花生味極之濃郁，質感粗粒得嚟又順滑，帶有微甜同微辣，非常惹味。

另一款必試嘅係炸蝦餅拼春卷 $20。大大塊圓碌碌嘅蝦餅炸到金黃酥脆，入面係實實在在嘅蝦肉膠，咬落去非常彈牙，每一啖都食到鮮甜嘅蝦味。蝦餅炸得好透，唔會油淋淋，配埋專用嘅泰式酸梅醬，酸酸甜甜非常開胃，酸甜味更加提昇咗蝦肉嘅鮮甜。春卷外皮極之酥脆，鬆化到跌晒碎，內餡豐富，係大量粉絲同雜菜，仲有木耳絲、紅蘿蔔絲等配料，增加咗爽脆嘅口感層次，味道一點都唔寡，反而有一種清新嘅蔬菜甜香。

椰汁冰﹕呢度嘅椰汁甜度調校得啱啱好，唔會過份甜膩，而係突顯咗椰子本身嘅天然清香同奶滑感，郁順滑嘅椰奶香味即刻充滿成個口腔。口感非常幼滑，最重要就係解辣。當你食完一啖咖哩，即刻飲一啖冰凍嘅椰汁冰，舒緩辣味帶嚟嘅刺激感，超涼快。

泰聚

by admin | 1 月 31, 2026 | Blog, 太子, 小食, 水果, 泰國菜, 甜品

太子 31/1/2026 14:00

今日行經太子，被泰聚呢個泰式下午茶吸引，非常適合慢嘆一個下午。泰式下午茶非常靚，絕對值得打卡。先來兩層架，上層係柚子沙律，柚子肉粒粒飽滿多汁，每一啖都爆汁，非常香甜。撈埋泰式醬汁，仲有大大粒腰果，口感豐富，酸酸甜甜極之開胃。下層係香口炸物大集合，炸蝦餅厚切，非常彈牙，充滿鮮味，最岩點埋酸梅醬。泰式魚餅就有驚喜，口感結實得嚟帶有獨特嘅香料味，檸檬葉同豆角粒，非常惹味。炸雞翼脆卜卜，醃料好入味。咖哩春卷炸到金黃酥脆，餡料充滿濃郁嘅咖哩香，雜蔬等。仲有泰式鳳爪索晒泰式酸辣汁味道，充滿蒜蓉、辣椒、酸酸辣辣，非常入味。

芒果糯米飯靚到不得了，充滿夢幻感。除左有傳統嘅椰漿味白色，仲有一件係紫藍色。糯米飯煮得剛剛好，軟糯煙韌，帶住淡淡嘅米香同椰香。芒果勁甜，入口香甜完全無渣，果肉又多汁。最後淋上濃厚嘅椰奶，甜中帶少少鹹味，味道出色。

最後飲番杯泰式檸檬茶，過一個充滿東南亞風情嘅悠閒下午。