九龍城 11/1/2026 18:00
天寒地凍來火鍋，有得食有得玩，帶小朋友就最岩。今次揀左「番茄薯仔鮮牛鍋」，大大件番茄、薯仔，仲有粒粒鮮牛肉，味道香濃，酸酸甜甜，夠晒開胃。
冰震鮑魚都係冰爽彈牙好鮮甜，今次嘅池魚刺身非常新鮮，味道甜甜，魚油味香。霜鮮肥牛油花非常靚，輕輕煮十秒，入口嫰滑到不得了。
火鍋料有招牌水餃皇，超飽滿勁大隻，皮薄餡靚，入面係原隻大蝦，非常爽口彈牙，仲有配料，充滿鮮味。手打鮮肥牛丸更加係必食推介，非常彈牙多汁，牛味極濃，而家肉汁豐富。雲吞併韭菜餃就岩晒小朋友，細細粒但餡料豐富，幾香甜。蝦滑併墨魚滑非常新鮮，煮熟左係非常爽口彈牙。
最後要讚下個紫菜響鈴，平時食響鈴多數係齋腐皮，呢度加埋紫菜，淥三秒即食，外層吸滿番茄牛湯嘅精華，內層紫菜帶嚟淡淡嘅海洋鮮味，酥脆得嚟又有層次，真係邪惡又好食！
佐敦 11/1/2026 13:30
上次食過旺角店，今日再來佐敦店encore。
先來一大支清甜豆漿，豆味夠香，又夠凍，仲有免費任添!
今次叫左幾款唔同口味嘅生煎包，招牌原味 ($35/4隻)外層脆卜卜，非常焦香，咬開中間係鮮甜肉餡，最緊要係爆多汁，雖然係煎炸嘢，但係食完又唔會覺得好油膩! 另外仲有瀨尿蝦 ($28/2隻) 同蟹粉 ($38/2隻)。
個人就幾鍾意呢度嘅小籠包 ($40)，新鮮熱辣，一啖一粒，皮薄薄，肉餡鮮甜多汁，加少少醋已經好好味。
香煎豬排拌麵 ($45) ，份量十足，一大塊切好嘅豬扒，金黃酥脆，煎得啱啱好，咬落去少少香脆，唔會乾爭爭，調味亦都好夠，鹹香適中。拌麵係蔥油醬底，每一條麵都光澤感十足，啲蔥炸到焦黃色，非常香口。麵條係爽滑彈牙，入口充滿濃郁嘅蔥香同醬油嘅鮮甜味，簡單得嚟又好惹味。
但呢間店更加細，地方淺窄，而且食物出品無論賣相、新鮮度同味道都好似比旺角略遜。
尖沙咀 10/1/2026 13:30
近排發現重慶大樓旁邊多左一個慶芳商場地下美食街，真係搵食新去處! 食街中間就見到一架車仔麵檔，原來係一間非常港式地道嘅車仔麵店，吸引!
大大碗車仔麵份量十足，一次過滿足幾個邪惡願望。豬大腸厚度十足，滷得好入味，外皮爽脆，中間充滿油脂香，真係邪惡又好食。牛腩係半肥瘦嗰種，炆到好腍身，肉味濃郁。豬手皮爽肉滑，充滿豐富嘅骨膠原，牛筋丸都係彈牙到不得了。淮山麵煙韌幼滑，吸湯力強，每一啖麵都掛滿咗濃郁香甜嘅腩汁，超好食。
另一碗試埋雞中翼都好有驚喜，肉質嫩滑，瑞士汁甜度啱啱好﹔仲有超彈牙嘅墨魚丸、菜肉餃皮薄餡靚，鮮味十足。另碗上嘅魚皮餃，魚皮更加爽滑彈牙，魚香味十足。
招牌必食厚叉燒真係份量十足，外層燒到焦糖色，油光亮麗，仲有少少焦邊，外層嘅焦邊帶點微脆，蜜汁味香甜濃郁，內裡嘅肉質非常鬆軟，半肥瘦每一啖都充滿肉香同油香，正!
冠軍奶茶港式風味，茶底夠香，味道少甜，讚!
旺角 29/11/2025 13:30
一向都知呢間招牌生煎包人氣非常高，今日經過竟然有位，食個快Lunch。
生煎包賣相已經好吸引，底煎到金黃香脆，面頭就灑滿黑白芝麻同蔥花。一咬開，薄薄嘅脆底超香脆，入面嘅湯汁多到爆出嚟，非常燙口，味道極之鮮甜，再嚟就係充滿肉汁嘅豬肉餡，調味啱啱好，唔會太鹹，充滿肉香，加埋啲湯汁一齊食，超正! 食完一個會忍唔住即刻想食第二個!
一籠熱辣辣嘅小籠包上到枱，小籠包個個都脹卜卜，輕輕咬開一小啖，湯汁又係超熱，充滿豬肉嘅鮮味同埋高湯嘅濃郁。再加上少少薑絲同醋一齊放入口，肉餡肥瘦適中唔油膩。
雞湯小雲吞賣相簡單樸實，湯頭充滿濃郁雞味，味道鮮甜得嚟一啲都唔油膩，小雲吞皮薄餡靚，一啖一粒啱啱好。個皮煮到好滑溜，幾乎入口即化，豬肉餡調味恰到好處，鮮味十足。
最緊要就係鮮甜豆漿任飲，超滿足。
深圳新洲 12/10/2025 18:30
點評探店
封神豬扒飯﹕即係番茄焗豬扒飯，面層芝士烤得微微焦香，散發出濃郁嘅奶香味，芝士下可見鮮紅嘅番茄醬汁，仲有大大年吉列豬扒，大量雞蛋炒飯非常香口，濃郁卻不膩口，蕃茄醬汁味道恰到好處，酸酸甜甜。
豉油雞飯加荷包蛋﹕豉油雞飯經典選擇，加上一隻煎得剛剛好嘅荷包蛋，沒有太花哨嘅擺盤，豉油雞雞皮亮皮，味道唔太咸，雞肉比較實淨，還好有些雞味。要加上薑蓉就可以送飯。
腩汁生菜﹕菜都幾新鮮，腩汁味道幾香，可以送飯。
熊仔奶茶﹕可愛嘅熊仔造成奶茶，奶茶茶味濃郁，帶微微嘅苦澀，奶味平衡，甜度適中，不會過於膩口，又夠晒凍，正斗。
鮮奶紅豆冰﹕鮮奶紅豆冰賣相吸引，紅豆層層堆疊，鮮奶倒入後有漸層效果，頂部鋪滿碎冰，清涼感十足。紅豆的甜度自然，煮得軟糯卻不爛，奶味甜度適中，味道不錯。
正宗香港茶餐廳，完全係香港風味，味道真係一般般。
中航城 12/10/2025 11:00
想試呢間野妹火鍋好耐，呢度最特別係佢嘅經營模式，好似超市咁，所有食材都係一盤盤擺好晒喺凍櫃度，想食咩就自己攞。食材方面，選擇超級多，由普通嘅肥牛、豚肉、丸類、蔬菜，甚至有幾個大魚缸放左各種海鮮。除左火鍋，仲可能製成鐵板。自助區有熱茶、零食，仲有各款調味，選擇都好多。
鮮切牛肉雙人餐 168元
揀左菌湯配番茄湯底，菌湯好足料，飲得出係用咗好多唔同種類嘅菇菌去熬，味道好鮮甜清香，飲完個胃暖笠笠好舒服。番茄湯底更加係驚喜，濃郁嘅番茄味酸酸甜甜，入面仲有好多番茄蓉，超夠味。套餐包左幾款肉類，匙柄中間有一條好明顯嘅筋，切得薄薄哋，淥幾秒就食得，入口爽脆彈牙，肉味好濃。吊龍肥瘦適中，口感比較嫩滑，帶有少少油脂香。肥牛甘香又腍滑。仲有鮮蝦滑超级爽口，入面仲食到一粒粒鮮甜嘅蝦肉，真材實料。魚豆腐吸滿晒湯底精華，口感軟綿綿又帶點Q彈，非常滋味。四川苕皮原來係紅薯粉整成嘅粉皮，口感軟糯糯，索晒湯，不錯。另外仲有鐵板海鮮炒飯，上枱時熱辣辣，飯底炒得粒粒分明，乾身得嚟又唔會太硬，鑊氣十足。配料都好豐富，每一啖飯都充滿海洋咸香，份量亦好足。
另外再自費揀幾款火鍋料，其實價錢相當抵食。蔬菜麵 (5元) 三色麵條都幾特別，放入湯底煮一陣，麵條依然保持彈牙，吸收晒湯底精華，每一啖都好入味，加少少醬料超好味。香菇豬肉餃 (5元) 有六大粒，餃子皮薄餡靚，香菇味都幾濃，豬肉鮮甜。羊肉卷 (19元) 色澤紅白相間，好靚。放入滾熱嘅湯底輕輕淥幾下就食得。羊肉味好香濃，口感非常嫩滑。撒尿牛丸 (9元) 非常有彈牙，超級爽口，真係做到肉汁爆發，濃郁又鮮甜，牛味十足。
全餐夾埋都係200玩左右，又豐富又好食。
