啟德天璽天 19/4/2026 16:30
終於試左近期大熱嘅香港人的茶飲品牌! 味道不錯，值得bookmark。
龍眼桂花冰 $41﹕龍眼沙冰原汁原味，感覺非常新鮮天然，仲有清甜滑溜嘅桂花茶凍，茶味好清香，新鮮龍眼肉飽滿多汁，甜度恰到好處，清爽涼快!
抹茶鮮奶茉 $39﹕頂層芝士奶蓋口感極之綿密，味道微鹹，加上抹茶粉夠晒甘甜，飲得出的高級感。鮮奶茉茶底順滑醇厚，加入煙韌彈牙嘅黑糖珍珠，整體味道配合得相當不錯。
牛油果甘露乳酪 $46﹕牛油果乳酪保留左牛油果天然嘅順滑口感，味道濃郁豐富，配搭酸酸甜甜的乳酪、芒果、柚子肉、西米等，啖啖果肉，口感超豐富，味道微酸平衡得剛剛好。
佐敦逸東酒店 19/4/2026 14:00
佐敦逸東酒店 food court好多野食，呢間牛響度套餐好抵食，套餐包飲茶同小食/甜品，幾吸引!
炸豬扒、豬軟骨湯麵 $78﹕呢款組合真係滿足食肉獸，炸豬扒外層炸到金黃酥脆，豬軟骨煮到夠晒腍，豬軟骨湯麵湯底都幾香。
五花豚腩片、豬頸肉蔥油拌麵 $73﹕五花豚腩片肥瘦相間，豬頸煎到微微焦香。拌麵用蔥油調味，味道勁咸香，非常惹味。
套餐加$7升級冷泡茶，白桃冷泡茶茶底帶有淡淡嘅茶香，配埋白桃嘅甜香，清新又解渴。青蘋果冷泡茶就更加酸甜，茶底帶有微微嘅澀感，配埋青蘋果嘅果香，清涼！蒜泥白肉肥瘦比例啱啱好，蒜泥醬汁勁蒜，味道濃郁，鹹香加辣，個人黎講就太過刺激。和牛甜品幾特別，整成和牛造型，士多啤梨味都幾香。
沙茶鮮牛、沙茶金錢肚蔥油拌麵 $78﹕抵食套餐一碗麵、包開胃前菜同汽水! 沙茶鮮牛真係惹味到爆，牛肉肉質鮮嫩滑溜，沙茶醬濃郁甜香微辣，超惹味。金錢肚炆到入晒味，爽口又多汁。底下嘅蔥油拌麵麵條煙韌彈牙，拌勻之後每一條麵都充滿蔥油同豉油香。蔥油夠晒咸香，食到舔舔脷。隨餐送小食，麻油雲耳滿滿麻油香，口感爽脆，非常開胃。最後飲埋杯可樂就非常滿足。
牛雜淨食 $55﹕之後揀左幾款小食，街頭經典牛雜淨食，一碗有齊牛腸、牛肚、牛肺同牛膀，非常足料。每一款都處理得好乾淨，牛雜炆到軟腍入味，充滿脂香得嚟又帶點嚼勁。最正嘅仲有墊底嘅白蘿蔔，吸晒牛骨湯底精華，清甜多汁。
炸芝士熔岩蝦球 $38﹕外面金黃酥脆，入面係超級彈牙鮮甜嘅蝦膠，口感十足，最驚喜嘅係中間係半溶芝士餡，熱辣辣爆晒漿，蝦肉嘅同芝士鹹香非常夾，極邪惡超好食。
炸地瓜球 $26﹕地瓜球炸得唔錯，唔會覺得油膩，外層酥脆，中間係煙韌Q彈嘅麻糬口感，紫心地瓜甜度啱啱好。
大埔昌運中心 18/4/2026 17:00
超鍾意呢間大埔外賣糖水，價錢唔貴，勁足料，有驚喜。街坊小店值得支持。
芒果西米桃膠芋圓 $38:芒果肉俾得毫不吝嗇，大大粒又極之鮮甜多汁，西米晶瑩剔透，桃膠滑溜溜，三色手工芋圓煙韌彈牙，芋頭、地瓜香味濃郁。椰奶底香濃，甜度啱啱好，清爽解膩，超正!
綜合芋圓燒仙草 $42:碗底係滑溜溜嘅燒仙草，有淡淡嘅草本甘香，透心涼。配料超豐富，除咗有三色芋圓之外，仲有綿密嘅紅豆同微甜嘅珍珠。紅豆煮得夠腍又起沙，勁足料!
煎餃雙併 $40:一盒有齊粟米煎餃同韭菜煎餃，賣相飽滿，餃子皮炸到酥脆，餡料都幾豐富，鮮甜嘅粟米加豬肉。韭菜香氣濃郁，仲有肉汁，完全唔會覺得乾。
台式椒鹽甜不辣 $20: 煙韌鹹香：甜不辣條外層炸得微脆，入面煙韌彈牙，魚漿有淡淡鮮甜味，再撒滿台式椒鹽粉，鹹香微辛好惹味。
長沙灣 11/4/2026 14:00
鹵水乳鴿 $48﹕乳鴿油亮，鴿肉啖啖肉，肉質都幾滑溜，肉汁豐富。鹵水鹹香鮮甜，夠晒入味。
沙拉骨 $88﹕份量多，大大件豬扒掛滿濃郁嘅沙拉醬。豬扒微微酥脆，軟腍多汁。沙拉醬酸酸甜甜，大人細路都鍾意。
白鱔煲仔飯 $88﹕原煲即煮熱辣辣上枱嘅，一打開個砂鍋蓋，滿滿飯香同豉汁白鱔香氣。厚切白鱔鋪滿飯面，淋上甜豉油，賣相極吸引。魚肉厚身爽口彈牙，魚油豐富。最精彩嘅部分當然係底層極度香脆嘅金黃飯焦，咬落去索索聲，充滿濃烈嘅焦香，豉油撈飯，超正!
送贈是日靚湯，菜乾豬骨湯夠晒足料! 大牌檔風味。長沙灣市政街市樓上，舊街市無冷氣，天熱都有啲辛苦，衛生情況還好。
深圳皇廷廣場 29/3/2026 11:00
食一餐午餐嘅價錢可以無限自助的確爽快。自助餐最緊要係選擇夠多，呢度嘅肉類區、海鮮款都多，可惜肉款多數原味，醃肉味道亦唔算濃，口感一般。扇貝同青口算最好食，起碼鮮甜，蒜蓉辣油落得夠多，味道不錯。
除咗自己動手燒肉，熟食區款式仲多。各式炸物新鮮熱辣，炸鮮奶最好食，薯條夠脆。蛋撻香脆鬆化，蛋味香濃，好過香港好多餅店。熱盆仲有熱腸、菠蘿炒飯算非常不錯。各款甜品有自助冰粉、小蛋糕、布甸等。無限任飲嘅特飲最驚喜係有伯牙絕弦，冰涼透心，奶味香濃，或者不同款枝裝飲品。最後伊利雪糕無限添，味道還好。呢間店明顯燒烤料一般，熱盆更出色。點評做優惠，成人只需要69.9元，兒童39.9元，性價OK。暗地裡無限時食足兩個鐘呢個係幾開心。
黃埔 22/3/2026 12:00
以往都幾鍾意呢間牛骨湯麵，原來出左套餐，一款麵+小食+飲品，非常抵食!
牛筋牛腩肥牛手工麵 $78﹕餸料勁多，牛筋炆到極之軟腍入味，入口即化，充滿骨膠原。牛腩大大件，啖啖肉，肥牛肥瘦適中，煮得入味。最抵讚係佢哋個牛骨湯底，清澈，入口醇厚鮮甜，飲完都唔會覺得口渴。手工麵煙韌彈牙，又掛湯。
牛舌、炸雞扒手工麵 $72﹕份量十足，厚切
牛舌軟嫩得嚟又帶點爽脆，即炸嘅雞扒炸到金黃酥脆，肉質嫩滑多汁。
小食揀左A5和牛慕絲甜品，賣相超得意，神級還原，紅白相間嘅雪花紋理極之逼真，望落完全係一塊頂級嘅生和牛，打卡一流。原來係士多啤梨慕絲，質地輕盈，入口即化，味道都相當濃郁，甜度啱啱好。
粟米豬肉小雲吞 $48，細細粒，皮薄料多，粟米超甜，小朋友最鍾意。
