土瓜灣 31/8/2026 17:00
今日嚟到土瓜灣天光道嘅「魚旦佬」掃街嘆下午茶小食。
日式餃子 $20﹕呢份日式餃子炸到外皮金黃脆卜卜，咬開入面包滿豬肉碎同爽脆蔬菜餡料，肉質緊緻多汁，肉香與菜甜味交織得剛剛好。沾少少餃子醋一齊食，微酸提鮮又解膩，熱辣辣食落相當惹味可口。
魚蓉燒賣併招牌白魚蛋 $21﹕街頭經典嘅魚蓉燒賣蒸得熱氣騰騰，黃色嘅外皮薄滑軟熟。入面嘅魚蓉肉餡扎實彈牙，帶有淡淡嘅魚香，完全唔會粉感過重。淋上靈魂甜豉油，係百食不厭嘅港式掃街小食。魚蛋粒粒雪白圓潤，煮得熱辣燙口。一啖咬落去爽口彈牙，齒頰留香，食得出鮮甜嘅魚肉鮮味，完全無腥味亦唔會過鹹。簡單淋上少許豉油或者原汁原味品嚐，都食到魚蛋最純正純粹嘅鮮味。
雙拼丸 $22﹕呢碗雙拼丸一次過滿足兩個願望。墨魚丸外表油亮飽滿，入口彈牙爽脆，牛丸肉質緊密有嚼勁，咬落去帶有豐富肉汁與濃郁肉香。
台式腸 $8﹕香腸烤得外皮油光鋥亮，腸衣薄脆微繃，咬落去「啪」一聲爆汁。內裏嘅豬肉肥瘦適中，肉質扎實且帶有地道台式風味嘅清甜與淡淡五香香氣。微甜鹹香，香口惹味。
馬鞍山 30/8/2026 17:00
「阿月渾子」列日窩夫 $88﹕呢款開心果窩夫賣相極吸睛，窩夫即叫即烘，外層金黃酥脆，內裏綿密鬆軟且蛋香四溢。面頭淋上濃郁細滑嘅特調開心果醬，再灑上滿滿嘅香脆開心果碎粒，堅果風味醇厚得嚟唔會過於甜膩。配埋冰凍香滑嘅草莓雪糕一齊食，一冷一熱，奶油清爽空氣感十足，味道不錯。
玉桂蘋果金寶 $68﹕呢道經典嘅玉桂蘋果金寶充滿溫暖嘅烘焙香氣。蘋果粒切得大細適中，用玉桂粉同焦糖慢火煨煮至軟糯入味，散發出肉桂獨特嘅香氣。頂層鋪滿烤得金黃酥脆嘅金寶碎屑，咬落香脆有牛油香，甜酸平衡得剛剛好。上面仲有一球香滑嘅牛奶雪糕，賣相非常精緻，份量略嫌細小，唔夠喉。
黑糖金時。白玉 $68﹕賣相極具和風美感。底層係圓潤雪白嘅手作白玉小丸子，口感極之煙韌軟糯、嚼勁十足，熱辣辣，加上香甜甘醇嘅黑糖汁，同埋黃豆粉，味道不錯。紅豆大大粒，綿密起沙，顆粒分明，食得出係靚野。面頭灑上玉米片，加一點脆口，配合不錯。
薑湯紫薯。雙圓 $48﹕呢碗中式糖水暖胃又養生。薑湯底色澤清亮，辛辣感溫和順喉。入面加入咗軟糯香甜嘅紫薯塊同黃番薯，口感綿密；雙圓（芋圓與地瓜圓）煮得晶瑩剔透、彈牙煙韌。成碗糖水材料豐富、甜度適中，飲落成個人都暖笠笠。
食足四個甜品，全單$272。環境不錯，味道不錯，單價略貴，份量太精緻，難怪人流咁少。可惜。
慈雲山 16/8/2026 11:00
今日午餐嚟到鑽石山富苑金閣飲茶，招牌點心水準不俗：鮮蝦餃賣相勁靚，晶凝通透，皮薄餡料足，蝦肉爽彈鮮甜，好食到要叫多一籠。蟹籽燒賣皇肉質扎實，材料豐富又多汁。醬汁蒸鳳爪炆得軟爛惹味；排骨啖啖肉，蒜香味道足；菜苗餃、潮州粉果，餡料豐富；春卷炸得金黃香脆；金錢肚爽口彈牙，微辣惹味。
每款點心定時出爐，熱辣辣上枱，用料實在且份量足，傳統老字號酒樓，點心師傅經驗十足，絕對係高性價比嘅飲茶之選。全單$500有找，飽到上天花板。
何文田 15/8/2026 12:30
合桃酥 $7.5: 合桃酥外形金黃飽滿，表面帶有香脆嘅合桃碎，濃郁嘅牛油同堅果香氣。口感極之鬆化酥脆，甜度亦控制得啱啱好。
豆沙酥 $7.5: 經典唐餅，外皮焗到層次分明、酥香鬆化。入面包裹住厚實細滑嘅紅豆豆沙餡，口感綿密且甜而不膩。
朱古力蛋糕 $24: 蛋糕質地濃郁扎實，蛋糕體濕潤綿密，每一啖都食到濃郁嘅朱古力甜香，仲有勁多朱古力粒粒，朱古力控大愛。
紅豆糯米糍 $6: 糯米糍外層沾滿咗雪白嘅香甜椰絲，增添咗獨特嘅熱帶風情。煙韌軟糯嘅糯米皮包裹住香滑嘅紅豆餡，清甜綿密。
花生糯米糍 $6: 花生糯米糍外皮煙韌彈牙，口感軟糯適中。入面填滿咗香氣四溢嘅碎花生同糖粉混合餡料，多到爆餡，滋味無窮。
剛好全單$100，抵食。
灣仔外賣 14/8/2026 18:00
初戀叉燒半斤 $80: 半肥瘦賣相非常靚，肥瘦相間嘅肉質比例完美，油脂分明。叉燒表面燒到帶有微燶嘅焦香，咬落去肉質極之軟稔肉汁豐富，叉燒頭蜜味十足。超正。
松茸燒鵝叉燒雙拼撈粗麵 $72: 松茸燒鵝皮脆卜卜，肉質嫩滑，咬落去油脂四溢，勁多汁。配埋招牌叉燒，啖啖肉極之滿足。撈粗麵質地煙韌彈牙，索晒惹味嘅醬油同鵝油精華。
燒鵝五寶飯 $80: 五寶飯足料到令人驚嘆，一次過滿足晒所有願望。入面有齊皮脆肉嫩嘅燒鵝、肉汁豐富嘅叉燒、外皮極度香脆咸香嘅燒腩仔、經典嘅紅腸同埋咸香惹味嘅鹹蛋，真係大滿足。
可樂 $6
全單$240，份量多，食物質素勁高質，下次一定再試！
九龍灣 7/8/2026 20:00
今日晚餐雞駅食花膠雞。
姫松茸竹笙花膠雞髀上海麵 $93﹕勁足料，份量十足。湯底充滿濃郁嘅雞香，飲落鮮甜滋潤。姫松茸同竹笙吸滿晒湯汁精華，花膠口感軟滑彈牙。雞髀大大件啖啖肉，肉質軟嫩，上海麵煙韌彈牙，索晒湯汁，滋補又滿足。
麻藥蛋 $28﹕最愛必點，蛋白滑溜，蛋黃半熟。浸透咗惹味嘅醬油、蒜香、芝麻味勁香，送麵食一流。
蜜糖雞翼 $42﹕金黃脆卜卜，淋左甜甜嘅蜜糖，雞翼肉質鮮嫩多汁，外脆內軟，蜜糖又香甜惹味。
黑松露醬薯條 $32﹕幼身炸得夠脆，黑松露醬味道香，酸甜開胃，勁正。
熱檸檬茶 $4
全單$199
