佐敦 1/8/2026 13:30
黎開佐敦，喺白加士街發現呢間霜月居酒屋，午市定食價格非常親民，環境不錯，充滿地道日式風情嘅小店。
原條燒鰻魚丼 $88﹕份量真夠震撼，成條長身嘅蒲燒鰻魚舖喺飯面，視覺效果滿分！鰻魚燒到外皮微脆、肉質軟糯，有豐富嘅魚脂香氣，冇腥味，但略嫌不夠肥美。蒲燒汁味道香甜，表面再加左山椒粉同芝麻，香氣滿滿。醬油滲晒落白飯，都算不錯。
特上壽司定食配手卷 $108﹕十件不同款式嘅壽司配上手卷，夠晒豪華，賣相靚，絕對係刺身愛好者嘅最喜。入面有齊肥美嘅三文魚、油潤即化嘅吞拿魚腩、爽口清甜嘅魷魚、鮮甜軟糯嘅甜蝦、三文魚籽軍艦夠晒咸香，仲有甜甜嘅玉子等，款款都極之新鮮。師傅手勢一流，飯糰大小適中，醋飯酸甜度適中，一啖一件真係超正。手卷餡料夠多，份量十足嘅三文魚同吞拿魚，魚肉鮮甜幼滑。芥辣應該係新鮮即磨，辣味適中。
全單$196，跟餐包埋麵豉湯好足料，有肥美香甜嘅蜆仔、海帶等。麵豉味道香，但唔算太咸，非常不錯。
銅鑼灣 27/7/2026 16:30
炒海帶絲 $40﹕非常地道嘅韓式開胃小菜，海帶絲軟硬適中，口感爽脆，調味啱啱好，加入咗麻油同白芝麻去提香，鹹香之中帶有淡淡嘅清甜，唔會油膩。
吞拿魚紫菜飯卷 $53﹕紫菜包住粒粒分明，軟糯適中嘅珍珠米，有唔同顏色嘅配料，賣相不錯。吞拿魚沙律落得夠慷慨，每一啖都食到滿滿嘅吞拿魚肉，口感綿密且濕潤，仲有雞蛋、青瓜絲同黃醃蘿蔔等爽脆配料，中和咗沙律醬嘅濃郁，層次分明、清新唔膩，份量唔少，真係性價比極高嘅飽肚之選！
韓式炸醬麵 $68﹕黑豆醬濃稠度剛剛好，帶有獨特嘅焦香同微微嘅洋蔥清甜，入面仲有豐富嘅豬肉碎同薯仔粒，口感豐富。麵條煙韌彈牙，撈勻之後每條麵完美掛滿醬汁，原咗韓式地道風味！
韓式芝士炸雞 $88﹕一大盒無骨炸雞啖啖肉，外層炸到金黃香脆，肉質依然保持到鮮嫩多汁，面頭鋪滿咗濃郁芝士粉，味道香甜惹味。
全單$249，出品不錯，份量比想像中多，值得再去。
深圳萬象食家 21/6/2026 17:00
新開紫菜包飯品牌，都係新鮮即製，賣相OK，味道正常。
醬多多紫菜包飯 16元﹕醬多多紫菜包飯名副其實，醬汁同餡料份量極之豪氣。外層嘅紫菜散發住淡淡嘅麻油清香，米飯粒粒分明且緊實軟糯。入面捲滿爽脆嘅黃蘿蔔、蛋皮、蟹柳等多款配料，最亮眼嘅係淋滿咗特調嘅濃郁沙律醬汁。一啖咬落去，脆嫩蔬菜與爆漿醬汁瞬間融合，口感濕潤順滑、層次豐富，完全唔會覺得乾哽，食落滋味十足。
濃情芝士紫菜包飯 18元﹕厚厚嘅芝士片與豐富配料緊緊包裹喺紫菜飯卷之中。芝士嘅鹹香奶味濃郁醇厚，喺微溫嘅米飯烘托下微微融化，質地綿密細滑。配搭爽口解膩嘅醃蘿蔔同煎蛋絲，芝士嘅濃郁與蔬菜嘅清爽形成強烈平衡，鹹甜香濃交織。
打卡點評送泡菜年糕，年糕條煮得軟糯透心、彈牙有嚼勁，完全吸飽咗韓式辣醬嘅濃稠精華；配埋自然發酵、酸香脆爽嘅泡菜一齊炒，酸、辣、甜三重滋味。
馬鞍山 19/4/2026 19:00
外賣平台自取仲平過門市買。連埋平台優惠，全單$152。
黑蒜油叉燒拉麵 $32﹕陣陣黑蒜油嘅焦香撲鼻而來，湯底飲落非常濃郁，豬骨湯鮮甜加上黑蒜油嘅香。麵條彈牙，掛滿晒黑蒜油湯汁，叉燒肥瘦比例均勻，但肉質有點韌。溏心蛋夠溏心。呢個價錢絕對可以。
火炙壽司拼盤 $132﹕一碟有齊六款，賣相已經超級吸引。火炙多一份焦香味。蒜蓉牛油帶子鮮甜，表面微微燒過，做到外香內軟；芝士熟蝦壽司食落非常爽脆﹔三文魚有兩款，芝士三文魚腩入口即化，芝士嘅鹹香同魚油融為一體，口感極之順滑。另一款七味三文魚中腩加左香濃燒汁，更惹味。鰻魚肉質鬆軟，配埋香甜嘅蒲燒醬汁，仲有芝士。蟹子沙律玉子燒﹕甜甜地嘅玉子燒配上卜卜脆嘅蟹子。整體感覺不錯。
深圳中航城 4/1/2026 12:00
呢度主打韓式烤肉放題，食材選擇極之豐富，好滿足。肉類選擇多，五花肉、秘製肥牛、厚切五花肉放上高溫烤盤，發出誘人嘅滋滋聲響。燒到外層金黃焦脆，逼出多餘油脂，咬落去油香四溢，口感爽脆彈牙。肉類都醃得極入味，韓式微甜醬香，肉質軟腍多汁﹔仲有幾款海鮮類。
除咗高質烤肉，自助吧仲有好多款熟食、涼拌菜、壽司賣相都唔錯。最緊要係甜品、雪糕、飲品都係任食。
食物選擇多，都算幾新鮮，味道還好。以成人99元一位當食餐午餐係非常滿足。
深水埗 11/10/2025 14:00
今日來到西九中心美食廣場，呢間Pizza店選擇非常多。
千島海鮮韓式pizza $79: 新鮮即焗，賣相吸引，整個餅面有好多魷魚、蟹柳絲、蜆肉等等，再加上大量芝士，顏色配搭豐富。餅底厚薄適中幾鬆軟，千島醬嘅味道非常突出，甜中帶酸，好開胃，芝士份量夠慷慨做到拉絲效果。
卡邦尼炒年糕公仔麵 $69: 勁多奶油超忌廉咪，芝士奶香味濃郁，口感順滑，煙肉鹹香，洋蔥超甜。韓式年糕煙韌軟糯，富有嚼勁，公仔麵就夠索晒汁 好飽肚。
原味飯卷 $50: 紫菜鹹香，脆卜卜，材料都好豐富，有蟹柳，紅蘿蔔，青瓜，魚片等，好有韓式風味。
食物係不錯，但係西九龍中心美食廣場實在太多人，座位真係麻麻哋。
