觀塘 2/5/2026 14:00
觀塘日月堂主打地道台式風味，食物選擇多，份量亦夠實在，性價比高。
牛三寶冬粉 $90：牛筋、牛腱肉同牛肋條份量十足，清燉湯底原汁原味，牛筋軟腍帶點膠質感，牛腱、牛肋條肥瘦適中，有肉香。冬粉吸滿湯汁，非常滑溜。
炸排骨便當 $65:排骨炸得金黃香脆，外層薄薄一層脆漿，唔會太乾。配上香濃肉燥飯，鹹香突出，醬汁拌飯特別開胃。
台灣香腸$40外皮煎到微脆，入面肉質紮實，帶少少甜味，愈食愈惹味。花枝丸$38炸得香口，入口非常彈牙爽口，仲食到粒粒花枝肉。
最後的黑糖珍珠奶茶$34為整餐作結。奶茶茶味夠，不會只得甜味，黑糖香氣自然。珍珠煙韌有嚼勁，甜度平衡，飲落順口。
尖沙咀 25/4/2026 14:00
嚟到尖沙咀旺角街食地道韓國菜。
海鮮流心小丸子 $238: 製作過程趣味十足，DIY，將芝士倒入炒飯中攪拌均勻，放入小丸子機，再加入牛奶蛋漿煎熟。每粒小丸子都圓轆轆，非常成功!估唔到份量咁多，整左三大底，飽晒! 小丸子外層金黃微脆，內裡係滿滿嘅芝士同海鮮炒飯，炒飯咸香微辣，加上濃郁嘅芝士同紫菜，味道非常夾。好玩又好食!
炸雞柳配沙律 $160: 份量超大，炸雞外皮炸到金黃酥脆，入面嘅雞肉仲鮮嫩多汁，而且啖啖肉，簡單加上酸甜蛋黃醬，已經非常惹味。食完邪惡嘅炸雞再食埋清新解膩嘅沙律，沙律菜超級新鮮爽脆，配搭埋微酸嘅柚子沙律汁，仲有酸甜爽脆嘅蘿蔔，入口極之清新。
太子 24/4/2026 18:00
鍾意掃街搵食，試左幾款人氣招牌美食。
招牌酸辣粉配咖哩魚蛋﹕香氣已經令人食指大，紅薯粉吸滿精華湯汁，入口微辣帶酸。分量足料，大量肉碎、花生、青蔥、炸菜等，加入彈牙咖哩魚蛋，正!
最佳搭配就係大腸豬紅蘿蔔韭菜﹕重口味之選，酸辣湯底好香。大腸白白滑滑，爽口彈牙。豬紅切得厚身且分量十足，質感滑溜。大大件白蘿蔔吸收了辣汁精華。
碗仔翅﹕湯底極之濃稠，食到豐富嘅木耳絲、筍絲、蛋絲同粉絲。加入幾滴麻油、胡椒粉同醋，就係港式風味。
腸粉燒賣魚蛋三併﹕白滑的腸粉充滿米香，皮薄餡靚﹔魚蛋粒粒彈﹔燒賣魚香味濃，最緊要係超充足嘅甜豉油同甜醬，仲有芝麻，勁香。
旺角 24/4/2026 17:30
試左幾款產品，仲有新出品，每一款都充滿驚喜。
紅棗貝果$28 口感極之煙韌，麵團揉合紅棗嘅清甜，淡淡棗香，仲有好棗肉，味道微甜，夠健康。
醇滑芝士撻$24 有金黃色酥皮，十級酥脆，充滿濃郁牛油香。芝士餡爆晒漿!
開心果酥皮窩夫 $34 極香脆， 中間係開心果醬同碎粒，堅果味勁香。
開心果牛角酥 $32 外皮酥香，面頭係開心果脆皮，牛角酥好鬆化。
旺角新出聯乘再睡5分鐘，四季桃氣迷你菠蘿包幾吸引，下次試試。
新蒲崗 19/4/2026 17:30
芝士雪花韓式炸雞：外賣自取，拎到返屋企仲熱辣辣。一份炸雞份量唔少，面頭鋪滿厚厚一層好似雪花咁嘅芝士粉，賣相已經贏晒。炸雞外皮炸得極之酥脆，雞肉依然保持到鮮嫩多汁，啖啖肉。芝士雪花粉味道鹹鹹甜甜，奶香同芝士味超級濃郁。炸雞仲有幾件炸韓式年糕，炸到外層微脆，咬落去極之煙韌軟糯，米香味濃。
炸紅豆鮮奶條：炸到金黃香脆熱辣辣，外層嘅炸漿薄薄地，咬開中間係軟軟半溶狀態嘅鮮奶凍，鮮奶餡超級軟滑，奶味極之香濃，仲夾雜住幾粒甜甜地嘅紅豆，有驚喜。外層脆卜卜，內裡滑溜溜，非常好食。
大角咀 21/3/2026 15:00
發現外賣韓式炸雞專門店
雞皮炸到金黃酥脆，炸粉唔算厚，入面嘅雞肉依然保持嫩滑多汁。我哋揀咗極受歡迎嘅「香蒜醬油」同埋「蜜糖芥末醬」雙拼口味。香蒜醬油咸香帶點微甜，加上濃郁嘅蒜香。而蜜糖芥末醬就充滿驚喜，蜜糖嘅香甜中帶住微微嘅芥末辛香，極之開胃。
每份炸雞仲有幾件炸韓式年糕，炸到外層微脆，咬落去極之煙韌軟糯，米香味濃。年糕表面沾滿惹味嘅醬汁，配埋熱辣辣嘅炸雞一齊食，外脆內軟嘅口感對比極之強烈，味道不錯。
跟埋飲品 $108
佐敦逸東酒店 19/4/2026 14:00
佐敦逸東酒店 food court好多野食，呢間牛響度套餐好抵食，套餐包飲茶同小食/甜品，幾吸引!
炸豬扒、豬軟骨湯麵 $78﹕呢款組合真係滿足食肉獸，炸豬扒外層炸到金黃酥脆，豬軟骨煮到夠晒腍，豬軟骨湯麵湯底都幾香。
五花豚腩片、豬頸肉蔥油拌麵 $73﹕五花豚腩片肥瘦相間，豬頸煎到微微焦香。拌麵用蔥油調味，味道勁咸香，非常惹味。
套餐加$7升級冷泡茶，白桃冷泡茶茶底帶有淡淡嘅茶香，配埋白桃嘅甜香，清新又解渴。青蘋果冷泡茶就更加酸甜，茶底帶有微微嘅澀感，配埋青蘋果嘅果香，清涼！蒜泥白肉肥瘦比例啱啱好，蒜泥醬汁勁蒜，味道濃郁，鹹香加辣，個人黎講就太過刺激。和牛甜品幾特別，整成和牛造型，士多啤梨味都幾香。
沙茶鮮牛、沙茶金錢肚蔥油拌麵 $78﹕抵食套餐一碗麵、包開胃前菜同汽水! 沙茶鮮牛真係惹味到爆，牛肉肉質鮮嫩滑溜，沙茶醬濃郁甜香微辣，超惹味。金錢肚炆到入晒味，爽口又多汁。底下嘅蔥油拌麵麵條煙韌彈牙，拌勻之後每一條麵都充滿蔥油同豉油香。蔥油夠晒咸香，食到舔舔脷。隨餐送小食，麻油雲耳滿滿麻油香，口感爽脆，非常開胃。最後飲埋杯可樂就非常滿足。
牛雜淨食 $55﹕之後揀左幾款小食，街頭經典牛雜淨食，一碗有齊牛腸、牛肚、牛肺同牛膀，非常足料。每一款都處理得好乾淨，牛雜炆到軟腍入味，充滿脂香得嚟又帶點嚼勁。最正嘅仲有墊底嘅白蘿蔔，吸晒牛骨湯底精華，清甜多汁。
炸芝士熔岩蝦球 $38﹕外面金黃酥脆，入面係超級彈牙鮮甜嘅蝦膠，口感十足，最驚喜嘅係中間係半溶芝士餡，熱辣辣爆晒漿，蝦肉嘅同芝士鹹香非常夾，極邪惡超好食。
炸地瓜球 $26﹕地瓜球炸得唔錯，唔會覺得油膩，外層酥脆，中間係煙韌Q彈嘅麻糬口感，紫心地瓜甜度啱啱好。
