太子 22/8/2026 13:30
稀有澳洲『全血』和牛 Blackmore M9+: 呢款頂級稀有嘅澳洲全血 Blackmore M9+ 和牛油花分佈極之細密均勻，呈現出大理石般嘅漂亮紋理。放落壽喜燒汁輕輕灼幾秒，肉片吸收咗微甜醇厚嘅醬汁精華，滿口都係濃郁嘅牛油脂香同甘甜肉味，肉味香濃，肉質厚實。
黑安格斯牛小排：今次特意將野菜拼盤轉成牛小排，滿足感即刻倍增。黑安格斯牛小排肉質軟滑，油脂更加豐富，經過壽喜燒汁烹煮後，肉質軟嫩，吸晒醬汁的香甜。沾上生日本蛋液，味道更加柔和。
追加嘅日本葛絲絕對係壽喜燒嘅靈魂配角。葛絲晶瑩剔透，煮熟後質地滑溜且極具彈性，最重要係能夠完完全全吸飽鍋入面濃郁嘅和牛油脂與壽喜燒甜醬油精華，滑溜又入味。
無加一，全單剛好$500，高級享受。
羅湖Space 1234 2/8/2026 11:00
橙V套餐 134元。
六珍冠菌豬肚雞火鍋真係滋補又惹味！湯底用咗六種珍貴菌菇同豬肚、雞肉慢火熬煮，金黃濃厚嘅湯頭充滿菌香同濃郁肉味，飲落暖笠笠又鮮甜。爽脆嘅豬肚同鮮嫩嘅雞肉份量十足。雞肉肥美爽口，肉質鮮甜，非常新鮮。百豬肚爽口，但味道唔濃。再配埋油花均勻嘅靚肥牛、索晒湯精華嘅腐竹，以及清甜嘅生菜，成個火鍋配搭豐富又滿足。經理送嘅手打牛肉丸彈牙勁爆汁，可惜牛味唔夠濃郁。自助醬料吧最好味嘅係香甜沙茶醬，同埋鹹香嘅蒜蓉。
荔浦芋頭粉糯綿密，入口即化，芋香濃郁。表面淋上咗清甜嘅桂花蜜糖漿，甜而不膩。
油潤透亮嘅臘腸同臘肉鋪係飯面，臘腸香甜，臘肉咸香，肉汁滲入白飯入面。黃金飯焦烘到香脆金黃，淋上特製甜豉油撈埋一齊食，惹味又暖胃。
打卡送多兩支可樂，非常滿足。
南山益田假日廣場 19/7/2026 12:00
熊貓煲作為慶祝生日嘅聚餐地點絕對充滿驚喜與歡樂氣氛。公主生日，首選呢間。1元生日套餐，包括生日長壽麵、和牛生日蛋糕，最緊要就係有生日禮物包括熊貓公仔一隻，小朋友最鍾意。
熊貓煲肉肉滿足雙人餐216元
經典三味熊貓鍋一次過滿足三個願望，牛油鍋底香辣濃郁、豚骨湯底醇厚鮮美、手搗鮮番茄湯底酸甜開胃，三種風味互相配搭，用黎烚咩配料都咁惹味。甄奢七鑽原切牛肉肉質極佳，紋理清晰且牛肉味濃郁；甄選品質肥牛油脂分佈均勻，入口軟嫩；精品五花肉油香四溢；內蒙古品質羊肉毫無羶味，啖啖肉香；貢菜鮮肉滑口感爽脆彈牙，層次豐富。仲有幾款蔬菜，扯面煙韌彈牙，掛汁力極強；茴香小油條炸得香酥可口，索盡湯汁後風味獨特。
牛筋丸 35.9元﹕粒粒手打製作，質感極之扎實彈牙。一咬落去肉汁爆發，彈牙多汁。
鵪鶉蛋12.9元﹕細細粒，吸滿湯汁，小朋友最愛。
油條糍粑 15.9元﹕外層炸至金黃酥脆，咬落去外脆內軟。油條嘅香脆包裹住煙韌軟糯嘅糍粑內餡，甜美香口又邪惡。
店內提供多款自助醬料DIY，首推沙茶醬，芝麻醬，自助吧仲有雪耳糖水夠晒滋潤。
深圳溫德姆至尊酒店 12/7/2026 12:00
之前食過V酒店相當不錯，團隊搬左去崗廈深圳溫德姆至尊酒店。食物款式都幾多，刺身油脂分佈均勻，非常鮮味肥美，有驚喜。熟食有各位燒炸都相當不錯。惹味嘅蒜蓉焗生蠔香氣撲鼻，鐵板燒區嘅牛扒、羊扒煎得肉汁豐富。
自助吧枱有唔同海鮮，可以自己撈起煮火鍋。蜆仔肉質爽彈且充滿鮮味。
多款造型精美嘅手工蛋糕、慕絲同雪糕，甜品控絕對大滿足。款款賣相都好靚，蛋糕味道都不錯。
整體菜品選擇豐富、海鮮新鮮度十足，環境高檔舒適，服務周到。
深圳福民站 1/7/2026 18:00
點評搶到潮汕牛火鍋雙人餐只需74元，真係超抵。
招牌清湯牛骨鍋，清澈見底但充滿濃郁嘅牛骨香氣，飲落鮮甜而不味精。
套餐包括三款牛肉。吊龍伴油脂分佈均勻，肉質軟滑細緻，入口即化且牛味濃郁；嫰肉筋道十足，切成薄片後只需輕輕灼幾秒，口感爽脆彈牙又帶有獨特嘅嚼勁。肥牛則油脂豐富，又腍滑。呢度嘅秘製沙茶醬質地濃郁稠密，帶蒜香與甘甜，味道不錯。
手工牛肉丸質地極之扎實彈牙，一咬落去肉汁即刻喺口入面爆開，口感彈得嚟又充滿濃郁嘅牛肉香氣，彈牙多汁。蘿蔔牛腩煮得入味，但略嫌太實。
深圳皇廷廣場 10/5/2026 18:00
橙V尊享優惠價 98元套餐，抵到爛。
基本四款菇菌配上雞湯火鍋，湯色金黃油亮，加入菇菌熬煮後，非常香濃醇厚，鮮甜十足，菇味同雞味都好突出，鹹鮮清潤，暖笠笠，真係超鍾意呢個湯。套餐包吊龍，油花均勻分佈，肉質唔算特別鮮嫩，味道還好。三色麵絲夠特別，口感幼滑彈牙，仲有新鮮時蔬。酥炸肉香脆可口，外脆內軟。打卡送鮮花餅，外皮酥化，中間花味香甜，不錯。
