炸雞扒由台灣飛到黎香港，過江龍紅唔紅得起，就要睇下佢道行夠唔夠高。北海道脆皮雞排並唔係來自北海道，同豪大大一樣，籍貫台灣，唔好扮日本人。

脆皮G脾排 ($24)
可能貪得意叫做G脾排，G排都係即叫即炸，客人可隨意自選味粉。我地貪心啲揀左海苔味、蒜味同起司粉。

件頭幾大，切開一塊塊都感覺到份量十足。係超級咁脆皮，漿粉較厚，食到脆皮嘅蛋漿味，而表層仲佈滿左味粉。雞扒只係夠厚身可取，食落唔夠嫰滑，肉汁一般，比較乾，而且冇乜肉味。要連皮食，藉住脆皮嘅味粉先可以吊番起個味。好彩我地夠貪心，一次過落左三種味粉。

整體黎講，味道一般。首次覺得食炸雞扒，個脆皮仲好食過件雞扒。而脆皮同雞肉係若即若離，程度介乎想分手又唔捨得之間。一邊食，個皮就一邊跌。食到尾段，大家都係覺得唔夾，決定左分開，最後變左甩皮雞。突然諗番起，麥太嘅紙包雞，我覺得呢件野似皮包雞皮包雞，但佢最後係會甩皮嘅。