福岡另一樣著名料理就係牛腸鍋，牛腸鍋係用湯頭燉煮牛腸、高麗菜、韭菜等蔬菜，加入辣椒、大蒜提味嘅重口味鍋，湯頭多用上麵豉或鹽味。就咁一個火鍋本來無乜興趣，但試過就真係好驚喜，係全個旅程最深刻嘅一餐。

黎到博多駅，直上AMU Plaza，九至十樓係美食廣場，每層都有好多家出名嘅料理。上到黎十樓，喺盡頭就見到笑樂。笑樂係福岡牛腸鍋名店，Tabelog 有3.56分，係旅人黎到九州必食之選，唔怪得有咁多人排隊。

入場後安排左面壁位，再睇睇有咩食。首先一定要點牛腸鍋，一人前¥1180，最少兩人起鍋，湯底可以選擇味噌、鹽、醬油。試得最地道嘅，當然要揀味噌湯啦。就先叫一份，再睇下加啲咩配料。鍋好快就送到，見到下面有好多菜，上面有好多韭菜，賣相仍然未有衝擊力。服務員幫我地開左爐後，話由佢慢煮十分鐘先食。

時間差不多到，服務員將所有材料撈埋，終於見到啡黃嘅味噌湯底。味噌嘅香味開始湧上，湯底煮到出氣泡，成件事開始吸引。菜都煮到腍晒，可以開餐。湯底的確正，味噌勁香，好濃郁，鹽甜度調中，加左少許辣椒，令湯底更加惹味。鍋內有大量椰菜，菜煮到腍晒，菜本身好甜，仲吸收晒味噌嘅香味，更加好味。日本嘅韭菜又正，草青味唔重，仲好甜，撈埋味噌又係一流。主角牛腸都俾得好足，份量唔少。牛腸有一層腸皮包住白雪雪嘅脂肪，本來睇見好似好油膩，但食落真係上癮。牛腸味道好腥，牛味勁重，完全無腥臭。腸皮煙韌，脂肪入口即溶，仲好有油香甜味，吸晒味噌汁真係好正，無估到咁正。除左牛腸外，仲有其他牛雜，一樣好味。

食到水尾，發覺湯底越煮越濃，就學下大家，追加一份椰菜(¥300)同長棒麵(¥300)，掃盡每一啖湯。生麵喺濃郁嘅湯內煮成熟，吸盡湯底精華，有乜辦法唔好食。麵條本身帶甜味，質地煙韌，認真唔錯。食到最後，湯真係所剩無幾。埋單今餐¥2960，二百零港幣食得飽飽，仲要咁好味，真係正。無估到牛腸鍋可以咁好食，真係九州必食之選。